Hokotia ke he Loto he Tama

KUA momoko nakai a koe he kitia e tama ne pele tau fana? Ko e tau mena ia kua kitia mau foki ke he tau fanau ikiiki, ha kua lofia e favale he lalolagi fakafiafia. Lagomatai fēfē e koe e tama tote ke fehikitaki e tau toi he felakutaki mo e tau toi he mafola? Ko Waltraud, ko e taha he Tau Fakamoli a Iehova ne leva e misionare ne fekafekau i Aferika, ne moua e puhala ke lagomatai taha tama taane ke taute pihia.

Ha ko e felatauaki, ne toka e Waltraud e motu ne nofo ai a ia mo e fano ke he taha motu i Aferika. I ai ne kamata a ia ke fakaako e Tohi Tapu mo e matua fifine ne taha e tama taane lima tau. He tau magaaho oti ne aahi atu a ia ke he matua fifine, ko e tama taane hane pele mo e fana palasetiki tote, ko e toi ni a ia haana. Ne nakai kitia e Waltraud a ia he tuhi e fana ke he ha mena, ka e lavelave tumau a ia he hafagi mo e pa he fana, ke tuga ko e liu fafao he tau matapulu.

Ne pehe a Waltraud ke he tama taane: “Werner, iloa nakai e koe e kakano ne hau au nofo he motu haau? Kakano ha ko e felakutaki—ne hola au he motu haaku ke hao mai he tau tagata taane hagahaga kelea ne fa e fana e tau tagata aki e tau fana tuga haau. Mitaki nakai e tau fana pihia he manatu e koe?”

“Nakai, ai mitaki,” he tali fakamomoko e Werner.

“Hako lahi a koe,” he talahau e Waltraud. Ti hūhū a ia: “Iloa nakai e koe e kakano ne aahi mai au ki a koe mo e matua fifine haau he tau faahi tapu oti? Kakano ko e manako e Tau Fakamoli a Iehova ke lagomatai e falu ke moua e mafola, ke mafola mo e Atua pihia mo e tau katofia ha lautolu.” Mo e fakaatāaga mai he matua fifine ha Werner, ne tala age a Waltraud ki a ia: “Ka mai e koe e fana haau ki a au, to liti e au ke he vao, mo e to ta mai mooli e au taha motoka toi ne fa e hui ma haau.”

Ne age e Werner e fana toi haana ki a Waltraud. Ne fakatali a ia ke fa e faahi tapu, ka e ne hoko mai e toi foou haana—ko e motoka toi ne taute mai he tau vala akau, ne talia fiafia e ia mo e mamali lahi.

Kua fakaaoga nakai e koe taha magaaho ke tutala ke he tau fanau haau, he lali ke hokotia ke he tau loto ha lautolu ke omoomoi a lautolu ke tiaki e tau toi ne tuga e tau kanavaakau he felakutaki? Ka pihia, to fakaako e koe e tau fakaakoaga ka aoga ai a lautolu he tau momoui katoa ha lautolu.