Kua Mautauteute Nakai a Koe Ma e Fakahaoaga?
Kua Mautauteute Nakai a Koe Ma e Fakahaoaga?
“Kia hu atu a koe katoa mo e hau a magafaoa oti ke he vaka; ha kua kitia tuai e au a koe kua tututonu ki mua haku ke he hau nai.”—KENESE 7:1.
1. Ko e heigoa e foakiaga ma e fakahaoaga ne taute e Iehova he vahā a Noa?
KO IEHOVA ne “ta mai e fakapuke ke he lalolagi matahavala” he vahā a Noa, ka e taute foki e Ia e tau foakiaga ma e fakahaoaga. (2 Peteru 2:5) Ne age he Atua mooli ki a Noa ne mahani tututonu e tau hatakiaga maaliali ke ta e vaka ke fakahao e tagata mai he fakapuke he lalolagi katoa. (Kenese 6:14-16) Tuga ne amanaki a tautolu ke he fekafekau loto hakohako ha Iehova, “ti eke ni e Noa; tuga ne poaki mai he Atua kia ia ke he tau mena oti.” Mooli ni, “ne eke pihia ai e ia.” Ha ko e omaoma foki ha Noa, ati moui a tautolu he vahā nei.—Kenese 6:22.
2, 3. (a) Fēfē e aga he tau tagata he vahā a Noa ke he gahua ha Noa? (e) Ko e heigoa e mauokafua ne moua e Noa ati hu atu ke he vaka?
2 Nakai ko e gahua mukamuka e ta he vaka. Tuga ni, kua tokologa e tagata ne ofo ke he mena ne taute e Noa mo e magafaoa haana. Pete ia, kua nakai taute he mena ia a lautolu ke talitonu kua fakavē e fakamouiaga ke he hūhū atu ha lautolu ki loto he vaka. Fakahiku, ne oti e fakauka he Atua ke he lalolagi mahani kelea ia.—Kenese 6:3; 1 Peteru 3:20.
3 He mole e tau hogofulu tau he gahua mategūgū a Noa mo e magafaoa haana, ne pehē a Iehova ki a Noa: “Kia hu atu a koe katoa mo e hau a magafaoa oti ke he vaka; ha kua kitia tuai e au a koe kua tututonu ki mua haku ke he hau nai.” He tua mo e mauokafua ke he kupu ha Iehova, “ne hu atu a Noa, mo e hana tau tama tane, mo e hana hoana, mo e tau hoana he hana tau tama tane, fakalataha mo ia.” Ne pa e Iehova e gutuhala ke puipui aki e tau tagata tapuaki haana. He magaaho ne hoko e Fakapuke ke he lalolagi, ne eke e vaka mo foakiaga mooli he Atua ma e fakahaoaga.—Kenese 7:1, 7, 10, 16.
Tau Fakatataiaga Foou Nei ke he Vahā a Noa
4, 5. (a) Ko e heigoa ne fakatatai aki e Iesu e magaaho he ha ha hinei haana? (e) Ko e heigoa e tau tataiaga ne ha ha he vahā a Noa mo e vahā ha tautolu?
4 “Ke tuga ni e tau aho a Noa, ti pihia ka ha ha hinei e Tama he tagata.” (Mataio 24:37, NW) Mo e tau kupu nei, ne fakakite e Iesu to tatai e magaaho he ha ha hinei haana ke he vahā a Noa, ti kua pihia mooli. Mua atu tali mai he 1919, ko e fekau hataki ne tatai mo e fekau ne fakamatala e Noa kua hane fakapuloa ke he tau tagata he tau motu oti. Ko e tokologa, ne tatai e aga ha lautolu ke he tau tagata he vahā a Noa.
5 He puhala he Fakapuke, ne totoko atu a Iehova ke he lalolagi ne ‘puke ke he favale.’ (Kenese 6:13) He fakaheu a Noa mo e haana magafaoa ke fakalataha ke he favale pihia, ka e taute mo e mafola e gahua ta he vaka ne mailoga ai he tau tagata ne kitia a lautolu. Hanei, kua kitia foki e tautolu e tataiaga ke he vahā ha tautolu. Ko e tau tagata fakamooli mogonei kua ‘kitia e kehe he tagata mahani tututonu mo e tagata mahani kelea; ko ia kua fekafekau ke he Atua, mo ia kua nakai fekafekau kia ia.’ (Malaki 3:18) Ko e mahani fakamooli, totonu, mafola, mo e lotomatala ne fakatātā he Tau Fakamoli a Iehova kua nava he tau tagata onoono ne nakai fili tagata ti ko e tau mahani nei ati mailoga ai e kehe he tau tagata he Atua mo e laulahi he lalolagi. Kua fakaheu he Tau Fakamoli e tau mahani favale oti kana mo e toka e agaaga ha Iehova ke takitaki a lautolu. Ko e kakano haia kua fakamonuina a lautolu aki e mafola mo e kakano ne tutuli e lautolu e puhala tututonu.—Isaia 60:17.
6, 7. (a) Ko e heigoa ne kaumahala e tau tagata he vahā a Noa ke loto fakaaue, ti tatai fēfē mo e vahā nei? (e) Ko e heigoa e tau fakafifitakiaga ne fakakite e Tau Fakamoli a Iehova ke kehe lahi?
6 Ne kaumahala e tau tagata he vahā a Noa ke mailoga kua ha ha ia Noa e lalago faka-Atua mo e kua muitua ke he takitakiaga he Atua. Ti nakai uta fakahokulo e lautolu e fakamatala atu haana mo e fakateaga ke he haana fekau hataki. Ka e kua e vahā nei? Pete kua tokologa ne nava ke he gahua mo e mahani he Tau Fakamoli a Iehova, kua laulahi ne nakai talitonu ke he tala mitaki mo e hatakiaga he Tohi Tapu. Ko e tau tuuta kaina, tau takitaki gahua, po ke tau magafaoa kua liga navanava lahi atu ke he tau fua mitaki he tau Kerisiano mooli ka e togi agaia, “Kane mai ni nakai ko e Tau Fakamoli a Iehova a lautolu!” Ko e mena ne pokia e lautolu nei na fakakite he Tau Fakamoli e tau fua tuga e fakaalofa, mafola, totonu, mahani mitaki, mahani molū, mo e fakamanavalahi ha kua takitaki he agaaga tapu he Atua a lautolu. (Kalatia 5:22-25) Ti kua lata he mena nei ke mahomo e falanaki ke he fekau ha lautolu.
7 Ke tuga anei, i Rusia, ne ta he Tau Fakamoli a Iehova e Fale he Kautu. Ne pehē e tagata taane ne tū ke tala ke he taha he tau tagata gahua: “Kehe ai pihia e gahua ta fale nei—kua nakai ula, nakai vagahau kelea, ti ai fai tagata ne konahia! Ko e taha nakai he Tau Fakamoli a Iehova a koe?” Ne hūhū e tagata gahua ki a ia, “Kaeke pehē au nakai, to talitonu nakai e koe au?” Ne tali mafiti age e tagata, “Nakai.” He taha maaga lahi foki i Rusia, ne nava lahi e takitaki he maaga he magaaho ne kitia e ia e Tau Fakamoli hane ta e Fale he Kautu foou ha lautolu. Ne talahau e ia pete kua tatai e tau matakau fakalotu oti ki a ia he magaaho fakamua, ka e he mole e kitia e mahani fakamooli mo e nakai fulukovi he Tau Fakamoli a Iehova, ne hiki e manatu haana. Ko e ua ni e fakafifitakiaga nei ke fakakite e kehe he tau tagata ha Iehova mai ia lautolu ne nakai pipiki ke he tau tutuaga he Tohi Tapu.
8. Ko e heigoa ne falanaki e fakahaoaga ha tautolu mai he fakaotiaga he lalolagi kelea nei?
8 He magahala fakahiku he “lalolagi tuai” ne tatafi he fakapuke, ko Noa ko e “ogo [tua fakamooli] he tututonu.” (2 Peteru 2:5) He vahā fakahiku he fakatokaaga nei, hane fakamatala he tau tagata ha Iehova e tau tutuaga tututonu he Atua mo e hane fakapuloa e tala mitaki hagaao ke he puhala ke hao atu ke he lalolagi foou. (2 Peteru 3:9-13) Ka e tuga ni a Noa mo e magafaoa matakutaku Atua haana ne hao i loto he vaka, ko e fakahaoaga he tau tagata takitokotaha he vahā nei kua falanaki ni ke he tua ha lautolu mo e lafi fakamooli atu ha lautolu ke he vala he fakatokatokaaga ha Iehova he lagi mo e lalolagi katoatoa.
Lata ke Moua e Tua ma e Fakahaoaga
9, 10. Ko e ha kua aoga e tua kaeke ke hao mai a tautolu he fakaotiaga he fakatokaaga ha Satani?
9 Ko e heigoa kua lata he tagata ke taute ke hao mai he moumouaga ne tata mai ke he lalolagi ne ha ha he pule ha Satani? (1 Ioane 5:19) Kua lata ia ia ke mailoga fakamua e manako ma e puipuiaga. Ti lata ia ia ke fakagahuahua e puipuiaga ia. Ne taute ni he tau tagata he vahā a Noa e tau mena fa mahani he tau aho takitaha mo e nakai manako ke moua e puipuiaga mai he matematekelea i mua. Kua fai mena foki a lautolu ne kaumahala ki ai—ko e tua ke he Atua.
10 Ke he taha faahi, ne mailoga e Noa mo e magafaoa haana e manako ke moua e puipuiaga mo e laveakiaga. Ne fakagahua foki e lautolu e tua ke he Pule Katoatoa he Lagi mo e Lalolagi, ko Iehova ko e Atua. “Ka nakai tua, ti nakai maeke ke fakafiafia kia [Iehova],” he tohia he aposetolo ko Paulo, “ha ko e mena lata ia ia kua fina atu ke he Atua ke talia kua moui a ia, ko ia foki kua taui mai a lautolu kua kumi fakamakutu kia ia.” Ne lafi e Paulo: “Ko e tua ne taute ai e Noa e vaka mo e matakutaku, kia momoui ai hana faoa, ha kua fakailoa he Atua kia ia e tau mena nakaila kitia ke he vaha ia; kua fakahala ai e ia e lalolagi, ti moua e ia e tututonu, ha ha he tua.”—Heperu 11:6, 7.
11. Ko e heigoa ka ako e tautolu mai he puhala ne foaki e Iehova e puipuiaga he tau vahā kua mole?
11 Ke hao mai he fakaotiaga he fakatokaaga kelea nei, kua nakai lata ia tautolu ke talitonu ni hokoia to moumou ai. Kua lata ia tautolu ke fakagahua e tua, fakaaoga fakamitaki e tau foakiaga he Atua ma e fakahaoaga. Mooli, kua lata ia tautolu ke fakagahua e tua ke he poa lukutoto he Tama he Atua, ko Iesu Keriso. (Ioane 3:16, 36) Pete ia, kua lata ia tautolu ke manatu na ko lautolu hokoia ni i loto he vaka ha Noa ne hao he Fakapuke. Tatai foki, ko e tau maaga ne eke mo huaga i Isaraela i tuai kua foaki e puipuiaga ma lautolu ne kelipopo tōtamaki taha tagata kaeke ke hola agataha a ia ke he maaga pihia ti nofo i ai ato mate e ekepoa ne mua. (Numera 35:11-32) Ko e malaia ke hogofulu aki he vahā a Mose, ne kelipopo e tau tama uluaki he tau Aikupito, ka e fakahao he tau Isaraela. Ko e ha? Ne fitā e hataki e Iehova a Mose: “Kia uta foki e lautolu [ko e tau Isaraela] e maga toto [he punua mamoe he Paseka], mo e tuku atu ke he na pou ua he gutuhala, mo e hana akau fakalava he tau fale ka kai ai e lautolu. . . . aua foki neke hu ki fafo taha ia mutolu ke he gutuhala he hana fale ato hoko ke he pogipogi.” (Esoto 12: 7, 22) Ko hai he tau tama uluaki he tau Isaraela ka fakaheu e tau hatakiaga ia ne foaki he Atua ke hu ki fafo he fale ne pīpī aki e toto e tau pou ua mo e akau fakalava i luga he gutuhala?
12. Ko e heigoa e hūhū kua lata ia tautolu takitokotaha ke hūhū hifo, mo e ko e ha?
12 Kua ha ha mogoia ia tautolu e kakano ke manamanatu fakamitaki hagaao ke he tuaga fakatagata ha tautolu. Kua haia mooli nakai a tautolu i loto he fakaholoaga ha Iehova ma e puipuiaga fakaagaaga? Ka hoko mai e matematekelea lahi, ko e tau hihina mata he fiafia mo e loto fakaaue ka tafe hifo he tau fofoga ha lautolu ne kumi e puipuiaga pihia. Ma e falu, to ha ha ai ni e tau hihina mata he loto mamahi mo e he tokihala.
Kua Mautauteute a Tautolu ha ko e Tau Hikihikiaga Fakahaga
13. (a) Ko e heigoa e aoga he tau hikihikiaga he fakatokatokaaga? (e) Fakamaama falu a hikihikiaga fakahaga.
13 Kua taute fakahaga e Iehova e tau hikihikiaga ke he fakatokatokaaga haana he lalolagi. Kua taute ai ke fakafuluola, fakatumau, mo e fakamalolō e fakaholoaga haana ma e puipuiaga fakaagaaga ha tautolu. Mai he atu tau 1870 ke he 1932, ne vili he tau tagata he fakapotopotoaga e tau motua mo e tau tiakono ke he kotofa ha lautolu. He 1932 ko e tau motua ne vili kua hukui he komiti fekafekau ne vili he fakapotopotoaga ke lagomatai e tau takitaki fekafekau ne kotofa. He magahala he 1938, ne taute e tau fakaholoaga ke kotofa fakateokarasi e tau fekafekau oti he fakapotopotoaga. I lalo he takitakiaga he Kau Fakatufono he Tau Fakamoli a Iehova, tali mai he 1972, ne taute ai e tau fakailoaaga ti ka talia ai, to moua he tau fakapotopotoaga e tau tohi ke kotofa fakateokarasi aki e tau leveki mo e tau fekafekau lagomatai. Ke he tau tau loga, ne malikiti hake e matagahua he Kau Fakatufono mo e taute e tau hikihikiaga ke fakamukamuka aki e gahua.
14. Ko e heigoa e fakaholoaga fakamahani ne kamata he 1959?
14 He 1950, ko e manamanatu fakamitaki ke he Salamo 45:16 ne takitaki atu ke he fakaholoaga ke fakamahani tumau. Ne totou he tohi ia: “To hukui ni hāu a tau matua he hāu a tau aloalomanava; to kotofa a lautolu mo tau iki ke he lalolagi oti.” Ko e tau motua ne takitaki e fakapotopotoaga mogonei kua fakamahani ma e tau matagahua fakateokarasi he magaaho nei mo e ka mole a Amaketo. (Fakakiteaga 16:14, 16) Ne kamata e Aoga Fekafekau he Kautu he 1959. He magaaho ia, ne ha ha ai e aoga fakaako ke taha e mahina ne foaki pauaki ma e tau fekafekau he fakapotopotoaga, ne ui ai e tau leveki he fakapotopotoaga he magaaho ia. Ko e aoga nei he mogonei kua fakalaulahi atu ke fakaako e tau leveki mo e tau fekafekau lagomatai oti. Ko e tau matakainaga taane nei, he magaaho fakamui, kua takitaki e fakamahaniaga takitokotaha he Tau Fakamoli a Iehova he tau fakapotopotoaga ni ha lautolu. Ti, kua lagomatai fakaagaaga e tau tagata oti mo e fakamalikiti e lauia mitaki he fekafekauaga ha lautolu ko e tau tagata fakapuloa he tala mitaki he Kautu.—Mareko 13:10.
15. Ko e heigoa e tau puhala ua ne puipui e meā he fakapotopotoaga Kerisiano?
15 Ko e tau tagata takitokotaha ne manako ke eke mo vala he fakapotopotoaga Kerisiano kua lata ke hokotia ke he tau tutuaga kua lata. Mooli ai, ko lautolu hane vā mai he magaaho nei kua pa ki fafo tuga ni e tau tagata ne nakai fakaatā ke hūhū ke he vaka ha Noa. (2 Peteru 3:3-7) Ti mua atu tali mai he 1952, ne malikiti hake e lalago he Tau Fakamoli a Iehova ke he fakaholoaga ne lagomatai ke puipui e fakapotopotoaga—puhala ia, he tuku ki tua e tau tagata agahala ne nakai fakatokihala. Mooli, ko lautolu ne hehē ti fakatokihala mooli kua lagomatai fakaalofa ke “fakamolemole e tau puhala ma e tau hui ha [l]autolu.”—Heperu 12:12, 13; Tau Fakatai 28:13; Kalatia 6:1.
16. Ko e heigoa e tuaga fakaagaaga he tau tagata ha Iehova?
16 Ko e tuaga mahuiga fakaagaaga he tau tagata ha Iehova kua nakai ko e mena fakaofo po ke tupu tōtamaki. Puhala he perofeta ko Isaia, ne pehē a Iehova: “Kitiala, to kai mena haku a tau fekafekau, ka ko mutolu to hoge a mutolu; kitiala, to inu haku a tau fekafekau, ka ko mutolu to fia inu ni a mutolu; kitiala, to fiafia haku a tau fekafekau, ka ko mutolu to mā ni a mutolu.” (Isaia 65:13, 14) Kua matutaki a Iehova ke foaki ki a tautolu e tau mena kai fakaagaaga loga ne atihake he magaaho tonu ke fakatumau a tautolu ke malolō fakaagaaga.—Mataio 24:45.
Kia Mautauteute ma e Fakahaoaga
17. Ko e heigoa ka lagomatai a tautolu ke mautauteute ke hao?
17 Kua nakaila pihia tali mai fakamua, ko e magaaho ainei ke “manatu foki a tautolu ko e taha ke he taha, ke fakalagalaga ai e fakaalofa mo e tau gahua mitaki; aua neke tiaki e fakapotopotoaga ha tautolu tuga ne mahani he falu, ka kia fefakamafanaaki.” (Heperu 10:23-25) He pipiki fakatata mo e fakatumau ke hakahakau ke he taha he tau fakapotopotoaga ne molea e 98,000 he Tau Fakamoli a Iehova ka lagomatai a tautolu ke mautauteute ma e fakahaoaga. To moua e tautolu e lalago he tau katofia talitonu he eketaha a tautolu ke fakakite e “tagata fou” mo e taute loto katoa e tau laliaga ke lagomatai falu ke iloa e tau foakiaga ha Iehova ma e fakahaoaga.—Efeso 4:22-24; Kolose 3:9, 10; 1 Timoteo 4:16.
18. Ko e ha kua fakamalolō a koe ke fakatata fakatumau ke he fakapotopotoaga Kerisiano?
18 Ko Satani mo e lalolagi kelea haana hane fiafia lahi ke fakataki kehe a tautolu mai he fakapotopotoaga Kerisiano. Pete ia, kua lata ia tautolu ke fakatumau ke eke mo vala ki ai mo e hao mai he fakaotiaga he fakatokaaga he lalolagi nei. Kia omoi ai he fakaalofa ma Iehova mo e loto fakaaue ma e tau foakiaga fakaalofa haana a tautolu ke fakamalolō fakalahi ke fakakaumahala e tau laliaga ha Satani. He manamanatu fakahokulo ke he tau monuina ha tautolu he vahā nei ka fakamalolō e fifiliaga ha tautolu. Ko e falu he tau monuina nei to fakatutala ki ai he vala tala ka mui mai.
Ko e Heigoa Haau a Tau Tali?
• Tatai fēfē e vahā ha tautolu ke he vahā a Noa?
• Ko e heigoa e aga ne kua lata ma e fakahaoaga?
• Ko e heigoa e tau hikihikiaga fakahaga ne fakamalolō e fakaholoaga ha Iehova ma e puipuiaga ha tautolu?
• Maeke fēfē ia tautolu takitokotaha ke mautauteute ma e fakahaoaga?
[Tau Hūhū he Fakaakoaga]
[Fakatino he lau 12]
Nakai fanogonogo e tau tagata he vahā a Noa ki a Noa
[Fakatino he lau 13]
Kua aoga lahi ke uta fakahokulo e tau fekau hataki he Atua
[Fakatino he lau 14]
Ko e heigoa ne taute he Aoga Fekafekau he Kautu?
[Fakatino he lau 15]
Hanei e magaaho ke fakatumau ke fakatata ke he fakapotopotoaga Kerisiano