Mitaki ne Agaagai he Kelea

HE LALOLAGI he vaha nei, kua liga gahoa e tagata ne makai ke foaki a lautolu. Ka e, ha ha agaia falu ne manako “ke fai kehe”—ke taute e mitaki ke he falu he taha puhala. He tau tau takitaha, tokologa e tagata ne foaki e tau piliona tālā ne kua logona hifo e lautolu kua fakaaoga mitaki. I Peritania, ma e fakatai, ko e tau tupe foaki ke he gahua fakaalofa noa ne hokotia ke he tapunu ko e $13 piliona (U.S.) he 2002. Tali mai he 1999, hogofulu e tagata ona fakamokoi ne foaki po ke mavehe ke tuku molea e $38 piliona (U.S.) ke lagomatai a lautolu ne nonofogati.

Ko e falu he tau gahua mitaki ne taute he tau tagata gahua foaki noa fakaalofa noa ne putoia ai foki ke totogi e tau kaitalofa fakaekekafo he tau magafaoa ne temotemoai e tupe moua, puipui e tau fanau he tau matua tokotaha, foaki tupe ke he tau polokalama huki fakagata he tau motu tupu, foaki ke he fanau ha lautolu a pepa fakamua, foaki e tau manu fakafanau ke he tau tagata gahua fonua he tau motu mativa, mo e uta e tau koloa lagomatai ke he tau tagata ne lauia he matematekelea pauaki.

Ko e tau fakamooliaga i luga ne fakakite kua ha ha he tau tagata e malolō ke taute e mitaki ke he falu. Momoko ai, ha ha i ai foki e tau tagata ne taute e tau gahua kelea.

Malikiti e Kelea

Tali mai he matahiku he Felakutaki II he Lalolagi, kua ha ha i ai teitei 50 e fakamauaga ke he tau mena ne tutupu he kelipopoaga mo e omoomoi fakapolitika he kelipopo lahi mahaki. “Ko e tau mena tutupu nei,” ne talahau he senolo American Political Science Review, “ne tukia e tau momoui he toko 12 e miliona mo e tokologa atu ke hoko ke he 22 e miliona he tau tagata noa, molea ke he tau tagata ne lauia noa he tau felakutaki fakamotu mo e he lalolagi katoa tali mai he 1945.”

Ke he hafa fakahiku he 20 e senetenari, hoko ke he 2.2 e miliona tagata ne kelipopo i Kamepotia ha ko e tau kakano fakapolitika. Ko e fevihiatiaaki fakamatakau i Ruanata ne takitaki ke he molea e 800,000 he tau tagata tane, tau fifine, mo e tau fanau ne mamate. Ne fakalagalaga ai fakalotu mo e fakapolitika e tau tagata kelipopo tagata i Posonia ne katoa ai ke molea e 200,000 ne mamate.

Ke talahau e tau gahua foou ne kelea lahi, ko e takitaki tohikupu he tau Motu Kaufakalataha ne pehe he 2004: “I Iraka, kua kitia e tautolu e tau tagata noa ne tamate fakakelea, ka e taofi ki loto e tau tagata foaki lagomatai, tau tagata tohi tala mo e falu tagata noa ti tamate ai ke he puhala favale lahi mahaki. He magaaho taha, kua kitia e tautolu e tau pagotā Iraka he fale pouli kua eke fakakelea fakalialia. I Darfur, kua kitia e tautolu e tau tagata tokologa ne fehola mai he tau kaina, ti  moumou e tau kaina ha lautolu, ka ko e fakapilo pulenoa kua fakaaoga ko e matahele taute pauaki. I Ukanata, ne kitia e tautolu e tau fanau ne helehele mo e fakaohooho ke taute e tau gahua vale fakateteki. I Peselani, ne kitia e tautolu e tau fanau ne taofi ki loto mo e tamate fakakelea.”

Pihia mo e tau motu ne talahau kua tupu ki mua, ko e tau matahavala vihiatia ne liga kua tupu lahi. Ma e fakatai, kua hokotaki he Independent News he 2004 ne fakamooli e Peritania “ko e fakalahi hogofulu ma taha e tupu ki mua he numera he tau tagata noa ne fakamatematekelea po ke fakakelea ha ko e lanu he tau hogofulu tau kua mole.”

Ko e ha e tau tagata ne ha ha ai e malolō ke taute fakalahi e mitaki ne fakahoko ai e tau gahua kelea pihia? To liu nakai a tautolu ke atāina mai he kelea? To fakakite he vala tala ka mui mai, kua foaki he Tohi Tapu e tau tali makona ke he tau hūhū uka nei.

 [Fakatino Credit Line he lau 2]

COVER: Mark Edwards/Still Pictures/Peter Arnold, Inc.