‘Kia O Atu ke Taute Tutaki ti Papatiso a Lautolu’
‘Kia O Atu ke Taute Tutaki ti Papatiso a Lautolu’
‘Hanei, kia o atu ke eke e tau motu oti kana mo tutaki, ti papatiso atu a lautolu; ti fakaako atu a mutolu kia lautolu kia omaoma ke he tau mena oti ne tala atu e au kia mutolu.’—MATAIO 28:19, 20.
1. Ko e heigoa e fifiliaga ne taute he motu ha Isaraela ke he matafū he Mouga ko Sinai?
KAVI ke he 3,500 e tau he mole, ne taute he motu katoa e omonuo ke he Atua. He fakapotopoto ke he matafū he Mouga ko Sinai, ne fakailoa he tau Isaraela oti: “Ko e tau mena oti ne tala mai e Iehova, to eke ni e mautolu.” He magaaho ia, ne eke a Isaraela mo tau tagata tukulele ke he Atua, ko e haana a “koloa uho.” (Esoto 19:5, 8; 24:3) Kua amaamanaki atu a lautolu ke moua haana puipuiaga mo e ko e atuhau moui ke he motu “kua tafe ai e puke huhu mo e meli.”—Levitika 20:24.
2. Ko e heigoa e fakafetuiaga mo e Atua kua olioli ai he tau tagata he vahā nei?
2 He talahau he salamo ko Asafo, mogoia, ko e tau Isaraela ne “nakai taofi e lautolu e maveheaga he Atua, ti nakai fakai foki ke o a lautolu ke he puhala he hana fakatufono.” (Salamo 78:10) Ne kaumahala a lautolu ke fakatumau ke he omonuo ne taute he tau tupuna ha lautolu ki a Iehova. Fakahiku ai, ne galo he motu e fakafetuiaga mua ue atu mo e Atua. (Fakamatalaaga 5:4; Mataio 23:37, 38) Ko e mena ia, ne ‘ahiahi he Atua ke he tau motu kehe ke moua ai e tau tagata māna.’ (Gahua 15:14) He tau aho fakamui nei, ne fakapotopoto auloa e ia e “moto tagata tokologa, kua nakai maeke ia taha ke totou, mai he tau motu oti, mo e tau faoa, mo e tau tagata kehekehe, mo e tau vagahau kehekehe,” kua olioli he talahau: “Ko e fakamouiaga ha he Atua ha tautolu, ko ia kua nofo ke he nofoaiki, katoa mo e Punua mamoe.”—Fakakiteaga 7:9, 10.
3. Ko e heigoa e tau lakaaga kua lata ke taute he tagata ke olioli e fakafetuiaga fakatagata mo e Atua?
3 Ke fakalataha mo lautolu kua olioli e fakafetuiaga uho ia mo e Atua, kua lata e taha ke taute e tukuleleaga ki a Iehova mo e fakamailoga ke he papatisoaga ke he vai. Kua eke e mena nei mo omaoma ke he poaki fakatonu ha Iesu ke he tau tutaki haana: “Hanei, kia o atu a a mutolu ke eke e tau motu oti kana mo tutaki, ti papatiso atu a lautolu ke he higoa he Matua, mo e Tama, mo e [a]gaga [t]apu; ti fakaako atu a mutolu kia lautolu kia omaoma ke he tau mena oti ne tala atu e au kia mutolu.” (Mataio 28:19, 20) Ne fanogonogo e tau Isaraela ke he totouaga he “tohi he maveheaga.” (Esoto 24:3, 7, 8) Ti, ne maama e lautolu e tau matagahua ha lautolu ki a Iehova. Pihia foki he vaha nei, ko e iloilo tonu he finagalo he Atua ne moua he haana Kupu, ko e Tohi Tapu, kua latatonu ato taute he tagata e lakaaga he papatisoaga.
4. Ko e heigoa kua lata ke taute he tagata ke lata ma e papatisoaga? (Putoia e puha i luga.)
4 Mahino ai, ne manako a Iesu ke he tau tutaki haana ke moua e fakaveaga malolō ma e tua ha lautolu ato hoko e papatiso. Ne fakaako e ia haana tau tutaki ke nakai ni o mo e taute tutaki ka e pihia foki ke fakaako a lautolu ke ‘omaoma ke he tau mena oti ne tala age e ia.’ (Mataio 7:24, 25; Efeso 3:17-19) Ko e mena ia, ko lautolu ne lata ke papatiso ne fa fakaako e Tohi Tapu ke he tau mahina po ke taha po ke ua e tau, ke maeke he tau fifiliaga ha lautolu ke nakai fakatepetepe po ke taute puleheu. He papatisoaga, kua tali he tau tagata papatiso e, ke he ua e matapatu hūhū. He peehi e Iesu kua ‘lata ha tautolu a E ke E, ha tautolu a Nakai ke Nakai,’ to lagomatai oti ki a tautolu ke liu hakahaka fakamatafeiga e aoga he tau hūhū papatiso ua nei.—Mataio 5:37.
Fakatokihala mo e Tukuleleaga
5. Ko e heigoa e tau lakaaga ua aoga lahi kua peehi he hūhū papatiso fakamua?
5 Ko e hūhū papatiso fakamua ne hūhū ke he tagata papatiso kaeke kua fakatokihala tuai a ia ke he puhala moui tuai haana ti tukulele e moui haana ki a Iehova ke taute haana a finagalo. Kua peehi he hūhū nei ua e lakaaga aoga kua lata ke taute ato hoko e papatisoaga, ko e fakatokihala mo e tukuleleaga.
6, 7. (a) Ko e ha kua lata e fakatokihala ma e tau tagata papatiso oti kana? (e) Ko e heigoa e tau hikihikiaga kua lata ke taute he mole e tokihala he tagata?
6 Ko e ha kua lata e tagata ke tokihala ato hoko a ia ke he papatisoaga? Ne fakamaama he aposetolo ko Paulo: “Ne mahani fakalataha a tautolu oti kana mo lautolu ke he vaha i tuai he nonofo ai ke he tau manako lahi he tau tino ha tautolu.” (Efeso 2:3) Ato moua e tautolu e iloilo tonu he finagalo he Atua, kua nonofo lagotatai a tautolu mo e lalolagi nei, fakatatau ke he haana tau aogaaga mo e tau tutuaga. Kua pule he atua he lalolagi nei, ko Satani, e puhala moui ha tautolu. (2 Korinito 4:4) He iloa mogoia e finagalo he Atua, kua fifili a tautolu ke momoui ‘nakai ke he tau manako lahi ha he tau tagata, ka ke he finagalo he Atua.’—1 Peteru 4:2.
7 Kua tamai he puhala foou nei loga e tau palepale. Mua atu, kua hafagi e puhala ke he fakafetuiaga uho mo Iehova, nukua fakatatai e Tavita ke he uiina ke hu atu ke he “fale uta fano” mo e “mouga tapu” he Atua—ko e kotofaaga mua ue atu mooli. (Salamo 15:1) Maama ai, to nakai uiina fakahanoa e Iehova ha tagata ka ko lautolu ni ne “mahani hako, mo e tututonu, kua vagahau foki mo e moli ke he [ha lautolu a] loto.” (Salamo 15:2) He falanaki ke he tuaga ha tautolu ato ako e tautolu e kupu mooli, he lagotatai mo e tau manako nei kua kakano kua lata ke taute e tautolu e falu hikihikiaga—ke he mahani mo e he aga. (1 Korinito 6:9-11; Kolose 3:5-10) Ko e fakaohoohoaga ke he tau hikihikiaga ia ko e fakatokihala—ko e tokihala hokulo ke he puhala moui tuai ha tautolu mo e fifiliaga malolō ke fakafiafia a Iehova. Kua takitaki he mena nei ke he liliuina katoatoa—he tiaki e mahani lotokai, puhala moui fakalalolagi mo e tutuli e puhala kua fakafiafia ke he Atua.—Gahua 3:19.
8. Taute fēfē e tautolu e tukuleleaga ha tautolu, ti ko e heigoa e matutakiaga kua lata mo e papatisoaga?
8 Ko e vala ke uaaki he hūhū papatiso fakamua kua hūhū ke he tau tagata papatiso kaeke kua tukulele mooli a lautolu ki a Iehova ke taute haana a finagalo. Kua latatonu e lakaaga aoga he tukuleleaga ke taute fakamua to papatiso. Kua taute ai he liogi, nukua fakakite e tautolu e manako ke foaki e tau momoui ha tautolu ki a Iehova puhala atu ia Keriso. (Roma 14:7, 8; 2 Korinito 5:15) Ti eke ai a Iehova mo Takitaki mo e Pule ha tautolu, ti tuga a Iesu kua fiafia a tautolu ke taute e finagalo he Atua. (Salamo 40:8; Efeso 6:6) Ko e maveheaga hokulo nei ki a Iehova kua lagataha ni e taute. Ha kua taute fakatagata ni e tukuleleaga ha tautolu, mogoia, ko e fakailoa ke he tau tagata he aho papatiso kua fakakite ke iloa he tau tagata kua taute e tautolu e tukuleleaga hokulo ke he ha tautolu a Matua he lagi.—Roma 10:10.
9, 10. (a) Ko e heigoa ne putoia he taute e finagalo he Atua? (e) Maeke fēfē he tau takitaki Nasi ke mailoga e tukuleleaga ha tautolu?
9 Ko e heigoa kua putoia he muitua ke he fakafifitakiaga ha Iesu he taute e finagalo he Atua? Ne pehe a Iesu ke he tau tutaki haana: “Kaeke kua manako e taha ke muitua mai ki a au, kia fakatikai e ia a ia mo e lagaki hake hana akau fakakikiveka mo e muitua mai tumau ki a au.” (Mataio 16:24, NW) Ne talahau fakatonu mai e ia tolu e mena nei kua lata ke taute e tautolu. Fakamua, kia “fakatikai” e tautolu a tautolu. Tuku ai pehēnei, kua talahau e tautolu, nakai, ke he tau fakaohoohoaga lotokai, nakai mitaki katoatoa ha tautolu mo e, e, ke he fakatonuaga mo e takitakiaga he Atua. Uaaki, kua lata ia tautolu ke ‘lagaki hake ha tautolu a akau fakakikiveka.’ He vaha ha Iesu ko e akau fakakikiveka ko e fakamailoga he fakamā mo e matematekelea. Ha ko e tau Kerisiano, kua talia e tautolu e vala he matematekelea ke lata mo e tala mitaki. (2 Timoteo 1:8) Pete he vaiga po ke ekefakakelea he lalolagi a tautolu, tuga e Keriso, kua ‘fakateaga ke he ma’ a tautolu, ka e fiafia he iloa kua fakafiafia e tautolu e Atua. (Heperu 12:2) Fakahiku ai, kua fifitaki “tumau” e tautolu a Iesu.—Salamo 73:26; 119:44; 145:2.
10 Fuluola ai, kua mailoga he falu tagata totoko foki e tukuleleaga ne taute he Tau Fakamoli a Iehova ke he Atua ke fekafekau katoatoa ki a ia. Ma e fakatai, he kemuaga pagotā Buchenwald ha Nasi i Sihamani, ne nakai huhui he Tau Fakamoli e tua ha lautolu ke saini e fakamooliaga tohia na: “Ko au agaia ko e Tagata Fakaako Tohi Tapu katoatoa mo e to nakai moumou e omonuo ne taute e au ki a Iehova.” Mooli kua fakakite maali he mena nei e aga he tau fekafekau tua fakamooli oti ne tukulele he Atua!—Gahua 5:32.
Fakakite ko e Taha he Tau Fakamoli a Iehova
11. Ko e heigoa e kotofaaga kua ha ha ki a ia ka papatiso?
11 Ko e hūhū ke uaaki ne hūhū ke he tau tagata papatiso, fakamua ai, kua maama mooli ke ia e papatisoaga haana kua eke mo fakakiteaga ki a ia ko e taha he Tau Fakamoli a Iehova. He oti e papatiso, ne eke a ia mo fekafekau fakauku ke fua e higoa a Iehova. Ko e kotofaaga mo e matagahua hokulo ne mua anei. Kua ha ha ai foki he tagata papatiso e amaamanakiaga ma e fakamouiaga tukulagi, ka eke ke tua fakamooli a ia ki a Iehova.—Mataio 24:13.
12. Ko e heigoa e matagahua kua fakalataha mo e lilifu he fua e higoa a Iehova?
12 Mooli, ko e lilifu homo ue atu ke fua e higoa he Atua malolō ue atu, ko Iehova. Ne pehē e perofeta ko Mika: “Ko e tau motu oti kua takitaha mo e fano ke he higoa he atua ha lautolu, ko tautolu foki, to o a tautolu ke he higoa a Iehova ha tautolu a Atua tukulagi tukumuitea.” (Mika 4:5) Pete ia, ko e matagahua kua fakalataha mo e lilifu nei. Kua lata ia tautolu ke tutuli ke momoui ke he puhala kua tamai e lilifu ke he higoa ne fua e tautolu. Tuga he fakamanatu e Paulo ke he tau Kerisiano i Roma, kaeke ke nakai taute he tagata e mena ne fakamatala e ia, to “eke fakakelea,” po ke tāholigake ai e higoa he Atua.—Roma 2:21-24.
13. Ko e ha e tau fekafekau tukulele ha Iehova ne moua e matagahua ke fakamatala hagaao ke he Atua ha lautolu?
13 Ka eke e tagata mo taha he Tau Fakamoli a Iehova, kua talia foki e ia e matagahua ke fakamatala hagaao ke he Atua haana. Ne uiina e Iehova e motu tapu ha Isaraela ke eke mo tau fakamooli haana ke maeke ke talahau atu haana tuaga ko e Atua tukulagi. (Isaia 43:10-12, 21) Ka e kaumahala e motu ke fakamooli e gahua nei, ti fakahiku galo katoatoa e lautolu e taliaaga ha Iehova. He vaha nei, kua matalahi e tau Kerisiano ke moua e kotofaaga he talahau atu hagaao ki a Iehova. Kua taute pihia e tautolu ha kua fakaalofa a tautolu ki a ia ti manako lahi ke he higoa haana ke fakatapu. Maeke fēfē a tautolu ke fakanonono ka iloa e tautolu e kupu mooli hagaao ke he ha tautolu a Matua he lagi mo e haana amaamanakiaga? Kua logona hifo a tautolu tuga e aposetolo ko Paulo he pehē a ia: “Nukua nakai ha ha ia au e pule ke he mena ia; oi fakaalofa foki kia au, kaeke ke nakai fakamatala e au e vagahau mitaki.”—1 Korinito 9:16.
14, 15. (a) Ko e heigoa e gahua ne taute he fakatokatokaaga ha Iehova he tupuaga fakaagaaga ha tautolu? (e) Ko e heigoa e tau foakiaga kua ha ha i ai ke lagomatai fakaagaaga aki a tautolu?
14 Ko e hūhū ke uaaki kua fakamanatu foki ke he tau tagata papatiso e haana a matagahua ke gahua fakalataha mo e fakatokatokaaga ne takitaki he agaaga ha Iehova. Nakai fakatokehe a tautolu he fekafekau ke he Atua, ti manako a tautolu ke he lagomatai, lalagoaga, mo e fakamalolōaga he “tau matakainaga.” (1 Peteru 2:17; 1 Korinito 12:12, 13) Kua taute he fakatokatokaaga he Atua e gahua aoga ke he tupuaga fakaagaaga ha tautolu. Kua foaki e loga he tau tohi faka-Tohi Tapu ke lagomatai a tautolu ke tupu ke he iloilo tonu, ke fakapulotu ka fehagai mo e tau lekua, mo e ke feaki e fakafetuiaga tata mo e Atua. Tuga e matua fifine ne matakite kua fagai fakamitaki mo e leveki haana tama, kua foaki he “fekafekau fakamoli mo e loto matala” e loga he tau mena kai fakaagaaga magaaho tonu ma e tupuaga fakaagaaga ha tautolu.—Mataio 24:45-47; 1 Tesalonia 2:7, 8.
15 Ke he tau feleveiaaga fakafaahi tapu, kua moua he tau tagata a Iehova e fakamahani kua lata mo e fakamalolōaga ke eke mo Tau Fakamoli kua tua ha Iehova. (Heperu 10:24, 25) Kua fakaako he Aoga Fekafekau Fakateokarasi a tautolu ke vagahau ke he tau tagata, ti fakamahani he Feleveiaaga Fekafekau a tautolu ke talahau fakamitaki e fekau ha tautolu. Ko e tau feleveiaaga ha tautolu ti puhala he fakaakoaga fakatagata he tau tohi he Tohi Tapu, kua maeke ke kitia e tautolu e agaaga a Iehova kua gahuahua ai, he takitaki haana a fakatokatokaaga. Mai he tau foakiaga tumau nei, ne fakamataala he Atua a tautolu ke he tau hagahagakelea, he fakamahani a tautolu ke eke mo tau fekafekau lauia mitaki, mo e lagomatai a tautolu ke aala fakaagaaga tumau.—Salamo 19:7, 8, 11; 1 Tesalonia 5:6, 11; 1 Timoteo 4:13.
Ko e Omoomoiaga he Fifiliaga
16. Ko e heigoa kua fakalagalaga a tautolu ke tukulele e tau momoui ki a Iehova?
16 Ko e tau hūhū papatiso ua ne fakamanatu ke he tau tagata papatiso e aoga he papatiso ke he vai mo e tau matagahua ne fakalataha ki ai. Ti ko e heigoa kua lata ke fakalagalaga a lautolu ke taute e fifiliaga ke papatiso? Kua eke a tautolu mo tau tutaki papatiso, nakai ha kua fakaohooho he falu a tautolu, ka e kakano kua “futia mai” e Iehova a tautolu. (Ioane 6:44) Ha ko e “Atua ko e fakaalofa,” ne pule a ia ke he lagi mo e lalolagi katoatoa mai he fakaalofa, nakai he fakaohooho. (1 Ioane 4:8) Kua futia a tautolu ki a Iehova ha ko e haana a tau mahani totonu mo e puhala kua fehagai a ia mo tautolu. Kua foaki e Iehova haana a Tama fuataha ma tautolu ti foaki ki a tautolu e vaha mitaki lahi mahaki anoiha. (Ioane 3:16) Mena ia, kua fakalagalaga a tautolu ke foaki ki a ia—ke tukulele ki a ia—e tau momoui ha tautolu.—Tau Fakatai 3:9; 2 Korinito 5:14, 15.
17. Ko e heigoa ne nakai tukulele e tau momoui ha tautolu ki ai?
17 Kua tukulele e tautolu a tautolu, nakai ke he tupuaga po ke gahua, ka ki a Iehova hokoia. Ko e gahua he Atua ma e tau tagata haana ka hiki, ka ko e tukuleleaga ha lautolu ki a ia to tumau ni. Ma e fakatai, ko e mena ne tala age e ia ki a Aperahamo ke taute kua kehe mamao mai he mena ne tala age e ia ki a Ieremia ke taute. (Kenese 13:17, 18; Ieremia 1:6, 7) Ka e, maeke tokoua ia laua ke taute e gahua pauaki ne age he Atua ki a laua ke taute ha kua fakaalofa a laua ki a Iehova ti manako a laua ke taute tua fakamooli ai. Ke he magahala nei he fakaotiaga, kua tutuli e tau tutaki papatiso oti he Keriso ke taute e poakiaga ke fakamatala e tala mitaki he Kautu mo e ke taute tutaki. (Mataio 24:14; 28:19, 20) He taute loto katoa e gahua ia ke fakakite kua fakaalofa a tautolu ke he ha tautolu a Matua he lagi ti ko e mena ia kua tukulele mooli a tautolu ki a ia.—1 Ioane 5:3.
18, 19. (a) Ko e heigoa e fakailoaaga ke he tau tagata ka taute e tautolu ha ko e papatisoaga ha tautolu? (e) Ko e heigoa ka fakatutala a tautolu ke he vala tala ka mui mai?
18 Nakai fakauaua ai, kua hafagi he papatisoaga e puhala ke he tau monuina loga, ka e nakai ko e lakaaga ke uta fakateaga. (Luka 14:26-33) Kua fakakite e fifiliaga ne mua atu e aoga ke he falu matagahua foki. (Luka 9:62) Ka papatiso a tautolu, kua taute mooli e tautolu e talahauaga ke he tau tagata: “Ko e Atua nai, ko e ha tautolu a Atua ia tukulagi tukumuitea; ko ia ni ke takitaki a tautolu ato hoko ke he mate.”—Salamo 48:14.
19 To fakatutala fakalaulahi e vala tala ka mui mai ke he tau hūhū ka tutupu he matutaki mo e papatisoaga ke he vai. Liga fai kakano aoga nakai ma e tagata ke mataofi mai he papatiso? Ko e tau tau he moui kia e matakupu? Maeke fēfē ia tautolu oti ke lafi ke he lilifu he magaaho ka papatiso ai?
Maeke Nakai a Koe ke Fakamaama?
• Ko e ha kua lata e tau Kerisiano takitaha ke tokihala ato papatiso?
• Ko e heigoa ne putoia e tukuleleaga ke he Atua?
• Ko e heigoa e tau matagahua kua fakalataha mo e lilifu he fua e higoa ha Iehova?
• Ko e heigoa kua lata ke fakalagalaga a tautolu ke taute e fifiliaga ke papatiso?
[Tau Hūhū he Fakaakoaga]
[Puha/Fakatino he lau 24]
Ua e Hūhū Papatiso
He fakaveaga ke he poa ha Iesu Keriso, kua fakatokihala nakai a koe he tau agahala haau mo e tukulele a koe ki a Iehova ke taute haana a finagalo?
Kua maama nakai e koe kua fakakite he tukuleleaga mo e papatisoaga haau a koe ko e taha he Tau Fakamoli a Iehova he matutaki mo e fakatokatokaaga ne takitaki he agaaga he Atua?
[Fakatino he lau 25]
Ko e tukuleleaga ko e maveheaga hokulo ne taute ki a Iehova he liogi
[Fakatino he lau 27]
Ko e gahua fakamatala ha tautolu kua fakatātā e tukuleleaga ha tautolu ke he Atua