Hokotia ke he Tau Tuaga he Papatisoaga Faka-kerisiano

“Ke lekua he ha ke nakai papatiso ai au?”—GAHUA 8:36.

1, 2. Kamata fēfē e Filipo e fakatutalaaga mo e takitaki Aitiope, ti ko e heigoa ne kitia ke he hihiga fakaagaaga he tagata nei?

HE TAHA po ke ua e tau he mole e mate ha Iesu, ko e tagata gahua fakatufono ne fenoga atu he faahi toga he puhalatū mai i Ierusalema ki Kasa. Ha kua lolelole he heke he nofoa fakataveli he liga 1,500 kilomita he mamao i mua. Ko e tagata fakamooli nei ne fenoga mai i Aitiope ki Ierusalema ke tapuaki ki a Iehova. He loa e puhala ne liu mai, ne fakaaoga fakamitaki e ia e magaaho haana he totou e Kupu he Atua—ko e fakakiteaga he tua he tagata ia. Ne mailoga e Iehova e tagata fakamooli nei, mo e puhala he agelu, ne takitaki e Ia e tutaki ko Filipo ke fakamatala ki a ia.—Gahua 8:26-28.

² Ne mukamuka a Filipo ke kamata e fakatutalaaga, ha kua totou fakaleo lahi e takitaki Aitiope, ko e aga fakamotu he vahā ia. Ti, maeke a Filipo ke logona kua totou a ia nei he tohi vakai ha Isaia. Taha e hūhū mukamuka mai ia Filipo ne fakalagalaga e fiafia he tagata: “Kua maama nakai kia koe e tau mena kua totou ai e koe?” Ne takitaki e mena nei ke he fakatutalaaga he Isaia 53:7, 8. Fakahiku ai, “kua fakamatala atu [e Filipo] kia ia e tala mitaki kia Iesu.”—Gahua 8:29-35.

3, 4. (a) Ko e ha ne nakai fakamule a Filipo ke papatiso e Aitiope? (e) Ko e heigoa e tau hūhū ka fakatutala a tautolu ki ai mogonei?

³ Nakai leva, ne maama he Aitiope e gahua ha Iesu ke he finagalo he Atua, fakalataha mo e manako ke eke mo tutaki papatiso he Keriso. “Ke lekua he ha ke nakai papatiso ai au?” he hūhū a ia ki a Filipo he mailoga e vai ne tata atu. Mooli, ko e tau tutuaga pauaki anei. Hanei e tagata  kua tua ne fitā e tapuaki ke he Atua ko e Iutaia liliuina. To liga nakai fai magaaho foki a ia ke papatiso ke he vahā loa. Aoga lahi ai, kua maama he tagata nei e manako he Atua ma haana, ti manako a ia ke tali loto katoa. Ne talia fiafia e Filipo e ole haana, ti ko e magaaho ne oti e papatiso he Aitiope, “kua fano foki a ia he hana fenoga mo e fiafia.” Nakai fakauaua ai ne eke a ia mo tagata fakamatala makutu he tala mitaki he motu haana.—Gahua 8:36-39.

⁴ Pete ko e tau lakaaga he tukuleleaga mo e papatisoaga kua nakai uta fakateaga po ke fakatepetepe, ne fakakite he fakataiaga ke he takitaki Aitiope kua fai magaaho ne papatiso e tau tagata he nakai leva e logona he kupu mooli he Kupu he Atua. * Ti, kua tonu ke manamanatu ke he tau hūhū na: Ko e heigoa e vahega tauteuteaga kua lata fakamua to hoko e papatisoaga? Laulahi fēfē e lata he matakupu ke he tau tau moui? Ko e heigoa e holo ki mua fakaagaaga kua lata ke kitia fakamua to papatiso e tagata? Ki luga he tau mena oti, ko e ha kua manako a Iehova ke he tau fekafekau haana ke taute e lakaaga nei?

Ko e Maveheaga Mauokafua

5, 6. (a) Tali fēfē e tau tagata he Atua i tuai ke he fakaalofa ha Iehova? (e) Ko e heigoa e fakafetuiaga tata mo e Atua kua olioli auloa he magaaho ka papatiso a tautolu?

⁵ He mole e fakahao he tau Isaraela mai i Aikupito, ne makai a Iehova ke talia a lautolu ko e “koloa uho” haana, ke fakaalofa mo e puipui a lautolu mo e fakatu a lautolu ko e “motu tapu.” Ke moua e tau monuina ia, mogoia, ne lata he tau tagata ke tali ke he puhala mauokafua ke he fakaalofa he Atua. Ne taute e lautolu e mena nei he talia ke taute e “tau kupu oti ia ne poaki mai ai e Iehova” mo e fakatu e maveheaga mo ia. (Esoto 19:4-9) He senetenari fakamua, ne poaki a Iesu ke he tau tutaki haana ke taute tutaki ke he tau tagata he tau motu oti kana, ti ko lautolu ne talia e fakaakoaga haana ka papatiso. Ko e fakafetuiaga mitaki mo e Atua ne falanaki ke he tua ia Iesu Keriso ne mui mai e papatisoaga.—Mataio 28:19, 20; Gahua 2:38, 41.

⁶ Ko e tau tala faka-Tohi Tapu nei kua fakakite kua fakamonuina e Iehova a lautolu kua taute mo e taofi ke he maveheaga tukulagi ke fekafekau ki a ia. Ma e tau Kerisiano, ko e tau lakaaga kua lata e tukuleleaga mo e papatisoaga ne takitaki ke he fakamonuina a Iehova. Kua fifili a tautolu ke muitua haana tau puhala mo e tutuli haana takitakiaga. (Salamo 48:14) Fakahiku ai, ne tataki e Iehova a tautolu he lima mo e takitaki a tautolu ke he puhala kua lata ia tautolu ke o ai.—Salamo 73:23; Isaia 30:21; 41:10, 13.

7. Ko e ha e tukuleleaga mo e papatisoaga ko e fifiliaga fakatagata?

⁷ Ko e fakaohoohoaga ma tautolu ke taute e tau lakaaga nei kua lata ke eke mo fakaalofa ma Iehova mo e manako ke fekafekau ki a ia. Nakai lata ha tagata ke papatiso ha kua tala age taha tagata ki a ia kua leva e fakaako haana po ke kua papatiso e tau kapitiga haana. Mahani ai, kua liga fakamalolō he tau matua po ke falu Kerisiano momotua e tagata ke manamanatu ke he tukuleleaga mo e papatisoaga. Ne fakaako he aposetolo ko Peteru a lautolu ne logona a ia he Penetekoso ‘ke papatiso.’ (Gahua 2:38) Pete ia, ko e tukuleleaga ha tautolu ko e fifiliaga fakatagata, ti nakai fai tagata foki ke taute ma tautolu. Ko e fifiliaga ke taute e finagalo he Atua kua lata ko e ha tautolu ni.—Salamo 40:8.

Tauteuteaga kua Lata ma e Papatisoaga

8, 9. (a) Ko e ha e papatisoaga he tau tama mukemuke kua nakai tatai mo e Tohiaga Tapu? (e) Ko e heigoa e tupu fakaagaaga kua lata ke taute e lautolu ne ikiiki ato papatiso?

⁸ Maeke kia he tau fanau ke taute e tukuleleaga fakailoilo? Kua nakai fai fakaveaga e tau Tohiaga Tapu ke he tau tau he moui ma e papatisoaga. Nakai maeke mooli agaia he tau tama mukemuke ke eke mo tau tagata talitonu, fakagahuahua e tua, po ke taute e tukuleleaga ke he Atua. (Gahua 8:12) Hagaao ke he tau Kerisiano he senetenari fakamua, ko e tagata fakamauaga tala tuai ko Augustus Neander ne talahau he tohi haana General History of the Christian Religion and Church: “Kua fakagofua ni e papatisoaga he magaaho  fakamua ke he tau tagata lalahi, ha kua mahani e tau tagata taane ke maama e papatisoaga mo e tua nukua matutaki fakakikili.”

⁹ Ke lata mo e tau fuata, kua feaki tuai he falu e tuaga fakaagaaga he tau tau fuata mui, ka e levaleva e falu. Ato papatiso, mogoia, kua lata e tama ke fai fakafetuiaga fakatagata mo Iehova, ko e maama hako he tau matapatu Tohiaga Tapu, mo e maama mahino e mena ne putoia ke he tukuleleaga, tuga ki a lautolu ne lalahi.

10. Ko e heigoa e tau lakaaga kua lata fakamua to hoko e tukuleleaga mo e papatisoaga?

¹⁰ Kua fakaako e Iesu e tau tutaki haana ke fakaako a lautolu ne foou ke he tau mena oti ne poaki e ia. (Mataio 28:20) Fakamua ai, kua lata a lautolu ne foou ke moua e iloilo tonu ke he kupu mooli, ka fua mai to maeke ia lautolu ke feaki e tua ia Iehova mo e he haana a Kupu. (Roma 10:17; 1 Timoteo 2:4; Heperu 11:6) Ti, ka hokotia e kupu mooli he Tohiaga Tapu ke he loto he tagata, kua omoi a ia ke fakatokihala mo e mafokifoki mai he puhala moui fakamua haana. (Gahua 3:19) Fakahiku ai, kua hokotia e tagata ke he tapunu kua manako a ia ke tukulele a ia ki a Iehova he papatiso, tuga ne poaki e Iesu.

11. Ko e ha kua aoga ke fakalataha tumau a tautolu ke he gahua fakamatala ato papatiso?

¹¹ Ko e taha lakaaga aoga foki ke hoko atu ke he papatisoaga ko e fakalataha ke he fakamatala he tala mitaki he Kautu. Ko e matapatu gahua anei kua kotofa e Iehova ke he haana tau tagata he tau aho fakamui nei. (Mataio 24:14) Ti maeke he tau tagata fakailoa nakai la papatiso ke moua e olioli he tutala hagaao ke he tua ha lautolu ke he falu. He fakalataha ke he gahua nei kua tauteute foki a lautolu ke fakalataha tumau mo e makai ke he fekafekauaga he fonua ka oti e papatiso.—Roma 10:9, 10, 14, 15.

Fai Mena Kia ne Taofi a Koe Mai he Papatiso?

12. Ko e heigoa ka liga taofi e falu mai he papatiso?

¹² Ha ha i ai e falu ne fakamamao mai he papatisoaga ha kua tehatehaua a lautolu ke talia e matagahua ne putoia ai. Ne mailoga e lautolu ko e hokotia ke he tau tutuaga ha Iehova, to lata ia lautolu ke taute e tau hikiaga aoga he tau momoui ha lautolu. Po ke liga matakutaku a lautolu to uka ia lautolu ke nonofo fakatatau ke he tau tutuaga he Atua ka oti e papatisoaga. Liga manatu foki e falu, “To liga taute e au he taha aho e mahani kelea ti tuku ki tua he fakapotopotoaga.”

13. He vaha a Iesu, ko e heigoa ne taofi falu mai he eke mo tau tutaki ha Iesu?

¹³ He vahā a Iesu, falu ne fakaatā e tau manako fakatagata mo e tau pipiaga fakamagafaoa ke tauhele a lautolu mai he eke mo tau tutaki haana. Taha e tohikupu ne fakailoa to mui a ia ki a Iesu ko e mena fe ni ka fano a Ia ki ai. Ka e fakamaama e Iesu ke he tau magaaho loga, ne nakai fai mena a ia ke mohe ai. He magaaho ne uiina e Iesu taha tagata fanogonogo ke eke mo tutaki haana, ne tali e tagata taane nei kua lata ia ia ke “tanu” fakamua e matua taane haana. Liga, ne manako a ia ke nofo i kaina mo e fakatali ke he matua taane haana ke mate mo e taute ai e matagahua fakamagafaoa ia ka tupu, ka e nakai mui atu ki a Iesu. Fakahiku ai, ko e tagata ke toluaki ne pehē ato mui atu a ia ki a Iesu, kua lata ia ia ke “mavehe” mua ke he faoa haana. Ne fakamaama e Iesu e fakamule pihia ko e ‘haga ke he tau mena i tua.’ Ti, kua tuga ko lautolu ne manako ke fakamule pihia ka maeke tumau ke kumi mena ke piu ki ai he kalo mai he ha lautolu a matagahua faka-Kerisiano.—Luka 9: 57-62.

14. (a) Tali atu fēfē a Peteru, Aneterea, Iakopo, mo Ioane ke he uiina ha Iesu ki a lautolu ke eke mo tau tagata takafaga tagata? (e) Ko e ha kua nakai lata ia tautolu ke tehatehaua ke talia e lakau hahamo ha Iesu?

 ¹⁴ Ko e fakafifitakiaga ha Peteru, Aneterea, Iakopo, mo Ioane ne kehe lahi mahaki. He magaaho ne uiina e Iesu a lautolu ke mumui atu ki a ia ti eke mo tau tagata takafaga tagata, ne pehē e Tohi Tapu: “Ati toka ai agataha e laua ha laua a tau kupega, ka e mumui atu kia ia.” (Mataio 4:19-22) He taute fakamafiti e fifiliaga ia, ne iloa fakatagata e lautolu e mena ne tala age e Iesu he magaaho fakamui: “Kia hahamo e mutolu e lakau hahamo haku, mo e fifitaki mai a mutolu kia au; ha ko au ni ko e totonu mo e loto holoilalo; ti moua ai e mutolu e okiokiaga mo e tau agaga ha mutolu. Ha ko e mena maeke vave haku a lakau hahamo he uta, ko e haku a kavega foki, ko e mena mama a ia.” (Mataio 11:29, 30) Ha kua tamai he papatisoaga e lakau hahamo he matagahua, ne fakamalolō e Iesu a tautolu ko e mena totonu ti māmā ai he foaki e okiokihaga lahi ki a tautolu.

15. Fakakite fēfē he tau fakafifitakiaga ha Mose mo Ieremia kua maeke ia tautolu ke falanaki he moua e lalagoaga he Atua?

¹⁵ Ko e tau logonaaga he nakai maeke mogoia kua mahani mau. Ko Mose mo Ieremia ne logona fakamua e nakai maeke ke taute e tau matagahua ne age e Iehova ki a laua. (Esoto 3:11; Ieremia 1:6) Fakamalolō fēfē he Atua a laua? “To fakalataha au mo koe,” he tala age e ia ki a Mose. “Ko e mena laveaki e au a koe,” he mavehe e ia ki a Ieremia. (Esoto 3:12; Ieremia 1:8) Maeke foki ia tautolu ke mauokafua ke he lalagoaga faka-Atua. Ko e fakaalofa ke he Atua mo e falanaki ki a ia kua maeke ke lagomatai a tautolu ke kautu mai he fakauaua tumau to maeke nakai ia tautolu ke hokotia ke he tukuleleaga ha tautolu. “Nakai toka ai ha matakutaku ke he fakaalofa,” he tohia he aposetolo ko Ioane, “ka ko e fakaalofa katoatoa kua vega kehe e ia e matakutaku.” (1 Ioane 4:18) Ko e tama taane tote ne liga matakutaku ka fano tokotaha a ia, ka kua mauokafua a ia ka fano he tōtō e lima he matua taane haana. Pihia foki, ka falanaki a tautolu ki a Iehova mo e tau loto katoa ha tautolu, kua mavehe e ia ke ‘fakahakohako ai e ia ha tautolu a tau puhala’ he fakatauo a tautolu mo ia.—Tau Fakatai 3:5, 6.

Ko e Magaaho Lilifu

16. Ko e ha e papatisoaga kua putoia e tanumia katoatoa ke he vai?

¹⁶ Ko e papatisoaga kua fa taute ai ka oti e lauga faka-Tohi Tapu ne fakamaama e aoga he papatisoaga faka-Kerisiano. He fakaotiaga he lauga nei, ko lautolu ka papatiso kua tala age ke taute e talahauaga he tua ha lautolu ke he tau tagata he tali ua e hūhū papatiso. (Roma 10:10; kikite e puha he lau 24.) Mole ia, to tanumia a lautolu ka papatiso ke he vai, he muitua e puhala ne fakatoka e Iesu. Kua fakakite he Tohi Tapu kua oti e papatisoaga, ne “haele hake a [Iesu] he vai,” po ke ‘hake mai a ia he vai.’ (Mataio 3:16; Mareko 1:10) Maama ai, ko Ioane  ko e Papatiso ne tanumia katoatoa a Iesu. * Ko e tanumia katoatoa kua latatonu ne fakamailoga e hikiaga aoga lahi ne taute e tautolu ke he tau momoui ha tautolu—kua mate fakatai a tautolu ke he puhala moui fakamua mo e kamata e moui foou he fekafekau ke he Atua.

17. Maeke fēfē he tau tagata papatiso mo lautolu ne mamata ki ai ke lafi ke he lilifu he papatisoaga?

¹⁷ Ko e magaaho olioli mo e hokulo e papatisoaga. Kua fakakite he Tohi Tapu kua liogi a Iesu he magaaho ne tanumia e Ioane a ia ke he Vailele i Ioritana. (Luka 3:21, 22) Fakatatau ai mo e fakafifitakiaga nei, ko lautolu ka papatiso he vahā nei kua lata ke fakakite e mahani kua tonu. Ha kua tomatoma he Tohi Tapu a tautolu ke tui ke he tau tapulu kua gali he tau aho takitaha he moui, to mua atu mogoia e lata ke omaoma e fakatonuaga nei he aho papatiso ha tautolu! (1 Timoteo 2:9) Maeke foki he tau tagata kitekite ke fakakite e fakalilifu kua lata he fanogonogo fakamitaki ke he lauga papatiso mo e mamata ke he papatisoaga ke he puhala lilifu.—1 Korinito 14:40.

Tau Monuina ne Olioli he Tau Tutaki Papatiso

18, 19. Ko e heigoa e tau kotofaaga mo e tau monuina kua tamai he papatisoaga?

¹⁸ Ka tukulele agataha e tautolu a tautolu ke he Atua mo e ke papatiso, kua eke a tautolu mo vala he magafaoa uho pauaki. Fakamua ai, kua eke a Iehova mo Matua mo e Kapitiga ha tautolu. Kua mamao a tautolu mai he Atua ato hoko e papatisoaga ha tautolu; mogonei kua fakafeilo tuai a tautolu. (2 Korinito 5:19; Kolose 1:20) Puhala he poa he Keriso, kua fakatata a tautolu ke he Atua ti fakatata mai a ia ki a tautolu. (Iakopo 4:8) Ne fakamaama he perofeta ko Malaki e puhala ne matakite mo e fanogonogo a Iehova ki a lautolu kua fakaaoga mo e fua haana a higoa, ti putoia e ia e tau higoa ha lautolu he haana tohi ke fakamanatu ai. “To eke foki a lautolu maku,” he talahau he Atua, “to fakaalofa foki au kia lautolu, tuga he fakaalofa e tagata ke he hana tama tane kua fekafekau kia ia.”—Malaki 3:16-18.

¹⁹ Kua fakamalolō foki he papatisoaga a tautolu ke eke mo vala he fakamatakainaga he lalolagi katoa. He hūhū e aposetolo ko Peteru ke he tau monuina ka moua he tau tutaki he Keriso ma e tau foakiaga kua taute e lautolu, ne mavehe e Iesu: “Kaeke ke toka e taha e tau fale, po ke tau matakainaga, po ke lafu mahakitaga, po ke matua tane, po ke matua fifine, po ke hoana, po ke tau fanau, po ke tau kaina, ha ko e haku a higoa, to moua e ia takiteau māna, to eke foki māna e moui tukulagi.” (Mataio 19:29) He tau tau ki mui, ne tohi e Peteru hagaao “ke he tau matakainaga” kua tupu ‘ke he lalolagi.’ Ne iloa fakatagata e Peteru e lalagoaga mo e tau monuina he tau matakainaga fakaalofa, mo e maeke foki ia tautolu.—1 Peteru 2:17; 5:9.

20. Ko e heigoa e amaamanakiaga monuina ne foaki he papatisoaga?

²⁰ Mua atu, ne fakakite e Iesu ko lautolu ne mumui ki a ia ka ‘moua e moui tukulagi.’ E, to foaki he tukuleleaga mo e papatisoaga e amaamanakiaga he ‘toto atu ke he moui mooli’—ko e moui tukulagi ke he lalolagi foou he Atua. (1 Timoteo 6:19) Ko e heigoa e fakaveaga mitaki ma e vaha anoiha ka maeke ke ati e tautolu ma tautolu mo e tau magafaoa ha tautolu? Ko e amaamanakiaga monuina nei ka fakamalolō a tautolu ke “o a tautolu ke he higoa a Iehova ha tautolu a Atua tukulagi tukumuitea.”—Mika 4:5.

[Tau Matahui Tala]

Maeke Nakai a Koe ke Fakamaama?

• Puhala fēfē mo e ko e ha kua lata ia tautolu ke tali atu ke he fakaalofa a Iehova?

• Ko e heigoa e tupuaga fakaagaaga kua lata fakamua to papatiso?

• Ko e ha kua nakai lata ke fakaatā e matakutaku he kaumahala po ke tehatehaua ke talia e matagahua ke taofi a tautolu mai he papatisoaga?

• Ko e heigoa e tau monuina mua ue atu kua olioli he tau tutaki papatiso ha Iesu Keriso?

[Tau Hūhū he Fakaakoaga]

[Fakatino he lau 28]

“Ke lekua he ha ke nakai papatiso ai au?”

[Tau Fakatino he lau 31]

Ko e magaaho hokulo lahi mo e olioli e papatisoaga