‘Fakamatala ke he Tau Motu Oti’

“To eke foki a mutolu mo tau talahau haku . . . ke hoko nike he fakaotiaga he lalolagi.”—GAHUA 1:8.

1. Magaaho fe mo e i fe ne logona fakamua he tau tutaki e perofetaaga ne fakamau ia Mataio 24:14?

KO E tau kupu ha Iesu ne fakamau ia Mataio 24:14 kua mahani lahi ti iloa manatu ai he tokologa ha tautolu. Ti ko e perofetaaga mua ue atu mōli ha ia! Fakatino la e mena kua liga manamanatu e tau tutaki he magaaho ne logona fakamua ai e lautolu! Ko e tau 33 V.N. Kua fakalataha e tau tutaki mo Iesu kavi ke he tolu e tau, ti ko e mogonei kua o mai a lautolu mo ia ki Ierusalema. Kua kitia e lautolu e tau mana mo e kua fanogonogo ke he tau fakaakoaga haana. Pete ne fiafia a lautolu ke he tau kupu mōli uho ne fakaako e Iesu ki a lautolu, ne mailoga mitaki e lautolu to nakai fakalataha oti a lautolu ke he fiafia ia. Kua ha ha ia Iesu e tau fi malolō lahi mo e fakalagalaga.

2. Ko e heigoa e tau hagahagakelea mo e tau paleko ka fehagai e tau tutaki ki ai?

² He Mouga ko Olive, tokofā he tau tutaki ne nonofo mo Iesu, ne fanogonogo fakamakutu he vagahau a ia hagaao ke he tau hagahagakelea i mua mo e tau paleko ka fehagai mo lautolu. Fakamua atu, ne tala age a Iesu ki a lautolu to kelipopo a ia. (Mataio 16:21) Ne fakamahino e ia mogonei to moua foki e lautolu e totokoaga vevela. “Ati tuku atu ai e lautolu a mutolu ke he matematekelea, mo e kelipopo a mutolu,” he talahau e ia. “To vihiatia foki a mutolu he tau motu oti ha ko e haku a higoa.” Nakai koenaia. To fakahēhē he tau perofeta fakavai e tokologa. To tupetupe e falu mo e to afokau ti fakavihia ai e falu. Ka e, ha ha agaia e falu, ne “tokologa,” ka fakaatā e fakaalofa ha lautolu ma e Atua mo e haana Kupu ke momoko.—Mataio 24:9-12.

3. Ko e ha e tau kupu ha Iesu ne moua ia Mataio 24:14 kua ofoofogia mōli?

³ Ko e totoko ke he tau tutuaga fakalolelole pihia ne talahau e Iesu e talahauaga ne liga fakatupu e tau tutaki ke ofoofogia. Ne pehe a ia: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.” (Mataio 24:14) E, ko e gahua ne kamata e Iesu i Isaraela—ke ‘talahau e kupu moli’—ka matutaki mo e fakalaulahi ke he tau kalakala oti he lalolagi. (Ioane 18:37) Ko e perofetaaga ofoofogia mōli ha ia! Ke fakalaulahi e gahua ia ke he “tau atu motu oti” to paleko ai; ke taute pihia “to vihiatia foki . . . he tau motu oti” to eke e mena ia mo fakaofoofogia. Ko e fakakatoatoaaga he gahua lahi nei ka fakatokoluga nakai ni ko e pule katoatoa a Iehova mo e malolō ka e pihia foki e fakaalofa, fakaalofa noa, mo e fakauka haana. Lafi ki ai, to foaki ke he tau fekafekau haana e magaaho ke fakakite e tua mo e fakamōli katoatoa ha lautolu.

4. Ko hai ne tala age ki a lautolu ke taute e gahua fakamatala, ti ko e heigoa e fakamafanaaga ne talahau e Iesu?

⁴ Ne toka e Iesu ke he tau tutaki haana e gahua aoga lahi mahaki ke taute e lautolu. Ato hake a ia ke he lagi, ne hau a Iesu ki a lautolu mo e tala age: “Ka to moua e mutolu e malolo, ka haele hifo e [a]gaga [t]apu ki luga ia mutolu; to eke foki a mutolu mo tau talahau haku ki Ierusalema, mo Iutaia oti ni, mo Samaria, ke hoko ni ke he fakaotiaga he lalolagi.” (Gahua 1:8) Mōli, nakai leva to fai ka fakalataha mo lautolu. Ka e, tokogahoa ni e tau tutaki he magahala ia. Ko e mafanatia ha ia ke iloa to foaki e agaaga tapu malolō he Atua ki a lautolu ke fakakatoatoa aki e matagahua faka-Atua nei!

5. Ko e heigoa he tau tutaki ne nakai iloa hagaao ke he gahua fakamatala?

⁵ Ne iloa he tau tutaki ko lautolu ka fakamatala e tala mitaki mo e ‘eke e tau motu oti kana mo tutaki.’ (Mataio 28:19, 20) Ka e nakai iloa e lautolu  e laulahi he fakamatafeiga he fakamatala ka taute e lautolu, ti nakai iloa e lautolu e magaaho ka hoko mai e fakaotiaga. Ti pihia foki a tautolu. Ko e tau mena hanei ma Iehova hokoia ke fifili. (Mataio 24:36) Ka makona a Iehova ke he gahua fakamatala, to tamai e ia e fakaotiaga ke he fakatokaaga kelea nei. Ko e magaaho laia ka iloa he tau Kerisiano kua fakakatoatoa tuai e gahua fakamatala ke he laulahiaga ne finagalo a Iehova ki ai. Ne nakai maeke he tau tutaki fakamua atu ia ke kitia tuai e lahi he fakamatala ka taute he vahā he fakaotiaga.

Ko e Fakamatala he Senetenari Fakamua

6. Ko e heigoa ne tupu he Penetekoso 33 V.N. mo e he magaaho fakamui?

⁶ He senetenari fakamua, ko e fakamatala he Kautu mo e gahua taute tutaki ne fakatoka mai e tau fua ofoofogia. He aho Penetekoso 33 V.N. kavi ke he 120 e tutaki ne haia he poko tapa ki luga i Ierusalema. Ko e agaaga tapu he Atua ne liligi ki luga ha lautolu, ne taute he aposetolo ko Peteru e lauga fakalagalaga he fakamaama e kakano he mana nei, ti kavi ke he 3,000 ne talitonu mo e papatiso ai. Ko e kamataaga ni a ia. Pete ne tau laliaga fakamalolō he tau takitaki lotu ke taofi e fakamatala he tala mitaki, ne fakatumau ‘a Iehova ke he tau tutaki ke he taha aho mo e taha aho kua fakamomoui ki a lautolu.’ Nakai leva, kua “katoa foki he tau tagata, na ko e lima e afe.” Mole ia, “kua au atu ai he lafilafi ke he Iki a lautolu ne tua, tokologa e tau tane katoa mo e tau fifine.”—Gahua 2:1-4, 8, 14, 41, 47; 4:4; 5:14.

7. Ko e ha e liliuina ha Konelio ko e tupuaga aoga lahi?

⁷ Ko e tau 36 V.N. ne kitia e taha tupuaga aoga lahi—ko e liliuina mo e papatisoaga ha Konelio, ko e tagata Motu Kehe. He takitaki atu e aposetolo ko Peteru ke he tagata matakutaku Atua nei, ne fakakite e Iehova ko e poakiaga ha Iesu ke ‘eke e tau motu oti kana mo tutaki’ kua nakai kaupā ni ke he tau Iutaia he tau motu kehekehe. (Gahua 10:44, 45) Ko e heigoa e tali ha lautolu ne taki? He magaaho ne fifili e tau aposetolo mo e tau patu i Iutaia nukua lata foki e tala mitaki ke ta atu ki a lautolu he tau motu—ko lautolu ne nakai ko e tau Iutaia—ne fakaheke e Atua. (Gahua 11:1, 18) He magahala ia, ne matutaki e gahua fakamatala ke fua loga i Iutaia. Fai tau he mole, liga kavi ke he 58 V.N., ha ha i ai e falu ne lafi ki a lautolu ne tua he Motu Kehe ko e “tokologa afe mo afe he tau tagata Iutaia kua tua.”—Gahua 21:20.

8. Maeke fēfē e tala mitaki ke lauia e tau tagata takitokotaha?

⁸ Pete ne mua atu e malikiti he numera ke he tau Kerisiano he senetenari fakamua, kua nakai lata ke nimo e tau tagata ne hukui he tau numera. Ko e fekau faka-Tohi Tapu ne logona e lautolu kua malolō lahi. (Heperu 4:12) Ne hiki fakamafiti ai e tau momoui ha lautolu ne pipiki ki ai. Ne fakameā e lautolu e tau momoui ha lautolu, ti tapulu ke he aga fou, ti fakafeilo ai ke he Atua. (Efeso 4:22, 23) Pihia foki ke he vahā nei. Ti ko lautolu ne talia e tala mitaki ne ha ha ai e amaamanakiaga mua ue atu he moui tukulagi.—Ioane 3:16.

Tau Ekegahua mo e Atua

9. Ko e heigoa e kotofaaga mo e matagahua ne mailoga he tau Kerisiano fakamua atu ne moua e lautolu?

⁹ Ne nakai uta he tau Kerisiano fakamua atu e foufou ke he tau mena nukua fakakatoatoa. Ne mailoga e lautolu ko e gahua ha lautolu ko e tau fekafekau ne lalago he ‘malolo he agaaga tapu.’ (Roma 15:13, 19) Ko Iehova ne ha ha ai e foufou ia ma e tupuaga fakaagaaga. He magaaho taha, ne iloa he tau Kerisiano ia kua ha ha ia lautolu e kotofaaga mo e matagahua ko e ‘tau ekegahua he Atua.’ (1 Korinito 3:6-9) Fakahiku ai, he lagotatai mo e fakamafanaaga ha Iesu, ne eketaha fakamalolō a lautolu ke he gahua ne kotofa ke taute.—Luka 13:24.

10. Ko e heigoa e tau laliaga ne taute he falu Kerisiano fakamua atu ke fakamatala ke he tau motu oti kana?

¹⁰ Ha ko e “aposetolo ke he tau tagata kehe,” ne fenoga a Paulo ke he afe he tau kilomita ke he kelekele mo e tahi, he fakatū loga e tau fakapotopotoaga he fahimotu ha Roma i Asia mo Heleni. (Roma 11:13) Ne fenoga foki a ia ki Roma ti pihia foki ki Sepania. Ke he magaaho nei, ne tuku age ke he aposetolo ko Peteru e “vagahau mitaki . . . ma lautolu kua peritome,” ne fenoga ke he taha faahi ke gahua i Papelonia, ko e matapatu lotouho he faka-Iutaia he magahala ia. (Kalatia 2:7-9; 1 Peteru 5:13) Ke he tokologa he falu foki ne gahua fakalahi ke he Iki ko e tau fifine tuga a Tufaina mo Tufosa. Ko e taha fifine ne higoa ko Peresita, ne talahau kua “gahua fakalahi ke he gahua he Iki.”—Roma 16:12.

11. Fakamonuina fēfē e Iehova e tau laliaga he tau tutaki?

 ¹¹ Kua fakamonuina lahi e Iehova e tau laliaga ha lautolu mo e falu tagata gahua makai. Nakai molea e 30 e tau he mole e talahau tuai e Iesu to ha ha i ai e fakamatala ke he tau motu oti kana, ne tohi e Paulo ko e “vagahau mitaki” ne “fakamatala atu ke he tau tagata oti ke he lalolagi.” (Kolose 1:23) Hoko mai kia e fakaotiaga he magahala ia? Ke he taha manatu, e. Ne hoko mai ki luga he fakatokaaga Iutaia he tau 70 V.N. he magaaho ne moumou he tau kautau Roma a Ierusalema fakalataha mo e faituga i ai. Ka e, ne fifili e Iehova kua lahi atu e fakamatala ka taute ato hoko mai e fakaotiaga ke he fakatokaaga he lalolagi katoa ha Satani.

Ko e Fakamatalaaga he Vahā Nei

12. Maama fēfē he Tau Tagata Fakaako he Tohi Tapu fakamua atu e poaki ke fakamatala?

¹² Ke he lotoga fakahiku he senetenari ke 19 aki, he mole e vahā loa he tupu e tiaki taofiaga fakalotu, ne liu fakatū e tapuakiaga meā. Ko e Tau Tagata Fakaako he Tohi Tapu, ne iloa mogoia ko e Tau Fakamoli a Iehova, ne maama mitaki e poakiaga ke taute tutaki ke he lalolagi oti. (Mataio 28:19, 20) He tau 1914, kavi ke he 5,100 ne fakalataha fakamakai ke he gahua fakamatala, ti hoko atu e tala mitaki kavi ke he 68 e motu. Pete ia, ko e Tau Tagata Fakaako he Tohi Tapu fakamua ia ne nakai maama katoatoa e aoga he Mataio 24:14. He matahiku he senetenari ke 19 aki, i loto he Tohi Tapu e tala mitaki, po ke evagelia, ne fakaliliu mo e lolomi he tau sosaiete he Tohi Tapu ke he tau vagahau loga ti tufatufa ai ke he lalolagi katoa. Ti, ke he falu hogofulu tau, ko e Tau Tagata Fakaako he Tohi Tapu ne fakamaama kua fitā he taute e fakamatala ke he tau motu.

13, 14. Ko e heigoa e maamaaga mahino he kautū mo e finagalo he Atua ne fakakite he fufuta he The Watch Tower, he 1928?

¹³ Ne foaki fakahaga e Iehova ke he tau tagata haana e maama mahino ke he finagalo mo e amaamanakiaga haana. (Tau Fakatai 4:18) Ne pehē he The Watch Tower ia Tesemo 1, 1928: “Maeke nakai a tautolu ke talahau [e] tufatufaaga he Tohi Tapu nukua fakakatoatoa e fakamatala ne talahau tuai he evagelia he kautu? Nakai pihia! Pete ne tufatufaaga he Tohi Tapu kua lata agaia ma e matakau tote he Atua he tau fakamōli he lalolagi ke lolomi e tau tohi ne fakamaama e [amaamanakiaga] he Atua ti aahi atu ke he tau kaina ne toka ai e tau Tohi Tapu nei. Neke ai iloa he tau tagata e fakatuaga he fakatufono faka-Mesia he vaha ha tautolu.”

¹⁴ Ne lafi he fufuta ia he The Watch Tower: “He 1920, . . . ne hokotia e Tau Tagata Fakaako he Tohi Tapu ke he maama hako he perofetaaga he Iki ha tautolu ne tu ia Mataio 24:14. Ti mailoga ai e lautolu ko e ‘evagelia nei’ nukua fakamatala ai ke he lalolagi oti kana ko e fakamōliaga ke he tau tagata Motu Kehe po ke tau motu oti, nakai ko e evagelia he kautu ne nakai la hoko mai ka ko e evagelia kua lauia e Patuiki faka-Mesia ne fitā e kamata hana pule ke he lalolagi.”

15. Fakalaulahi fēfē e gahua fakamatala tali mai he atu tau 1920?

¹⁵ Ko e “matakau tote he tau fakamōli” ia he atu 1920 ne nakai tumau ke tote. He tau tau loga ne mui mai, “ko e moto tagata tokologa” he ‘tau mamoe kehe’ ne fakakite mo e kamata ke fakapotopoto ai. (Fakakiteaga 7:9; Ioane 10:16) He vahā nei, kavi ke he 6,613,829 e tagata fakapuloa he tala mitaki he 235 e motu he lalolagi. Ko e fakamōliaga mua ue atu ha ia he perofetaaga! Nakai la pihia fakamua ne fakamatala e “tala mitaki nai he kautu” ke he takatakaiaga laulahi. Nakai la pihia fakamua ne tokologa e tau fekafekau tua fakamōli ha Iehova he lalolagi.

16. Ko e heigoa kua fakakatoatoa he tau he fekafekauaga kua mole? (Kikite e fakafonua he lau 29-32.)

¹⁶ Fakalataha ai, ko e tokologa he Tau Fakamoli ne lavelave he tau he fekafekauaga he 2005. Molea e piliona he tau tulā ne fakaaoga ke fakapuloa e tala mitaki ke he 235 he tau motu. Totou miliona he tau liu aahi atu ne taute, ti totou miliona he tau fakaakoaga Tohi Tapu. Ko e gahua nei ne fakakatoatoa he Tau Fakamoli a Iehova, ne foaki noa e tau magaaho mo e tau koloa ha lautolu ke folafola e Kupu he Atua ke he falu. (Mataio 10:8) He puhala he agaaga tapu malolo lahi, ne fakatumau a Iehova ke fakamalolō haana tau fekafekau ke taute haana finagalo.—Sakaria 4:6.

Gahua Malolō ke Fakamatala

17. Tali atu fēfē e tau tagata a Iehova ke he tau kupu a Iesu hagaao ke he fakamatala e tala mitaki?

¹⁷ Pete ne teitei 2,000 tau he mole tali mai he  talahau e Iesu to fakamatala e tala mitaki, ko e makai he tau tagata he Atua ma e gahua ne nakai galo. Iloa e tautolu ko e tumauokafua ha tautolu he taute e mena kua mitaki, nukua fakaata e tautolu e tau mahani a Iehova he fakaalofa, fakaalofa noa, mo e fakauka. Tuga a ia, kua nakai manako a tautolu ke he ha tagata ke mate ka e manako ke he tau tagata ke tokihala mo e fakafeilo ai ki a Iehova. (2 Korinito 5:18-20; 2 Peteru 3:9) Puke he agaaga he Atua, kua fakatumau fakamakai e Tau Fakamoli a Iehova ke fakapuloa e tala mitaki ke he tau kalakala oti he lalolagi. (Roma 12:11) Ti ko e fua, ko e tau tagata he tau matakavi oti kua talia e kupu mōli ti fakatatau ke he takitakiaga fakaalofa a Iehova. Mailoga la e tau fakataiaga gahoa.

18, 19. Ko e heigoa e tau iloaaga kua maeke ia koe ke talahau hagaao ke he falu ne talia fiafia e tala mitaki?

¹⁸ Ko Charles ko e tagata gahua fonua he faahi lalo i Kenya. He 1988 ne fakafua e ia 8,000 kilokuleme he tau tapaka ti palepale ai ke he setifikete ne higoa a ia ko e Tagata Gahua Fonua Tapaka ne Mitaki Lahi. He magaaho ia, ne kamata a ia ke fakaako e Tohi Tapu. Nakai leva ti mailoga e ia ko e tagata ne putoia ke he tauteaga he tau tapaka ne moumou e poaki ha Iesu ke fakaalofa ke he katofia. (Mataio 22:39) He fakahiku ko e ‘tagata gahua fonua tapaka ne mitaki lahi’ ko e ‘kelipopo mitaki lahi’ mōli, ati pamu oti e Charles e ulu akau tapaka haana aki e vai kona. Ne holo a ia ki mua ke hoko ke he tukuleleaga mo e papatisoaga ti ko e mogonei ko e paionia tumau mo e fekafekau lagomatai a ia.

¹⁹ Nakai fakauaua ai kua luelue e Iehova e tau motu ke he puhala he fakamatala ke he lalolagi katoa, mo e tau mena kua manako—ko e tau tagata—kua o mai ki loto. (Hakai 2:7) Ko Pedro, ne nofo i Potukala, ne hu ke he aoga lotu he 13 e tau haana he moui. Ko e foliaga haana ke eke mo misionare mo e ke fakaako e Tohi Tapu. Nakai leva he mole, mogoia, ne toka e ia e aoga ha kua tote maka e fakaaogaaga ke he Tohi Tapu he tau vahega haana. Ono e mahina he mole ne kumikumi a ia ke he gahuahuaaga he manamanatuaga he univesiti i Lisbon. Ne nofo a ia he anitī haana, ko e taha he Tau Fakamoli a Iehova, ne fakamalolō ki a ke fakaako e Tohi Tapu. He magaaho ia, ne nakai iloa e Pedro ko e mena fai Atua, po ke fifili e ia ko e mena lata ke fakaako e Tohi Tapu po ke nakai. Ne tutala a ia ke he porofesa he gahuahuaaga he manamanatuaga hagaao ke he lotolotoua. Ne pehē e porofesa kua fakaako he kumikumi ke he gahuahuaaga he manamanatuaga ko e tau tagata ne nakai maeke ke taute e tau fifiliaga ne hihiga ke tamate ne ia a ia. Ko e mena ia, ne fifili a Pedro ke fakaako e Tohi Tapu. Ne nakai la leva e papatiso haana ti taute ai mogonei e tau fakaakoaga Tohi Tapu ni haana.

20. Ko e ha kua olioli a tautolu ko e fakamatala ke he tau motu kua talahau fakalaulahi ai?

²⁰ Nakai la iloa agaia e tautolu e laulahi he fakamatala ka taute ke he tau motu, po ke nakai iloa e tautolu e aho mo e magaaho ka hoko mai e fakaotiaga. Iloa ni e tautolu to hoko mafiti mai. Olioli a tautolu ha kua laulahi e fakamatala he tala mitaki ka e taha he tau fakakiteaga loga kua tata e magaaho ma e Kautu he Atua ke hukui e tau fakatufono he tagata. (Tanielu 2:44) He tau tau takitaha, totou miliona ne foaki e magaaho ke talia e tala mitaki, ti fakaheke e ha tautolu a Atua, ko Iehova. Kia eke mo fifiliaga ha tautolu ke tumau e tua fakamōli mo e fakalataha mo e tau matakainaga ha tautolu he lalolagi katoa ke fakatumau ke lavelave ke he gahua fakamatala ke he tau motu oti kana. He taute pihia, to fakahao e tautolu a tautolu mo lautolu ne fanogonogo ki a tautolu.—1 Timoteo 4:16.

Manatu Nakai e Koe?

• Ko e ha e Mataio 24:14 ko e perofetaaga mua ue atu?

• Ko e heigoa e tau laliaga ne taute he tau Kerisiano fakamua atu he fakamatala, ti ko e heigoa e fua?

• Maeke fēfē e Tau Tagata Fakaako he Tohi Tapu ke maama e lata ke fakamatala ke he tau motu oti kana?

• He manamanatu ke he gahua he tau tagata a Iehova he tau he fekafekauaga kua mole, ko e heigoa kua atihake a koe?

[Tau Hūhū he Fakaakoaga]

[Fakafonua he lau 29-32]

HOKOTAKI HE FEKAFEKAUAGA HE TAU HE 2005 TAU FAKAMOLI A IEHOVA HE LALOLAGI OTI

 (Kikite pega volume)