‘Ko e Fakaalofa ha Mutolu Oti Hane Tupu Lahi’

LOGA e tau mena tutupu pauaki ne lauia a Sapani he 2004. Putoia e tau matagi malolo, puke he vai, mo e tau mafuike. Ti lauia kelea ai e tau momoui he tokologa, putoia e Tau Fakamoli a Iehova. (Fakamatalaaga 9:11) Ha ko e tau matematekelea nei, kua moua he Tau Fakamoli e tau magaaho pihia ke fakakite e fakaalofa fakamatakainaga ke he taha mo e taha.—1 Peteru 1:22.

Ma e fakatai, ha kua to lahi e uha ia Iulai, ne pua e tau kauvai he vailele he lotouho a Sapani. Ti molea 20 e kaina he Tau Fakamoli a Iehova ne malona he puke he vai. Ko e taha Fale he Kautu, ne puke hake e vai ti teitei taha e mita mai he foloa. Ne o atu fakamafiti e Tau Fakamoli he tau fakapotopotoaga ne tata atu ke lagomatai. Totou teau a lautolu kua foaki noa ke fakamea e tau fale ne puke he pelapela. Ko e Fale he Kautu ne ua ni e fahi tapu he fakamea katoa mo e taute e tau mena ne malona.

Ia Oketopa 23, ne liu e matakavi ia lauia foki he mafuike ne 6.8 he fuafuaaga he Richter. Ne kavi ke he 40 e moui ne galo, mo e molea e 100,000 tagata ne fekau ke o kehe mai he tau kaina ha lautolu. Kua nakai fai vai, kese, mo e hila. Pete he 50 e kilomita he mamao mai he lotouho he mafuike, ko e fale he Kautu ne fakafou kua nakai malona. Ti taute fakamafiti ai mo lotouho fakaku ke foaki e tau lagomataiaga. Ne o atu fakamafiti e tau leveki Kerisiano ke fakakia e tau matakainaga talitonu ha lautolu mo e totoka he iloa kua nakai fai ne pakia po ke mate. Tagoki he pogipogi hake, ko e tau matakainaga toko ono ne matematekelea he fakapuke he mahina a Iulai ne foaki noa fakamakai ke lau e tau kai mo e vai ke he tau matakavi ne lauia. Gahoa ni e tau tula he mole e mafuike, ti hokotia atu e tau koloa lagomatai.

“Ko lautolu nei ne lauia he fakapuke ne manamanatu ko e lagomatai ki a lautolu ne matematekelea he mafuike ko e magaaho ma lautolu ke fakakite e loto fakaaue ke he lagomatai ne moua e lautolu,” he talahau he taha leveki he fakapotopotoaga. “Ne gahua malolo a lautolu tagoki mai he pogipogi ti tuloto e po. Kua kikila e tau fofoga ha lautolu he fiafia!”

To nakai fakaai e tau fakapuke po ke tau mafuike ke fakahagahagakelea e pipiaga fakaalofa ne fakave ai e fakamatakainaga Kerisiano he Tau Fakamoli a Iehova. Ka e, ka tupu e tau matematekelea pihia, ne logona he tau Kerisiano e tau kupu he aposetolo ko Paulo ke he tau matakainaga talitonu i Tesalonia: “Kua fakalahi foki ha mutolu a fakaalofa, ko mutolu oti kana takitokotaha.”—2 Tesalonia 1:3.