Leveki he Atua a Lautolu ne Momotua
Leveki he Atua a Lautolu ne Momotua
KO E tupu lahi he ekefakakelea ha lautolu ne momotua he vahā nei kua nakai ko e mena ke ofo ai. He vahā fakamua, ne talahau tuai he Tohi Tapu he “tau aho fakamui” he fakatokaaga nakai mahani Atua nei, to “ofaofa he tau tagata a lautolu ni, . . . to nakai fai fakaalofa.” (2 Timoteo 3:1-3) Ko e kupu Heleni ma e “fai fakaalofa” kua maeke ke putoia e fakaalofa ne ha ha i loto he tau magafaoa. Ka fakatatai ke he perofetaaga he Tohi Tapu, kua maaliali e nakai fai fakaalofa pihia he vahā nei.
He kehekehe mamao mai he tau tagata ne ekefakakelea a lautolu ne momotua, ko Iehova ko e Atua kua ofania lahi mo e leveki ki a lautolu kua momotua. Manamanatu ke he puhala ne fakakite e mena nei he Tohi Tapu.
‘Ko e Fakafili ke he Tau Fifine Takape’
Ko e manamanatu lahi ha Iehova ko e Atua ki a lautolu ne momotua kua kitia maali he tau Tohiaga Tapu Heperu. He Salamo 68:5, ke fakatai, ne fakahigoa e Tavita e Atua ‘ko e fakafili ke he tau fifine takape,’ ne fa tokologa ko e tau tagata momotua. * Ke he falu fakaliliuaga he Tohi Tapu, ko e kupu “fakafili” kua talahau “ko e tagata lalago,” “ko e tagata puipui,” mo e “toa.” Ko e mena ia, kua leveki e Iehova e tau takape. Ati pehē e Tohi Tapu, ka ekefakakelea a lautolu, to tupu lahi e ita haana. (Esoto 22:22-24) Ko e tau takape—mo lautolu oti ne momotua kua tua fakamooli—nukua ofania lahi he Atua mo e he haana tau fekafekau. Ne fakakite he Tau Fakatai 16:31 e onoonoaga ha Iehova ko e Atua mo e ke he haana tau tagata he pehē: “Ko e foufou fulufuluola e ulu hina, kaeke ke moua ai ke he puhala he tututonu.”
Nakai ofo ai, ko e fakalilifu ki a lautolu ne momotua ko e taha matapatu vala a ia he Fakatufono ha Iehova ne age ki a Isaraela. Ne hataki ke he tau Isaraela: “Kia tu a koe ki mua hana kua ulu hina, kia fakalilifu atu foki ki mua he tagata motua, mo e matakutaku ke he hau a Atua; ko au ko Iehova.” (Levitika 19:32) Ko e mena ia, ko e onoonoaga ha Isaraela ki a lautolu ne momotua kua matutaki lahi ke he fakafetuiaga he tagata mo Iehova ko e Atua. Kua nakai maeke e tagata ke pehē kua fakaalofa a ia ke he Atua ka e ekefakakelea e ia a lautolu ne momotua.
Kua nakai ha ha e tau Kerisiano i lalo he Fakatufono faka-Mose. Pete ia, kua ha ha a lautolu i lalo he “fakatufono a Keriso,” ne lauia lahi e tau mahani mo e tau aga, putoia ai e fakakite he fakaalofa mo e manamanatu ke he tau matua mo lautolu ne momotua. (Kalatia 6:2; Efeso 6:1-3; 1 Timoteo 5:1-3) Ti fakakite he tau Kerisiano e fakaalofa nakai ha kua poaki ke taute pihia ka e ha kua omoomoi mai he loto. “Kia feofanaki fakalahi ai a mutolu mai he loto mea,” he fakamalolō he aposetolo ko Peteru.—1 Peteru 1:22.
Kua foaki mai he tutaki ko Iakopo falu kakano ma tautolu ke leveki a lautolu ne momotua. Ne tohi e ia: “Ko e hanai e oma ke he Atua kua mitaki mo e fakamoli ki mua he Atua e Matua, ke ahi e tau tagata kua mamate e tau matua, mo e tau fifine takape ke he ha lautolu a matematekelea, kia leveki foki e ia a ia neke ilaila a ia he lalolagi.” (Iakopo 1:27) Ne talahau e Iakopo e manatu mafanatia. Kua fakamanatu mai ki a tautolu e aoga he tau fakahele nei ki a Iehova.
Ko e mena ia, kua nakai koenaia ke nakai ekefakakelea a lautolu ne momotua. Ka e, kua lata ia tautolu ke fakakite kua manamanatu mooli a tautolu ki a lautolu he taute e tau gahua mitaki. (Kikite e puha “Gahuahua e Fakaalofa,” lau 6-7.) Ne tohi e Iakopo: Ko e “tua kua mate ia kaeke kua noa mo e tau gahua.”—Iakopo 2:26.
Fakamafana he “ha Lautolu a Matematekelea”
Fai manatu foki ke moua mai he tau kupu ha Iakopo. Mailoga ne tala age a Iakopo ke he tau Kerisiano ke aahi e tau takape he “ha lautolu a matematekelea.” Ko e kupu Heleni ke he “matematekelea” kua kakano ko e tupetupe, mamahi, po ke uhu ne moua ha ko e tau pehiaaga he tau tutuaga ha tautolu he moui. Nakai fakauaua ai kua tokologa a lautolu ne momotua ne logona e tupetupe pehēnei. Falu kua matimati. Falu kua mamahi he tau kaupaaga ne moua ha kua momotua. Pihia foki a lautolu ne hakahakau lahi he fekafekauaga ha lautolu ke he Atua ke liga fakalolelole. Manamanatu la ki a John, * ko e tagata fakamatala tua fakamooli he Kautu he Atua ke molea e fa e hogofulu tau, ko e tolu fakamui ne gahua a ia he fekafekauaga mau pauaki. Mogonei he 80 tumā e tau haana, ne talahau e John ne ha ha e tau magaaho ne fakalolelole a ia. Pehē a ia: “Ne fa liu au ono ki tua ti manatu e tau hepehepe haaku, kua loga lahi mahaki e tau hepehepe. Ne manamanatu tumau au na lata au ke mitaki atu e tau mena taute.”
Maeke a lautolu pehēnei ke mafanatia he iloa ko Iehova, pete he mitaki katoatoa, kua nakai amanaki a ia ke mitaki katoatoa foki a tautolu. Pete kua mailoga e ia e tau hepehepe ha tautolu, ne pehē e Tohi Tapu hagaao ki a ia: “Ioha na e, ane mai tokaloto e koe e tau mahani hepehepe, po ko hai, ma Iki na e, ke maeke ke tu atu?” (Salamo 130:3) E, ne molea atu e onoono ha Iehova ke he tau hepehepe ha tautolu mo e kitia e tau mena he loto. Iloa fēfē e tautolu e mena nei?
Ko e Patuiki ko Tavita—ne nakai ko e tagata kehe ke he tau hehē mo e nakai mitaki katoatoa—ne omoomoi he Atua ke fati e tau kupu nei, ne fakamau he Salamo 139:1-3:“Iehova na e, kua kumikumi e koe au, ti kua fioia ni e koe au. Ko koe ni kua fioia haku a nofo ki lalo mo e haku a tu mai ki luga; kua fioia fakamamao e koe haku a manamanatuaga. Kua kumi ni e koe haku a puhala mo e haku a takotoaga, kua mahani a koe mo e haku a tau puhala oti kana.” He mena nei, ko e kupu “kumi ni” kua kakano ke “hakahaka,” tuga e puhala ne hakahaka he tagata gahua fonua e tau otaota ka e toe hifo e tau saito. I lalo hifo he omoomoiaga faka-Atua, ne fakamafana e Tavita a tautolu na iloa e Iehova ke hakahaka a tautolu mo e manatu e tau gahua mitaki ha tautolu he manamanatuaga haana.
Ko e ha tautolu a Matua fakaalofa noa he lagi kua manatu—mo e ofania—e tau gahua mitaki ha tautolu ka tumau a tautolu ke tua fakamooli ki a ia. Mooli, ne pehē e Tohi Tapu to kitia e ia kua nakai tututonu ke fakanimonimo e tau gahua mo e fakaalofa ha tautolu ne fakakite ke he haana higoa.—Heperu 6:10.
“Kua Mole Atu e Tau Mena Fakamua”
Kua fakakite he Tohi Tapu ko e lekua he motua e tino ne nakai ko e mena ne finagalo he Atua ma e tagata. Ne pihia laia he totoko e tau mamatua uluaki, ko e tagata taane mo e fifine fakamua, ke he Tufuga ha laua ati eke ai e lauiaaga lolelole he fuakau mo vala he moui he tagata. (Kenese 3:17-19; Roma 5:12) To nakai matutaki tukulagi e mena nei.
Tuga ni kua fitā e mailoga, ko e loga he tau tutuaga kelea ne logona e tautolu he vahā nei—putoia e ekefakakelea ki a lautolu ne momotua—kua lafi ke he fakamooliaga kua nonofo a tautolu ke he “tau aho fakamui” he fakatokaaga nei. (2 Timoteo 3:1) Ko e finagalo he Atua ke utakehe e tau lauiaaga he agahala, putoia ai e tau lauiaaga he fuakau mo e mate. Pehē e Tohi Tapu: “To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.”—Fakakiteaga 21:4.
He lalolagi foou he Atua, ko e tau mamahi mo e tau matulituli he motua e tino to eke mo vala he tau mena fakamua kua mole atu. Pihia foki e ekefakakelea ki a lautolu ne momotua. (Mika 4:4) Pihia mo lautolu kua mamate ne kua ha ha he manamanatuaga he Atua to liuaki mai ke he moui, ke maeke foki ia lautolu ke moua e magaaho ke momoui tukulagi ke he lalolagi parataiso. (Ioane 5:28, 29, NW) He magaaho ia, to maaliali lahi tuga nakaila pihia ia kua nakai ni leveki e Iehova ko e Atua a lautolu ne momotua ka e pihia foki mo lautolu oti ne omaoma ki a ia.
[Tau Matahui Tala]
^ para. 5 Mooli, ne nakaila momotua ia e falu takape. Ko e mooli kua fakakite ai na leveki foki he Atua e tau takape fuata, tuga anei, ia Levitika 22:13.
^ para. 11 Nakai ko e higoa mooli haana.
[Puha/Tau Fakatino he lau 6, 7]
Gahuahua e Fakaalofa
Ha ha he Tau Fakamoli a Iehova e tau motua he fakapotopotoaga kua matamua ke fakakite e levekiaga ki a lautolu ne momotua. Ne uta fakahokulo e lautolu e tomatomaaga he aposetolo ko Peteru: “Kia leveki e mutolu e fuifui mamoe he Atua ha ia mutolu.” (1 Peteru 5:2) Ko e leveki ki a lautolu ne momotua ke he tau puhala fakatino ko e vala he levekiaga he fuifui mamoe he Atua. Ko e heigoa ka liga putoia he mena nei?
Kua lata ke fakauka mo e liga lagaloga e ahiahi atu mo e tutala ke iloa mahino e manako he tagata motua. Liga manako lagomatai ke taute e fakatau mo e fakameāaga, mo e ta atu ke he tau feleveiaaga faka-Kerisiano, he totou e Tohi Tapu mo e tau tohi faka-Kerisiano, mo e falu mena atu foki. Ke he ha magaaho ni ka maeke, kua lata ke taute ke mau e tau fakatokatokaaga ke lagomatai ti fakagahua ai. *
Ka e kua ka matematekelea lahi e matakainaga motua i loto he fakapotopotoaga, liga manako ke he lagomatai fakatupe? Fakamua, mitaki ke kumi kua fai fanau nakai po ke tau magafaoa ne maeke ke lagomatai. To felauaki e mena nei mo e talahauaga ia 1 Timoteo 5:4: “Kaeke foki ha ha he taha fifine takape e tau tama hana po ke fanau he tama hana, kia ako e lautolu ke fakamua e mahani mitaki ke he tau faoa ha lautolu, mo e taui atu ke he tau matua ha lautolu; ha ko e mena mitaki ia mo e fakafiafia ke he Atua.”
Liga lata a ia ne motua ke lagomatai ke fifili kua hokotia po ke nakai hokotia a ia ke moua ha lagomatai kua foaki he fakatufono. Liga maeke falu he fakapotopotoaga ke lagomatai. Kaeke nakai fai puhala lagomatai pehenei, kua lata he tau motua ke fifili kua hokotia nakai a ia ke he tau tutuaga ke moua e lagomatai mai he fakapotopotoaga. He falu tutuaga, kua fakaatā e mena nei he fakapotopotoaga he senetenari fakamua, ha kua tohi he aposetolo ko Paulo ki a ia ne fakatau gahua mo ia ko Timoteo: “Ua tohi ha fifine takape kua nakai la onogofulu hana tau tau, ne tane foki ke he tane tokotaha; kua talahaua mitaki ha ko e tau gahua mitaki hana, kaeke kua leveki e ia e tau fanau, kaeke kua fakaalofa a ia ke he tau tagata kehe, kaeke kua holoholo e ia e tau hui he tau tagata tapu, kaeke kua fakaalofa a ia ke he tau tagata matematekelea, kaeke kua feiga mau ke he tau gahua mitaki oti.”—1 Timoteo 5:9, 10.
[Matahui Tala]
^ para. 25 Ma e falu manatu, kikite e vala tala “Leveki e Tau Manako he Tau Tagata Momotua—Ko e Paleko he Kerisiano,” he fufuta he The Watchtower ia Iulai 15, 1988.
[Fakatino he lau 5]
Ne leveki e Toreta e tau takape nonofogati.—Gahua 9:36-39