Kua Moui e Kupu ha Iehova

Tau Fakamaamaaga Mai he Tohi a Iopu

KUA nofo e tupuna ko Iopu he motu ko Usa, mogonei haia i Arapi. Na tokologa e tau Isaraela ne nonofo i Aikupito he magahala ia. Pete he nakai ko e Isaraela a ia, ko Iopu ko e tagata tapuaki ki a Iehova ko e Atua. Hagaao ki a ia, ne pehē e Tohi Tapu: “Kua nakai ha ha i ai taha ke tatai mo ia ke he lalolagi, ko e tagata mahani hakohako mo e mahani tonu, kua matakutaku a ia ke he Atua mo e kalo kehe mo e tau mena kelea.” (Iopu 1:8) Liga ko e magaaho anei he magahala ne momoui ai ua e fekafekau mitaki lahi ha Iehova—ko e tama taane a Iakopo ko Iosefa mo e perofeta ko Mose.

Ne fakataitai ko Mose ne tohia e tohi a Iopu, ne liga iloa a Iopu he magaaho ne 40 e tau he nofo a ia i Mitiana, ne tata ke he motu ko Usa. Liga logona e Mose hagaao ke he tau tau fakahiku he moui a Iopu he magaaho ne tata e tau Isaraela ki Usa, he okioki fakaku ai he teitei oti e 40 tau he o he tutakale. * Kua fuluola e puhala ne tohi aki e tau mena ne tutupu ki a Iopu ati kua mua hake ai e tala mai he tohi talahaua hokoia. Mahomo hake he mena ia, kua tali e tau hūhū tuga e: Ko e ha ne matematekelea e tau tagata mitaki? Ko e ha ne fakaatā e Iehova e mahani kelea ke tupu? Maeke nakai e tau tagata nakai mitaki katoatoa ke tumau e fakamooli ha lautolu ke he Atua? Ha ko e taha vala omoomoi he Kupu he Atua, ko e fekau he tohi a Iopu kua moui mo e malolō agaia he vaha nei.—Heperu 4:12.

“KIA MALAIA E AHO NE FANAU AI AU”

(Iopu 1:1–3:26)

Taha aho ne paleko e Satani e fakamooli ha Iopu ki mua he Atua. Ne talia e Iehova e paleko mo e fakaatā a Satani ke fakamatematekelea hololoa a Iopu. Ka e ne fakaheu a Iopu ke ‘vagahau kelea ke he Atua.’—Iopu 2:9.

Tokotolu e kapitiga ha Iopu ne hohoko mai ke “fakamafana a ia.” (Iopu 2:11) Ne nonofo a lautolu mo ia ka e nakai vagahau atu ha kupu ato vagahau a Iopu pehē: “Kia malaia e aho ne fanau ai au.” (Iopu 3:3) Kua manako a ia ke “tuga ne tama mukemuke nakai kitia e maama,” po ke tama ne mate ato fanau mai.—Iopu 3:11, 16.

Tali he Tau Hūhū Faka-Tohiaga Tapu:

1:4—Fakamanatu kia he fanau ha Iopu e tau aho fanau? Nakai, ne nakai taute pihia e lautolu. Ko e kupu tuai ma e tau kupu “aho” mo e “aho ne fanau” kua kehekehe, igatia ni mo e kakano. (Kenese 40:20) Ia Iopu 1:4, ko e kupu “aho” ne fakaaoga ai, hagaao ke he vevehe he hake mai he laā ke he to he laā. Ko e tau fanau taane tokofitu ha Iopu nukua fakapotopoto auloa fakamagafaoa ke he fitu e aho lagataha he tau. He o viko a lautolu, igatia e tama taane mo e fakamatapatu e galue ne taute he fale haana he “hana aho.”

1:6; 2:1—Ko hai ne fakaatā ke tūtū ki mua a Iehova? Ko lautolu ne tūtū ki mua ha Iehova ko e Tama fuataha he Atua, ko e Kupu; ko e tau agelu tua fakamooli; mo e tau agelu liuliu ko e tau ‘tama tane he Atua,’ putoia foki a Satani ko e Tiapolo. (Ioane 1:1, 18) Ne nakai liti hifo a Satani mo e haana tau temoni mai he lagi ato mole fakatote e fakatū e Kautu he Atua he 1914. (Fakakiteaga 12:1-12) He fakaatā a lautolu ke o mai ki mua haana, ne tala age e Iehova ke he tau mena momoui fakaagaga oti e tau paleko mo e tau matakupu ne fakatūtū e Satani.

 1:7; 2:2—Ne vagahau fakahako nakai a Iehova ki a Satani? Kua nakai loga e talahauaga matafeiga ne foaki he Tohi Tapu ke he puhala ne matutaki a Iehova mo e tau mena momoui fakaagaga. Pete ia, ne kitia he perofeta ko Mikaio e fakakiteaga ke he agelu ne matutaki fakahako mo Iehova. (1 Tau Patuiki 22:14, 19-23) Kua liga mahino mogoia, ne tutala a Iehova ki a Satani mo e nakai fai gutu vagahau.

1:21—Ko e heigoa e puhala ka liga liu a Iopu ke he ‘manava he matua fifine’? Ha ko Iehova ko e Atua ne taute e tagata “ke he efuefu he kelekele,” ko e kupu “matua fifine” kua fakaaoga fakatai he mena nei ke hagaao ke he kelekele.—Kenese 2:7.

2:9—Liga ko e heigoa e tuaga he manamanatuaga he hoana ha Iopu he magaaho ne tala age a ia ke he haana taane ke vagahau kelea ke he Atua mo e mate ai? Ne matematekelea e hoana ha Iopu ha ko e tau mena ne galo tuga ni haana taane. Ti liga mamahi mooli a ia he kitia e taane malolō haana he taha vahā nukua takaveli he gagao kelea lahi. Ne kua mamate haana tau fanau fakahelehele. Liga kua fakaatukehe lahi mahaki a ia kakano he tau mena oti nei ati galo ia ia e tau mena aoga mooli—ko e fakafetuiaga ha laua mo e Atua.

Tau Fakaakoaga ma Tautolu:

1:8-11; 2:3-5. He kitia mai he mena ne tupu ki a Iopu, lafi ke he gahua mo e vagahau mitaki, kua lata ke moua e fakamooli ke hako e fatuakiloto he fekafekau ki a Iehova.

1:21, 22. He tumau e mahani fakamooli ki a Iehova he tau tutuaga mitaki mo e hagahaga kelea, kua maeke ia tautolu ke fakakite mooli ko Satani ko e pikopiko.—Tau Fakatai 27:11.

2:9, 10. Tuga a Iopu, kua lata ia tautolu ke mauokafua tumau ke he tua pete kaeke fakateaga he tau tagata he magafaoa e tau tutuliaga fakaagaga ha tautolu po ke peehi ke fakahui po ke tiaki e tua ha tautolu.

2:13. Ne nakai fai fakamafanaaga e tau kapitiga ha Iopu ke talahau hagaao ke he Atua mo e haana tau maveheaga kakano kua temotemoai e moui fakaagaga ha lautolu.

‘NAKAI TOKA E AU HAKU A FAKAMOLI’!

(Iopu 4:1–31:40)

Ko e matapatu manatu ne talahau he tau kapitiga tokotolu ha Iopu he tau fakamatalaaga ha lautolu kua fai mena kelea a Iopu ne taute ke moua e fakahala kelea lahi pihia mai he Atua. Ne takitaki e Elifasa. Mui atu a Pilitati, he fakaaoga e vagahau kua mua e mania. Kua mahomo atu foki e fakavihiatia he ha Sofara.

Ne nakai talia e Iopu e tau fakakakano fakavai he tau tagata ahiahi haana. Ha kua nakai maama e kakano ne fakaatā he Atua e matematekelea haana, ne tupetupe lahi a ia he lali ke fakamaama haana tuaga. Pete ia, kua fakaalofa a Iopu ke he Atua mo e pehe: ‘Ato hoko ke he aho ke mate ai au nakai toka e au haku a mahani fakamoli.’—Iopu 27:5.

Tali he Tau Hūhū Faka-Tohiaga Tapu:

7:1; 14:14—Ko e heigoa e kakano he ‘fekafekauaga ne kotofa’? Ne fakaatukehe lahi mahaki a Iopu ati manamanatu a ia kua uka e moui, kua uka e fekafekauaga ne kotofa. (Iopu 10:17) Ha ko e magaaho ne ha ha e tagata i Seoli—magaaho ne mate e tagata ke hoko ke he liu tu mai—ko e magahala haia he fekafekauaga ne kotofa, ne fakatatai e Iopu e magaaho ia ke tuga e fekafekauaga ne kotofa.

7:9, 10; 10:21; 16:22—Fakakite kia he tau talahauaga nei kua nakai talitonu a Iopu ke he liu tu mai? Ko e tau talahauaga nei kua hagaao ke he vahā tata ha Iopu i mua. Ti ko e heigoa e kakano haana? Taha kakano liga kaeke ke mate a ia, nakai fai tagata he vahā haana ka kitia a ia. Mai he onoonoaga ha lautolu, to nakai liu a ia ke he haana fale po ke moua ha talahaua mitaki ato hoko e magaaho kotofa he Atua. Liga kakano foki a Iopu to nakai fai ka liu mai i Seoli he haana malolō ni. Mai he mena ia ko e amaamanakiaga ha Iopu ke he liu tu mai he vaha anoiha kua fakamahino mai he Iopu 14:13-15.

10:10—Puhala fē ne ‘liligi e Iehova a Iopu tuga e puke huhu mo e fakatuli a ia tuga e puke huhu tuli’? Ko e fakamaamaaga fakapoeme anei ke he puhala ne talaga ai a Iopu ke he manava he matua fifine haana.

19:20—Ko e heigoa e kakano ha Iopu he talahauaga “kua hao au mo e kili he haku  tau nifo”? He talahau kua hao a ia mo e kili he taha mena ne tuga nakai fai kili, ne liga talahau e Iopu ne hao fetamaki a ia nakai fai mena.

Tau Fakaakoaga ma Tautolu:

4:7, 8; 8:5, 6; 11:13-15. Kia nakai mafiti a tautolu ke tuahā ka tupetupe e tagata kua helehele a ia he tau mena ne gana e ia mo e kua nakai talia he Atua a ia.

4:18, 19; 22:2, 3. Kua lata e fakatonuaga ha tautolu ke fakave ke he Kupu he Atua, nakai ke he manatu fakatagata.—2 Timoteo 3:16.

10:1. Ne fakapouligia he loto mamahi a Iopu, ati nakai manamanatu a ia ke he falu kakano ma e matematekelea haana. Nakai lata ia tautolu ke loto mamahi ka matematekelea a tautolu, mua atu ha kua maama mitaki e tautolu e tau matakupu ne putoia ai.

14:7, 13-15; 19:25; 33:24. Ke he ha kamatamata ka tamai e Satani ki a tautolu, maeke e amaamanakiaga he liu tu mai ke fakamalolō a tautolu.

16:5; 19:2. Kua lata e tau kupu ha tautolu ke fakamafana mo e fakamalolō falu, ka e nakai fakahogohogo manava a lautolu.—Tau Fakatai 18:21.

22:5-7. Ko e fakatonuaga ne taute fakave ke he tukumale mo e nakai fai fakamooliaga mauokafua kua teao mo e ulu moumou.

27:2; 30:20, 21. Ke fakatumau ke fakamooli kua nakai lata ke mitaki katoatoa. Ne tuhituhi hehē e Iopu e Atua.

27:5. Ko Iopu ni ne maeke ke toka kehe haana a fakamooli kakano kua fakave e fakamooli ke he fakaalofa he tagata ke he Atua. Kua lata mogoia ia tautolu ke feaki e fakaalofa hokulo ma Iehova.

28:1-28. Iloa he tagata e tokaaga he tau maka uho he kelekele. He kumikumi a ia ki ai, ko e haana makutu kua hokotia a ia ke he tau hala lalofonua ne nakai maeke ha manu lele favale mata maama ke kitia. Ka e, moua e pulotu mahani Atua mai he matakutaku ki a Iehova.

29:12-15. Kua lata ia tautolu ke makai ke fakaalofa-totonu atu ki a lautolu kua manako lagomatai.

31:1, 9-28. Ne fakatoka e Iopu e fakafifitakiaga ma tautolu he kalo mai a ia he kalahī, mahani faivao, nakai fakafili tonu mo e ekefakakelea ke he falu, velevelekoloa, mo e tapuaki tupua.

“TOKIHALA AI AU KE HE EFUEFU MO E EFUEFUAFI”

(Iopu 32:1–42:17)

Ko e fuata ne tu tata mai ne higoa ko Elihu ne fanogonogo fakatekiteki ke he fetoko. Mogonei ne vagahau hake a ia. Kua fakahako e ia a Iopu mo e tau tagata fakamamahi tokotolu haana.

Mogoia ni ne oti a Elihu, ne tali mai a Iehova he pakūlagi. Ne nakai fakamaama e ia e matematekelea ha Iopu. He loga e hūhū ne hūhū, mogoia, kua fakakite he Malolō Ue Atu ki a Iopu e Haana malolō ofoofogia mo e pulotu ne mua. Ne talahau e Iopu kua vagahau a ia mo e nakai maama ti pehē: “Kua vihiatia ai e au haku tau kupu, mo e tokihala ai au ke he efuefu mo e efuefuafi.” (Iopu 42:6) He oti e kamatamata ha Iopu, ne moua e ia e palepale he haana fakamooli.

Tali he Tau Hūhū Faka-Tohiaga Tapu:

32:1-3—Magaaho fe ne hoko mai a Elihu? Ha kua logona oti e Elihu e tau fakamatalaaga, liga fitā e nofo a ia he taha mena tata mai ato vagahau a Iopu ti oti ai e fitu aho he fakanono he tau kapitiga tokotolu haana.—Iopu 3:1, 2.

34:7—Kua tatai fēfē a Iopu mo e tagata ne “inu ai e fakafiu, tuga he inu e maga vai”? He tuaga tupetupe haana, ne hihiga a Iopu ke talia e tau fakafiufiu ne talahau he tau tagata ahiahi tokotolu haana ki a ia, pete kua vagahau kelea mooli a lautolu ke he Atua. (Iopu 42:7) Ati, kua tatai a ia mo e tagata ne inu ke he maga vai mo e olioli.

Tau Fakaakoaga ma Tautolu:

32:8, 9. Ne nakai moua ni e pulotu ha kua motua. Kua lata ke moua e maamaaga ke he Kupu he Atua mo e takitakiaga he agaaga haana.

 34:36. Kua kitia e fakamooli ha tautolu ka ‘kamatamata ke he fakaotiaga’ he falu mena.

35:2. Ne fanogonogo fakamitaki a Elihu mo e kitia mitaki e lekua mooli ato vagahau a ia. (Iopu 10:7; 16:7; 34:5) Ato foaki e fakatonuaga, kua lata e tau motua Kerisiano ke fanogonogo fakamitaki, moua e tau tala mooli, mo e maama mitaki e kakano he lekua.—Tau Fakatai 18:13.

37:14; 38:1–39:30. He manamanatu ke he tau gahua homo ue atu ha Iehova—tau fakakiteaga he haana malolō mo e pulotu—kua fakatokolalo aki a tautolu mo e lagomatai a tautolu ke kitia kua mua e aoga ke fakatokoluga e pule katoatoa Haana ke he ha manako fakatagata ha tautolu.—Mataio 6:9, 10.

40:1-4. Ka logona e tautolu e hihiga ke gūgū ke he Malolō Ue Atu, kua lata ia tautolu ke ‘uufi aki e lima e gutu ha tautolu.’

40:15–41:34. Ko e malolō ha ia ne ha ha he Pehemota (ko e hipotomati) mo e Leviatana (ko e korokotala)! Ke fakauka ke he gahua he Atua, kua lata foki ia tautolu ke moua e malolō mai he Taute he tau manu malolō lahi nei, ko ia ne foaki mai e malolō ki a tautolu.—Filipi 4:13, NW.

42:1-6. He logona e kupu ha Iehova mo e he fakamanatu ke he fakakiteaga he malolō haana ne lagomatai a Iopu ke ‘kitia e Atua,’ po ke kitia e kupu mooli hagaao ki a ia. (Iopu 19:26) Ne hiki he mena nei e puhala manamanatu haana. Magaaho ka fakahako faka-Tohiaga Tapu ai, kua lata ia tautolu ke fakamakai ke talahau e tau hēhē ha tautolu mo e taute e tau hikihikiaga.

Feaki “e Fakauka a Iopu”

Kua fakakite fakamahino he tohi a Iopu kua nakai ko e Atua ne fakatupu e tau matematekelea oti he tagata. Ko Satani. Kua fakaatā he Atua e mahani kelea he lalolagi ke maeke ia tautolu ke fai tali fakatagata ke he tuaga ha tautolu ke he matakupu he pule katoatoa ha Iehova mo e fakamooli ha tautolu.

Tuga a Iopu, ko lautolu oti ne fakaalofa ki a Iehova to kamatamata. Kua foaki mai he tala ha Iopu ki a tautolu e mauokafua na maeke ia tautolu ke fakauka. Fakamanatu mai ki a tautolu mena nakai tumau tukulagi e tau lekua ha tautolu. “Kua fanogonogo a mutolu ke he fakauka a Iopu, kia iloa e mutolu e fakahikuaga ha he Iki,” he talahau he Iakopo 5:11. Ne age e Iehova ki a Iopu e palepale he fakatumau e fakamooli. (Iopu 42:10-17) Ko e amaamanakiaga mitaki lahi ha ia kua fakatoka mai i mua ha tautolu—ko e moui tukulagi ke he Parataiso he lalolagi! Tuga a Iopu, kia eketaha a tautolu ke fakatumau e fakamooli ha tautolu.—Heperu 11:6.

[Matahui Tala]

[Tau Fakatino he lau 22]

Ko e heigoa ha tautolu ka ako mai he “fakauka a Iopu”?