Ko e Fiafia he O he Mahani Hakohako
Ko e Fiafia he O he Mahani Hakohako
“Ko e fakamonuina a Iehova, ke maukoloa ai e tagata; ti nakai lafilafi e ia ha mamahi ki ai.”—TAU FAKATAI 10:22.
1, 2. Ko e ha kua lata ia tautolu ke puipui mai neke molea e amaamanaki ke he vahā anoiha?
“KO E amaamanaki lahi ke he vahā anoiha . . . ati nakai kitia e tautolu e tuaga mooli he vahā nei,” he mailoga he taha tagata pulotu ha Amerika. Ti kua mailoga mooli e mena nei ke he fanau ne lahi e amaamanaki ke he tau mena moua ka lalahi hake, ti nimo e lautolu e aoga he vahā tama ato leva e mole.
2 Kua ha ha foki he tau tagata tapuaki ha Iehova he falu a magaaho e puhala manamanatu nei. Ka e mailoga e mena ka tupu. Kua manako lahi a tautolu ke fakamooli e maveheaga he Atua ke tamai e parataiso ke he lalolagi. Kua talifaki a tautolu ke he moui ne ataina he gagao, vahā fuakau, mamahi, mo e matematekelea. Pete kua mitaki ke amanaki ke he tau mena pihia, ka e kua kaeke ke lahi e amaamanaki ha tautolu ke he tau monuina fakatino he vahā anoiha ti pokia mogoia e tau monuina fakaagaaga he vahā nei? Ko e kelea ha ia ka pihia! To liga mukamuka a tautolu ke fakalolelole mo e logona e ‘mamahi he loto ha kua mule e amaamanakiaga ha tautolu’ ke he mena ne manatu ki ai. (Tau Fakatai 13:12) Kua liga taute he tau lekua mo e tau mena uka he moui a tautolu ke logona e apitia he fakaagitau po ke momoko hifo ki a ia ni. Ti he nakai lali ke fahia ke he tau tuaga kelea, to liga feaki e tautolu e aga gūgū. Ko e tau mena oti nei kua maeke ke fakamamao mai ai he manamanatu loto fakaaue ke he tau monuina ha tautolu he magaaho nei.
3. Ko e heigoa ka hagaaki a tautolu ki ai he vala tala nei?
3 “Ko e fakamonuina a Iehova, ke maukoloa ai e tagata; ti nakai lafilafi e ia ha mamahi ki ai,” he tohi he Tau Fakatai 10:22. Nakai kia ko e tuaga mahuiga fakaagaaga he tau fekafekau he vahā foou nei ha Iehova ko e monuina ke olioli ki ai? Kia onoono atu a tautolu ke he falu puhala he mahuiga fakaagaaga ha tautolu mo e mailoga e kakano ma tautolu fakatagata. He fai magaaho ke manamanatu ke he tau monuina ne foaki mai e Iehova ke he “tagata tututonu kua fano mo e hana mahani hakohako” ka fakamalolō mooli e fifiliaga ha tautolu ke matutaki ke fekafekau fiafia ke he Matua ha tautolu he lagi.—Tau Fakatai 20:7.
Tau Monuina ne Taute a Tautolu ke Maukoloa he Mogonei
4, 5. Ko e fakaakoaga Tohi Tapu fe ne uho lahi ki a koe, mo e ko e ha?
4 Ko e iloilo tonu he tau fakaakoaga he Tohi Tapu. Kua fa mahani e tau lotu ha Kerisitenitome ke talahau teao ke talitonu ke he Tohi Tapu. Pete ia, kua kaumahala a lautolu ke talia e tau mena ne fakaako mai ai. Kua pihia foki e tau tagata i loto he taha e matakau lotu kua fa kehekehe e tau onoonoaga ha lautolu ke he tau mena ne fakaako mooli he tau Tohiaga Tapu. Ko e kehe ha ia e tuaga ha lautolu ke he tau fekafekau ha Iehova! Pete ko e ha tautolu a motu, aga, po ke feakiaga, kua tapuaki e tautolu e Atua ne iloa e tautolu e higoa. Nakai ko e Atua tolu taha ne fakagalogalo. (Teutaronome 6:4; Salamo 83:18; Mareko 12:29) Kua mailoga foki e tautolu ko e matakupu aoga lahi he pule katoatoa he Atua ke he lagi mo e lalolagi kua teitei tuai ke fakahiku ti he fakatumau e mahani hakohako ha tautolu ki a ia, kua igatia a tautolu mo e putoia fakatagata ke he matakupu ia. Kua iloa e tautolu e kupu mooli hagaao ke he tau tagata mamate ti kua tokanoa mai he matakutaku hopoate ke he Atua ne talahau he falu ke fakakikiveka e tau tagata ke he afi i helo po ke fakafano a lautolu ke he pulekatolia.—Fakamatalaaga 9:5, 10.
5 Mua atu foki, ko e fiafia ha ia ke iloa kua nakai moui puleheu mai a tautolu ha ko e tupu mai noa! Ka ko tautolu ko e tufugatia he Atua, ne taute ke he fakatai ni haana. (Kenese 1:26; Malaki 2:10) “Kua fakaaue atu au kia koe, ha ko e mena eke au kia matakutakuina mo e ofo ki ai,” he lologo he salamo ke he Atua. “Ko e tau mena ne eke e koe ko e tau mena ke ofomate ki ai haia; kua iloa tonuhia e au e tau mena ia.”—Salamo 139:14.
6, 7. Ko e heigoa e tau hikiaga he moui haau po ke he moui he falu kua iloa e koe ne kua fua mai e monuina?
6 Tokanoa mai he tau aga fa mahani mo e tau gahua hagahaga kelea. Kua loga e tau hatakiaga hagaao ke he tau hagahaga kelea he ula, molea e inu kava, mo e fakahanoa he mahani fakataane mo e fifine ne mai he tau puhala uta tala. Ko e laulahi, kua fakaheu e tau hatakiaga nei. Ka ko e heigoa, mogoia, ka tupu he magaaho ne iloa he tagata loto fakamooli kua fakatikai he Atua mooli e tau mena pihia ti nakai fiafia ki a lautolu ne taute ai? Nukua fakaohooho agataha e tagata ia ke utakehe e tau gahua pihia mai he haana a moui! (Isaia 63:10; 1 Korinito 6:9, 10; 2 Korinito 7:1; Efeso 4:30) Ha kua taute fakamua ai e ia ke fakafiafia a Iehova ko e Atua, kua moua foki e ia e tau aoga lafi ki luga—ko e malolō tino mitaki mo e manamanatuaga mafola.
7 Ke tiaki e tau aga kelea ne fa mahani kua uka lahi ma e tokologa. Pete ia, ke he tau tau takitaha kua hogofulu e tau afe hane kautū mai ai. Ne tukulele a lautolu ki a Iehova mo e hokotia ke papatiso he vai, ati fakakite ke he toloaga tagata kua tiaki e lautolu mai he tau momoui ha lautolu e tau gahua ne nakai fakafiafia e Atua. Ko e fakamalolōaga ha ia ma tautolu oti! Ati fakamalolō ai e fifiliaga ha tautolu ke tumau ke tokanoa mai he fakatupa ke he agahala mo e tau mahani fakamamahi.
8. Ko e heigoa e fakatonuaga ne fakavē ke he Tohi Tapu ne lafi ke he fiafia he magafaoa?
8 Ko e fiafia he moui magafaoa. Ke he tau motu loga kua lolelole e moui magafaoa. Kua loga e fakamauaga ne hiku ke tau vevehe, ti fa mahani ke toka hifo e fanau mo e logonaaga mamahi lahi. He falu motu i Europa, kua teitei ke 20 e pasene he tau magafaoa ne taha ni e matua he tau loto kaina. Kua lagomatai fēfē e Iehova a tautolu ke o he puhala he mahani hakohako hagaao ke he mena nei? Fakamolemole totou e Efeso 5:22–6:4, mo e mailoga e fakatonuaga mitaki ne foaki he Kupu he Atua ke he tau taane, tau hoana, mo e fanau. He fakagahua e tau mena ne talahau i ai mo e he falu Tohiaga Tapu foki ka fakamalolō mooli e pipiaga he fakamauaga, lagomatai e tau matua ke feaki fakamitaki e fanau, mo e lafi ke he moui fiafia he magafaoa. Nakai kia ko e monuina a ia ke olioli ki ai?
9, 10. Puhala fe ne kehe e onoonoaga ha tautolu ke he vahā anoiha mai he lalolagi?
9 Iloa mooli to nakai leva ti utakehe e tau lekua he lalolagi. Pete ko e pulotu he fakasaiene mo e he tau matini foou mo e tau laliaga fakamooli he falu takitaki, kua nakaila utakehe e tau lekua lalahi he moui he vahā nei. Ko Klaus Schwab, ne kamata e World Economic Forum, ne talahau foou “ko e tohi fakamau ke he tau mena ne paleko ai e lalolagi kua loagitu mo e ko e magaaho ke fehagai ki ai kua kū fakahaga.” Ne vagahau a ia ke he “hagahaga kelea ne lauia e tau motu oti tuga e fakamatakutakuina, malona fakahaga he takatakaiaga mo e nakai mauokafua he puhala fakatupe.” Ne fakahiku e Schwab: “He mogonei, ke mua atu he tali mai, kua fehagai e lalolagi mo e tau kitiaaga mooli ne kua lata ni mo e tau gahua auloa mo e mafiti lahi.” He holo ki mua e senetenari ke 21 aki, kua pulefu agaia e onoonoaga katoa ke he vahā anoiha he tagata.
10 Ko e mafanatia ha ia ke iloa kua fakatū e Iehova e fakaholoaga ka maeke ke utakehe e tau lekua oti he tagata—ko e Kautu faka-Mesia he Atua! He puhala he Kautu ia, to “fakahiku [he Atua mooli] e tau” mo e tamai e ‘mafola lahi.’ (Salamo 46:9; 72:7) Ko e Patuiki kotofa, ko Iesu Keriso, ‘to laveaki a ia ne nofogati, ko ia kua matematekelea, ko ia kua lolelole mai he favale mo e mai he mahani kelea.’ (Salamo 72:12-14) I lalo he pule Kautu, to nakai kūkū e tau mena kai. (Salamo 72:16) “To holoholo kehe [e Iehova] e tau hihina mata oti mai he tau mata ha [t]autolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.” (Fakakiteaga 21:4) Kua fitā he fakatū e Kautu i luga he lagi ti nakai leva to taute e tau mena kua lata ke fakamafola e tau lekua oti kana he lalolagi.—Tanielu 2:44; Fakakiteaga 11:15.
11, 12. (a) Kua tamai kia he tutuli e olioli e fiafia tukulagi? Fakamaama. (e) Ko e heigoa ne tamai e fiafia mooli?
11 He iloa e tau mena ne tamai e fiafia mooli. Ko e heigoa ne tamai e fiafia mooli? Ne talahau he taha tagata kumikumi ke he manamanatuaga na tolu e vala he fiafia—ko e olioli, fakaholoaga (ko e putoia ke he tau feua tuga e gahua mo e magafaoa), mo e kakanoaga (gahua ke he taha mena pauaki po ke foli ke lagomatai e falu). Mai he tau mena tolu ia, ne fakamau hifo e ia e olioli ke aoga tote mo e pehē: “Kua kehe lahi e mena nei ha kua tokologa e tagata ne ati viko e tau momoui ha lautolu he tutuli e olioli.” Ko e heigoa e onoonoaga he Tohi Tapu ke he mena nei?
12 Ne talahau he Patuiki ko Solomona ha Isaraela i tuai: “Ne pehe hifo au ke he haku loto, Hau a, to kamatamata e au a koe ke he olioli, kia fiafia a ke he mena mitaki; ti kitiala, ko e mena fakateaga ni haia. Ne pehe age au ke he kata, Kua heketia a ia; ko e olioli foki, Ko e heigoa kia e mena ne eke e ia?” (Fakamatalaaga 2:1, 2) Hagaao ke he Tohi Tapu, ko e ha olioli ne tupu mai he fiafia na galo vave. Ka e kua e putoia he gahua? Kua ha ha ia tautolu e gahua kakano lahi ke taute—ko e gahua fakamatala he Kautu mo e taute tutaki. (Mataio 24:14; 28:19, 20) He fakamatala ke he falu e fekau he fakamouiaga ne fakamaama i loto he Tohi Tapu, kua taute e tautolu e gahua ka fua mai e fakamouiaga ma tautolu mo e ma lautolu ne fanogonogo mai. (1 Timoteo 4:16) “Ha ko e tau ekegahua . . . fakalataha mo e Atua,” kua mailoga e tautolu “kua mua e monuina hana ke foaki atu, ke he monuina hana ke talia mai.” (1 Korinito 3:9; Gahua 20:35) Kua lafi he gahua nei e kakano mitaki ke he moui ha tautolu mo e foaki ke he Tufuga e tali ki a ia ne fakafiufiu a ia, ko Satani ko e Tiapolo. (Tau Fakatai 27:11) Mooli, kua fakakite e Iehova ki a tautolu kua tamai he mahani Atua fakamooli e fiafia mooli mo e tukulagi.—1 Timoteo 4:8.
13. (a) Ko e heigoa e puhala ne eke e Aoga Fekafekau Fakateokarasi ko e monuina ma tautolu ke olioli ki ai? (e) Puhala fe ne aoga mai a koe he Aoga Fekafekau Fakateokarasi?
13 Ko e polokalama fakamahani ne aoga mo e lauia mitaki. Ne fekafekau a Gerhard ko e motua he fakapotopotoaga he Tau Fakamoli a Iehova. He manatu e vahā fuata haana, ne pehē a ia: “He vahā fuata mui, ne lekua lahi e vagahau haaku. He magaaho ka tupetupe lahi , kua uka au ke vagahau fakahako ti kamata mogoia ke koekoe. Ne logona e au e tokolalo mo e fakaatukehe. Ne uta he tau matua haaku au ke he aoga fakaako vagahau, ka e nakai fai lagomatai e tau laliaga ha laua. Ko e lekua haaku ko e manamanatuaga, nakai fakatino. Ka e, ha ha ai e foakiaga homo ue atu mai ia Iehova—ko e Aoga Fekafekau Fakateokarasi. He hū ke he aoga nei ne atihake e malolō haaku. Ne lali fakalahi au ke fakagahua e tau mena ne ako e au. Ti lauia mitaki! Ne holo mitaki e vagahau haaku, galo e fakaatukehe, mo e malolō lahi ke he fekafekauaga. Mogonei kua maeke foki ia au ke lauga ke he toloaga tagata. Kua loto fakaaue mooli au ki a Iehova, he foaki mai e moui foou puhala he aoga ia.” Nakai kia ko e kakano mitaki a ia ke fiafia ke he puhala ne fakamahani e Iehova a tautolu ke taute e gahua haana?
14, 15. He tau magaaho fakaagitau, ko e heigoa e lagomatai ne ha ha i ai? Fakamaama.
14 Ko e fakafetuiaga fakatagata mo Iehova mo e lalagoaga mai he fakamatakainaga kaufakalataha he lalolagi katoa. Ko Katrin, ne nofo i Sihamani, kua fakaagitau lahi he logona e tau hokotaki ke he mafuike lahi mahaki mo e tau lauia he peau kula he faahi toga ki uta i Asia. Ne ahiahi atu e tama fifine haana ki Tailani he magaaho ne tupu e matematekelea. Ke he 32 e matahola ne nakai iloa he matua fifine nei ko e moui e tama haana po ke haia he tau tagata pakia ne tokoluga fakahaga e numera. Ko e totoka ha ia ha Katrin he moua e ogo he telefoni ke tala age kua hao e tama fifine haana!
15 Ko e heigoa ne lagomatai a Katrin he magahala he tau matahola ia ne fakaagitau? Ne tohia e ia: “Ne teitei katoa e magaaho nei he fakaaoga e au ke liogi ki a Iehova. Ti logona tumau e au e malolō lahi mo e mafola he manamanatuaga ne foaki he mena nei ki a au. Mua atu, ne aahi mai e tau matakainaga fakaagaaga fakahele mo e fakamafana au.” (Filipi 4:6, 7) To liga kelea lahi ha e tuaga haana kaeke nakai fakaaoga e ia e tau matahola ia ke liogi ki a Iehova mo e mafanatia he tau matakainaga fakaagaaga fakahele! Ko e fakafetuiaga tata ha tautolu mo Iehova mo e haana Tama mo e lafiaga tata ha tautolu mo e tau matakainaga Kerisiano, ko e monuina kehe ue atu ne kua uho lahi ke uta fakateaga.
16. Talahau e mena ne tupu ne fakakite e uho he amaamanakiaga he liu tu mai.
16 Ko e amaamanakiaga ke liu kitia e tau fakahele ne mamate. (Ioane 5:28, 29) Ko e fuata taane ko Matthias ne feaki ko e taha he Tau Fakamoli a Iehova. He nakai mailoga e tau monuina haana, ne tafea kehe a ia he fakapotopotoaga Kerisiano he vahā fuata mui haana. Ne tohia e ia mogonei: “Ne nakai fa hokulo e tau tutalaaga haaku mo e matua taane. Mai he tau tau loga ne lahi e taufetoko ha maua. Pete ia, ne manako tumau e matua taane haaku ke moua e au e moui mitaki lahi. Ne hofihofi e fakaalofa haana ki a au, ko e mena ne kaumahala ia au ke kitia he magaaho ia. He 1996, ne nofo au he tapa he mohega haana, tōtō haana lima mo e tagi fekapai, ne tala age e au e tokihala lahi haaku ke he tau mena ne taute e au mo e kua ofaofa lahi e au a ia. Ka kua nakai logona e ia au. He mole e gagao fakakū, ne mole atu a ia ke he mate. Kaeke moui au ke kitia e matua haaku he liu tu mai, to taute e maua e mafola ma e vahā kua mole. Ti to fiafia mooli a ia ke iloa kua eke au he mogonei ko e motua ti kua kotofa e hoana haaku mo au ke fekafekau ko e tau paionia.” Ko e monuina ha ia he amaamanakiaga he liu tu mai ki a tautolu!
“Nakai Lafilafi e Ia ha Mamahi ki Ai”
17. Ko e heigoa ka lagomatai aki a tautolu he lata ke manamanatu fakahokulo ke he tau monuina ha Iehova?
17 Hagaao ke he haana Matua he lagi, ne pehē a Iesu Keriso: “Kua fakahake ne ia hana la kia lautolu kua mahani kelea katoa mo lautolu kua mahani mitaki, kua fakato hifo foki e ia e uha kia lautolu kua tututonu katoa mo lautolu kua nakai tututonu.” (Mataio 5:45) Kaeke liligi hifo e Iehova e tau monuina ki luga he tau tagata nakai tututonu mo e mahani kelea, to liligi mooli foki e ia ki luga ha lautolu ne o he mahani hakohako! ‘To nakai lamakai e Iehova ke he taha mena mitaki kia lautolu kua hakohako ha lautolu a puhala,’ he tohi he Salamo 84:11. Ka manamanatu fakahokulo a tautolu ke he uho he levekiaga mo e manamanatu ne fakakite e ia ki a lautolu ne fakaalofa ki a ia, kua fufula e tau loto ha tautolu he loto fakaaue mo e fiafia!
18. (a) Maeke fēfē ke talahau kua nakai lafilafi e Iehova ha mamahi ke he monuina haana? (e) Ko e ha ne matematekelea e tau tagata fakamooli tokologa he Atua?
18 “Ko e fakamonuina a Iehova”—ne foaki ke he tau tagata haana e mahuiga fakaagaaga. Ti kua fakamafana ki a tautolu ne “nakai lafilafi e ia ha mamahi ki ai.” (Tau Fakatai 10:22) Ko e ha mogoia ne hohoko e tau kamatamata ke he tau tagata fakamooli tokologa he Atua, ti fakatupu e mamahi mo e matematekelea lahi ki a lautolu? Kua tupu e tau mena uka mo e tupetupe ki a tautolu ke he tolu e matapatu kakano. (1) Ko e fatuakiloto agahala ha tautolu. (Kenese 6:5; 8:21; Iakopo 1:14, 15) (2) Ko Satani mo e haana tau temoni. (Efeso 6:11, 12) (3) Ko e lalolagi kelea. (Ioane 15:19) Pete he fakaatā e Iehova e tau mena kelea ke tutupu ki a tautolu, nakai ko ia ne fakatupu e tau mena ia. Ko e mooli, “ko e tau mena mitaki oti kua foaki noa mai, katoa mo e tau mena fakaalofa oti kua katoatoa ai e mitaki, mai luga e tau mena ia, kua hifo mai mai he Matua he maama.” (Iakopo 1:17) Kua nakai mamahi e tau monuina ha Iehova.
19. Ko e heigoa ne talifaki ki a lautolu ne matutaki ke o he mahani hakohako?
19 Ke mailoga e mahuiga fakaagaaga kua lata tumau ke fakatata fakalahi atu ke he Atua. Ka feaki e tautolu e fakafetuiaga tata mo ia, kua ‘tauteute e tautolu e koloa ko e fakaveaga mitaki ma e tau aho ne tatali, kia toto atu a tautolu ke he moui mooli’—ko e moui tukulagi. (1 Timoteo 6:12, 17-19) He vahā anoiha he lalolagi foou ne taute he Atua, to fakapikiua e maukoloa fakaagaaga ha tautolu mo e tau monuina fakatino. Ko e moui mooli mogoia to eke ma lautolu ne ‘fanogonogo tumau ke he leo a Iehova.’ (Teutaronome 28:2) Mo e fifiliaga malolō, kia matutaki atu a tautolu ke o fiafia he mahani hakohako.
Ko e Heigoa ne Ako e Koe?
• Ko e ha kua nakai pulotu ke molea e amaamanaki ke he vahā anoiha?
• Ko e heigoa e tau monuina hane olioli e tautolu mogonei?
• Ko e ha ne matematekelea e tau fekafekau tua fakamooli he Atua?
[Tau Hūhū he Fakaakoaga]