Fakamamao he Tapuakiaga Fakavai!
Fakamamao he Tapuakiaga Fakavai!
‘Kia o mai a mutolu mai loto ia lautolu, mo e vevehe kehe a mutolu, kua pihia mai ai e Iehova, aua foki neke piki atu a mutolu ke he mena kelea.’—2 KORINITO 6:17.
1. Ko e heigoa e tuaga fakaagaaga ne ha ha i ai e tokologa he tau tagata loto fakamooli?
KUA tokologa e tagata loto fakamooli ne nakai iloa e kupu mooli hagaao ke he Atua mo e vahā anoiha he tagata. He nakai moua e tau tali ke he tau manako fakaagaaga ha lautolu, kua fakaligoa mo e fakauaua a lautolu. Kua totou miliona hane fakatupa ke he tau matakutaku aitu, tau aga tuai, mo e tau fakamanatuaga ne fakahogohogomanava e Tufuga ha tautolu. Ti liga, kua ha ha ia koe e tau tuuta kaina mo e tau magafaoa ne talitonu ke he afi i helo, Atua tolu taha, solu nakai mate, po ke falu fakaakoaga fakavai foki.
2. Ko e heigoa ne taute he tau takitaki lotu, ti ko e heigoa e fua?
2 Ko e heigoa ati holofa ai e pouligia fakaagaaga nei? Ofo ai, ko e lotu—ti tonu lahi ke he tau fakatokatokaaga he lotu mo e tau takitaki ne fakahakehake e tau manatu ne mamao ke he tau manatu he Atua. (Mareko 7:7, 8) Ko e fua, kua tokologa e tagata ne fakahēhē ke talitonu hane tapuaki a lautolu ke he Atua mooli, ka ko e mooli kua fakahogohogomanava e lautolu a ia. Ko e lotu fakavai ne fakatupu mooli e tuaga fakaatukehe nei.
3. Ko hai e matapatu fakahakehake he lotu fakavai, mo e fakamaama fēfē a ia he Tohi Tapu?
3 Kua ha ha ai e tagata nakai kitia ne lalago e lotu fakavai. Hagaao ki a ia, ne pehē e aposetolo ko Paulo: “Kua fakapouli he atua he lalolagi nai e tau manatu ha lautolu kua nakai tua, neke kikila atu kia lautolu e maama he vagahau mitaki he lilifu a Keriso, ko ia kua fakatai ke he Atua.” (2 Korinito 4:4) Ko e “atua he lalolagi nai” ko Satani ni hokoia ko e Tiapolo. Ko ia e matapatu fakahakehake he tapuakiaga fakavai. “Ko Satani ni kua faliu e ia a ia mo agelu he maama,” he tohia e Paulo. “Haia ni, nakai ko e mena lahi kaeke ke faliu hana tau fekafekau ke tuga e tau fekafekau he tututonu.” (2 Korinito 11:14, 15) Ne taute e Satani e tau mena kelea ke tuga e mitaki mo e fakahēhē e tau tagata ke talitonu e tau pikopiko.
4. Ko e heigoa ne talahau he Fakatufono he Atua ki a Isaraela i tuai hagaao ke he tau perofeta fakavai?
4 Ko e mena ia ni ati fakatikai fakamalolō he Tohi Tapu e lotu fakavai! Ke tuga anei, ne hataki fakatonu he Fakatufono faka-Mose e tau tagata fifili he Atua ke totoko ke he tau perofeta fakavai. Ko e ha tagata ne fakahakehake e tau fakaakoaga nakai mooli mo e tapuakiaga he tau atua fakavai kua lata ke ‘kelipopo he vagahau ke o kehe ia Iehova.’ Ne poaki ke he tau Isaraela ke ‘tuku kehe e kelea ia lautolu.’ (Teutaronome 13:1-5) E, kua kelea e lotu fakavai ke he kitiaaga ha Iehova.—Esekielu 13:3.
5. Ko e heigoa e tau hatakiaga kua lata ke omaoma a tautolu ki ai he vahā nei?
5 Ne fakaata e Iesu Keriso mo e tau aposetolo haana e tau logonaaga malolō ha Iehova hagaao ke he lotu fakavai. Ne hataki e Iesu e tau tutaki haana: “A mutolu mo e tau perofeta pikopiko; to o mai a lautolu kia mutolu mo e tau tapulu mamoe, ka ko loto ko e tau luko kakati haia.” (Mataio 7:15; Mareko 13:22, 23) Ne tohia e Paulo “kua fakakite mai foki e ita he Atua mai he lagi ke he tau mahani matahavala, mo e tau mahani hepehepe oti kana he tau tagata, ko lautolu haia kua taofi e kupu moli.” (Roma 1:18) Kua latatonu mogoia he tau Kerisiano mooli ke omaoma ke he tau hatakiaga nei mo e fakamamao mai he ha tagata ne tautaofi e kupu mooli he Kupu he Atua po kua folafola e tau fakaakoaga fakavai!—1 Ioane 4:1.
O Kehe Mai ia ‘Papelonia Lahi’
6. Kua fakatino fēfē a ‘Papelonia Lahi’ i loto he Tohi Tapu?
6 Manamanatu ke he puhala ne fakamaama he tohi ha Fakakiteaga he Tohi Tapu e lotu fakavai. Ne fakatino ai ke tuga e fifine fakataka ne pule ke he tau kautu loga mo e tau tagata i ai. Ko e fifine fakatai nei kua feuaki mo e tau patuiki loga ti kua konahia ke he toto he tau tagata tapuaki mooli he Atua. (Fakakiteaga 17:1, 2, 6, 18) Ne tohia he matalē haana e higoa ne felauaki mo e mahani kiva mo e teteki haana. Ko e higoa nei ko ‘Papelonia Lahi, ko e matua he tau fifine fakataka mo e tau mena vihiatia he lalolagi.’—Fakakiteaga 17:5.
7, 8. Puhala fe ne feuaki e lotu fakavai, ti ko e heigoa e tau fua?
7 Ko e fakamaama he Tohiaga Tapu ki a Papelonia Lahi kua felauaki tonu ke he tau lotu fakavai oti kana he lalolagi. Pete kua nakai kaufakalataha e tau lotu totou afe ke he taha ni e fakatokatokaaga he lalolagi, nukua matutaki katoatoa a lautolu ke he tau manatu mo e tau gahua. Tuga ne fakatino he fifine fakataka ia Fakakiteaga, kua lahi mahaki e fakaohoohoaga he lotu fakavai ke he tau fakatufono. Kua tatai mo e fifine nakai tua fakamooli ke he tau omonuo he fakamauaga haana, ne feuaki e lotu fakavai he taute e matutakiaga mo e tau pule fakapolitika kehekehe. “Ko mutolu, ko e tau tane faivao na e, mo e tau fifine faivao na e, kua iloa nakai e mutolu ko e kapitiga mo e lalolagi ko e faitaua haia ke he Atua?” he tohia he aposetolo ko Iakopo. “Hanai, kaeke ke fia kapitiga taha mo e lalolagi, kua eke a ia mo fi ke he Atua.”—Iakopo 4:4.
8 Ko e fioaki nei he lotu fakavai mo e tau fakatufono ati fua mai e matematekelea lahi ke he tau tagata. Ne mailoga he tagata Aferika he kumikumiaga fakapolitika ko Dr. Xolela Mangcu ko e “fakamauaga tuai he tagata kua pukeina he tau mena tutupu tuga e tau keliaga he tokologa ha ko e matutakiaga he tau lotu mo e tau politika.” Ne talahau foou he taha tohitala: “Ko e tau felatauaki kelea muitui mo e hagahaga kelea lahi he vahā nei . . . kua matapatu ni ke he lotu.” Ko e tau momoui he tau miliona nukua mamate ai ha ko e tau felatauaki ne lalago he tau lotu. Ne favale mo e kelipopo foki e Papelonia Lahi e tau fekafekau mooli he Atua, ti konahia ke he toto ha lautolu, ke fakatai ki ai.—Fakakiteaga 18:24.
9. Fakakite fēfē e vihiatia a Iehova ke he tapuakiaga fakavai i loto he tohi ha Fakakiteaga?
9 Kua vihiatia e Iehova e tapuakiaga fakavai he fakakite fakamaali mai he mena ka tupu ki a Papelonia Lahi. Ne pehē e Fakakiteaga 17:16: “Ko e tau hoe foki ne hogofulu ne kitia e koe ke he manu favale, to fakavihia e lautolu e fifine fakataka mo e moumou a ia, mo e uta kehe hana tau tapulu, to kai foki e lautolu hana tino, mo e huhunu a ia ke he afi.” Fakamua, ne tafolo mo e tamate he manu favale makimaki a ia mo e kai haana tino. Ti, ko e heigoa ni ne toe to huhunu oti ke he afi. Tatai foki, nakai leva ti pihia e mena ka taute he tau fakatufono ke he lotu fakavai. To fakatupu ni he Atua e mena nei. (Fakakiteaga 17:17) Ko Papelonia Lahi, ko e kautu he tau lotu fakavai he lalolagi, kua hokotia ke he moumouaga. ‘To nakai tuai kitia a ia.’—Fakakiteaga 18:21.
10. Ko e heigoa e tuaga ha tautolu hagaao ke he lotu fakavai?
10 Ko e heigoa e tuaga kua lata ke uta he tau tagata tapuaki mooli hagaao ki a Papelonia Lahi? Kua nakai fai fakauaua e poakiaga he Tohi Tapu: “Haku motu na e, ati o kehe ā mutolu ia ia, neke fakalataha a mutolu mo ia ke he hana tau hala, neke moua foki a mutolu he hana tau malaia.” (Fakakiteaga 18:4) Ko lautolu ne manako ke hao kua lata ke o kehe mai he lotu fakavai neke tomui lahi. He nofo he lalolagi, ne talahau tuai e Iesu Keriso ko e tau aho fakamui, to tokologa ka talahau teao ke mumuitua ki a ia. (Mataio 24:3-5) Ki a lautolu ia, ne pehē a ia: “Nakai iloa ni e au a mutolu, kia o kehe a a mutolu ia au, ko mutolu ne eke e tau mahani kelea.” (Mataio 7:23) Ko e Patuiki hane pule mogonei, ko Iesu Keriso, kua nakai fai matutakiaga ke he lotu fakavai.
Fakamamao—Fēfē?
11. Ko e heigoa kua lata ke taute e tautolu ke fakamamao he tapuakiaga fakavai?
11 Kua fakamamao e tau Kerisiano mooli he tapuakiaga fakavai, he fakaheu e tau fakaakoaga he lotu fakavai. Kakano kua lata ia tautolu ke kalo mai he fakalataha ke he tau polokalama fakalotu he letio mo e televisoni pihia foki mo e tau tohi fakalotu ne fakahakehake e tau pikopiko hagaao ke he Atua mo e haana Kupu. (Salamo 119:37) Kua pulotu foki ia tautolu ke kalo mai he fakalataha ke he tau fakafiafiaaga mo e tau matagahua ne lalago he ha fakatokatokaaga ne kau mo e lotu fakavai. Lafi ki ai, kua nakai lalago e tautolu e lotu fakavai ke he ha puhala ni. (1 Korinito 10:21) He kalo mai he tau mena ia ka puipui a tautolu neke lautaki he taha tagata “ke he pulotu nakai aoga ke fakahehe ai, ke lata mo e kupu toka tuai he tau tagata, ke lata foki mo e tau kupu fakamua he lalolagi, ka e nakai lata mo Keriso.”—Kolose 2:8.
12. Maeke fēfē he tagata ke mumutu kehe mai he ha matutakiaga mo e tau fakatokatokaaga he lotu fakavai?
12 Ka e kua kaeke fakamau agaia e higoa he tagata ne manako ke eke mo taha he Tau Fakamoli a Iehova ke he lotu fakavai? Ke he mena fa mahani, ko e tohi ke fakaoti mai i ai kua eke mo fakamooliaga kua nakai liu manako e tagata ia ke eke mo taha he lotu fakavai. Kua aoga lahi foki ke taute he tagata e tau fifiliaga tonu ke kalo katoatoa mai neke pikitia fakaagaaga he tapuakiaga fakavai. Ko e tau mena taute he tagata ka eke mo Fakamoli kua lata ke fakamahino ke he fakatokatokaaga lotu mo e toloaga tagata kua fakaoti tuai e matutakiaga haana mo e lotu ia.
13. Ko e heigoa e fakatonuaga ne foaki he Tohi Tapu hagaao ke he lata ke fakamamao he tapuakiaga fakavai?
13 “Aua neke hahamo a mutolu mo e nakai tatai fakalataha mo lautolu kua nakai tua,” he tohia he aposetolo ko Paulo. “Ha ko e mena fakalataha fefe e tututonu mo e mahani kelea? Ke fakafetui fefe e maama mo e pouli? Ke loto fakalataha fefe a Keriso mo Pelialo? Po ke igatia fakalataha fefe a ia kua tua mo ia kua nakai tua? Ke loto fakalataha fefe e faituga he Atua mo e tau tupua? . . . Hanai, kia o mai a mutolu mai loto ia lautolu, mo e vevehe kehe a mutolu, kua pihia mai ai e Iki, aua foki neke piki atu a mutolu ke he mena kelea.” (2 Korinito 6:14-17) Kua omaoma a tautolu ke he tau kupu nei he fakamamao he tapuakiaga fakavai. Kua pehē foki kia e fakatonuaga ha Paulo kua lata ia tautolu ke fakamamao he tau tagata he tapuakiaga fakavai?
‘Kia O Fano a Mutolu mo e Pulotu’
14. Kua lata kia ia tautolu ke kalo katoatoa mai ia lautolu ne putoia ke he tapuakiaga fakavai? Fakamaama.
14 Kua lata kia e tau tagata tapuaki mooli ke tiaki katoatoa e tau matutakiaga mo e tau tagata ne putoia ke he tapuakiaga fakavai? Lata kia ia tautolu ke fakamamao ligo mai ia lautolu ne nakai tatai e tua mo e ha tautolu? Ko e tali, nakai. Ne pehē e poakiaga ke uaaki he tau poakiaga ne ua: “Kia fakaalofa atu a koe kia ia ne katofia a mua.” (Mataio 22:39) Kua fakatātā mooli e tautolu e fakaalofa ke he tau katofia ha tautolu he fakamatala e tautolu e tala mitaki he Kautu ki a lautolu. Kua kitia foki e fakaalofa ha tautolu ma lautolu he fakaako e tautolu e Tohi Tapu mo lautolu mo e fakailoa ki a lautolu ke lata ke fakamamao mai he tapuakiaga fakavai.
15. Ko e heigoa e kakano he “nakai ko e tau tagata he lalolagi”?
15 Pete he fakamatala atu e tala mitaki ke he tau katofia ha tautolu, ko e tau tutaki ha Iesu kua “nakai ko e tau tagata he lalolagi” a tautolu. (Ioane 15:19) Ko e kupu nei “lalolagi” kua hagaao ke he kaufakalatahaaga tagata ne mafoki kehe mai he Atua. (Efeso 4:17-19; 1 Ioane 5:19) Kua vevehe mai a tautolu he lalolagi he tiaki e tautolu e tau aga, puhala vagahau, mo e tau mahani ne fakahogohogomanava a Iehova. (1 Ioane 2:15-17) Mua atu, ke felauaki mo e matapatu fakaakoaga “ko e feoaki mo lautolu kua mahani kelea kua kelea ai e tau mahani mitaki,” kua kalo mai a tautolu he fakakapitiga mo lautolu ne nakai moui ke he tau tutuaga Kerisiano. (1 Korinito 15:33) Ke nakai eke mo tagata he lalolagi kua lata ke fakatumau “neke ilaila . . . he lalolagi.” (Iakopo 1:27) Ko e mena ia, ke vevehe mai he lalolagi kua nakai pehē kua lata ia tautolu ke nakai fai matutakiaga mo e falu a tagata.—Ioane 17:15, 16; 1 Korinito 5:9, 10.
16, 17. Kua lata ke fehagai fēfē e tau Kerisiano ki a lautolu ne nakai iloa e kupu mooli he Tohi Tapu?
16 Ti lata fēfē, mogoia, a tautolu ke fehagai mo lautolu ne nakai iloa e kupu mooli he Tohi Tapu? Ke he fakapotopotoaga i Kolose, ne tohia e Paulo: “Kia o fano a mutolu mo e iloilo ki mua ha lautolu i tua, mo e fakaaoga e mutolu e tau aho he mouiaga nai. Aua neke noa ha mutolu a tau kupu mo e fakaalofa, kia fakamasima ke he masima, kia iloa e mutolu ke tali fakatonu atu ke he tau tagata oti kana.” (Kolose 4:5, 6) Ne tohia he aposetolo ko Peteru: “Ka e fakatokoluga e Keriso ko e Iki i loto he ha mutolu a tau loto, ki a tauteute tumau ke tali atu ki mua ha lautolu oti ne huhu fakalahi atu ki a mutolu ma e kakano he amaamanakiaga ia mutolu, ka e taute pihia fakalataha mo e mahani molu mo e hokulo e fakalilifu.” (1 Peteru 3:15, NW) Ne fakatonu e Paulo e tau Kerisiano ke “aua neke eke fakakelea ke he taha, aua neke fa taufetoko, kia totonu, mo e fakakite e mahani molu ni ke he tau tagata oti kana.”—Tito 3:2.
17 Ko e Tau Fakamoli a Iehova, kua kalo mai a tautolu he favale po ke fakatokoluga ke he falu. Kua nakai fakaaoga foki e tautolu e tau kupu fakateaga ke ui aki e tau tagata he falu a lotu. Ka kua fakailoilo a tautolu, pihia foki ka nakai totonu po ke fakaaoga he tagata he fale, katofia, po ke tagata he gahuaaga e tau kupu vale.—Kolose 4:6; 2 Timoteo 2:24.
‘Kia Eke mo Fifitaki e Tau Kupu Tonu’
18. Ko e heigoa e tuaga fakalialia fakaagaaga ne hokotia ki ai falu ne liliu tua ke he tapuakiaga fakavai?
18 He mole e ako hagaao ke he tau kupu mooli he Tohi Tapu, ko e kelea ha ia kaeke ke liutua taha ke he tapuakiaga fakavai! Ne fakamaama he Tohi Tapu e tau fua fakaatukehe he taute pihia: “Ha ko e mena kaeke kua fehola kehe a lautolu mai he tau mena kelea he lalolagi ha kua maama mitaki ke he Iki, ko e Fakamoui ia ko Iesu Keriso, ka e liu foki lavelave ke he tau mena na ti mahala ni, ati au atu ai e mahani kelea he fakahikuaga ha lautolu ke he kamataaga ha lautolu. . . . Ka kua hoko kia lautolu e kupu fakatai mooli, Kua liu foki e kuli ke he hana ni a koko, mo e kupu ē, Ko e puaka ne koukou kua liu taveli foki a ia ke he pelapela.”—2 Peteru 2:20-22.
19. Ko e ha ne aoga lahi ke mataala tumau ke he ha mena ka fakahagahaga kelea e tuaga fakaagaaga ha tautolu?
19 Kua lata ia tautolu ke mataala tumau ke he ha mena ka fakahagahaga kelea e tuaga fakaagaaga ha tautolu. Nukua ha ha tumau ai e tau hagahaga kelea! Ne hataki he aposetolo ko Paulo: “Kua talahau fakatonu mai he [a]gaga, to o kehe e falu mai he tua ke he tau aho fakamui, to fanogonogo a lautolu ke he tau agaga ke fakahehe ai, mo e tau kupu he tau temoni.” (1 Timoteo 4:1) Kua nonofo a tautolu he “tau aho fakamui.” Ko lautolu ne nakai fakamamao he tapuakiaga fakavai “kua hikihikifano, mo e havilia he tau matagi oti he tau kupu fakaako, ko e pikopiko he tau tagata ke he tau lagatau kelea kua taute ke fakahehe ai.”—Efeso 4:13, 14.
20. Maeke fēfē ia tautolu ke puipui mai he tau fakaohoohoaga moumou he lotu fakavai?
20 Maeke fēfē ia tautolu ke puipui mai he fakaohoohoaga moumou he lotu fakavai? He manamanatu ke he tau mena oti ne foaki e Iehova. Kua moua e tautolu e Kupu he Atua, ko e Tohi Tapu. (2 Timoteo 3:16, 17) Ne foaki foki e Iehova e tau mena kai fakaagaaga loga puhala he “fekafekau fakamooli mo e loto matala.” (Mataio 24:45) He holo ki mua a tautolu ke he kupu mooli, nakai kia lata ia tautolu ke feaki e lolo ma e ‘mena kai kakano kua lata mo e tau tagata motua’ mo e manako ke fakalataha auloa ke he matakavi ka ako e tautolu e kupu mooli fakaagaaga? (Heperu 5:13, 14; Salamo 26:8) Kia fakamalolō a tautolu ke fakaaoga katoatoa e tau foakiaga ha Iehova ke lata ia tautolu ke ‘eke mo e fifitaki e tau kupu tonu’ ne logona e tautolu. (2 Timoteo 1:13) Ko e mena ia kua lata ia tautolu ke fakamamao he tapuakiaga fakavai.
Ko e Heigoa ne Ako e Koe?
• Ko e heigoa a ‘Papelonia Lahi’?
• Ko e heigoa kua lata ke taute e tautolu ke fakamamao he lotu fakavai?
• Ko e heigoa e tau hagahaga kelea ke he tuaga fakaagaaga ha tautolu ne kua lata ke kalo mai i ai?
[Tau Hūhū he Fakaakoaga]
[Fakatino he lau 16]
Iloa nakai e koe ko e ha ne fakatino a ‘Papelonia Lahi’ ko e fifine fakataka?
[Fakatino he lau 17]
‘Papelonia Lahi’ kua hokotia ke he moumouaga
[Fakatino he lau 18]
Fakatātā e tautolu e “mahani molu mo e hokulo e fakalilifu” ki a lautolu ne nakai fakalataha ke he tau taofiaga ha tautolu