Maama e Tohi Tapu​—Ko e Heigoa Ka Lagomatai a Koe?

“HE UFIUFI e koe e tau mena nai he tau tagata iloilo, mo e loto matala, ka kua fakakite atu ai ke he tau tama mukemuke.” (Luka 10:21) Ko e tau kupu nei ne hagaao e Iesu ke he haana Matua he lagi kua fakakite e puhala ke maeke ke maama e Tohi Tapu, kua latatonu ia tautolu ke moua e aga hako. Kua fakakite e pulotu ha Iehova he foaki mai e ia e tohi ne maeke ni ia lautolu ne mahani fakatokolalo mo e maeke ke fakaako ke maama mooli ai.

Nakai mukamuka e mahani fakatokolalo ke he tokologa ia tautolu. Ha ha ia tautolu oti e hihiga pauaki ke fakatokoluga. Ke lafi ki ai, kua nonofo a tautolu he “tau aho fakamui,” ha ha mo lautolu kua “ofaofa ni he tau tagata a lautolu ni, . . . mahani fakahanoa, to fakatokoluga.” (2 Timoteo 3:1-4) Ko e tau aga a nei ne fakatauhele e maama ha tautolu ke he Kupu he Atua. Momoko ai, kua fakaohooho ai a tautolu oti ha ko e tau takatakaiaga ha tautolu. Maeke fēfē mogoia ia koe ke moua e aga kua lata ke maama e Tohi Tapu?

Tauteute e Loto mo e Manamanatuaga

Ko Esera, ko e takitaki i tuai he tau tagata he Atua, ‘kua taute hana loto ke kumi ke he fakatufono a Iehova.’ (Esera 7:10) Fai puhala foki nakai ke tauteute e tautolu e tau loto ha tautolu? E. Maeke ia tautolu ke kamata he moua e onoonoaga tonu ke he tau Tohiaga Tapu. Ke he tau matakainaga Kerisiano, ne tohia he aposetolo ko Paulo: “Ha kua talia e mutolu e kupu he Atua ne fanogonogo mai ai a mutolu kia mautolu, ti talia ai e mutolu nakai ko e kupu he tau tagata, ka ko e kupu he Atua.” (1 Tesalonia 2:13) Pete ko e tau tagata taane ne fakaaoga ke tohi e tau Tohiaga Tapu, ko e tau mena ne tohi e lautolu kua mai ia Iehova. He mailoga e vala aoga lahi ia ka taute a tautolu ke fiafia ke he tau mena kua totou e tautolu.—2 Timoteo 3:16.

Taha puhala ke tauteute e tau loto ha tautolu ko e liogi. Ha kua omoomoi he agaaga tapu e Tohi Tapu, to maama ia tautolu e fekau i ai ka lagomatai he agaaga ia. Kua lata ia tautolu ke liogi ma e lagomatai pihia. Mailoga ko e tupetupe a nei ne moua he salamo ne tohia: “Kia fakamaama mai kia au, ti omaoma ai e au hāu a fakatufono, mo e fifitaki ki ai ke he loto katoa.” (Salamo 119:34) Lata ia tautolu ke liogi nakai ke maeke ke maama hokoia e tau mena ne tohi ka e ma e aga he loto ke fakaatā a tautolu ke talia ai. Ke maama e Tohi Tapu, kua lata ia tautolu ke fiafia ke he tau mena kua mooli.

He manamanatu fakahokulo a koe ke maeke ke moua e aga hako he loto, kia manamanatu ke he mena ka maeke he Tohi Tapu ke taute ma haau. Kua ha ha ia tautolu e tau kakano mitaki lahi mahaki ke kumi ke he Kupu he Atua, ka e mua atu he tau mena oti ko e maeke ke lagomatai a tautolu ke fakatata atu ke he Atua.  (Iakopo 4:8) He totou e tautolu hagaao ke he puhala ne fehagai a Iehova ke he tau tutuaga kehekehe, puhala ne loto fakaaue ki a lautolu ne fakaalofa ki a ia, mo e puhala ne fehagai mo lautolu ne tiaki a ia, kua iloa e tautolu ko e peresona fēfē a ia. Ko e matapatu manako mau ha tautolu he totou e Tohi Tapu kua lata ke iloa mitaki e Atua mo e maeke ke fakamalolō e fakafetuiaga ha tautolu mo ia.

Tau Fakatauhele ke Moua e Aga Hako

Ko e heigoa ka auhia ai a tautolu ke maama e Kupu he Atua? Taha fakatauhele ko e mahani fakamooli ke he tau mena nakai lata. Ma e fakatai, liga tapiki a koe ke he tau taofiaga mo e tau manatu he falu ne tūtū tokoluga. Pete ia, ka e kua ka nakai lalago po ke tuku fakatokoluga he tau tagata nei e mooli he Kupu he Atua? He tau tutuaga pihia, ke maama mooli e mena ne fakaako he Tohi Tapu to liga ko e paleko. Ka e, fakamalolō mai he Tohi Tapu ki a tautolu ke kamatamata fakamitaki e tau mena kua fakaako e tautolu.—1 Tesalonia 5:21.

Ko e matua fifine ha Iesu, ko Maria, ne fehagai mo e paleko pihia. Ne feaki hake a ia ke fakalilifu e tau aga tuai faka-Iutaia. Ne omaoma a ia ke he Fakatufono faka-Mose ti nakai fakauaua ne fano ke he sunako. He lahi hake ne mailoga e ia ko e puhala tapuaki ne fakaako age he tau matua haana kua nakai tuai talia he Atua. Ko e fua, ne talia e Maria e tau fakaakoaga ha Iesu mo e eke ai mo taha ia lautolu fakamua he fakapotopotoaga Kerisiano. (Gahua 1:13, 14) Nakai fakakite he mena nei e nakai fakalilifu ha Maria ma e tau matua haana po ke tau aga tuai ha laua; ka e, ko e fakakiteaga he fakaalofa haana ma e Atua. Kaeke ke aoga mai a tautolu he Tohi Tapu, ke tuga a Maria kua latatonu ia tautolu ke mahani fakamooli fakamua ke he Atua to mahani fakamooli ke he taha tagata.

Momoko ai, tokologa e tagata ne fakateaga ke he kupu mooli he Tohi Tapu. Falu kua talia ni ke muitua ke he tau aga tuai fakalotu ne fakavē ke he fakavai. Falu kua nakai fakalilifu e kupu mooli ke he tau puhala vagahau mo e tau puhala momoui ha lautolu. Ko e mena ia, ke talia e kupu mooli he Tohi Tapu ko e totogi lahi: To liga fekehekeheaki a koe mo e tau kapitiga, tau katofia, tau kapitiga gahua, pihia foki mo e magafaoa haau. (Ioane 17:14) Pete ia, ne tohia he tagata pulotu: “Kia fakafua mai ā e mena moli, aua neke fakafua atu.” (Tau Fakatai 23:23) Kaeke kitia e koe kua aoga lahi e kupu mooli ki a koe, to lagomatai e Iehova a koe ke maama e Tohi Tapu.

Taha fakatauhele foki ke maama e fekau he Tohi Tapu ko e nakai fakamakai ke fakagahua e tau talahauaga i ai. Ne tala age a Iesu ke he tau tutaki haana: “Kua foaki atu kia mutolu ke iloa ai e mutolu e tau mena galo he kautu he lagi; ka e nakai foaki atu kia lautolu. Ha ko e mena kua matolu e tau loto he motu nei, ti nakai fanogonogo ha lautolu a tau teliga he fanogonogo.” (Mataio 13:11, 15) Tokologa ia lautolu ne fakamatala a Iesu ki ai ne nakai talia, nakai makai ke hiki. Kua nakai tatai mo e tagata fakafua koloa ne tutala a Iesu ki ai he fakataiaga! He moua e penina fakafua lahi, ne fano e tagata fakafua koloa mo e fakafua fakamafiti e tau mena oti haana ke maeke ia ia ke fakatau mai ai. Ke maama e kupu mooli he Tohi Tapu kua lata ke uho pihia ki a tautolu.—Mataio 13:45, 46.

Ko e Paleko ke Fakaako

Ko e paleko lahi mahaki foki ke maama e Tohi Tapu ko e maeke ke fakaako. To liga uka he tagata ke talia e tau manatu foou mai he tagata ne liga tu tokolalo. Ka e, ko e tau aposetolo ha Iesu Keriso ne ‘nakai ako mo e tau tagata goagoa.’ (Gahua 4:13) He fakamaama e kakano, ne tohi e Paulo: “Kua iloa e mutolu e uiina ne ui mai ai a mutolu, ko e tau matakainaga na e, nakai tokologa e tau tagata pulotu ke he tau mena he tino kua uiina, nakai tokologa e tau tagata malolo, nakai tokologa e tau iki; ka kua fifili he Atua e tau mena goagoa he lalolagi ke fakama ai e tau tagata iloilo.” (1 Korinito 1:26, 27) Kaeke paleko e mahani fakatokolalo haau ha kua fakaako he tagata tu tokolalo, manatu ko e puhala he Atua a ia ke fakaaoga e tagata ia ke fakaako a koe. Fai lilifu foki nakai kua mua atu mai he maeke ke fakaako e Iehova, ko e ha tautolu a “Faiaoga Homo Ue Atu”?—Isaia 30:20, NW; 54:13.

Ko e takitaki kautau Suria ko Naamanu e taha tagata ne uka ke talia e tau fakaakoaga mai he tagata tu tokolalo. He kumi fakamauluaga ma e lepela haana, ne fano a ia ke kitia e perofeta he  Atua ko Elisaio. Ka e ko e tau hatakiaga he Atua ke he fakamauluaga ne fakahoko ki a Naamanu puhala he fekafekau. Ko e fekau mo e puhala kua tala age ai ne paleko ke he mahani fakatokolalo ha Naamanu, ti nakai talia e ia ke omaoma he magaaho fakamua ke he kupu he perofeta he Atua. Fakamui, ne hiki e aga ha Naamanu ti kua fakamalolō ai. (2 Tau Patuiki 5:9-14) Kua tatai foki e tau mena ne fehagai mo tautolu ka fuluhi a tautolu ke he Tohi Tapu. Liga ako e tautolu ke maeke ke fakamalolō ke he puhala fakaagaaga mo e ke he tau mahani, kua lata ia tautolu ke muitua e puhala foou he moui. To ha ha nakai ia tautolu e aga fakatokolalo ke fakaatā taha tagata ke fakaako a tautolu ke he tau mena kua lata ia tautolu ke taute? Ko lautolu ni ne ha ha ai e aga fia fakaako ka olioli e maamaaga he Tohi Tapu.

Ko e aga mitaki lahi ne fakakite he tagata taane ne pule i lalo hifo a Kanake, ko e patuiki fifine he tau Aitiope. Hane liu atu a ia ki Aferika he haana nofoa fakataveli ti poi tata atu e tutaki ko Filipo mo e fina atu ki a ia. Ne hūhū a Filipo po kua maama nakai e ia e tau mena haana ne totou. Ne loto fakatokolalo lahi e iki nei he tali: “To maeke fefe e au, ka nakai fakakite mai e taha kia au?” He maama e Kupu he Atua, ne papatiso e tagata taane ia. Mole ai, ne “fano foki a ia he hana fenoga mo e fiafia.”—Gahua 8:27-39.

Laulahi he Tau Fakamoli a Iehova ko e tau tagata noa. He tau faahi tapu takitaha ne taute e lautolu e tau fakaakoaga Tohi Tapu he tau kaina ke he molea e ono e miliona tagata. Ha kua fakaako he Tohi Tapu e puhala kua mua e mitaki he moui, fakamaama e amaamanakiaga mooli hokoia ma e tagata, mo e fakakite mai e puhala ke iloa e Atua, ne totou miliona kua logona ko e fakaako he Tohi Tapu mo e maama e tau talahauaga i ai ko e mena fiafia lahi mahaki. Ko e fiafia kua hafagi foki ki a koe.

[Fakatino he lau 7]

Ne uka a Naamanu ke talia e tau hatakiaga mai he fekafekau tu tokolalo

[Fakatino he lau 7]

Mafanatia e tau loto ha tautolu he maama e Tohi Tapu