Tau Leveki ko e “Tau Fakafifitaki ke he Fuifui Mamoe”
Tau Leveki ko e “Tau Fakafifitaki ke he Fuifui Mamoe”
“Kia leveki e mutolu e fuifui mamoe he Atua ha ia mutolu . . . kia leoleo ki ai mo e fakamakai . . . ko e loto fiafia . . . kia eke a mutolu mo tau fakafifitaki ke he fuifui mamoe.”—1 PETERU 5:2, 3.
1, 2. (a) Ko e heigoa e kotofaaga ne foaki e Iesu ke he aposetolo ko Peteru, ti ko e ha ne fakave mitaki e mauokafua ha Iesu? (e) Fēfē e logonaaga ha Iehova hagaao ke he tau leveki ne kotofa?
FAI magaaho ato hoko e Penetekoso 33 V.N., hane kai a Peteru mo e falu tutaki tokoono he kai pogipogi ne tauteute e Iesu he mataafaga he Tahi i Kalilaia. Nakai ko e magaaho fakamua anei ne kitia e Peteru e liu tu mai ha Iesu, ti nakai fakauaua ne fiafia lahi a ia ke iloa kua moui tuai a Iesu. Ka e liga tehatehaua foki a Peteru. Kakano ai, he fai aho gahoa he mole, ne fakatikai e ia ki mua he tau tagata kua nakai iloa e ia a Iesu. (Luka 22:55-60; 24:34; Ioane 18:25-27; 21:1-14) Kua hataki kia e Iesu a Peteru ne tokihala ha ko e tote e tua haana? Nakai. Ka e, ne foaki e ia ki a Peteru e kotofaaga he fagai mo e leveki e ‘tau mamoe ikiiki’ ha Iesu. (Ioane 21:15-17) Tuga he fakakite he tala he Tohi Tapu he fakamauaga tala tuai ke he fakapotopotoaga Kerisiano he senetenari fakamua, ko e mauokafua ha Iesu ia Peteru kua nakai hiki. Fakalataha mo e falu aposetolo mo e tau patu i Ierusalema, ne matutaki atu a Peteru ke leveki e fakapotopotoaga Kerisiano he magahala kamatamata vevela mo e tupu mafiti.—Gahua 1:15-26; 2:14; 15:6-9.
2 He vahā nei, he puhala e Iehova ia Iesu Keriso ke kotofa e tau tagata taane kua lata ke eke mo tau leveki fakaagaaga ke takitaki Haana a tau mamoe ke he magahala uka lahi he fakamauaga tuai he tagata. (Efeso 4:11, 12; 2 Timoteo 3:1) Ha ha ai nakai e fakaveaga mitaki ke he mauokafua ia? Kua fakamooli he fakamatakainaga Kerisiano mafola ne kitia ke he lalolagi katoa. Mooli, ko e tau leveki nei ko e tau tagata agahala, tuga a Peteru. (Kalatia 2:11-14; Iakopo 3:2) Pihia foki, kua foaki e Iehova ki a lautolu ke leveki e tau mamoe ne “fakafua e ia māna ke he hana [Tama] toto ni.” (Gahua 20:28) Ha ha ia Iehova e fakaalofa hokulo ma e tau tagata taane nei, he kitia a lautolu “kua lata mo e lilifu kua lafi ua.”—1 Timoteo 5:17.
3. Fakatumau fēfē he tau leveki fakaagaaga e aga makai mo e makutu?
3 Fakatumau fēfē he tau leveki fakaagaaga e aga makai mo e makutu, ti eke mo tau fakafifitakiaga ke he fuifui mamoe? Tuga a Peteru mo e falu leveki he senetenari fakamua, ne falanaki a lautolu ke he agaaga tapu he Atua, nukua age ki a lautolu e malolō kua lata ia lautolu ke fakatumau ke he kavega he matagahua ha lautolu. (2 Korinito 4:7) Kua ha ha foki ia lautolu e tau fua he agaaga—ko e fakaalofa, [“olioli,” NW], mafola, fakauka, ko e totonu, ko e mahani mitaki, ko e tua, ko e mahani molu, mo e manako fakalatalata. (Kalatia 5:22, 23) Kia manamanatu la tautolu ke he falu puhala pauaki kua maeke he tau leveki ke fakatoka e fakafifitakiaga he fakatātā e tau fua nei he leveki e lautolu e fuifui mamoe he Atua i lalo he levekiaga ha lautolu.
Fakaalofa ke he Fuifui mo e Tau Mamoe Takitaha
4, 5. (a) Fakakite fēfē e Iehova mo Iesu e fakaalofa ke he fuifui mamoe? (e) Ko e heigoa e falu puhala kua maeke he tau leveki fakaagaaga ke fakatātā e fakaalofa ma e fuifui mamoe?
4 Ko e fua ne mua atu e mitaki ne moua mai he agaaga he Atua ko e fakaalofa. Kua fakakite e Iehova e fakaalofa haana ma e fuifui mamoe katoa he foaki e ia e tau mena kai fakaagaaga loga. (Isaia 65:13, 14; Mataio 24:45-47) Ka e, kua lahi atu e mena ne taute e ia mai he fagai hokoia e fuifui mamoe. Ne logona hifo e ia e pipiki fakatagata ke he tau mamoe takitaha. (1 Peteru 5:6, 7) Kua ofania foki e Iesu e fuifui mamoe. Ne foaki e ia haana moui ma lautolu, ti iloa e ia e tau mamoe takitaha, “ke he tau higoa” ha lautolu.—Ioane 10:3, 14-16.
5 Kua fifitaki he tau leveki fakaagaaga a Iehova mo Iesu. Ne fakatātā e lautolu e fakaalofa ma e fuifui mamoe katoa he Atua he ‘hagaaki fakaako e lautolu’ e fakapotopotoaga. Ko e ha lautolu a tau lauga ne fakavē ke he Tohi Tapu kua lagomatai ke fagai mo e puipui e fuifui mamoe, ti kitia maali ai he tau tagata oti e tau gahua malolō ha lautolu ke he mena nei. (1 Timoteo 4:13, 16) Nakai kitia lahi e tau magaaho ne fakaaoga e lautolu ke fakatumau e tau fakamauaga, he taute e tau tohi, taute e tau setulu, mo e leveki e falu fakamauaga loga ke kitia kua taute e tau feleveiaaga he fakapotopotoaga mo e falu matagahua ke he ‘puhala maopoopo mo e taute fakamitaki.’ (1 Korinito 14:40) Laulahi he gahua nei kua taute ka e nakai kitia he tau tagata ti liga tote maka e mailoga. Ko e gahua fakaalofa mooli.—Kalatia 5:13.
6, 7. (a) Ko e heigoa e taha puhala kua maeke e tau leveki ke iloa mitaki e tau mamoe? (e) Ko e ha he falu magaaho kua aoga ke talahau e tau logonaaga ha tautolu ke he motua?
6 Ko e tau leveki Kerisiano fakaalofa ne lali ke fakakite e fiafia fakatagata ke he tau mamoe takitaha he fakapotopotoaga. (Filipi 2:4) Taha puhala ne maeke e tau leveki ke iloa mitaki e tau mamoe takitaha ko e gahua auloa mo lautolu he gahua fakamatala ke he tau tagata. Kua fa mahani a Iesu ke o mo e tau tutaki haana ke he gahua fakamatala ti fakaaoga e tau magaaho pihia ke foaki e fakamalolōaga. (Luka 8:1) Taha e leveki Kerisiano lotomatala ne pehē: “Kua moua e au ko e taha he tau puhala mitaki lahi ke iloa mo e fakamalolō e matakainaga ko e gahua mo ia he fekafekauaga he fonua.” Ka nakai la fai magaaho ia koe ke gahua mo e taha he tau motua he fekafekauaga he fonua, ko e ha he taute e fakatokaaga ke gahua mogonei?
7 Kua omoi he fakaalofa a Iesu ke fakalataha ke he tau olioli mo e maanu he tau tutaki haana. Ma e fakatai, he liliu atu e tau tutaki toko 70 haana mo e olioli mai he fakamatala ha lautolu, ne “fiafia lahi” a Iesu. (Luka 10:17-21) Pete ia, he kitia e ia e lauiaaga ha Maria mo e tau tagata he magafaoa haana mo e tau kapitiga ha ko e mate a Lasalo, “kua tagi a Iesu.” (Ioane 11:33-35) Pihia foki, ko e tau leveki fakaalofa he vaha nei kua nakai vevehe kehe e tau manamanatuaga mai he tau mamoe. Kua omoi he fakaalofa a lautolu ke “fiafia . . . fakalataha mo lautolu kua fiafia” mo e ke ‘tagi fakalataha mo lautolu kua tagi.’ (Roma 12:15) Ka iloa e koe e olioli po ke maanu he moui haau, kia atāina ke talahau e tau logonaaga ke he tau leveki Kerisiano. He logona e olioli haau to fakamalolō a lautolu. (Roma 1:11, 12) He iloa e tau kamatamata haau ka maeke ia lautolu ke fakamalolō mo e fakamafana a koe.—1 Tesalonia 1:6; 3:1-3.
8, 9. (a) Fakakite fēfē he taha motua e fakaalofa ke he hoana haana? (e) Aoga fēfē ma e leveki ke fakatātā e fakaalofa ma e magafaoa haana?
8 Ko e fakaalofa he leveki ke he fuifui mamoe kua kitia pauaki ke he puhala ne taute e ia e magafaoa ni haana. (1 Timoteo 3:1, 4) Ka fai hoana a ia, ko e fakaalofa mo e fakalilifu ne fakakite e ia ke he hoana haana kua fakatoka e fakafifitakiaga ma e falu taane ke fifitaki. (Efeso 5:25; 1 Peteru 3:7) Manamanatu ke he tau talahauaga he fifine Kerisiano ne higoa ko Linda. Kua eke e taane haana mo leveki ke molea e 20 e tau ato mate a ia. Pehē a ia: “Kua lavelave tumau e taane haaku he leveki e fakapotopotoaga. Ka e taute e ia au ko e taha vala he matakau. Ne fa talahau e ia e loto fakaaue ha ko e haaku a lalagoaga, ti fakaaoga e ia e magaaho atā haana mo au. Ti ko e fua, ne logona e au e ofania mo e nakai mahekeheke ke he tau magaaho ne fakaaoga e ia mo e fakapotopotoaga.”
9 Ka fai fanau e leveki Kerisiano, ko e puhala ne akonaki fakaalofa mo e navanava tumau a lautolu nei ne ikiiki ne fakatoka e fakafifitakiaga ma e falu matua ke muitua ki ai. (Efeso 6:4) Hanei, ko e fakaalofa ne fakakite e ia ma e magafaoa haana kua fakakite e fakamooliaga tumau nukua moui fakatatau a ia ke he falanakiaga ne tuku age ki a ia ha ko e kotofa he matagahua haana he agaaga tapu.—1 Timoteo 3:4, 5.
Fakatolomaki e Olioli mo e Mafola he Matutakiaga
10. (a) Ko e heigoa e fakaohoohoaga kelea ke he olioli mo e mafola he fakapotopotoaga? (e) Ko e heigoa e matakupu ne fakahagahaga kelea e mafola he fakapotopotoaga he senetenari fakamua, ti fakamafola fēfē e matakupu ia?
10 Kua maeke e agaaga tapu ke moua mai e olioli mo e mafola he loto he tau Kerisiano takitaha, he kau he tau motua, mo e he fakapotopotoaga katoa. Pete ia, ko e nakai fai matutakiaga mooli kua ha ha ai e fakaohoohoaga kelea ke he olioli mo e mafola nei. Ne mailoga e Solomona i tuai: “Kua ulu e tau mena ne manamanatu ki ai kaeke kua nakai fai pulega; ka e fakamau ai ni ke he tau pule tokologa.” (Tau Fakatai 15:22) He taha faahi, ko e matutakiaga fakalilifu mo e fakamooli kua fakaholo ki mua e olioli mo e mafola. Ma e fakatai, he magaaho ne fakahagahaga kelea e matakupu ke he pelitome ke matahavala e mafola he fakapotopotoaga he senetenari fakamua, ko e kau fakatufono i Ierusalema ne kumi e takitakiaga he agaaga tapu. Kua fakakite foki e lautolu e tau onoonoaga kehekehe ke he matakupu. He mole e fakatutalaaga fakalaulahi, ne hokotia a lautolu ke he fifiliaga. He magaaho ne matutaki e lautolu e fifiliaga laulahi ha lautolu ke he fakapotopotoaga, kua “fiafia ai [e tau matakainaga] ha ko e fakamafanaaga.” (Gahua 15:6-23, 25, 31; 16:4, 5) Ne fakaholo ki mua e olioli mo e mafola.
11. Maeke fēfē he tau motua ke fakatolomaki e olioli mo e mafola he fakapotopotoaga?
11 Pihia foki he vaha nei, kua fakaholo ki mua he tau leveki e olioli mo e mafola he fakapotopotoaga he eke mo tau tagata matutaki mitaki. Ka fakahagahaga kelea he tau lekua e mafola he fakapotopotoaga, kua fakafetui fakalataha a lautolu mo e talahau mooli e tau logonaaga ha lautolu. Kua fanogonogo fakalilifu e lautolu e tau talahauaga he tau matakainaga leveki. (Tau Fakatai 13:10; 18:13) He mole e liogi ma e agaaga tapu, ne fakavē e lautolu e tau fifiliaga ke he tau matapatu fakaakoaga he Tohi Tapu mo e tau takitakiaga ne lomi fakailoa he “fekafekau fakamoli mo e loto matala.” (Mataio 24:45-47; 1 Korinito 4:6) Ka taute he kau he tau motua e fifiliaga mitaki faka-Tohi Tapu, igatia e motua mo e hihiga ke he takitakiaga he agaaga tapu he lalago e fifiliaga ia pete ni ko e manatu fakatagata ne nakai talia he tokologa. Ko e mahani fakalatalata pihia he fakaholo ki mua e olioli mo e mafola mo e fakatoka e fakafifitakiaga mitaki ma e tau mamoe he puhala ke feoaki mo e Atua. (Mika 6:8) Kua mahani fakalatalata nakai a koe he kau auloa mo e tau fifiliaga ne fakavē ke he Tohi Tapu ne taute he tau leveki he fakapotopotoaga?
Kia Fakamanavalahi mo e Mahani Totonu
12. Ko e ha kua lata ia Iesu ke fakamanavalahi mo e mahani totonu he fakafehagai haana mo e tau aposetolo?
12 Ne fakamanavalahi mo e mahani totonu a Iesu he tau fehagaiaga haana mo e tau aposetolo, pete ne tau kūkū tumau ha lautolu. Ma e fakatai, ne fakatumau a Iesu ke peehi ki luga ha lautolu e lata ke loto holoilalo. (Mataio 18:1-4; 20:25-27) Ka e, he po fakahiku ha Iesu he moui ke he lalolagi, he mole laia e talahau e ia ki a lautolu e fakaakoaga he mahani fakatokolalo he holoholo e tau hui ha lautolu, “kua taufetoko foki a lautolu, po ko hai taha ia lautolu ke mua.” (Luka 22:24; Ioane 13:1-5) Kua ita kia a Iesu ke he tau aposetolo? Nakai, ne fakamaama totonu e ia ki a lautolu, he pehe: “Ko hai kia kua mua; ko e tagata kia ne takoto ke kai, po ko ia ne fekafekau mai? Nakai kia ko ia ne takoto ke kai? Ka ko au nai ha ha ia mutolu tuga ni e fekafekau.” (Luka 22:27) Ko e fakamanavalahi mo e mahani totonu ha Iesu—fakalataha mo e fakafifitakiaga mitaki haana—ne fakahiku ke hokotia ai ke he tau loto he tau aposetolo.
13, 14. Ko e magaaho pauaki fe kua lata e tau leveki ke mahani totonu?
13 Pihia foki, ko e leveki fakaagaaga kua liga lata ke foaki tumau e hatakiaga ke he tagata hagaao ke he lolelole pauaki. Kua liga hogohogomanava e leveki ke he taha. Pete ia, ko e tokaloto e tau lolelole haana ni ‘kia tomatoma kia lautolu kua mahani hemu,’ kua maeke ia ia ke fakakite e fakamanavalahi mo e mahani totonu ke he matakainaga haana. Ko e puhala pihia ne fifitaki e ia a Iesu mo Iehova, ne fakakite e tau mahani nei ke he tau Kerisiano oti—putoia e tau leveki.—1 Tesalonia 5:14; Iakopo 2:13.
14 Falu magaaho, ne lata e tau leveki ke foaki e hatakiaga malolō ki a ia ne taute e agahala kelea lahi mahaki. Ka nakai tokihala e tagata, kua lata e tau leveki ke utakehe mai a ia ne hehē he fakapotopotoaga. (1 Korinito 5:11-13) Pihia foki, ko e puhala kua fehagai a lautolu mo e tagata ia kua fakakite nukua vihiatia e lautolu e agahala, nakai ko e tagata agahala. (Iuta 23) Ko e mahani totonu he vala he tau leveki kua liga fakamukamuka ma e tau mamoe ne tafea kehe ati fakahiku ke liliu mai ke he lotopā.—Luka 15:11-24.
Tau Gahua Mitaki ne Omoomoi he Tua
15. Ko e heigoa e taha puhala kua fifitaki he tau leveki e mahani mitaki ha Iehova, ti ko e heigoa ne fakalagalaga a lautolu ke taute pihia?
15 “Kua mahani mitaki mai a Iehova ke he tau [tagata] oti,” pihia ki a lautolu ne nakai loto fakaaue ke he mena ne taute e lautolu. (Salamo 145:9; Mataio 5:45) Kua kitia pauaki e mahani mitaki ha Iehova he fakafano e ia e tau tagata haana ke fakamatala e “tala mitaki nai he kautu.” (Mataio 24:14) Kua fakakite he tau leveki e mahani mitaki he Atua he takitaki e gahua fakamatala nei. Ko e heigoa ne fakalagalaga e tau laliaga nakai maoki ha lautolu? Ko e tua malolō ki a Iehova mo e tau maveheaga haana.—Roma 10:10, 13, 14.
16. Maeke fēfē e tau leveki ke “mahani mitaki” ke he tau mamoe?
16 He lafi ke he gahua ‘mahani mitaki ke he tau tagata oti kana’ he fakamatala, kua ha ha he tau leveki e matagahua ke taute e mitaki “au atu ke he faoa ne tua.” (Kalatia 6:10) Taha puhala kua taute e lautolu e mena nei he taute e tau ahiahi ne leveki kua atihake. “Ne fiafia au he taute e tau ahiahi ne leveki,” he talahau he taha motua. “Ko e tau ahiahi ia ne tuku mai e magaaho ke atihake e tau matakainaga ma e tau laliaga ha lautolu mo e ke lagomatai a lautolu ke mailoga kua loto fakaaue ai ke he tau gahua malolō ha lautolu.” He falu magaaho, kua liga talahau he tau leveki e tau puhala kua maeke he tagata ke fakatolomaki e fekafekauaga haana ki a Iehova. He taute pihia, kua fifitaki he tau leveki mamoe pulotu e aposetolo ko Paulo. Mailoga e puhala ne futia a ia ke he tau matakainaga i Tesalonia: “Kua tua foki a mautolu ke he Iki kia mutolu, kua eke e mutolu e tau mena kua tala atu ai e mautolu kia mutolu, to eke mau foki e mutolu.” (2 Tesalonia 3:4) Ko e tau talahauaga pihia he mauokafua kua futia ke he tau manamanatuaga mitaki he tau mamoe mo e fakamukamuka ai ma lautolu ke “omaoma . . . ke he tau takitaki ha mutolu.” (Heperu 13:17) Ka moua e koe e ahiahi fakamalolōaga, ko e ha he fakakite e loto fakaaue ke he ahiahi ia?
Mahani Molū kua Lata mo e Mahani Fakalatalata
17. Ko e heigoa e fakaakoaga ne ako e Peteru mai ia Iesu?
17 Kua loto holoilalo a Iesu, pete ni he ekefakakelea ki a ia. (Mataio 11:29) He magaaho ne afokau mo e tapaki a ia, ne fakatātā e Iesu e mahani molū mo e mahani fakalatalata ne mua. He ohooho, ne taaki e Peteru e pelu mo e ta ai. Ka e fakamanatu age e Iesu ki a ia: “Piko kia a koe nakai maeke ia au ke ole atu ainei ke he haku a Matua, ti fekau mai e ia kia au e tau agelu ne mua he tokologa ke he tau lekeona ne hogofulu ma ua?” (Mataio 26:51-53; Ioane 18:10) Ne aoga lahi ki a Peteru e fakaakoaga ti fakamanatu foki he magaaho fakamui ke he tau Kerisiano: “Ko e mena ne mamahi a Keriso ni ma mutolu, ti toka ai e ia e fakafifitaki ma mutolu, kia mumui atu a mutolu ke he hana tau tuagahui. . . . Ko ia ne amuamu ki ai, ka e nakai amuamu atu ke taui atu, ne fakamamahi a ia ka e nakai fakamatakutaku atu.”—1 Peteru 2:21-23.
18, 19. (a) Ko e magaaho tonu fe ka fakatātā he tau leveki e mahani molū mo e mahani fakalatalata? (e) Ko e heigoa e tau hūhū ka manamanatu ki ai ka mui mai?
18 Pihia foki, kua loto holoilalo e tau leveki lauia mitaki pete ni ka taute fakakelea a lautolu. Tuga anei, ko e falu ne lali a lautolu ke lagomatai he fakapotopotoaga kua liga nakai talia fiafia. Kaeke kua manako lagomatai e taha ne auhia po ke gagao fakaagaaga, maeke ia ia ke talia e fakatonuaga he “vagahau, [a]ti tuga ne tuina ai e tau tagata he pelu.” (Tau Fakatai 12:18) Pete ia, tuga a Iesu, ne nakai taui aki e tau kupu kelea po ke taute fakakelea atu e tau leveki. Ka e, ne fakagahuahua e lautolu e mahani fakalatalata mo e fakakite agaia e logonaaga fakamatakainaga, he eke mooli mo fakamonuina ki a ia ne manako lagomatai. (1 Peteru 3:8, 9) Ako mai nakai a koe he fakafifitakiaga he tau motua mo e fakatātā e mahani molū mo e mahani fakalatalata ka moua e koe e fakatonuaga?
19 Nakai fakauaua, ne loto fakaaue a Iehova mo Iesu ke he gahua malolō he tau leveki tokoafe hane lopoti fakamakai e tau fuifui mamoe he lalolagi katoa. Kua ha ha ia Iehova mo e Tama haana foki e fakaalofa hofihofi hokulo ma e tokoafe he tau fekafekau lagomatai ne lalago e tau motua he ‘fekafekau ke he tau tagata tapu.’ (Heperu 6:10) Ti ko e ha mogoia kua tehatehaua e falu matakainaga taane papatiso ke hokotia atu ke he “gahua mitaki” nei? (1 Timoteo 3:1) Ti fakamahani fēfē e Iehova a lautolu ne kotofa e ia ke eke mo tau leveki haana? To manamanatu a tautolu ke he tau hūhū nei he vala tala ka mui mai.
Manatu Nakai e Koe?
• Ko e heigoa falu puhala ne fakakite he tau leveki e fakaalofa ke he fuifui mamoe?
• Maeke fēfē he tau tagata oti he fakapotopotoaga ke fakatolomaki e olioli mo e mafola?
• Ko e ha e tau leveki kua lata ke fakamanavalahi mo e mahani totonu ka foaki e fakatonuaga?
• Fakatātā fēfē he tau motua e mahani mitaki mo e tua?
[Tau Hūhū he Fakaakoaga]
[Fakatino he lau 18]
Kua fakalagalaga e tau motua ha ko e fakaalofa ke leveki e fakapotopotoaga
[Tau Fakatino he lau 18]
Ne fakaaoga foki e lautolu e magaaho mo e tau magafaoa ha lautolu ke he fakafiafiaaga . . .
. . . mo e he fekafekauaga
[Fakatino he lau 20]
Ko e matutakiaga mitaki he tau motua kua fakatolomaki e olioli mo e mafola he fakapotopotoaga