Tau Tagata Foou he Kau Fakatufono

HE Pogipogi Lotu, Aokuso 24, 2005, ko e tau magafaoa Peteli he Tau Faahi Kaufakalataha mo Kanata, ne matutaki ke he vitio, ne logona e fakailoaaga fiafia nei. Kamata ia Sepetema 1, 2005, tokoua e tagata foou​—ko Geoffrey W. Jackson mo Anthony Morris III​—ka lafi ke he Kau Fakatufono he Tau Fakamoli a Iehova.

Ko e Matakainaga Jackson ne kamata paionia ia Fepuari 1971 i Tasmania, ko e aelani ha Ausetalia. Ia Iuni 1974, ne mau a ia mo Jeanette (Jenny). Nakai leva, ne kotofa a laua ke fekafekau ko e tau paionia pauaki. Mai he 1979 ke he 2003, ne fekafekau a laua ko e tau misionare i Tuvalu, Samoa, mo Fiti​—ko e tau aelani he Pasifika Toga. He nonofo he tau aelani, ne lahi e lagomatai he Matakainaga Jackson mo e hoana ke he gahua fakaliliu he tau tohi faka-Tohi Tapu. Kamata he 1992, ne fekafekau e Matakainaga Jackson he La Komiti i Samoa, mo e mai he 1996, he La Komiti i Fiti. Ia Aperila 2003, ne eke a ia mo Jenny mo vala he magafaoa Peteli he Tau Faahi Kaufakalataha mo e kamata gahua he Faahi Gahua Fakaliliu. Nakai leva he mole, ne eke e Matakainaga Jackson mo tagata lagomatai ke he Komiti Fakaako he Kau Fakatufono.

Ko e Matakainaga Morris ne hu atu foki ke he gahua paionia he 1971 he Tau Faahi Kaufakalataha. Ia Tesemo he tau ia, ne mau a ia ki a Susan, ti matutaki a laua ke paionia ke teitei fa e tau ato fanau e tama taane uluaki ha laua, ko Jesse. Fai magaaho he mole, ne fai tama taane foki a laua, ko Paul. Ne liu e Matakainaga Morris hu atu ke he gahua mau he 1979 ko e paionia tumau. Ne tutaki atu e hoana haana ki a ia he magaaho ne o atu e fanau taane he aoga. Ne gahua e magafaoa he matakavi ne lahi e manako lagomatai i Rhode Island mo North Carolina, he Tau Faahi Kaufakalataha. I North Carolina, ne gahua e Matakainaga Morris ko e leveki takaiaga falu magaaho, mo e gahua paionia tumau e fanau taane. Ne uiina a Jesse mo Paul ke he la he Tau Faahi Kaufakalataha he 19 e tau tau. Ke he magaaho ia, ne kamata e Matakainaga Morris ke he gahua leveki takaiaga. Ti, he 2002 ne uiina a ia mo Susan ke he Peteli, kamata e kotofaaga foou ha laua ia Aokuso 1. Ne gahua e Matakainaga Morris he Faahi Gahua Fakatoka Fekau i Patterson ti fakamui ne eke mo tagata lagomatai he Komiti Fekafekau he Kau Fakatufono.

Lafi ki a laua foou nei, ko lautolu ne ha ha he Kau Fakatufono ko C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; mo D. Sydlik. Ko lautolu oti he Kau Fakatufono ko e tau Kerisiano fakauku.