Hagaaki ke he Mitaki he Fakatokatokaaga ha Iehova
Hagaaki ke he Mitaki he Fakatokatokaaga ha Iehova
“To makona a mautolu he tau mena mitaki ha he fale hāu.”—SALAMO 65:4.
1, 2. (a) To lauia fēfē e tau tagata he Atua ha ko e tau fakaholoaga ma e faituga? (e) Ko e heigoa e tau lagomatai ne foaki e Tavita ma e talagaaga he faituga?
KO Tavita ha Isaraela i tuai, ko e taha he tau tagata ne mua e mitaki ne totoku i loto he tau Tohiaga Tapu Heperu. Ne falanaki katoatoa e tagata leveki mamoe, fakatagitagi leo kofe, perofeta, mo e patuiki nei ki a Iehova ko e Atua. Ne omoi he fakafetuiaga tata haana mo Iehova a ia ke manako ke ta e fale ma e Atua. To eke e fale ia, po ke faituga, mo lotouho he tapuakiaga mooli i Isaraela. Ne iloa e Tavita to tamai he tau fakaholoaga ne matutaki mo e faituga e fiafia mo e tau monuina ke he tau tagata he Atua. Ati lologo a Tavita: “Uhoaki e tagata ne fifili e koe [Iehova], mo e tuku e koe ke fakatata atu kia koe, to nofo a ia ke he hāu a lotopā; to makona a mautolu he tau mena mitaki ha he fale hāu, ko e hāu a faituga tapu.”—Salamo 65:4.
2 Ne nakai fakaatā a Tavita ke takitaki e talaga he fale ha Iehova. Ka kua toka e kotofaaga ia ke he tama taane haana ko Solomona. Ne nakai loma a Tavita ha kua age ke he taha tagata e kotofaaga ne manako lahi a ia ki ai. Ko e mena ne aoga lahi ki a ia ko e ta ne fai e faituga. Ne lalago loto katoatoa e ia e matagahua he age ki a Solomona e tau palana ta fale ne moua mai ia Iehova. Mua atu, ne fakatokatoka e Tavita e tau Levi tokoafe ke he tau matakau gahua mo e foaki e tau auro mo e tau ario loga ma e talagaaga he faituga.—1 Nofoaga he Tau Patuiki 17:1, 4, 11, 12; 23:3-6; 28:11, 12; 29:1-5.
3. Ko e heigoa e aga he tau fekafekau he Atua ke he tau fakaholoaga ma e tapuakiaga mooli?
3 Ne lalago he tau Isaraela tua fakamooli e tau fakaholoaga ne taute ma e tapuaki mooli he fale he Atua. Ko e tau fekafekau ha Iehova he vahā nei, kua lalago pihia e tautolu e tau fakaholoaga ma e tapuakiaga he vala he fakatokatokaaga ha Iehova he lalolagi. Ti fakakite e tautolu kua tatai e manamanatuaga ha tautolu mo e ha Tavita. Nakai ha ha ia tautolu e aga gūgū. Ka kua hagaaki atu a tautolu ke he mitaki he fakatokatokaaga he Atua. Kua manamanatu nakai a koe ke he tau mena mitaki ne kua lata ia tautolu ke loto fakaaue mooli ki ai? Kia fakatutala a tautolu ke he falu he tau mena ia.
Loto Fakaaue ki a Lautolu ne Takitaki
4, 5. (a) Kua fakamooli fēfē he “fekafekau fakamoli mo e loto matala” e kotofaaga ha lautolu? (e) Fēfē e logonaaga he falu Fakamoli hagaao ke he tau mena kai fakaagaaga ne moua e lautolu?
4 Kua ha ha ia tautolu e tau kakano aoga ke loto fakaaue ke he “fekafekau fakamoli mo e loto matala” ne kotofa e Iesu Keriso ke pule ke he tau fekau haana he lalolagi. Ne takitaki he vahega fekafekau he tau Kerisiano ne fakauku he agaaga e fakamatala he tala mitaki, fakatokatoka e tau feleveiaaga ke tapuaki, mo e taute e tau tohi ne fakavē ke he Tohi Tapu ke molea e 400 vagahau. Kua totou miliona e tagata he lalolagi katoa ne loto fakaaue ke fakaaoga e “tau mena kai [nei] ke he tau magaaho” tonu. (Mataio 24:45-47) Kua nakai ni fai kakano ke loma hagaao ki ai.
5 Ke he loga e tau tau, ko Elfi ko e taha Fakamoli ha Iehova kua motua e tino, ne logona e mafanatia mo e lagomatai he fakagahua e fakatonuaga he Tohi Tapu ne moua i loto he tau tohi he vahega fekafekau. Ne omoi he loto fakaaue hokulo a Elfi ke tohia: “Ko e heigoa la haaku ka taute ane mai ai fai fakatokatokaaga a Iehova?” Ne fekafekau foki a Peter mo Irmgard ke he Atua ke he tau tau loga. Ne fakakite e Irmgard e loto fakaaue ma e tau tohi loga ne taute he “fakatokatokaaga fakaalofa mo e leveki ha Iehova.” Putoia ke he tau tohi nei e tau pepa ne taute ma e tau tagata ne fai matematekelea tuga a lautolu ne matapouli mo e teligatuli.
6, 7. (a) Kua leveki fēfē e tau gahua he tau fakapotopotoaga he lalolagi katoa? (e) Ko e heigoa kua talahau hagaao ke he vala he fakatokatokaaga ha Iehova he lalolagi?
6 Ko e “fekafekau fakamoli” kua hukui he Kau Fakatufono he Tau Fakamoli a Iehova, ko e matakau tote he tau tagata taane ne fakauku he agaaga hane gahua he tau matapatu he Tau Fakamoli a Iehova i Brooklyn, New York. Ne kotofa he Kau Fakatufono e tau fekafekau pulotu ha Iehova ke gahua he tau la ofisa ne leveki e tau gahua he tau fakapotopotoaga ne molea e 98,000 he lalolagi katoa. Ko e tau tagata taane ne fakamooli ke he tau poaki he Tohi Tapu kua kotofa mo tau motua mo e tau fekafekau lagomatai i loto he tau fakapotopotoaga nei. (1 Timoteo 3:1-9, 12, 13) Ne takitaki mo e leveki fakamakai he tau motua e fuifui mamoe he Atua ne tuku age ki a lautolu. Ko e monuina mooli ke eke mo vala he fuifui mamoe ia mo e ke mailoga e fakaalofa mo e kaufakalataha ne ha ha “he tau matakainaga” he lalolagi katoa!—1 Peteru 2:17; 5:2, 3.
7 He nakai gūgū, kua fa fakakite he tau tagata takitokotaha e loto fakaaue ma e takitakiaga fakaalofa fakaagaaga ne moua e lautolu mai he tau motua. Ke fakatai, kia manamanatu ki a Birgit, ko e hoana Kerisiano ne 30 tumā e tau he moui. He vahā fuata mui, ne putoia a ia ke he tau lafiaga kelea ti teitei ke taute e mahani hēhē. Ka kua lagomatai he fakatonuaga mahino he tau motua mai he Tohi Tapu mo e lalago he tau matakainaga talitonu a ia, ke hao mai he tau tutuaga hagahaga kelea. Ti fēfē e logonaaga ha Birgit he mogonei? Ne pehē a ia: “Kua loto fakaaue lahi au ha kua ha ha agaia au he fakatokatokaaga homo ue atu ha Iehova.” Ne talahau e Andreas ne 17 e tau he moui: “Ko e fakatokatokaaga mooli ha Iehova ainei, ko e fakatokatokaaga ne mua atu e mitaki he lalolagi katoa.” Kua nakai kia lata ia tautolu ke loto fakaaue ke he mitaki he vala he fakatokatokaaga ha Iehova he lalolagi?
Nakai Mitaki Katoatoa a Lautolu ne Takitaki
8, 9. Fēfē e aga he falu tagata he vahā a Tavita, ti fēfē e tali atu haana ke he tau mahani pihia?
8 E, ko lautolu ne kotofa ke takitaki e tapuakiaga mooli kua nakai mitaki katoatoa. Kua hepehepe foki a lautolu oti, ti hane lali fakamakamaka e falu ke tautaofi e tau lolelole hololoa ha lautolu. Kua lata kia a tautolu ke ita ha ko e mena nei? Nakai. Kua taute foki he tau tagata i Isaraela i tuai ne moua e tau kotofaaga e tau hēhē kelea muitui. Tuga a nei, he vahā fuata ha Tavita, ne tamai a ia ke eke mo tagata fakatagitagi leo kofe ke fakatotoka e patuiki tupetupe ko Saulo. Magaaho fakamui, ne lali a Saulo ke tamate a Tavita, ka e hola a ia ke hao.—1 Samuela 16:14-23; 18:10-12; 19:18; 20:32, 33; 22:1-5.
9 Ka e fakafualoto ni e falu Isaraela. Tuga anei, ne kelipopo he takitaki kautau ha Tavita ko Ioapo e matakainaga ha Saulo ko Apineru. Ne fakafualoto a Apisaloma ke he matua haana, ko Tavita, ma e pule patuiki. Mo e afo ni he tagata fakatonutonu ne falanaki ki ai, ko Aitofele, a ia ko Tavita. (2 Samuela 3:22-30; 15:1-17, 31; 16:15, 21) Pete he pihia, ne nakai eke a Tavita mo tagata gūgū he loto kona; nakai tiaki foki e ia e tapuakiaga mooli. Ka e kehe mamao e mena ne tupu. Ne fakamalolō he matematekelea a Tavita ke pipiki mau ki a Iehova ati fakatumau e aga mitaki haana he magaaho ne hola ia Saulo. He magaaho ia, ne lologo a Tavita: “Ko e Atua na e, kia fakaalofa mai a ko e kia au, kia fakaalofa mai a koe kia au; ha kua tua ni au kia koe; kua tua au ke he malu he hāu a tau tapakau, ato mole atu e tau mena matematekelea nai.”—Salamo 57:1.
10, 11. Ko e heigoa ne tupu ke he Kerisiano ko Gertrud he vahā fuata haana, ti ko e heigoa ne talahau e ia hagaao ke he tau kūkū he tau matakainaga talitonu?
10 Kua nakai fai kakano a tautolu ke gūgū he fakafualoto i loto he fakatokatokaaga he Atua he vahā nei. Ti nakai talia e Iehova po ke tau agelu haana po ke tau leveki mamoe fakaagaaga e tau tagata fakafualoto mo e mahani kelea ki loto he fakapotopotoaga Kerisiano. Moha ia, kua fehagai a tautolu oti mo e nakai mitaki katoatoa he tagata—he ha tautolu ni mo e he falu fekafekau he Atua.
11 He magaaho ne fuata a Gertrud, ne leva e tapuaki ki a Iehova, ne hokotaki fakavai ki a ia, ko e fifine fakatupua ti nakai ko e tagata fakapuloa he Kautu. Ka e tali atu fēfē a ia? Kua loma nakai a Gertrud hagaao ke he tukupau ia? Nakai. Ne nakai leva ato mate a ia he 2003 he 91 e tau he moui, ne liu a ia manamanatu ke he moui haana mo e talahau: “Ne ako e au mai he tau mena nei ne tutupu ke he moui haaku he pete ni e tau hēhē he falu, na ko Iehova ne takitaki e gahua uho haana, ti fakaaoga e ia a tautolu ko e tau tagata nakai mitaki katoatoa.” He magaaho ne fehagai mo e tau nakai mitaki katoatoa he falu fekafekau he Atua, ne liogi fakamakutu a Gertrud ki a Iehova.
12. (a) Ko e heigoa e tau fakafifitakiaga kelea ne fakakite he falu Kerisiano he senetenari fakamua? (e) Ko e heigoa kua lata ia tautolu ke manamanatu ki ai?
12 Ha kua nakai mitaki katoatoa foki e tau Kerisiano mahani fakamooli mo e fakamakutu, ti ka hēhē mogoia e fekafekau ne kotofa, kia fakatumau a tautolu ke “eke e tau mena oti kana mo e nakai loma.” (Filipi 2:14) Ko e momoko ha ia kaeke muitua a tautolu ke he fakafifitakiaga kelea he tau tagata gahoa he fakapotopotoaga Kerisiano he senetenari fakamua! Hagaao ke he tutaki ko Iuta, ko e tau akoako fakavai ne “vagahau kelea kia lautolu ne lilifu” he magahala ia. Mua atu foki, ko e tau tagata taute hēhē ia ko e ‘tau tagata loma, fegui ke he ha lautolu a tau manako.’ (Iuta 8, 16) Kia tiaki e tautolu e puhala ne mumui he tau tagata gūgū ka e manamanatu a tautolu ke he tau mena mitaki ne moua e tautolu puhala he “fekafekau fakamoli.” Kia loto fakaaue a tautolu ke he mitaki he fakatokatokaaga ha Iehova mo e ‘eke e tau mena oti kana mo e nakai loma.’
“Ko e Kupu Uka A Ena”
13. Tali atu fēfē e falu ke he falu fakaakoaga ha Iesu Keriso?
13 Ne loma falu he senetenari fakamua ke he tau fekafekau kotofa, ka e loma e falu ke he tau fakaakoaga ha Iesu. Tuga ne fakamau ia Ioane 6:48-69, ne pehē a Iesu: “Ko ia ne kai hoku tino, mo e inu haku a toto, ha ha ia ia e moui tukulagi.” He logona e tau kupu nei, “ti tokologa e tau tutaki hana ne . . . pehe a lautolu, Ko e kupu uka a ena; to maeke ia hai ke fanogonogo ki ai.” Ne fioia e Iesu “kua loma hana tau tutaki ke he mena ia.” Taha mena foki, “kua liliu atu ai e falu he hana tau tutaki tokologa, ti nakai tuai o fano a lautolu mo ia.” Ka e nakai loma oti e tau tutaki. Mailoga e mena ne tupu he hūhū a Iesu ke he tau aposetolo ne 12: “Po ke fia o kehe foki a mutolu?” Ne tali e aposetolo ko Peteru: “Ko e Iki na e, ke o kia a mautolu kia hai? Ha ha ia koe e tau kupu he moui tukulagi. Kua talia e mautolu, mo e iloa tuai e mautolu ko koe ko e Keriso, ko e Tama he Atua moui.”
14, 15. (a) Ko e ha ne nakai fiafia e tau tagata gahoa ke he falu fakaakoaga faka-Kerisiano? (e) Ko e heigoa kua ako e tautolu mai he mena ne tupu ke he tagata taane ne higoa ko Emanuel?
14 He vahā nei, kua gahoa e tau tagata he Atua ne nakai fiafia ke he falu puhala fakaako faka-Kerisiano ti loma hagaao ke he vala he fakatokatokaaga ha Iehova he lalolagi. Ko e ha ne tupu e mena nai? Ko e kakano ne loma pihia ai ha ko e nakai maama tumau e puhala gahua he Atua. Na fakakite fakahaga he Tufuga e kupu mooli ke he tau tagata haana. To hikihiki ai e maamaaga ha tautolu ke he tau Tohiaga Tapu he tau magaaho. Ko e laulahi he tau tagata ha Iehova kua olioli ke he tau hikihiki pihia. Ka e tokogahoa kua ‘tututonu lahi’ ti fakaheu e tau hikihikiaga. (Fakamatalaaga 7:16) Liga ko e aga fakaikaluga ati mokulu ai falu ke he matahele he manamanatuaga tutokotaha. Ko e heigoa ni e kakano, kua hagahaga kelea e mahani loma, ha kua maeke ke toho tua a tautolu ke he lalolagi mo e ke he tau puhala i ai.
15 Tuga anei, ko Emanuel ko e Fakamoli ne tuhituhi ke he falu mena ne totou e ia i loto he tau tohi he “fekafekau fakamoli mo e loto matala.” (Mataio 24:45) Ne nakai liu a ia totou e tau tohi faka-Kerisiano ha tautolu, ti fakahiku tala age ke he tau motua he fakapotopotoaga ia kua nakai tuai manako a ia ke eke mo taha he Tau Fakamoli a Iehova. Ka e nakai leva, ne mailoga e Emanuel kua hako mooli ni e tau fakaakoaga he fakatokatokaaga ha Iehova. Ne matutaki atu a ia ke he Tau Fakamoli, talahau e hepe haana, ti liu talia ko e taha he Tau Fakamoli a Iehova. Ti ko e fua, ne liu a ia ke eke mo tagata fiafia.
16. Ko e heigoa ka lagomatai a tautolu ke kautū mai he tau fakauaua hagaao ke he falu fakaakoaga faka-Kerisiano?
16 Ka e kua ka kamatamata a tautolu ke loma ha kua fakauaua ke he falu fakaakoaga ne ha ha he tau tagata ha Iehova? Lata mogoia ia tautolu ke fakauka. To liga fakahiku ni ti fakailoa he “fekafekau fakamoli” taha mena ke tali aki e tau hūhū ha tautolu, ti utakehe mogoia e fakauaua. Kua pulotu ai ke kumi e lagomatai he tau motua Kerisiano. (Iuta 22, 23) Kua maeke foki he liogi, fakaako fakatagata, he lafi mo e tau matakainaga talitonu ne loto fakaagaaga ke lagomatai a tautolu ke utakehe e tau fakauaua, ti maeke ke fakahokulo foki e loto fakaaue ha tautolu ke he kupu mooli atihake he Tohi Tapu ne ako e tautolu he puhala ne matutaki mai a Iehova.
Fakatumau e Aga Atihake
17, 18. He nakai loma, ko e heigoa e aga kua lata ke ha ha ia tautolu, ti ko e ha?
17 Mooli, kua hihiga pauaki e tau tagata nakai mitaki katoatoa ke agahala, ti manako lahi falu ke fakalea e tau gūgū nakai lata. (Kenese 8:21; Roma 5:12) Ka e, ka loma tumau a tautolu, to fakahagahaga kelea e tautolu e fakafetuiaga ha tautolu mo Iehova ko e Atua. Ko e mena ia ati lata ia tautolu ke tautaofi ha hihiga ke loma.
18 He nakai loma ke he tau mena he fakapotopotoaga, kua lata ia tautolu ke fakatumau e aga atihake mo e mumui tumau ke he fakaholoaga ka taute a tautolu ke gahua fakalahi, fiafia, mahani fakalilifu, lagotatai, mo e malolō e tua. (1 Korinito 15:58; Tito 2:1-5) Kua pule a Iehova ke he tau mena oti he fakatokatokaaga haana, mo e iloa e Iesu e tau mena tutupu he tau fakapotopotoaga takitaha, tuga ni ne iloa e ia he senetenari fakamua. (Fakakiteaga 1:10, 11) Kia fakatali fakatekiteki ke he Atua mo e Keriso, ko e Ulu he fakapotopotoaga. Kua lata ke fakaaoga e tau leveki mamoe ne pulotu ke fakahakohako e tau mena kua lata ke hiki.—Salamo 43:5; Kolose 1:18; Tito 1:5.
19. Ato pule katoatoa e Kautu ke he tau puhala he tagata, ko e heigoa kua lata ia tautolu ke hagaaki e onoonoaga ki ai?
19 Nakai leva to fakaoti e fakatokaaga kelea nei, to pule katoatoa e Kautu faka-Mesia ke he tau puhala he tagata. Ato hoko mai e magaaho ia, kua aoga lahi ia tautolu takitokotaha ke taofimau e aga atihake! To lagomatai a tautolu ke mailoga e mahani mitaki he tau matakainaga talitonu ha tautolu, ka e nakai hagaaki ke he ha lautolu a tau hepehepe. To moua e tautolu e fiafia ka hagaaki a tautolu ke he tau puhala mitaki ha lautolu. Ti, he nakai fakalolelole he loma, to fakamalolō ai a tautolu mo e atihake fakaagaaga.
20. Ko e heigoa e tau monuina ka olioli e tautolu he fakakite e aga atihake?
20 Kua maeke foki he aga atihake ke taute a tautolu ke manatu e tau monuina loga ne olioli e tautolu ha kua fakalataha mo e vala he fakatokatokaaga ha Iehova he lalolagi. Ko e fakatokatokaaga ni ainei he lalolagi ne fakamooli ke he Pule Katoatoa he lagi mo e lalolagi. Ti fēfē e logonaaga haau hagaao ke he mooli ia mo e lilifu he fakalataha atu ke tapuaki e Atua mooli tokotaha, ko Iehova? Kia aga a koe tuga a Tavita, ne lologo: “Ko e [F]anogonogo liogi na e, to o atu kia koe e tau tagata oti kana. Uhoaki e tagata ne fifili e koe, mo e tuku e koe ke fakatata atu kia koe, to nofo a ia ke he hāu a lotopā; to makona a mautolu he tau mena mitaki ha he fale hāu.”—Salamo 65:2, 4.
Manatu Nakai e Koe?
• Ko e ha kua lata ia tautolu ke loto fakaaue ki a lautolu ne takitaki i loto he fakapotopotoaga?
• Ko e heigoa kua lata ia tautolu ke taute ka hēhē e mena ne taute he tau matakainaga ne pulotu?
• Kua lata ke fēfē e onoonoaga ha tautolu ke he tau hikihiki ka hagaao ke he maamaaga he tau Tohiaga Tapu?
• Ko e heigoa ka lagomatai e Kerisiano ke kautū mai he fakauaua?
[Tau Hūhū he Fakaakoaga]
[Fakatino he lau 10]
Ne age e Tavita ki a Solomona e tau palana he faituga mo e lalago katoatoa e tapuakiaga mooli
[Fakatino he lau 11]
Ne foaki fiafia he tau motua Kerisiano e lagomatai fakaagaaga