Maeke Kia he Ha Tagata Ke Hiki Moli e Lalolagi?

“Talahau pihia e tau tagata nonofogati ki a tautolu, mua atu, kua manako a lautolu ke he mafola mo e haohao mitaki—mo e puhala ke fakamitaki aki e tau momoui ha lautolu. Kua manako a lautolu ke he tau fakatokatokaaga fakamotu mo e lalolagi ne tonu ke maeke he tau laliaga ha lautolu ke nakai tauhele he pule kelea he tau motu mautu mo e tau kamupani monuina.”

PIHIA he fakamaama he ulu fakatonu he taha matakau foaki lagomatai he lalolagi e tau amaamanakiaga mo e tau omoomoiaga he tau tagata nonofogati. Kua fakamaama fakamitaki he tau kupu hana e manako ha lautolu oti ne lauia he tau matematekelea mo e tau nakai fakafili tonu. Kua manako lahi a lautolu oti ma e lalolagi kua mafola moli mo e haohao mitaki. To moli nakai e lalolagi pihia? Kua fai tagata moli kia ne moua e malolo mo e lotomatala ke hiki e matapatu ko e lalolagi nakai tonu?

 Tau Laliaga ke Hiki

Tokologa e tau tagata ne lali. Ma e fakatai, ko Florence Nightingale, ko e fifine Peritania he senetenari 19 aki, ne foaki hana moui ke tamata e levekiaga puipui fakamea, ne fakaalofa hofihofi noa he leveki a lautolu ne gagao. He vaha hana—ato fai vai tului mo e tau tegavai—ko e levekiaga he fale gagao kua kehe mamao mo e mena ne amanaki a tautolu he vaha nei ki ai. Ko e “tau nosi,” kua talahau he taha tohi ne “nakai fakaako, tu kiva, mo e fakalialia ha ko e ha lautolu a konahia mo e mahani faivao.” Kautu nakai a Florence Nightingale he lali ke hiki e lalolagi nosi? Ne kautu a ia. Pihia foki, ko e tau tagata leveki tokologa ne nakai lotokai kua mua atu e kautu ke he tau fahi loga he moui—he iloilo, fakaakoaga, vai tului, fale, tau fakaholoaga fagai, ke totoku ni e falu. Ti ko e fua, ko e holo ki mua nukua aoga ne fakamitaki aki e tau momoui miliona he tau tagata nonofogati.

Ka e, nakai fakaheu e tautolu e tau mena mamahi moli nei: Totou teau miliona ne matematekelea agaia ha ko e felakutaki, kolokolovao, tatalu, hoge, mo e falu mena tutupu fakamahaikava. Ko e “nonofogati,” he talahau he matakau foaki lagomatai Concern i Ailani, “ne mamate ai 30,000 tagata he tau aho takitaha.” Ko e fakatupa foki, ko e matatau he tau tagata lagomatai tokologa he tau senetenari kua mole, kua ha ha agaia mo tautolu. “Kua loga atu e tupa ne momoui he vaha nei ke he tau tagata ne kaiha mai i Aferika he tau vaha ne fakafua e tau tupa ke he falu motu,” he talahau he Disposable People—New Slavery in the Global Economy.

Ko e heigoa kua tauhele e tau laliaga he tau tagata ke tamai e hikiaga tukulagi katoatoa? Ko e pule malolo kia ha lautolu ne monuina mo e malolo lahi, po ke fai mena foki ne putoia ai?

Tau Kaupaaga ka Hiki

Hagaao ke he Kupu he Atua, ko e kaupaaga malolo lahi ke he tau laliaga he tagata ke tamai e lalolagi tonu moli ko Satani ko e Tiapolo. Kua talahau he aposetolo ko Ioane ki a tautolu “ko e lalolagi oti ha he pule hana kua mahani kelea.” (1 Ioane 5:19) Ka ko e magaaho tonu nei, mogoia, ko Satani kua “fakahehe e lalolagi oti.” (Fakakiteaga 12:9) Ato hoko e magaaho ke utakehe e fakaohooho kelea lahi hana, to ha ha ai e tau tagata ne mamahi he kelea mo e nakai fakafili tonu. Ko e heigoa ne fakahoko e tuaga momoko nei?

Ko e ha tautolu a tau matua fakamua, ko Atamu mo Eva, ne fakamonuina aki e lalolagi ne talaga mo kaina parataiso mitaki katoatoa ma e tau magafaoa katoa he tagata—ko e lalolagi ne “mitaki lahi.” (Kenese 1:31) Ko e heigoa ati hiki ai? Ko Satani ati hiki ai. Ne totoko e ia e tonuhia he Atua ke taute e tau matafakatufono ke he puhala ke momoui ai e tau tagata tane mo e fifine. Ko e puhala he Atua ne pule, kua fakahaha e ia, kua nakai tonu. Ne fakatupu e ia a Atamu mo Eva ke hiki e puhala he tu tokotaha ke maeke ia laua ke fifili ma laua ni e mena ne mitaki mo e mena ne kelea. (Kenese 3:1-6) Ne fua e mena nei ke he kaupaaga ke uaaki ke he tau laliaga he tagata ke moua e lalolagi mitaki, kua tonu—ne agahala mo e nakai mitaki katoatoa.—Roma 5:12.

Ko e Ha ne Fakaata Ai?

‘Ka ko e ha ne fakaata he Atua e agahala mo e nakai mitaki katoatoa ke tupu?’ he liga huhu he falu. ‘Ko e ha ne nakai fakaaoga e ia e pule nakai fai fakakaupaaga ke utakehe e tau tagata totoko mo e liu kamata fakafou?’ Tuga ko e puhala mukamuka a ia. Pete ia, ko e fakaaoga he pule  kua fakalaga ai e tau huhu hokulo. Nakai kia moli ko e fakaaoga hehe he pule ko e taha matapatu fakamamahi ki a lautolu ne nonofogati mo e pehia ke he lalolagi? Nakai kia fakalaga he tau huhu e tau manamanatuaga he tau tagata loto hako ka fakaaoga he falu tagata pule kelea e malolo ke utakehe a lautolu ne nakai talia hana tau fakatokatokaaga?

Ke fakamafana a lautolu ne loto fakamoli ko Ia nakai ko e pule kelea ne fakaaoga hehe e malolo, ne fifili he Atua ke fakaata a Satani mo e tau tagata totoko ke gahua kehe mai he tau matafakatufono mo e tau matapatu fakaakoaga—ma e magaaho ku ni. To hoko e magaaho ke fakamoli e puhala ne pule e Atua ko e puhala hako hokoia. To fakakite ko e tau poakiaga ne fakalago e ia ki a tautolu ke lata ma e mitaki ni ha tautolu. Moli, ko e tau fua matematekelea he totokoaga ke he pule he Atua ne fita he kitia kua moli. Ti fakamoli e lautolu kua tonuhia katoatoa e Atua he fakaaoga e malolo ne mua hana ke utakehe e tau kelea oti kana ka fifili e ia ke taute. To nakai mule mai ai.—Kenese 18:23-32; Teutaronome 32:4; Salamo 37:9, 10, 38.

Ato lalago he Atua, kua apitia a tautolu he fakatokatokaaga nakai tonu, “kua oi fakalataha mo e mamahi . . . fakalataha.” (Roma 8:22) Ko e ha mena ne taute e tautolu ke hiki aki e tau puhala, kua nakai maeke ia tautolu ke utakehe a Satani, po ke utakehe katoatoa e nakai mitaki katoatoa ko e vaka he tau matematekelea oti kana ne moua e tautolu. Kua nakai ha ha ia tautolu e tuluiaga ke he tau lauia he agahala ne tupu mai ia Atamu.—Salamo 49:7-9.

To Tamai e Iesu Keriso e Hikiaga Tukulagi

Kakano kia e mena nei kua nakai fai amaamanakiaga katoatoa? Nakai moli. Fai tagata ne mua atu e malolo ke he ha tagata agahala ne maeke ke foaki ki ai e matagahua ke tamai e hikiaga tukulagi. Ko hai a ia? Ko Iesu Keriso haia. Kua fakamaama he Tohi Tapu a ia ko e Iki he Moui he Atua ma e fakahaoaga he magafaoa tagata.—Gahua 5:31.

Ko ia mogonei hane fakatali ke he “vaha” he Atua ke lalago ai. (Fakakiteaga 11:18) Ko e heigoa moli ka taute e ia? To fakahoko e ia ke “liu fakafou ai e tau mena oti kana, ne talahau mai ai he Atua ke he tau fofoga he hana tau perofeta tapu oti tali mai he kamataaga.” (Gahua 3:21) To taute e Iesu, ma e fakatai, “ko e mena laveaki e ia a ia ne nofogati he hana kalaga mai; katoa mo ia kua matematekelea, mo ia kua nakai fai lagomatai. . . . To laveaki e ia a lautolu mai he favale mo e mahani kelea.” (Salamo 72:12-16) Puhala ia Iesu Keriso, kua mavehe e Atua ke “fakahiku e . . . tau ato hoko ke he fakatulakiaga he lalolagi.” (Salamo 46:9) “To nakai pehe mai foki taha [he lalolagi mea hana] kua nofo ai, Kua gagao au,” he mavehe e ia. Ko lautolu ne matapouli, teligatuli, kulikuli—lautolu oti ne lauia he gagao mo e tatalu—ka liuaki ke he tino malolo mitaki katoatoa. (Isaia 33:24; 35:5, 6; Fakakiteaga 21:3, 4) Ti pihia mo lautolu ne mamate he tau tau kua mole ka monuina ai foki. Ne mavehe e ia ke liuaki mai ke he moui a lautolu ne lauia he nakai fakafili tonu mo e pehiaaga.—Ioane 5:28, 29.

To nakai tamai e Iesu Keriso e hikiaga tote, kua fakaku. To utakehe katoatoa e ia e tau kaupaaga ke he lalolagi tonu moli. To utakehe e ia e agahala mo e nakai mitaki katoatoa ti moumou a Satani ko e Tiapolo mo lautolu oti ne muitua ke he puhala totoko hana. (Fakakiteaga 19:19, 20; 20:1-3, 10) Ko e tupetupe mo e matematekelea ne fakaata fakaku he Atua “to nakai tupu mai lagaua.” (Nahuma 1:9) Ne manamanatu pihia a Iesu he fakaako e ia a tautolu ke liogi ma e Kautu he Atua ke hoko mai mo e ke gahuahua e finagalo he Atua “ke he lalolagi, tuga ne eke ke he lagi.”—Mataio 6:10.

‘Ka e,’ liga totoko e mutolu, ‘nakai kia ko Iesu ne pehe to “nonofo mau ia [tautolu] e tau nonofogati”? Nakai kia kakano e mena ia to ha ha tumau e nakai fakafili tonu mo e nofogati?’ (Mataio 26:11) E, ne pehe a Iesu to ha ha i ai tumau e tau tagata nonofogati. Ka e, ko e manatu he tau kupu hana fakalataha mo e tau maveheaga he Kupu he Atua ne fakakite kua kakano a ia to ha ha i ai e tau tagata nonofogati pete ne tumau e fakatokaaga nei. Ne iloa e ia nakai fai tagata ka maeke ke utakehe e lalolagi mativa mo e nakai fakafili tonu. Ne iloa foki e ia to hiki e tau mena oti ia. To nakai leva ti tamai e  ia e fakatokaaga fou katoatoa—ko e “lagi fou mo e lalolagi fou” ka nakai liu ha ha ai e mamahi, gagao, nofogati, mo e mate.—2 Peteru 3:13; Fakakiteaga 21:1.

‘Aua Neke Nimo ke Mahani Mitaki’

Kakano kia e mena nei kua nakai aoga ke taute ha mena kua maeke ia tautolu ke lagomatai falu tagata? Nakai pihia. Kua fakamalolo he Tohi Tapu a tautolu ke lagomatai e falu ka fehagai mo e tau kamatamata mo e tau tutuaga tupetupe. “Aua neke lamakai e koe e mena mitaki kia lautolu kua lata ki ai, ka kua maeke kia koe ke eke,” he tohia he patuiki i tuai ko Solomona. (Tau Fakatai 3:27) “Aua neke nimo ia mutolu ke mahani mitaki atu mo e fakaalofa atu,” he tomatoma he aposetolo ko Paulo.—Heperu 13:16.

Ne fakamalolo e Iesu Keriso a tautolu ke taute e tau mena kua maeke ia tautolu ke lagomatai e falu. Ne tala age e ia e fakataiaga he Samaria ne feleveia mo e tagata tane ne fahi mo e fofo ai. Ko e tagata Samaria, ne talahau e Iesu, kua ‘hofihofi e fakaalofa’ ke fakaaoga hana tau koloa ke pipi aki e tau matamotu he tagata ne fahi mo e ke lagomatai a ia ke maulu hana kafokia. (Luka 10:29-37) Ko e Samaria fakaalofa hofihofi noa ia ne nakai hiki e lalolagi, ka e lahi e mena ne taute e ia ke he moui he taha tagata. Maeke ia tautolu ke taute pihia.

Ka e, lahi atu e mena kua maeke ia Iesu Keriso ke taute he lagomatai hokoia e tau tagata takitaha. Maeke moli a ia ke tamai e hikiaga, ti to taute mafiti e ia. Ka taute e ia, ko lautolu ne lauia noa he tau tutuaga nakai tonu he vaha nei ka maeke ke fakamitaki e tau momoui ha lautolu mo e olioli e mafola moli mo e haohao mitaki.—Salamo 4:8; 37:10, 11.

He leo a tautolu ma e mena ia ke tupu, kia nakai tehatehaua a tautolu ke taute ha mena kua maeke ia tautolu, fakaagaga mo e fakatino, ke “mahani mitaki” ki a lautolu oti kua lauia noa he lalolagi nakai tonu.—Kalatia 6:10.

[Tau Fakatino he lau 5]

Kua taute e Florence Nightingale e tau hikiaga moli he lalolagi nosi

[Credit Line 5]

Courtesy National Library of Medicine

[Tau Fakatino he lau 7]

Taute he tau tutaki he Keriso e mahani mitaki ke he falu

[Fakatino Credit Line he lau 4]

The Star, Johannesburg, S.A.