Maama e Tohi Tapu​—Ko e Fiafia kua Hafagi ki a Koe

KUA ha ha he Tohi Tapu e tau kupu mooli uho mai he Atua. Ne tala mai ki a tautolu hagaao ke he kakano he moui, tupumaiaga he matematekelea he tagata, mo e vahā anoiha he tagata. Kua fakaako ki a tautolu e puhala ke moua e fiafia, puhala ke taute kapitiga, mo e puhala ke fehagai fakamitaki mo e tau lekua. Mua hake ke he tau mena ia, kua ako a tautolu hagaao ke he ha tautolu a Tufuga mo e Matua ha ha he lagi, ko Iehova. Ko e iloilo pihia ka tamai ki a tautolu e fiafia mo e fai kakano e tau momoui ha tautolu.

He iloa e iloilo ke he Atua kua fakatai he Tohi Tapu ke he kai. Ne pehē a Iesu: “Nakai ko e tau mena kai hokoia ke moui ai ha tagata, ka ko e tau kupu oti ne to mai he fofoga he Atua.” (Mataio 4:4; Heperu 5:12-14) Tuga ni he kai e tau mena kai huhua mitaki he tau aho takitaha ha kua lata pauaki ke momoui ai a tautolu, kua lata pauaki foki ma tautolu ke totou tumau e Kupu he Atua ke aoga mai he maveheaga he Atua ke he moui tukulagi.

Kua fiafia a tautolu ke kai ha ko e puhala ne talaga aki a tautolu mo e ha kua fakamakona ai taha matapatu manako ha tautolu. Pete ia, kua fai matapatu manako foki kua lata ia tautolu ke fakamakona kaeke manako a tautolu ke fiafia. Ne pehē a Iesu: “Fiafia a lautolu ne manamanatu ke he tau mena fakaagaga kua lata ma lautolu.” (Mataio 5:3, NW) Kua maeke ke fiafia kakano kua maeke e manako ia ke fakamakona ka maama e Kupu he Atua.

Mooli, kua paleko ke he falu ke maama e Tohi Tapu. Ma e fakatai, liga manako lagomatai a koe ke he tau kupu tohi ne hagaao ke he tau aga fakamotu ne nakai mahani mau po ke ne fakaaoga e tau talahauaga fakatai. Ti, ha ha ai foki e tau perofetaaga ne tohi ke he vagahau  fakatai ne maeke ke maama ni ka kumi ke he falu kupu Tohi Tapu ne tatai e matakupu. (Tanielu 7:1-7; Fakakiteaga 13:1, 2) Pete he pihia, na maeke mooli ia koe ke maama e Tohi Tapu. Maeke fēfē ia koe ke iloa mooli e mena ia?

Ko e Fiafia kua Hafagi ke he Tau Tagata Oti

Ko e Tohi Tapu ko e Kupu he Atua. I loto kua talahau he Atua haana finagalo ki a tautolu. To foaki kia he Atua e tohi ne nakai maeke ke maama po ke maama ni e lautolu kua tokoluga e tau fakaakoaga? Nakai maeke ia Iehova ke mahani vale pihia. Ne pehē a Iesu Keriso: “Ko hai e matua ia mutolu ke age kia e ia e maka ke he tama hana ka ole mai e areto? ka ole mai e ika, ke age kia e gata kia ia mo ika. Ka ole mai a ia e fufua moa, ke age kia kia ia e akarava? Hanai, ko mutolu ne mahani kelea, kaeke kua iloa e mutolu ke uta e tau mena mitaki mo e tau fanau ha mutolu; ka e nakai kia mua e Matua ha mutolu ha ha he lagi ke foaki mai e [a]gaga [t]apu kia lautolu ka ole atu ai kia ia?” (Luka 11:11-13) Ti, maeke ia koe ke mauokafua mooli na maeke ia koe ke maama e Tohi Tapu ti kaeke ole fakamooli a koe ke he Atua, to foaki atu e ia ki a koe e lagomatai kua lata ke maama haana Kupu. Mooli, na maeke e tau matapatu fakaakoaga he Tohi Tapu ke maama mo e loto fakaaue foki ki ai e tau fanau!—2 Timoteo 3:15.

Pete he fai laliaga ke maama e Tohi Tapu, ko e taute pihia kua moua e lauiaaga malolō mo e atihake ki a tautolu. He mole e liu tu mai haana, ne fakakite a Iesu ke he ua e tutaki haana mo e tutala ki a laua hagaao ke he tau perofetaaga he Tohi Tapu. Pehē e fakamauaga ha Luka: “Ati fakamatala ai e ia kia laua e tau mena ne tohi kia ia ke he tau Tohi oti, kua kamata mai ia Mose, mo e tau perofeta oti.” Ko e heigoa e fua? He afiafi ia, he manamanatu ke he tau mena ne ako e laua, ne vagavagahau e tau tutaki ki a laua ni: “Nakai kia velagia ha taua a tau loto ki loto ia taua he vagavagahau a ia mo taua ke he puhala, he fakamatala mai foki e ia e tau Tohi kia taua?” (Luka 24:13-32) Kua fiafia a laua he maama e Kupu he Atua kakano kua fakamalolō e tua ha laua ke he tau maveheaga he Atua mo e foaki ki a laua e onoonoaga mitaki ke he vahā anoiha.

He mamao ligo mai he kitia ko e kavega, ko e maama e Kupu he Atua kua fuluola mo e aoga ai, tuga e olioli he taumafa ke he kai lolo. Ko e heigoa kua lata ia koe ke taute ke moua e maamaaga pihia? To fakakite mai he vala tala ka mui mai e puhala ka maeke ia koe ke olioli “e iloilo he Atua.”—Tau Fakatai 2:1-5.

[Fakatino he lau 4]

Tuga e matua taane fakaalofa, ne foaki e Iehova e agaaga tapu ke lagomatai a tautolu ke maama e Tohi Tapu