“Ko e Hāu a Tau Fakamanatuaga ko e Haku a Fiafia Ni a Ia”

“Ko e tau mena oti ne tohi mai i tuai, ne tohi ia, ke fakaako ai a tautolu.”—ROMA 15:4.

1. Foaki mai fēfē e Iehova e tau fakamanatuaga, ti ko e ha kua lata ai mo tautolu?

NE FOAKI e Iehova e tau fakamanatuaga ke he tau tagata haana ke lagomatai a lautolu ke fahia ke he tau peehiaga he tau aho uka nei. Kua liu manatu e falu fakamanatuaga nei ka totou e koe e Tohi Tapu, ka e foaki mai falu puhala he tau fakaakoaga po ke he tau tali he feleveiaaga Kerisiano. Ko e tau mena loga ne totou po ke logona e tautolu he tau magaaho pehēnei kua nakai foou. Liga kua fitā he fakatutala a tautolu ke he tau vala tala pihia. Ha kua fa loto nimo a tautolu, kua lata ia tautolu ke liu fakamanatu tumau e tau finagalo, tau fakatufono mo e tau fakaakoaga ha Iehova. Kua lata ia tautolu ke loto fakaaue ke he tau fakamanatuaga he Atua. Kua fakamalolō he tau mena ia e tau agaaga ha tautolu, he lagomatai a tautolu ke manatu tumau e tau kakano ne omoomoi a tautolu ke talia e puhala moui mahani Atua. Ati, lologo e salamo ki a Iehova: “Ko e hāu a tau [“fakamanatuaga,” NW] ko e haku a fiafia ni a ia.”—Salamo 119:24.

2, 3. (a) Ko e ha ne fakamau e tau tala he tau momoui he tau tagata he Tohi Tapu ke hoko mai ke he vahā ha tautolu? (e) Ko e tau fakamauaga fe he tau Tohiaga Tapu ka fakatutala ki ai he vala tala nei?

² Pete kua tohia ke he loga e senetenari kua mole, nukua mua agaia e malolō he Kupu he Atua. (Heperu 4:12) Kua foaki ki a tautolu e tau tala mooli ke he tau momoui he tau tagata i loto he Tohi Tapu. Pete kua lahi e hiki he tau aga fa mahani mo e tau onoonoaga tali mai he tau vahā faka-Tohi Tapu, kua tatai agaia e tau paleko ne fehagai mo tautolu mo e tau mena ne fehagai mo lautolu he tau magahala ia. Kua loga e tala ne toka he Tohi Tapu ke aoga ai a tautolu, kua foaki ki a tautolu e tau fakafifitakiaga mafanatia he tau tagata ne fakaalofa ki a Iehova mo e fekafekau ki a ia pete he tau tutuaga uka. Ko e falu tala kua fakakite e tau mahani ne vihiatia he Atua. Ne tohi hifo oti e Iehova e tau fakamauaga he tau tagata takitaha nei i loto he Tohi Tapu pete he mitaki po ke kelea ke eke mo tau fakamanatuaga. Kua tuga ne tohia he aposetolo ko Paulo: “Ko e tau mena oti ne tohi mai i tuai, ne tohi ia, ke fakaako ai a tautolu; kia moua ai e tautolu e amaamanaki ha ko e fakauka mo e fakamafanatia mai he tau Tohi.”—Roma 15:4.

³ Kia onoono atu a tautolu ke he tolu e fakamauaga he tau Tohiaga Tapu: ko e tala ke he fakafehagai ha Tavita mo Saulo, ki a Anania mo Safaira, mo e mahani ha Iosefa ke he hoana ha Potifara. Kua foaki he tau tala takitaha nei ki a tautolu e tau fakaakoaga uho lahi.

Mahani Fakamooli ke he Tau Fakaholoaga he Atua

4, 5. (a) Ko e heigoa e mena ne tupu ke he Patuiki ko Saulo mo Tavita? (e) Puhala fe ne fehagai a Tavita ke he fakafualoto ha Saulo?

⁴ Ne nakai fakamooli e Patuiki ko Saulo ki a Iehova ti nakai lata ke pule ke he tau tagata Haana. Ti utakehe he Atua a ia mo e fekau e perofeta ko Samuela ke fakauku a Tavita mo patuiki ha Isaraela anoiha. He magaaho ne fakakite e Tavita e makaka ko e toa, ne fakaheke he tau tagata a ia, ti kamata a Saulo ke fi ki a Tavita. Ati lagaloga e lali ha Saulo ke tamate a ia. He tau magaaho oti ia ne hao a Tavita ha ko Iehova mo ia.—1 Samuela 18:6-12, 25; 19:10, 11.

⁵ Ke he loga e tau, ne taute a Tavita ke moui paea fano. He magaaho ne lata ia ia ke tamate  a Saulo, ne hataki he tau tagata ha Tavita a ia ke taute pihia, he talahau kua tuku age e Iehova ke he lima ha Tavita a lautolu ne fai fi ki a ia. Pete ia, ne nakai talia e Tavita. Ne omoi he mahani fakamooli haana ki a Iehova mo e fakalilifu haana ke he tuaga ha Saulo ko e patuiki fakauku he tau tagata he Atua a ia ke nakai taute e mena nei. Ha ko e mena nakai kia ko Iehova ne fakauku a Saulo mo patuiki ha Isaraela? To utakehe foki e Iehova a ia he magaaho kua lata ke taute pihia. Ne fakamaama e Tavita kua nakai tonuhia ia ia ke taute ha mena. He oti e tau mena ne taute ke fakatotoka hifo e fakafualoto ha Saulo, ne fakahiku a Tavita: “To ta ni e Iehova a ia, po ke hoko hana aho ke mate ai, po ke hifo a ia ke he tau, ti mate ai a ia. Kia fakamamao e Iehova ia au, ke fakaolo atu e au haku lima kia ia kua fakauku e Iehova.”—1 Samuela 24:3-15; 26:7-20.

6. Ko e ha ne aoga e tala ki a Tavita mo Saulo ki a tautolu?

⁶ Kua aoga lahi e fakaakoaga ne ha ha he fakamauaga nei. Kua fai magaaho nakai ne hūhū hifo a koe ki a koe, ko e ha ne tutupu ai falu lekua i loto he fakapotopotoaga Kerisiano? Liga kua pihia he taute he tagata e mena ne nakai tonu. Ti liga nakai kelea lahi e mena ne taute e ia, ka kua faguna ai ki a koe. Ti, ko e puhala fe kua lata ia koe ke tali atu? Mai he fakaalofa faka-Kerisiano ke he tagata ia, mo e mahani fakamooli ki a Iehova, liga ni to fifili a koe ke vagahau ki a ia ke he puhala totonu, he foli ke moua e mafola. Ka e kua mogoia ka tumau ni e lekua? Ha kua taute e koe e tau mena oti ne fahia ia koe, liga manako a koe ke toka e matalekua ia ke he tau lima ha Iehova. Ko e mena ia ne taute e Tavita.

7. Ke fifitaki a Tavita, puhala fe kua lata ia tautolu ke tali atu ke he nakai fakafili tonu po ke fili tagata?

⁷ Po ke liga fehagai a koe mo e tau lekua he nakai fakafili tonu he tau tagata po ke he fili tagata he lotu. He magaaho nei, kua liga tote po ke nakai fai mena a koe ka taute hagaao ki ai. Kua uka lahi ke fakauka ke he tuaga pihia, ka kua foaki mai he tali ha Tavita ke he nakai fakafili tonu e fakaakoaga ma tautolu. Ko e tau salamo ne tohia e Tavita, ko e fakamauaga mafanatia nakai ni ke he tau liogi fakamooli haana ke he Atua ke laveaki mai he tau lima ha Saulo, ka e pihia foki ke he haana mahani fakamooli ki a Iehova mo e haana manako ke fakaheke e higoa he Atua. (Salamo 18:1-6, 25-27, 30-32, 48-50; 57:1-11) Ne tumau a Tavita ke mahani fakamooli ki a Iehova pete he fakatumau a Saulo ke taute e mahani nakai tonu ke he tau tau loga. Kua lata foki ia tautolu ke tumau ke tua fakamooli ki a Iehova mo e haana fakatokatokaaga, pete ne tau nakai fakafili tonu ne tutupu ki a tautolu po ke tau mena ne taute he falu. Maeke ai ia tautolu ke mauokafua nukua mataala katoatoa a Iehova ke he tuaga ha tautolu.—Salamo 86:2.

8. Puhala fe ne tali atu e Tau Fakamoli a Iehova i Mosamipiki he magaaho ne kamatamata e mahani fakamooli ha lautolu ki a Iehova?

⁸ Ne foaki he tau Kerisiano i Mosamipiki e fakafifitakiaga he vahā nei ke he falu ne pipiki mau fakamooli ki a Iehova he magaaho ne kamatamata ai. He 1984 ne moumou lagaloga  he tau kautau he matakau totoko e tau maaga ha lautolu, kaiha, tugi e tau fale, mo e tamate e tau tagata. Ti tuga kua nakai maeke e tau Kerisiano mooli nei ke taute ha mena ke puipui aki ni a lautolu. Kua lali foki ke liliuina e tau tagata he matakavi ke matutaki atu ke he matakau fakakautau po ke toho a lautolu ke lalago e matakau ia ke he falu a puhala foki. Ne mailoga he Tau Fakamoli a Iehova ka eke pihia, kua nakai felauaki e mena ia mo e tu uho faka-Kerisiano ha lautolu. He nakai talia e lautolu ne tupu lahi e favale. Pete he kavi ke 30 e Fakamoli ne kelipopo he vahā kelea lahi ia, kua nakai maeke he fakamatakutaku ke he mate ke moumou e mahani fakamooli he tau tagata he Atua. * Ke tatai mo Tavita, ne fakauka a lautolu ke he nakai fakafili tonu ti fakahiku ni ke kautu.

Ko e Fakamanatuaga Hataki

9, 10. (a) Maeke fēfē ia tautolu ke aoga mai he falu fakataiaga he Tohi Tapu? (e) Ko e heigoa e mena hepe ne taute e Anania mo Safaira?

⁹ Ne foaki he falu tagata ne totoku i loto he tau Tohiaga Tapu e tau fakamanatuaga hataki hagaao ke he tau mahani ne lata ke tiaki. E, kua toka i loto he Tohi Tapu e tau fakamauaga loga ke he tau tagata ne taute e tau mena hēhē ti fakahiku ke matematekelea, ti pihia foki e tau fekafekau he Atua. (1 Korinito 10:11) Ko e taha fakamauaga ki a Anania mo Safaira, ko e taane mo e hoana he fakapotopotoaga Kerisiano he senetenari fakamua i Ierusalema.

¹⁰ He mole e Penetekoso 33 V.N., kua lata ke lagomatai fakatino e tau tagata talitonu foou ne nonofo hifo i Ierusalema ke atihake he lafi fakalataha mo e tau aposetolo. Ne fakafua he falu he fakapotopotoaga e tau fonua ke leveki aki e tau tagata oti. (Gahua 2:41-45) Ne fakafua e Anania mo Safaira e fonua mo e foaki ni e vala tupe ke he tau aposetolo, ti pikopiko ko e tupe katoa a ia ne moua e laua mai he fakafua e fonua. Mooli, kua tonuhia a Anania mo Safaira ke foaki e mena ne manako a laua, ka kua kelea ha laua a tau manatu mo e nakai fakamooli e mena ne taute. Ne manako a laua ke nava he tau aposetolo ti tuga kua lahi e mena ne taute. Ka e, kakano he omoomoi he agaaga tapu, ne fakatapakupaku he aposetolo ko Peteru e nakai fakamooli mo e fakavai ha laua, ati ta e Iehova a laua ti mamate.—Gahua 5:1-10.

11, 12. (a) Ko e heigoa e falu fakamanatuaga hagaao ke he fakamooli? (e) Ko e heigoa e tau aoga ka moua mai he fakamooli?

¹¹ Ti ka kamatamata a tautolu ke nakai fakamooli he lali ke nava mai e tau tagata, kia eke e tala ki a Anania mo Safaira mo fakamanatuaga malolō ki a tautolu. Liga maeke ia tautolu ke  fakavai e taha tagata, ka e nakai fakaai ia tautolu ke fakahēhē a Iehova. (Heperu 4:13) Kua lagaloga he tomatoma he tau Tohiaga Tapu a tautolu ke fakamooli ke he falu, ha kua nakai momoui e tau tagata pikopiko ke he lalolagi meā ne tututonu. (Tau Fakatai 14:2; Fakakiteaga 21:8; 22:15) Kua kitia maali e kakano ke he lekua ia. Ne fakahakehake e Satani ko e Tiapolo e aga pikopiko oti kana.—Ioane 8:44.

¹² He nonofo ke he moui ne fakamooli ka moua e tautolu e tau aoga loga. Putoia ki ai e manamanatuaga meā mo e fiafia ha kua falanaki mai falu ki a tautolu. Ke he tau tutuaga loga, ha kua fakamooli a lautolu, ne moua he tau Kerisiano e gahua, po ke mau e gahua. Ka ko e mena ne aoga lahi, kua kapitiga a tautolu mo e Atua Malolō Ue Atu.—Salamo 15:1, 2.

Fakatumau e Mahani Meā

13. Ko e heigoa e mena ne tupu ki a Iosefa, ti tali atu fēfē a ia?

¹³ Ko Iosefa, ko e tama he tupuna ko Iakopo, ne fakafua ke fakatupa he 17 e tau he moui. Ne fakahiku a ia ke he kaina ha Potifara, ko e fekafekau pule i Aikupito, mogoia ne mailoga he hoana ha Potifara a Iosefa. Ne manako e hoana ke taute e mahani fakataane mo e fifine mo Iosefa, ko e fuata taane mata fulufuluola, ne fakamakamaka a ia ki a Iosefa ke he tau aho loga: “Kia momohe a taua.” Ne mamao a Iosefa mai he magafaoa haana ke he motu ne nakai fai tagata ne iloa a ia. Ti mukamuka ia ia ke momohe mo e fifine nei ti nakai fai tagata ka iloa. Ka e he magaaho ne taofi he hoana ha Potifara a ia, ne hola a Iosefa.—Kenese 37:2, 18-28; 39:1-12.

14, 15. (a) Ko e ha ne aoga e tala ha Iosefa ki a tautolu? (e) Ko e ha ne loto fakaaue e taha fifine Kerisiano he fanogonogo a ia ke he tau fakamanatuaga he Atua?

¹⁴ Nukua feaki hake a Iosefa he magafaoa matakutaku Atua, ti maama e ia kua nakai hako ma e tau tagata ne nakai ko e taane mo e hoana ke taute e mahani fakataane mo e fifine. “To maeke fefe ia au ke eke e mena kelea lahi ia mo e hala au ke he Atua?” he hūhū e ia. Liga kua takitaki he tau fakatufono he Atua a ia, tuga ne talahau i Etena hagaao ke he taha ni e hoana he tagata. (Kenese 2:24) Maeke he tau tagata he Atua he vahā nei ke moua e aoga he manamanatu ke he puhala ne tali atu a Iosefa ke he tuaga ia. He falu matakavi, kua fakahanoa lahi e aga ke he mahani fakataane mo e fifine, ti ko e tau tama ne nakai mahala ke he mahani faivao kua vaiga he falu fanau. Kua lahi e mahani feuaki ke he tau tagata kua mau. Ati latatonu ai ke manatu e tautolu e tala ki a Iosefa. Kua tumau agaia e fakatufono he Atua, ko e hala e mahani feuaki mo e faivao. (Heperu 13:4) Kua tokologa ne kaumahala ha ko e peehi ke taute fakahanoa e mahani fakataane mo e fifine, ne talia kua ha ha ai e kakano mitaki ke nakai fakalataha  ki ai. Ko e tau fua kelea ne tutupu mai ai, liga ko e aga fuafuakelea, tokihala e manamanatuaga, tau mahekeheke, fatu, mo e gagao pikitia he fakataane mo e fifine. Tuga ni he fakamanatu he tau Tohiaga Tapu ki a tautolu, ko e tagata feuaki kua “hala tuai a ia ke he hana tino ni.”—1 Korinito 5:9-12; 6:18; Tau Fakatai 6:23-29, 32.

¹⁵ Ko Jenny, * ko e Fakamoli a Iehova ne nofo tokotaha, ne fai kakano ke loto fakaaue ke he tau fakamanatuaga he Atua. Ne kalahī e tagata mata fulufuluola he gahuaaga ki a ia. Ka e he fakaheu e Jenny, ne au atu e kalahī he tagata. “Ne tau fakalahi au ke fakatumau e mahani meā,” he talahau e ia, “ha kua fakahohoko manava ka mailoga he tagata taane a koe.” Ka kua iloa e Jenny ko e lali noa e tagata nei ke lafi a ia ke he tau fifine loga ne fitā he taute e mahani fakataane mo e fifine mo e tagata ia. He magaaho ne lolelole e totoko haana, ne liogi a ia ki a Iehova ke lagomatai ke tumau ke tua fakamooli ki a Ia. Ko e tau mena iloa ha Jenny he kumikumiaga haana ke he Tohi Tapu mo e tau tohi faka-Kerisiano, kua tuga e tau fakamanatuaga ne fakaofo a ia ke fakatumau ke mataala. Taha he tau fakamanatuaga ia ko e tala ki a Iosefa mo e hoana ha Potifara. “Ka fakatumau au ke manatu e lahi he fakaalofa haaku ma Iehova,” he fakahiku e ia, “kua nakai lata au ke matakutaku neke taute e au e kelea lahi nei mo e hala ki a ia.”

Fanogonogo ke he Tau Fakamanatuaga he Atua!

16. Moua fēfē e tautolu e aoga he liu kitekite mo e manamanatu fakahokulo ke he tau momoui ha lautolu takitaha ne totoku i loto he Tohi Tapu?

¹⁶ Kua lata ia tautolu oti ke fakatolomaki e loto fakaaue ha tautolu ma e tau fakatufono ha Iehova he lali ke maama e kakano ne tohi e ia e falu tala i loto he tau Tohiaga Tapu ma tautolu. Ko e heigoa ne fakaako he tau tala ia? Ko e heigoa e tau mahani po ke tau fatuakiloto ne fakakite he tau tagata i loto he Tohi Tapu, ne kua lata ia tautolu ke fifitaki po ke kalo mai ai? Kua totou teau e tagata ne fakamau ke he tau lau tohi he Kupu he Atua. Ko lautolu oti ne ofaofa e hatakiaga mai he Atua kua lata ke feaki e manako ma e pulotu foaki moui, pihia foki e tau fakaakoaga ne totou e tautolu mai he tau fakafifitakiaga ne puipui fakamitaki e Iehova. Kua fa fakakite mai he mekasini nei e tau vala tala hagaao ke he tau tagata takitaha pihia ne moua e tautolu e fakaakoaga mai he tau tala ha lautolu. Ko e ha he fakaaoga e magaaho ke liu kitekite ki ai?

17. Fēfē e manatu haau ke he tau fakamanatuaga ha Iehova, ti ko e ha?

¹⁷ Kua loto fakaaue lahi a tautolu ke he manamanatu fakaalofa ne fakakite e Iehova ma lautolu ne eketaha ke taute e finagalo haana! Mooli kua nakai mitaki katoatoa a tautolu, ke tuga ni e tau tagata taane mo e tau fifine ne totoku i loto he Tohi Tapu ne nakai mitaki katoatoa. Pete ia, ko e fakamauaga he tau gahua ha lautolu ko e tau taoga ma tautolu. He fanogonogo ke he tau fakamanatuaga ha Iehova, to puipui a tautolu mai he taute e tau mena hēhē lalahi, ti maeke ia tautolu ke muitua ke he tau fakafifitakiaga ha lautolu ne o he puhala he tututonu. Kaeke taute pihia e tautolu, to lologo a tautolu mo e salamo: “Uhoaki a lautolu kua omaoma ke he hana tau [“fakamanatuaga,” NW], ko lautolu kua kumi kia ia mo e loto katoa. Kua taofi haku loto ke he hāu a tau [“fakamanatuaga,” NW]; mo e manako lahi ue atu au ki ai.”—Salamo 119:2, 167.

[Tau Matahui Tala]

To Tali Fēfē e Koe?

• Ko e heigoa ka ako e tautolu mai he aga ha Tavita ki a Saulo?

• Ko e heigoa ne ako e tautolu mai he tala ki a Anania mo Safaira?

• Ko e ha kua aoga pauaki e tala ke he moui ha Iosefa ki a tautolu he vahā nei?

[Tau Hūhū he Fakaakoaga]

[Fakatino he lau 14]

Ko e ha ne nakai talia e Tavita ke tamate a Saulo?

[Fakatino he lau 15]

Ko e heigoa ne ako e tautolu mai he tala ki a Anania mo Safaira?

[Fakatino he lau 16]

Ko e heigoa ne taute a Iosefa ke fakaheu e mahani feuaki?