Puhala Ka Kautū e Mitaki ke he Kelea

Ko e tagata mitaki e Patuiki ko Tavita. Ha ha ia ia e fakaalofa hokulo ma e Atua, ko e manako ma e fakafili tonu, mo e fakaalofa hofihofi ma lautolu ne tokolalo. Ka e, ko e patuiki mitaki nei foki ne taute e mahani faivao mo e hoana he taha he tau tagata falanaki hana. Ti ko e magaaho ne iloa e Tavita kua fatu e hoana ko Patesepa, ia ia ne fakatokatoka e ia ke tamate e tane hana. Ati mau mogoia a ia mo Patesepa he lali ke ufiufi e tau matahavala hana.—2 Samuela 11:1-27.

KUA kitia ai mena maeke he tau tagata ke ha ha ai e malolo ke taute e mena mitaki lahi. Ko e ha, mogoia, ne fai fakalagoaga a lautolu ke he lahi he kelea? Kua fakakite he Tohi Tapu loga e tau kakano aoga. Kua fakakite foki e puhala ne fakaaoga he Atua a Keriso Iesu ke liu utakehe tukulagi e kelea.

Ko e Hihiga ke he Kelea

Ko e Patuiki ko Tavita ne kitia taha tupuaga he tau gahua kelea. He mole e fakatapakupaku he tau matahavala hana, ne talia e ia e fakalagoaga katoatoa he hana tau gahua. Ati tohi e ia fakatokihala: “Kitiala, ne fanau au mo e mahani hepehepe; ne fatu foki haku matua fifine ia au mo e hala.” (Salamo 51:5) Nakai ko e finagalo he Atua ma e tau matua fifine ke fakafua e tau tama ka agahala. Pete ia, he magaaho ne fifili e Eva ti pihia mo Atamu ke totoko ke he Atua, ne galo ia laua e lotomatala ke fanafanau e tau tama nakai agahala. (Roma 5:12) He malikiti hake e numera he tau lanu tagata nakai mitaki katoatoa, ne kitia maali ai “kua kelea e tau fatuakiloto he tau loto he tau tagata kua kamata mai he vaha tote.”—Kenese 8:21.

Ka nakai fakatonu, ko e fatuakiloto nei ke he kelea to fua ai ke he “feuaki, . . . ko e feitaaki, ko e taufetoko, ko e ita tafuā, ko e vale, ko e lagalagahou, ko e feveheveheaki, ko e tau veveheaga,  ko e mahekeheke,” mo e falu mahani moumou ne fakamaama he Tohi Tapu ko e “tau gahua he tino.” (Kalatia 5:19-21) He mena ne tupu ke he Patuiki ko Tavita, ne mahala a ia ke he lolelole he tino mo e taute e mahani feuaki, ne fua ai ke he vale lahi. (2 Samuela 12:1-12) Na maeke ia ia ke totoko hana fatuakiloto mahani feuaki. Ka e, manako loto a ia ki a Patesepa, ne muitua a Tavita ke he puhala ne fakamaama ai he magaaho fakamui he tutaki ko Iakopo: “Ka e takitokotaha mo e kamatamata a ia ka toho mo e hele a ia he hana tau manako lahi; ka fatu e manako lahi ti fanau mai ai e ia, ko e hala; ka motua foki e hala ti fanau mai ai, ko e mate.”—Iakopo 1:14, 15.

Ko e lahi he kelipopoaga, tau fakapilo pulenoa, mo e kaiha ne talahau he vala tala fakamua ko e tau fakataiaga molea lahi ke he mena ne tupu he fakaatā he tau tagata e tau manako kelea ke pule ke he tau gahua ha lautolu.

Omoomoi he Nakai Iloa e Kelea

Ko e mena ne tupu ke he aposetolo ko Paulo kua fakamaama e kakano ke uaaki ne taute he tau tagata e tau mena kelea. He magaaho ne mate a ia, ne moua e Paulo e matahigoa ko e tagata totonu, ti fakaalofa hofihofi. Ne foaki nakai lotokai e ia a ia he fekafekau ke he hana tau matakainaga Kerisiano. (1 Tesalonia 2:7-9) He kamataaga he moui hana, ne iloa a ia ko Saulo, ne “faguhe mai e fakamatakutaku mo e kelipopo” e tau tagata he matakau taha ia. (Gahua 9:1, 2) Ko e ha ne talia e Paulo ti fakalataha ke he tau gahua mahani kelea ne taute ke he tau Kerisiano fakamua atu? “Kua eke pihia e au ke he haku a nakai iloa,” he talahau e ia. (1 Timoteo 1:13) E, ne ha ha ia Paulo he magaaho fakamua “e fakamakutu ke he tau mena he Atua, ka e nakai lata mo e maama.”—Roma 10:2.

Tuga a Paulo, tokologa e tau tagata fakamooli ne fakalataha ke he tau gahua kelea ha ko e tote e iloilo tonu ke he finagalo he Atua. Ma e fakatai, ne hataki e Iesu hana tau tutaki: “To hoko mai foki e vaha ka kelipopo e taha a mutolu ti manatu e ia kua eke e ia e poa ke he Atua.” (Ioane 16:2) Ne iloa he tau Fakamooli ha Iehova he vaha fou nei e mooli he tau kupu ha Iesu. He tau motu loga, ne favale ki a lautolu mo e tamate foki he tau tagata ne totoku kua fekafekau ke he Atua. Maaliali ai, ko e makutu hehe pihia kua nakai fakafiafia e Atua mooli.—1 Tesalonia 1:6.

Ko e Punaaga he Kelea

Ne kitia e Iesu e matapatu kakano he kelea. He tutala ke he tau takitaki fakalotu ne pulega ke keli a ia, ne pehe a ia: “Ko mutolu, mai he matua ha mutolu ko e tiapolo ti kua fia eke e mutolu e tau mena kua manako ki ai e matua ha mutolu. Ko e keli tagata a ia tali mai he kamataaga.” (Ioane 8:44) Ko Satani ne ha ha ai e tau manatu lotokai ne fakahēhē a Atamu mo Eva ke totoko ke he Atua. Ko e totokoaga ia ati agahala ai—ti hoko e mate—ke he tau tagata oti kana.

Ko e tuaga kelipopo ha Satani ne fakatapakupaku fakalaulahi atu he puhala ne fehagai a ia mo Iopu. He magaaho ne fakaatā e Iehova a ia ke kamatamata e mahani fakamooli ha Iopu, ne nakai makona a Satani he  fofo hokoia e tau koloa ha Iopu. Ne fakatupu foki e ia e mamate ke he fanau tokohogofulu hana. (Iopu 1:9-19) He tau hogofulu tau kua mole, ne moua he tau tagata e mailogaaga he kelea, ha ko e nakai mitaki katoatoa mo e nakai iloa he tagata mo e pihia mo e fua he holo ki mua e tauhele ha Satani ke he tau gahua he tagata. Ne fakakite he Tohi Tapu ko e Tiapolo “kua liti hifo a ia ke he lalolagi, kua liti hifo foki hana tau agelu fakalataha mo ia.” Ko e perofetaaga taha ia ne talahau fakatonu tuai ko e puipuiaga ha Satani to fua mai e lahi atu he ‘malaia he lalolagi.’ He nakai fakaohooho e Satani e tau tagata ke taute e tau mena kelea, ko ia e takitaki ne “fakahehe e lalolagi oti.”—Fakakiteaga 12:9, 12.

Utakehe e Fatuakiloto ke he Kelea

Ka utakehe tukulagi e kelea he fakatokaaga tagata, ko e fatuakiloto mooli he tagata ke he kelea, ko e tote he iloilo tonu hana, mo e fakaohoohoaga ha Satani kua lata ke utakehe foki. Fakamua, maeke fefe he fatuakiloto mooli he tagata ke he agahala ke utakehe mai he loto?

Nakai fai tagata ihiihi po ke tau vai fakaekekafo kua maeke ke taute e matagahua ia. Ko Iehova ko e Atua hokoia ne tauteute e fakamauluaga ke he agahala mo e nakai mitaki katoatoa ma lautolu ne fiafia ke talia ai. Ne tohi he aposetolo ko Ioane: “Ko e toto foki a Iesu Keriso . . . kua fakamea ai a tautolu he tau hala oti kana.” (1 Ioane 1:7) He foaki e Iesu ne mitaki katoatoa hana moui, nukua “fua ha tautolu a tau hala ke he hana tino ni ki luga he akau, kia nonofo kehe a tautolu mo e tau hala, ka e nonofo mo e tututonu.” (1 Peteru 2:24) Ko e poa mate ne taute e Iesu to utakehe e tau lauiaaga he tau gahua kelea ha Atamu. Ne talahau e Paulo kua eke a Keriso Iesu ‘ko e lukutoto kua lata ma e tau tagata oti kana.’ (1 Timoteo 2:6) E, kua hafagi he mate he Keriso e puhala ma e tau tagata oti ke liu moua e mitaki katoatoa ne fakagalo e Atamu.

Liga huhu e tautolu, ‘Kaeke ke taute he mate ha Iesu kavi ke he 2,000 tau kua mole ke liuaki mai e mitaki katoatoa he tagata, ko e ha ne tupu agaia e kelea mo e mate?’ He moua e tali ke he huhu ia ka lagomatai ke utakehe e tupuaga ke uaaki he kelea—ko e nakai iloa he tagata e finagalo he Atua.

Tupu Olaola e Mitaki ha ko e Iloilo Tonu

Ko e moua e iloilo tonu ke he mena ne taute e Iehova mo Iesu mogonei ke utakehe e kelea ka liga puipui e tagata fakamooli mai he talia pouli e tau gahua kelea, po ke mua atu e kelea, he eke mo tagata ke tau “ke he Atua.” (Gahua 5:38, 39) Kua makai a Iehova ko e Atua ke fakanimo e tau hehē kua mole ne taute he nakai iloa. He tutala i Atenai, ne pehe e aposetolo ko Paulo: “Kua nakai manamanatu ki ai e Atua ke he vaha ne goagoa ai; ka kua tala mai ainei ke he tau tagata oti he tau motu oti kana ke tokihala. Ha ko e mena kua kotofa e ia e aho ke fakafili ai e lalolagi mo e tututonu he tagata kua kotofa ne ia; kua fakamoli mai ai e ia ke he tau tagata oti kana, he fakatu mai e ia a ia ia lautolu kua mamate.”—Gahua 17:30, 31.

Kua iloa tuai e Paulo ne liu fakatu mai a Iesu he mate, ha kua tutala a Iesu ne fakaliu tu mai ki a Paulo ti taofi e Iesu a ia mai he favale ke he tau Kerisiano fakamua atu. (Gahua 9:3-7) He magaaho ne moua e Paulo e iloilo tonu he finagalo he Atua, ne hiki a ia ti eke mo tagata mitaki mooli he fifitaki ke he Keriso. (1 Korinito 11:1; Kolose 3:9, 10) Lafi ki ai, ne fakamatala fakamakai e Paulo e “tala mitaki nai he kautu.” (Mataio 24:14) Teitei ke 2,000 tau he mate a Iesu ti liu tu mai, ne fifili e Keriso mai he tau tagata a lautolu, tuga a Paulo, ke pule fakalataha mo ia he Kautu hana.—Fakakiteaga 5:9, 10.

Tali mai he senetenari kua mole ato hoko mai mogonei, ne fakamooli fakamakutu he Tau Fakamooli a Iehova e poaki ha Iesu: “Hanei, kia o atu a a mutolu ke eke e tau motu oti kana mo tutaki, ti papatiso atu a lautolu ke he higoa he Matua, mo e Tama, mo e [a]gaga [t]apu; Ti fakaako atu a mutolu kia lautolu kia omaoma ke he tau mena oti ne tala atu e au kia mutolu; kitiala, to fakalataha au  mo mutolu ke he tau aho oti, ato hoko ni ke he fakaotiaga he lalolagi.” (Mataio 28:19, 20) Ko lautolu ne talia ke he fekau nei ne ha ha ai e moui tukulagi he lalolagi i lalo he fakatufono he lagi he Keriso. Ne pehe a Iesu: “Ko e moui tukulagi foki hanai, kia iloa e lautolu a koe, ko e Atua moli tokotaha ni, katoa mo ia ne fakafano mai e koe, ko Iesu Keriso haia.” (Ioane 17:3) He lagomatai e taha tagata ke moua e iloilo nei ko e mitaki lahi ue atu kua maeke he taha tagata ke taute ma e falu.

Ko lautolu ne talia e tala mitaki nei he Kautu kua fakatātā e tau mahani tuga e ‘fakaalofa, fiafia, mafola, fakauka, totonu, mahani mitaki, tua, mahani molu, mo e manako fakalatalata’ pete e tau kelea oti kana kua agaagai ia lautolu. (Kalatia 5:22, 23) He fifitaki ki a Iesu, ko lautolu ne ‘nakai taui atu e kelea ke he kelea he taha.’ (Roma 12:17) Igatia ai, ne lali a lautolu ke “mahala e kelea ke he mitaki.”—Roma 12:21; Mataio 5:44.

Ko e Kautuaga Fakahiku ke he Kelea

Ha ko lautolu ni, ne nakai maeke he tau tagata ke kautu ke he tagata ne lalago ue atu e kelea, ko Satani ko e Tiapolo. Nakai leva, mogoia, to fakaaoga e Iehova a Iesu ke taholi e ulu a Satani. (Kenese 3:15; Roma 16:20) To takitaki foki e Iehova a Keriso Iesu ke “tuki malipilipi mo e fakaotioti” e tau fakatokaaga fakapolitika, nukua loga ai ne fakatupu e kelea lahi ke he fakamauaga tala tuai. (Tanielu 2:44; Fakamatalaaga 8:9) Ke he aho nei he fakafiliaga hane hau, ko lautolu oti ne “nakai omaoma ke he vagahau mitaki he Iki ha tautolu ko Iesu Keriso . . . ke fakahala ke he mahaikava tukulagi.”—2 Tesalonia 1:8, 9; Sefanaia 1:14-18.

Ka utakehe a Satani mo lautolu ne lalago a ia, mai he lagi to lagomatai e Iesu a lautolu ka hao ke fakafou e lalolagi ke he tuaga fakamua hana. To fakaliu tu mai e Keriso a lautolu oti ne latatonu ke moua e lilifu ke moui he lalolagi fakafou. (Luka 23:32, 39-43; Ioane 5:26-29) He taute pihia, to nakai fakagofua e ia falu he tau lauiaaga kelea ke fakamatematekelea e tau tagata.

To nakai omoi e Iehova e tau tagata ke omaoma e tala mitaki hagaao ki a Iesu. Pete ia, kua age e ia ke he tau tagata e magaaho ke uta e iloilo ne takitaki ke he moui. Kua aoga ke fakaaoga e koe e magaaho nei he mogonei! (Sefanaia 2:2, 3) Ka taute pihia e koe, to ako e koe e puhala ke fahia mai he ha kelea ne moumou e moui hau mogonei. To kitia foki e koe e puhala ka takitaki he Keriso e kautuaga lahi ue atu ke he kelea.—Fakakiteaga 19:11-16; 20:1-3, 10; 21:3, 4.

[Fakatino he lau 5]

Ne talia e Saulo e tau gahua kelea ha kua tote e iloilo tonu hana

[Fakatino he lau 7]

He lagomatai e taha ke uta e iloilo tonu he Atua ko e mena mitaki lahi ue atu ne taute he tagata ma e falu