Logona he Tau Tagata he “Tau Vagahau Oti” e Tala Mitaki
Logona he Tau Tagata he “Tau Vagahau Oti” e Tala Mitaki
‘To toto atu mai he tau tagata tokohogofulu he tau vagahau oti he tau motu kehe he pehe atu, To o a tautolu mo mutolu; ha kua logona e mautolu ha ha ia mutolu e Atua.’—SAKARIA 8:23.
1. Foaki fefe e Iehova e magaaho mo e tuaga mitaki lahi ma e kamataaga he tau vagahau kehekehe mo e he lalolagi katoa he faka-Kerisiano?
KUA latatonu ai e magaaho mo e tuaga. Ko e aho Penetekoso 33 V.N. Fai fahitapu he mole, ko e tau Iutaia mo e tau tagata liliuina kavi mai he 15 e atu motu ke hoko atu ke he Pule Atu Motu Roma ti mamao atu ke fakapotopoto ki Ierusalema ke fakamanatu e Paseka. He aho ia, tokologa ia lautolu ne logona—he nakai fakagogoa tuga a lautolu ia i Papelu i tuai, ka e he maama ai—ko e tau tagata ne puke he agaga tapu ne fakailoa e tala mitaki ke he tau vagahau loga ne vagahau ke he atu motu ia. (Gahua 2:1-12) Ne fakamailoga he magaaho ia e fakaveaga he fakapotopotoaga Kerisiano mo e kamataaga he gahua fakaako ke he lalolagi katoa, ke he tau vagahau kehekehe ne matutaki ke hoko mai ke he aho nei.
2. Maeke fefe he toloaga he tau tagata kehekehe ke “ofo” he tau tutaki ha Iesu he Penetekoso 33 V.N.?
2 Liga fakaaoga he tau tutaki ha Iesu e vagahau Heleni ne mahani mau, ko e vagahau talahaua he magahala ia. Ne fakaaoga foki e lautolu e vagahau Heperu, ko e vagahau ne fakaaoga ke he faituga. Ka e, he aho Penetekoso, ne “ofo” e toloaga he tau tagata kehekehe ha kua vagahau a lautolu ke he tau vagahau fakamotu he tau tagata ia. Ko e heigoa e fua? Kua hokotia ke he tau loto he tau tagata fanogonogo ha ko e tau kupu moli kua lata ne logona e lautolu ke he vagahau moli ni ha lautolu. He matahiku he aho, ko e matakau tote he tau tutaki ne tupu lahi ai ke molea e 3,000!—Gahua 2:37-42.
3, 4. Fakalaulahi fefe e gahua fakamatala he o kehe mai e tau tutaki i Ierusalema, Iutaia, mo Kalilaia?
3 Nakai leva he mole e magaaho aoga ia, kua loga e tau favaleaga ne tupu ki Ierusalema, ti ko “lautolu ne mavehevehe, mo e fakamatala atu e vagahau mitaki he kupu.” (Gahua 8:1-4) Ma e fakatai, kua totou e tautolu ia Gahua veveheaga 8 hagaao ki a Filipo, ko e tagata fakamatala vagahau Heleni haia. Ne fakamatala a Filipo ke he tau Samaria. Ne fakamatala foki a ia ke he takitaki Aitiope ne talia e fekau hagaao ke he Keriso.—Gahua 6:1-5; 8:5-13, 26-40; 21:8, 9.
4 He hiki e tau Kerisiano mo e kumi matakavi ke atihake e tau momoui ha lautolu i fafo he tau matakavi ha Ierusalema, Iutaia, mo Kalilaia, ne felauaki a lautolu mo e tau kaupaaga fou he tau aga fakamotu mo e vagahau. Falu ia lautolu ne liga fakamatala ni ke he tau Iutaia. Ka e talahau he tutaki ko Luka: “Ko e tau tagata Kuperu mo Kurene foki e falu ha lautolu, kua hoko a lautolu ki Anetioka, kua vagahau ke he tau tagata Heleni, mo e fakamatala atu e tala mitaki ke he Iki ko Iesu.”—Gahua 11:19-21.
Atua Nakai Fakamailoga Tagata—Ko e Fekau ma e Tau Tagata Oti
5. Kitia fefe e nakai fakamailoga tagata ha Iehova hagaao ke he tala mitaki?
5 Ko e tau fakatupuaga pihia kua fakatatau mo e tau puhala he Atua; kua nakai fili tagata a ia. He mole e lagomatai e Iehova e aposetolo ko Peteru ke hiki hana onoonoaga ke he tau tagata he tau motu, ne mailoga loto fakaaue e ia: “Ko e moli, kua iloa e au nakai fakamailoga tagata e Atua. Ka ko e tau tagata he tau motu oti kana ne matakutaku kia ia mo e mahani tututonu, kua talia ai e ia.” (Gahua 10:34, 35; Salamo 145:9) He eke e aposetolo ko Paulo, he magaaho fakamua mo tagata favale ke he tau Kerisiano, ne fakapuloa ko e “finagalo [he Atua] ke fakamomoui e tau tagata oti kana,” ne mailoga moli e ia kua ataina e Atua mai he fili tagata. (1 Timoteo 2:4) Ko e nakai fakamailoga tagata he Tufuga ne kitia ai ti kua hafagi e amaamanakiaga he Kautu ke he tau tagata kehekehe, lanu, motu, po ke vagahau.
6, 7. Ko e heigoa e tau perofetaaga he Tohi Tapu ne talahau tuai to folafola e tala mitaki ke he tau vagahau kehekehe he tau motu oti?
6 Ko e fakalaulahi atu nei ke he lalolagi katoa ne talahau tuai he tau senetenari fakamua atu. Hagaao ke he perofetaaga ha Tanielu, “ti foaki age kia [Iesu] e pule, mo e fakahekeaga, mo e kautu, kia fekafekau kia ia e tau motu oti, mo e tau kautu, mo e tau vagahau kehekehe.” (Tanielu 7:14) Ko e kakano ne tohi fakailoa e mekasini nei ke he 151 e vagahau ti tufatufa ke he lalolagi katoa, kua fakamalolo a koe ke totou hagaao ke he Kautu ha Iehova, he fakatata e fakamoliaga he perofetaaga he Tohi Tapu.
7 Ne talahau tuai he Tohi Tapu e magaaho ka logona he tau tagata he tau vagahau kehekehe e fekau foaki moui nei. He fakamaama e puhala he tapuakiaga moli ka futiaki e tokologa, ne perofeta e Sakaria: “Ko e tau aho ia to toto atu ai he tau tagata tokohogofulu he tau vagahau oti he tau motu kehe; to toto atu ai e lautolu e kala tapulu he tagata Iuta [Kerisiano fakauku he agaga, vala he “Isaraela he Atua”] mo e pehe atu, To o a tautolu mo mutolu; ha kua logona e mautolu ha ha ia mutolu e Atua.” (Sakaria 8:23; Kalatia 6:16) Mo e talahau e mena ne kitia e ia he fakakiteaga, kua pehe e aposetolo ko Ioane: “Kitiala, ko e moto tagata tokologa, kua nakai maeke ia taha ke totou, mai he tau motu oti, mo e tau faoa, mo e tau tagata kehekehe, mo e tau vagahau kehekehe, kua tutu mai a lautolu ki mua he nofoaiki, ki mua foki he Punua mamoe.” (Fakakiteaga 7:9) Kua kitia e tautolu e tau perofetaaga pihia kua fakamoli!
Hokotia ke he Tau Tagata Oti Kana
8. Ko e heigoa e moliaga he vaha nei ne lata ai mo e tau hikiaga he gahua fakamatala ha tautolu?
8 He vaha nei, kua tokologa e tau tagata ne o ke nonofo he falu motu. Ko e kaufakalataha he lalolagi katoa kua hafagi e vaha fou he hiki atu ke he taha motu. Ko e tokologa he tau tagata mai he tau matakavi felakutaki mo e tau matakavi matematekelea fakatupe ne hiki atu ke he tau matakavi hagahaga mitaki, he kumi e moui haohao mitaki ke he mautu he tau koloa tino. He tau motu loga, kua tokologa e tau tagata ne o atu mo e tau tagata fehola ne fakahiku ai ke he tau matakau vagahau kehe. Tuga anei, i Finilani molea e 120 e vagahau kua vagahau i ai; ki Ausetalia kua molea e 200 e vagahau i ai. He taha ni e taone he Tau Fahi Kaufakalataha—San Diego—kua molea 100 e vagahau ne logona i ai!
9. Ko e heigoa e onoonoaga kua lata ia tautolu ke taute he magaaho tonu nei he fonua he tau tagata ne vagahau e vagahau kehe?
9 Kua onoono nakai a tautolu ko e tau fekafekau Kerisiano he magaaho tonu nei ke he tau tagata pihia ne vagahau e tau vagahau kehekehe kua fakatauhele ke he fekafekauaga ha tautolu? Nakai pihia! Ka e, kitia e tautolu e mena nei ko e tupuaga fiafia lahi ke he gahua fakamatala ha tautolu—‘kua hina ke he heleheleaga.’ (Ioane 4:35) Kua lali a tautolu ke leveki e tau tagata kua manamanatu ke he tau mena fakaagaga ha lautolu, pete ne tau motu po ke tau vagahau ha lautolu. (Mataio 5:3, NW) Ti ko e fua, he tau tau takitaha kua tupu ki mua e numera he tau tagata he “tau vagahau kehekehe” kua eke mo tau tutaki he Keriso. (Fakakiteaga 14:6) Ma e fakatai, tali mai ia Aokuso 2004, ko e gahua fakamatala i Sihamani ne taute he kavi ke 40 e vagahau. He magaaho taha, kua fakamatala e tala mitaki i Ausetalia ke teitei 30 e vagahau, mai he 18 e vagahau he hogofulu e tau kua mole. I Heleni, kua hokotia e Tau Fakamoli a Iehova ke teitei 20 e vagahau kehekehe. He lalolagi katoa, kavi ke he 80 e pasene he Tau Fakamoli a Iehova ne vagahau kehe nakai faka-Peritania, ko e vagahau talahaua ke he lalolagi.
10. Ko e heigoa e matagahua he tau tagata fakailoa takitaha he taute tutaki ke he tau tagata he “tau motu oti kana”?
10 Moli, ne poaki a Iesu ke “eke e tau motu oti kana mo tutaki” nukua taute pihia ai! (Mataio 28:19) He talia fiafia e poakiaga ia, ne gahuahua e Tau Fakamoli a Iehova ke he 235 e motu, he tufatufa e tau tohi ke molea e 400 he tau vagahau. He hane foaki he fakatokatokaaga ha Iehova e tau manako fakatino ke hokotia ke he tau tagata, kua lata he tau tagata fakailoa takitaha he Kautu ke fakailoilo ke talahau e fekau he Tohi Tapu ke he “tau tagata oti kana” he vagahau ne maama mitaki e lautolu. (Ioane 1:7) Ko e laliaga auloa nei ne fakamalolo e tau miliona tagata he tau matakau vagahau kehekehe ke aoga mai he tala mitaki. (Roma 10:14, 15) E, igatia a tautolu oti mo e taute e matagahua aoga nei!
Fakafehagai mo e Paleko
11, 12. (a) Ko e heigoa e tau paleko kua lata ke kautu ki ai, ti lagomatai fefe he agaga tapu? (e) Ko e ha e fakamatala ke he tau tagata he vagahau moli ha lautolu kua fa lagomatai?
11 He vaha nei, tokologa e tau tagata fakailoa he Kautu kua manako ke ako e taha vagahau, ka e nakai falanaki a lautolu po ke amanaki a lautolu ke he tau mena fakaalofa mana he agaga he Atua. (1 Korinito 13:8) Ko e ako e vagahau fou ko e matagahua makimaki. Pihia foki ki a lautolu ne fita e vagahau ke uaaki kua maeke ke hiki e tau manamanatuaga mo e fakafeleveiaaga ha lautolu ke maeke ke futiaki e fekau he Tohi Tapu ke he tau tagata ne vagahau ke he vagahau ia ka e nakai tatai ke he tau feakiaga mo e tau aga fakamotu. Ti pihia foki, kua fa ma a lautolu ne o mai ke he motu; ke maama e puhala manamanatu ha lautolu ko e gahua uka.
12 Pete ia, kua gahuahua agaia e agaga tapu ke he tau fekafekau ha Iehova he lali a lautolu ke lagomatai e tau tagata ne vagahau kehe. (Luka 11:13) He lali ke talahau e tau vagahau uka, kua maeke he agaga ke fakalaulahi e manako ha tautolu ke matutaki mo e tau tagata ne nakai vagahau ke he vagahau ha tautolu. (Salamo 143:10) He fakamatala po ke fakaako e fekau he Tohi Tapu ke he tau tagata he vagahau ne nakai mahani kua liga hokotia ke he tau manamanatuaga ha lautolu. Pete ia, ke maeke ke hokotia ke he tau loto he tau tagata fanogonogo ha tautolu, kua fa mitaki ke fakaaoga e vagahau motu ha lautolu—ko e vagahau ne hokotia ke he tau fatuakiloto, tau logonaaga mo e tau amaamanakiaga ha lautolu.—Luka 24:32.
13, 14. (a) Ko e heigoa ne fakalagalaga e falu ke taute e fekafekauaga ke he falu vagahau? (e) Kitia fefe e agaga he foaki noa?
13 Tokologa e tagata fakailoa he Kautu ne taute e fekafekauaga he fonua vagahau kehe ka kitia e lautolu e tali mitaki ke he kupu moli he Tohi Tapu. Kua alaala e falu ka paleko mo e fiafia e fekafekauaga ha lautolu. “Tokologa ia lautolu ne o mai i Europa Uta ne fia inu ke he kupu moli,” he talahau he la ofisa he Tau Fakamoli a Iehova i Europa toga. Ko e makona ha ia ke lagomatai e tau tagata fiafia pihia!—Isaia 55:1, 2.
14 Ati, ke fakalataha fai kakano ke he gahua nei, kua lata ia tautolu ke eketaha mo e foaki fakatagata. (Salamo 110:3) Tuga anei, ko e numera he tau magafaoa Fakamoli Sapani ne toka e tau kaina hagahaga mitaki he tau taone lalahi mo e hiki atu ke he tau matakavi mamao ke lagomatai e tau matakau he tau tagata Saina ke maama e Tohi Tapu. He fahi lalo he Tau Fahi Kaufakalataha, ne o motoka tumau e tau tagata fakailoa mai he taha ke he ua e tula ke fakaako Tohi Tapu he fonua he tau tagata Filipaina. I Noue, ko e hoa mau ne fakaako mo e magafaoa mai i Afghanistan. Kua fakaaoga he hoa Fakamoli e tau lagaki Peritania mo e Noue he porosua Ko e Heigoa e Manako he Atua ma Tautolu? * Kua totou he magafaoa e tau paratafa faka-Peresia, ko e vagahau tatai ke he vagahau Dari ha lautolu. Kua tutala faka-Peritania mo e faka-Noue. Ko e agaga pihia he foaki noa mo e hikihiki kua palepale lahi ka talia he tau tagata kehe e tala mitaki. *
15. Maeke fefe ia tautolu oti ke fakalataha ke he laliaga he fakamatala ke he tau vagahau kehe?
15 Maeke nakai ia koe ke fai vala he gahua vagahau kehe nei? Ko e ha he fakamau hifo e tau vagahau kehe ne mahani mau ke he fonua hau? Ti liga maeke ia koe ke uta e tau tuleke po ke tau porosua he tau vagahau ia. Ko e tohi tote Good News for People of All Nations, ne fakatoka mai he 2004, ne fita he eke mo kanavaakau he folafola e amaamanakiaga he Kautu ke he fekau mukamuka, ti atihake ke he tau vagahau loga.
‘Fakaalofa Atu ke he Tagata Kehe’
16. Maeke fefe he tau matakainaga tane manamanatu ke fakakite e fiafia nakai lotokai ke lagomatai e tau tagata vagahau kehe?
16 He ako e tautolu taha vagahau kehe po ke nakai, maeke ia tautolu ke lagomatai e fakaakoaga fakaagaga he tau tagata motu kehe he matakavi ha tautolu. Ne fakaako e Iehova hana tau tagata ke ‘fakaalofa atu ke he tagata kehe.’ (Teutaronome 10:18, 19) Ma e fakatai, he taha taone lahi i Amerika Tokelau, lima e fakapotopotoaga ne feleveia he taha e Fale he Kautu. He loga he tau Fale, ne hiki tumau he tau e magaaho feleveia ati hiki e tau feleveiaaga faka-Saina i ai ke he magaaho afiafi he Aho Tapu. Pete ia, to kakano e mena nei kua tokologa e tau tagata ne hiki mai kua taute e tau gahua ma e tau fale kai kua nakai maeke ke fakalataha atu ke he feleveiaaga. Ko e tau motua he falu fakapotopotoaga kua taute totonu e tau hikihikiaga ke maeke he tau feleveiaaga Saina ke taute tuai he Aho Tapu.
17. Fefe e logonaaga ha tautolu ka fifili e falu ke hiki ke lagomatai e matakau vagahau kehe?
17 Nava he tau leveki fakahele e tau matakainaga tane mo e fifine nukua lata mo e makaka ne manako ke hiki ke lagomatai e tau matakavi vagahau kehe. Ko e tau faiaoga lotomatala he Tohi Tapu ne liga galo lahi i ai, ka kua logona hifo he tau leveki tuga e tau motua ia i Luseta mo Ikonio. Ko e tau motua ne nakai taofi a Timoteo he fenoga mo Paulo, pete ni kua aoga a Timoteo ke he tau fakapotopotoaga ha lautolu. (Gahua 16:1-4) Lafi ki ai, ko lautolu ne takitaki e gahua fakamatala ne nakai fakalolelole ha ko e manamanatuaga, tau aga fakamotu, po ke tau mahani he tau tagata kehe. Ka e, kua fiafia a lautolu ke he kehekehe mo e kumi puhala ke feaki e tau fakafetuiaga mitaki ke lata mo e tala mitaki.—1 Korinito 9:22, 23.
18. Ko e heigoa e gutuhala kua lahi ne hafagi ke he tau tagata oti?
18 Tuga he perofeta, ko e tala mitaki nukua fakamatala ke he “tau vagahau oti he tau motu kehe.” Ko e homo ue atu he lata ma e holo ki mua kua kitia agaia ke he tau fonua vagahau kehe. Totou afe e tau tagata fakailoa lotomatala ne huhu ke he “gutuhala kua lahi mo e aoga” nei. (1 Korinito 16:9) Ka e, lahi atu e mena kua lata ke maeke ke feaki e tau matakavi pihia, tuga ka fakakite he vala tala ka mui mai.
[Tau Matahui Tala]
^ para. 14 Ne taute fakailoa he Tau Fakamoli a Iehova.
^ para. 14 Ma e falu fakafifitakiaga, kikite “Tau Foakiaga Ikiiki ne Tamai ki a Tautolu e Tau Monuina Lalahi,” he The Watchtower, Aperila 1, 2004, lau 24-8.
Maeke Nakai a Koe ke Fakamaama?
• Maeke fefe a tautolu ke fifitaki a Iehova he fakakite e nakai fakamailoga tagata?
• Onoono fefe a tautolu ke he tau tagata he matakavi ha tautolu ne nakai vagahau ke he vagahau ha tautolu?
• Ko e ha kua lagomatai ai ke fakamatala ke he tau tagata he tau vagahau moli ni ha lautolu?
• Fakakite fefe e tautolu e manamanatuaga ma e tau tagata motu kehe ne haia mo tautolu?
[Tau Huhu he Fakaakoaga]
[Mepe/Fakatino he lau 23]
(Ma e puhala katoa ne tohi aki, kikite e tohi)
Roma
KERETA
ASIA
FERUKIA
PAFULIA
PONO
KAPATOKIA
MESOPOTAMIA
METAI
PARETIA
ELAMA
ARAPI
LIPUA
AIKUPITO
IUTAIA
Ierusalema
[Tau Vai]
Tahi Metiteraneani
Tahi Uli
Tahi Kula
Ava Peresia
[Fakatino]
He Penetekoso 33 V.N., ko e tau tagata mai he 15 e matakavi he Pule Atu Motu Roma ti mamao atu ne logona e tala mitaki ke he tau vagahau motu ha lautolu
[Tau Fakatino he lau 24]
Tokologa e tau tagata motu kehe ne tali fiafia ke he kupu moli he Tohi Tapu
[Fakatino he lau 25]
Ne tu he lapa he Fale he Kautu lima e vagahau