Ko e Fakaholoaga ke Fakamooli e Finagalo he Atua

‘Kua fakagahua ni he Atua e tau mena oti ke lata mo e pule he hana finagalo.’—EFESO 1:11.

1. Ko e ha ati feleveia ai e tau fakapotopotoaga oti he Tau Fakamoli a Iehova ia Aperila 12, 2006?

HE AFIAFI Lotu, ia Aperila 12, 2006, kavi ke 16 e miliona tagata ka fakapotopoto ke fakamanatu e Kaiaga Afiafi he Iki. Ke he tau matakavi feleveiaaga takitaha, to fakatoka ai e laulau ne ha ha ai e areto nakai fakaea, ne hukui e tino he Keriso, mo e uaina kula, ne fakatai e toto fakamaligi haana. Ke he fakahikuaga he lauga ne fakamaama e kakano he Fakamanatuaga he matulei ha Iesu, ko e tau mena fakatai nei—fakamua ko e areto, ti ko e uaina—ka uta viko ia lautolu oti ne ha ha ai. He tau fakapotopotoaga gahoa he Tau Fakamoli a Iehova, to taha po ke ua mai ia lautolu ka kai mo e inu e tau mena fakatai. Ka e, he tau feleveiaaga loga, kua nakai fai tagata ne kai mo e inu. Ko e ha ne tokogahoa ni e tau Kerisiano, ko lautolu ne amaamanaki ke moui he lagi, ka kai mo e inu, ka ko e laulahi, ko lautolu ne amaamanaki ke moui tukulagi he lalolagi, kua nakai kai mo e inu?

2, 3. (a) Puhala fēfē ne tufugatia e Iehova ke lata mo e finagalo haana? (e) Ko e heigoa e kakano ne tufugatia e Iehova e lalolagi mo e tau tagata?

² Ko Iehova ko e Atua he finagalo. He fakamooli e finagalo haana, ‘kua fakagahua ni e ia e tau mena oti ke lata mo e pule he hana finagalo.’ (Efeso 1:11) Ne tufugatia fakamua e ia e Tama fuataha haana. (Ioane 1:1, 14; Fakakiteaga 3:14) Ti, puhala he Tama nei, ne tufugatia e Iehova e magafaoa he tau tama taane fakaagaaga ti fakahiku ko e lagi likoliko, fakalataha mo e lalolagi mo e tau tagata i ai.—Iopu 38:4, 7; Salamo 103:19-21; Ioane 1:2, 3; Kolose 1:15, 16.

³ Ne nakai tufugatia e Iehova e lalolagi ke eke mo fonua tivi ke fakalahi aki e magafaoa he tau tama fakaagaaga haana i luga he lagi, tuga ne fakaako he tau lotu a Kerisitenitome. Ne tufugatia ai e ia mo e finagalo pauaki, ke “nonofo ai e tau tagata.” (Isaia 45:18) Ne tufugatia he Atua e lalolagi ma e tagata mo e tagata ma e lalolagi. (Salamo 115:16) To eke e lalolagi katoa mo parataiso, ne pukeina he tau tagata tututonu, ka gahua mo e leveki e lalolagi. Ne nakai tuku e amaamanakiaga ke he hoa tagata fakamua ke o hake ke he lagi he magaaho fakamui.—Kenese 1:26-28; 2:7, 8, 15.

Ne Paleko e Finagalo a Iehova

4. Puhala fēfē ne paleko e puhala ne fakagahua e Iehova e pule katoatoa he kamataaga tonu he fakamauaga tuai he tagata?

⁴ Ne totoko mo e foli e tama fakaagaaga he Atua ke moumou e finagalo a Iehova, he ekefakakelea e mena fakaalofa faka-Atua ko e fifiliaga atāina. Ne matahavala a ia ke he mafola ne logona hifo e lautolu oti ne omaoma fakamakai ke he pule katoatoa a Iehova. Ne tataki e Satani e hoa tagata fakamua ke he puhala he tu tokotaha mai he Atua. (Kenese 3:1-6) Ne nakai fakatikai e ia e malolō ha Iehova, ka e paleko e ia e puhala ne fakagahua e pule katoatoa Haana ati paleko ai e tonuhia Haana ke pule. Ko e mena ia, ne mafuta hake e matakupu lahi he pule katoatoa ha Iehova he lalolagi nei, he kamataaga tonu he fakamauaga tuai he tagata.

5. Ko e heigoa e matakupu ke uaaki ne fakatū, ti hagaao ki a hai?

⁵ Putoia lahi ke he matapatu matakupu ia he pule katoatoa he lagi mo e lalolagi ko e matakupu ke uaaki ne fakatū e Satani he vahā a Iopu. Ne paleko e Satani e manako he tau mena momoui ha Iehova he omaoma ki a Ia mo e he fekafekau ki a Ia. Ne talahau e Satani kua taute pihia e lautolu ha ko e tau manako  lotokai ti ka kamatamata to fuluhi kehe mai a lautolu he Atua. (Iopu 1:7-11; 2:4, 5) Pete he fakatū ha ko e tau tagata ne fekafekau ki a Iehova, ne putoia foki e paleko nei ke he tau tama fakaagaaga he Atua, mo e ke he Tama fuataha foki ha Iehova.

6. Puhala fe ne eke a Iehova ke tua fakamooli ke he haana finagalo mo e ke he haana higoa?

⁶ He tua fakamooli ke he haana finagalo mo e ke he kakano he haana higoa, ne taute e Iehova a ia ko e Perofeta mo e Fakamoui. * Ne tala age a ia ki a Satani: “To fakatupu e au e faitaua kia mua mo e fifine, ko e hau a [tega] mo e hana [tega]; to tatuki e ia hau a ulu, ka e tatuki ni e koe hana muihui.” (Kenese 3:15, fakatatai NW) Puhala he Tega he “fifine” haana, po ke vala he fakatokatokaaga haana he lagi, to tali e Iehova e paleko ha Satani mo e foaki ke he tau hologa a Atamu e amaamanakiaga he laveakiaga mo e moui.—Roma 5:21; Kalatia 4:26, 31.

Ko e “Mena Galo he Hana Finagalo”

7. Ko e heigoa e finagalo ne fakakite e Iehova puhala he aposetolo ko Paulo?

⁷ I loto he haana tohi ke he tau Kerisiano i Efeso, ne fakamaama fakamitaki he aposetolo ko Paulo e puhala ne fakaholo aki e Iehova e tau mena ke fakamooli aki haana a finagalo. Ne tohia e Paulo: “Kua fakailoa mai e ia kia tautolu e mena galo he hana finagalo, ke lata mo e pule totonu hana kua manatu ai a ia ke he hana finagalo [“ma e fakaholoaga,” NW]; kia fakamaopoopo ai e ia e tau mena oti kia Keriso ka hoko mai e katoatoaga he tau tau ne kotofa, ko e tau mena ha he lagi katoa mo e tau mena ha he lalolagi.” (Efeso 1:9, 10) Ko e finagalo lilifu a Iehova ke tamai e lagi mo e lalolagi katoatoa ne nonofo auloa ai e tau mena momoui ne omaoma fakamakai ke he pule katoatoa haana. (Fakakiteaga 4:11) To fakatapu ai e higoa haana, fakakite mooli a Satani ko e pikopiko, mo e fakakatoatoa e finagalo faka-Atua “he lalolagi, tuga ne eke ke he lagi.”—Mataio 6:10.

8. Ko e heigoa e kakano he kupu ne fakaliliu “fakaholoaga”?

⁸ Ko e “pule totonu,” po ke finagalo a Iehova, to fakamooli puhala he “fakaholoaga.” Ne fakaaoga e Paulo e kupu ne kakano mooli ko e “levekiaga he kaina.” Kua hagaao, nakai ke he fakatufono, tuga e Kautu faka-Mesia, ka ke he puhala ne leveki ai e tau mena. * Ko e puhala homo ue atu ka uta fakaholoholo e Iehova e tau mena ke fakakatoatoa aki e finagalo haana, kua putoia ai e “mena galo” ka fakamaama fakahaga ke he tau senetenari a mui.—Efeso 1:10; 3:9, tau matahuitala, NW.

9. Puhala fe ne fakakite fakahaga e Iehova e mena galo he finagalo haana?

⁹ Puhala he tau maveheaga loga, ne fakakite fakahaga e Iehova e puhala ka fakamooli aki e finagalo haana hagaao ke he Tega ne mavehe i Etena. Ne fakakite he maveheaga haana ki a Aperahamo ko e Tega ne mavehe to hau ke he lalolagi he laini a Aperahamo, mo e ko e puhala ka monuina ai e “tau motu oti kana he lalolagi.” Ne talahau foki he maveheaga ia to fai foki ka fakalataha ke he vala fakamua he tega. (Kenese 22:17, 18) Ko e maveheaga he Fakatufono ne taute mo e tau Isaraela he tino kua fakakite e finagalo a Iehova ke moua e “kautu he tau ekepoa.” (Esoto 19:5, 6) Ne fakakite he maveheaga mo Tavita to eke e Tega mo Ulu he Kautu ke he tukulagi tukumuitea. (2 Samuela 7:12, 13; Salamo 89:3, 4) He takitaki  he maveheaga he Fakatufono e tau Iutaia ke he Mesia, ne fakakite e Iehova e falu faahi foki he fakamooliaga he finagalo haana. (Kalatia 3:19, 24) Ko e tau tagata ka fakalataha mo e vala fakamua he tega ka ha ha he “kautu he tau ekepoa” ne talahau tuai mo e tamai ke he “maveheaga fou” ko e “Isaraela” foou, fakaagaaga.—Ieremia 31:31-34; Heperu 8:7-9. *

10, 11. (a) Fakakite fēfē e Iehova e Tega ne talahau tuai? (e) Ko e ha ne hau e Tama fuataha he Atua ke he lalolagi?

¹⁰ Ke felauaki mo e fakaholoaga he finagalo faka-Atua, kua hoko mai e magaaho ma e Tega ne talahau tuai, ke kitia ke he lalolagi. Ne fakafano mai e Iehova e agelu ko Kaperielu ke talahau ki a Maria to fanau e ia e tama taane ka fakahigoa ko Iesu. Ne pehē e agelu ki a ia: “To homo a ia, to talahaua a ia ko e Tama hana ne Mua ue atu; to foaki atu he Iki ko e Atua kia ia e nofoaiki a Tavita hana matua; to eke a ia mo Patuiki he faoa a Iakopo tukulagi; ko e hana kautu foki nakai fai fakaotiaga ia.” (Luka 1:32, 33) Ko e kitiaaga he Tega ne mavehe kua maaliali ai.—Kalatia 3:16; 4:4.

¹¹ To hau e Tama fuataha ha Iehova ke he lalolagi ke kamatamata ke hoko ke he mate. Ko e tali mitaki katoatoa ke he paleko a Satani to ha ha ni he malolō ha Iesu. To tumau nakai a ia ke tua fakamooli ke he haana Matua? Kua putoia ke he mena nei e mena galo. Ne fakamaama he aposetolo ko Paulo e matagahua ha Iesu: “Kua talahau oti ni kua lahi ni e kupu galo ke he mahani Atua; Kua fakakite mai [a ia] ke he tino tagata, kua talahaua tututonu ke he [a]gaga, kua kitia he tau agelu, kua tuogo atu ke he tau motu kehe, kua tua ki ai a lautolu ha ha he lalolagi, kua ta hake ke he monuina.” (1 Timoteo 3:16) E, ha ko e fakamooli nakai maueue haana ato mate a ia, ne foaki e Iesu e tali mauokafua ke he paleko ha Satani. Ka ko e falu matafeiga ke he mena galo to fakakite fakamui.

Ko e “Tau Mena Galo he Kautu he Atua”

12, 13. (a) Ko e heigoa taha faahi he “tau mena galo he kautu he Atua”? (e) Ko e heigoa ne putoia he fakakaupa e Iehova e numera ne fifili mai he tau tagata ne o hake ke he lagi?

¹² He magahala he taha he tau fenoga fakamatala haana i Kalilaia, ne fakakite e Iesu kua matutaki lahi e mena galo ke he haana fakatufono he Kautu faka-Mesia. Ne tala age a ia ke he tau tutaki haana: “Kua foaki atu kia mutolu ke iloa ai e mutolu e tau mena galo he kautu he lagi [“kautu he Atua,” Mareko 4:11].” (Mataio 13:11) Ko e taha faahi he mena galo ia kua putoia e fifiliaga a Iehova he “fuifui mamoe gahoa” he tau tagata ne 144,000 ke fakalataha mo e Tama haana ke eke mo vala he tega, ke pule mo ia i luga he lagi.—Luka 12:32; Fakakiteaga 14:1, 4.

¹³ Ha kua tufugatia e tau tagata ke momoui ke he lalolagi, kua lata ke ha ha ai e “tagata fou” ha Iehova ke maeke he falu tagata ke o hake ke he lagi. (2 Korinito 5:17) He tala ko e taha ia lautolu ne fifili ke moua e  amaamanakiaga mua ue atu he lagi, ne tohia he aposetolo ko Peteru: “Fakaaue ke he Atua ko e Matua he Iki ha tautolu ko Iesu Keriso, ko ia kua fanau fakafou ai a tautolu ha ko e hana fakaalofa lahi, kia moua e tautolu e amaamanaki kua moui, ha ko e liu tu mai a Iesu Keriso mai ia lautolu kua mamate. Kia moua e tufaaga nakai tuai popo, nakai fai kelea nakai tuai fifigo, kua toka ke he lagi ma tautolu.”—1 Peteru 1:3, 4.

14. (a) Puhala fe ne putoia e tau tagata nakai ko e tau Iutaia ke he “tau mena galo he kautu he Atua”? (e) Ko e ha kua maeke ia tautolu ke maama e “tau mena hokulo ia he Atua”?

¹⁴ Ko e taha vala he mena galo ne hagaao ke he fakatufono he Kautu anoiha ko e finagalo he Atua, ke fakalataha e tau tagata nakai ko e tau Iutaia ke he numera tote he tau tagata ka ui ke pule mo e Keriso i luga he lagi. Ne fakamaama e Paulo e faahi nei he “fakaholoaga” a Iehova, po ke puhala ne leveki atu ke he fakamooliaga he finagalo haana: “Nakai fakailoa atu ai ke he tau tagata he tau hau kehe, tuga e fakailoa mai nai he [a]gaga ke he hana tau aposetolo tapu mo e hana tau perofeta tapu; kia eke e tau motu kehe mo hakeaga fakalataha mo tino taha kia igatia fakalataha foki ke he hana mena kua talahaua mai kia Keriso ke he vagahau mitaki.” (Efeso 3:5, 6) Ko e iloaaga he vala nei ke he mena galo kua fakakite ke he “tau aposetolo tapu.” Pihia foki he vaha nei, kaeke nakai ko e lagomatai he agaga tapu, to nakai maama e tautolu e “tau mena hokulo ia he Atua.”—1 Korinito 2:10; 4:1; Kolose 1:26, 27.

15, 16. Ko e ha ne fifili e Iehova a lautolu ka pule fakalataha mo e Keriso mai he tau tagata?

¹⁵ “Ko e teau e afe mo e fagofulu ma fa e afe” ne kitia hane tūtū mo e “Punua mamoe” i luga he Mouga ko Siona he lagi kua talahau ke  “fakafua mai he lalolagi,” “ne fakafua mai he tau tagata, ko e tau fua uluaki ma e Atua mo e Punua mamoe,” ko Keriso Iesu. (Fakakiteaga 14:1-4) Ne fifili e Iehova e uluaki he tau tama taane haana he lagi ke eke mo vala fakamua he tega ne mavehe i Etena, ka ko e ha ne fifili e ia mai he tau tagata a lautolu ka fakalataha mo e Keriso? Ne fakamaama he aposetolo ko Paulo ko e numera fakakaupā nei “kua uiina he hana [Iehova] finagalo,” “ke lata mo e pule totonu he hana finagalo.”—Roma 8:17, 28-30; Efeso 1:5, 11; 2 Timoteo 1:9.

¹⁶ Ko e finagalo a Iehova ke fakatapu e higoa lahi mo e tapu haana mo e fakamatalahi haana a pule katoatoa ke he lagi mo e lalolagi. Ha ko e haana a “fakaholoaga” pulotu ne nakai fai fakatataiaga, po ke puhala ne leveki ai e tau mena, ne fakafano mai e Iehova e Tama uluaki haana ke he lalolagi, ne kamatamata a ia ke hoko ke he mate. Mua atu, ne fifili e Iehova ko e fakatufono he Kautu faka-Mesia he haana Tama to fakalataha ki ai e tau tagata ne fakamatalahi e pule katoatoa Haana ke hoko ke he mate.—Efeso 1:8-12; Fakakiteaga 2:10, 11.

17. Ko e ha kua lata ia tautolu ke fiafia ko e Keriso mo e tau pule fakalataha haana na momoui ko e tau tagata he magaaho fakamua?

¹⁷ Ne fakakite e Iehova e fakaalofa lahi haana ma e tau hologa a Atamu he fakafano mai e Tama haana ke he lalolagi mo e he fifili mai he tau tagata a lautolu ka eke mo tau hakeaga fakalataha mo e Tama he fakatufono he Kautu. Aoga fēfē e mena nei ke he falu ne fakakite e tua fakamooli ki a Iehova, tali mai ia Apelu? He fanau mai ke fakatupa ke he hala mo e mate, kua lata e tau tagata nakai mitaki katoatoa ke fakamalolō fakaagaaga mo e fakatino mo e tamai ke he mitaki katoatoa, ke felauaki mo e finagalo fakamua a Iehova ma e tagata. (Roma 5:12) Ko e mafanatia ha ia ma lautolu ne onoono fakamahino atu ke he moui tukulagi he lalolagi, ke iloa to fakakite age he Patuiki ha lautolu e fakaalofa mo e maamaaga totonu tuga ne taute e ia ke he tau tutaki haana he magahala he fekafekauaga haana he lalolagi! (Mataio 11:28, 29; Heperu 2:17, 18; 4:15; 7:25, 26) Ti ko e fakamalolō ha ia ma lautolu ke mailoga ko e tau patuiki-ekepoa ka fakalataha mo e Keriso i luga he lagi kua fitā he eke mo tau tagata taane mo e tau fifine he tua, ne fakauka ke he tau lolelole fakatagata mo e fakafitā ke he tau paleko he moui tuga ni a tautolu!—Roma 7:21-25.

Finagalo Nakai Kaumahala ha Iehova

18, 19. Ko e ha e tau kupu a Paulo ia Efeso 1:8-11 kua maama lahi ki a tautolu, ti ko e heigoa ka fakatutala a tautolu ki ai he vala tala ka mui mai?

¹⁸ Kua maama mitaki e tautolu mogonei e kakano he tau kupu a Paulo ke he tau Kerisiano fakauku, ne moua he Efeso 1:8-11. Ne pehē a ia kua fakailoa e Iehova ki a lautolu e “mena galo he hana finagalo,” ko lautolu ne ‘fifili ko e tau hakeaga’ mo Keriso, ti ko lautolu kua “kotofa tuai ke lata mo e finagalo hana kua gahua ni e tau mena oti ke lata mo e pule he hana finagalo.” Kitia ai mogoia e tautolu kua felauaki ai mo e “fakaholoaga” mitaki lahi a Iehova ke fakamooli e finagalo haana. Lagomatai foki a tautolu ke maama ko e ha ne tokofiha ni e tau Kerisiano ne o atu ke he Kaiaga Afiafi he Iki ka kai mo e inu ke he tau mena fakatai.

¹⁹ He vala tala ka mui mai, to kitia e tautolu e kakano he Fakamanatuaga he matulei he Keriso ke he tau Kerisiano ne ha ha ai e amaamanakiaga he lagi. To ako foki e tautolu e kakano kua lata e totou miliona ne ha ha ai e amaamanakiaga ke moui tukulagi he lalolagi ke fiafia lahi ke he tau mena fakatai he Fakamanatuaga.

[Tau Matahui Tala]

Ko e Puhala he Fakamanatu

• Ko e ha ne tufugatia e Iehova e lalolagi mo e tuku e tagata i ai?

• Ko e ha ne latatonu ma e Tama fuataha ha Iehova ke kamatamata ke he lalolagi?

• Ko e ha ne fifili e Iehova mai he tau tagata a lautolu ka pule fakalataha mo e Keriso?

[Tau Huhu he Fakaakoaga]