Kia Iloilo​—Matakutaku ke he Atua!

“Ko e matakutaku kia Iehova ko e kamataaga he iloilo haia.”—TAU FAKATAI 9:10.

1. Ko e ha kua uka he tokologa ke maama e manatu he matakutaku ke he Atua?

HA HA ai e magahala ne nava fakaheke ai ke he tagata kua matakutaku Atua. He vahā nei, tokologa ne kitia ko e puhala tuai e manatu he matakutaku ke he Atua ka e uka ke maama ai. ‘Ka fakaalofa e Atua,’ he liga hūhū e lautolu, ‘ko e ha kua lata au ke matakutaku ki a ia?’ Ki a lautolu, ko e mena kelea e matakutaku, ti fakalolelole foki e logonaaga. Ka ko e matakutaku mooli ke he Atua, kua laulahi e kakano ti to kitekite a tautolu ki ai, nakai ni ko e logonaaga po ke manamanatuaga.

2, 3. Ko e heigoa ne putoia he matakutaku mooli ke he Atua?

² Ko e manatu mitaki e matakutaku ke he Atua ne fakaaoga he Tohi Tapu. (Isaia 11:3) Ko e fakaheke katoatoa mo e fakalilifu hokulo ma e Atua, ko e manako malolō ke fakafiafia a ia. (Salamo 115:11) Kua putoia e talia mo e pipiki katoatoa ke he tau tuaga mahani mitaki he Atua mo e manako ke moui fakatatau ke he mena ne talahau he Atua kua hako po ke hepe. Ne talahau he taha tohi fakamaama ko e matakutaku mitaki pihia ne fakakite “e matapatu he aga ke he Atua ne takitaki ke he mahani iloilo mo e kalo kehe mai he tau puhala kelea oti.” Latatonu ai, ne tala mai e Kupu he Atua ki a tautolu: “Ko e matakutaku kia Iehova ko e kamataaga he iloilo haia.”—Tau Fakatai 9:10.

³ Mooli, ne putoia he matakutaku ke he Atua e tau puhala oti he tagata. Kua nakai ni lauia e iloilo ka e pihia foki e fiafia, mafola, monuina, fakatuleva, amaamanaki, falanaki, mo e mauokafua. (Salamo 2:11; Tau Fakatai 1:7; 10:27; 14:26; 22:4; 23:17, 18; Gahua 9:31) Kua matutaki lahi ke he tua mo e fakaalofa. Kua putoia katoatoa e fakafetuiaga ha tautolu mo e Atua mo e tau tagata oti. (Teutaronome 10:12; Iopu 6:14; Heperu 11:7) Ko e matakutaku ke he Atua kua putoia e fakamooli katoatoa to leveki mooli he ha tautolu a Matua he lagi a tautolu ti mautali a ia ke fakamagalo e tau agahala ha tautolu. (Salamo 130:4) Ko lautolu ni e tau tagata nakai fakatokihala ka hopoate he Atua. *—Heperu 10:26-31.

Fakaako ke Matakutaku ki a Iehova

4. Ko e heigoa ka lagomatai a tautolu ke ‘fakaako ke matakutaku ki a Iehova’?

⁴ Ha kua aoga lahi e matakutaku ke he Atua ke taute e tau fifiliaga iloilo mo e moua e tau monuina haana, maeke fēfē a tautolu ke ‘fakaako ke matakutaku ki a Iehova’ fakamitaki? (Teutaronome 17:19) Loga e fakafifitakiaga he tau tagata matakutaku Atua ne fakamau he tau Tohiaga Tapu “ke fakaako ai a tautolu.” (Roma 15:4) Ke lagomatai a tautolu ke maama e kakano mooli ke matakutaku ke he Atua, kia manamanatu a tautolu ke he moui he taha he tau fakafifitakiaga ia, ko e Patuiki ko Tavita i Isaraela i tuai.

5. Fakaako fēfē he leveki ke he tau mamoe ke lagomatai a Tavita ke matakutaku ki a Iehova?

⁵ Ne tiaki e Iehova a Saulo ko e patuiki fakamua a Isaraela, ha kua matakutaku a ia ke he tau tagata ka e nakai matakutaku ke he Atua. (1 Samuela 15:24-26) He taha faahi, ko e puhala moui ha Tavita mo e fakafetuiaga tata haana mo Iehova kua fakakite a ia ko e tagata matakutaku Atua mooli. Mai he vahā tama ha Tavita, ne fa mahani a ia ke leveki e tau mamoe he matua taane haana. (1 Samuela 16:11) He tau po loga ne muhu fetu e lagi ko Tavita hane leveki e tau mamoe, ne liga lagomatai he mena nei a ia ke maama e matakutaku ki a Iehova. Pete kua tote e mena ne iloa e Tavita ke he lahi mahaki he lagi mo e lalolagi katoa, ne hokotia a ia ke he fakaotiaga hako—kua latatonu e Atua ke moua e fakalilifu mo e nava ha tautolu. “Ka kitekite atu au ke he lagi hāu, ko e gahua he hāu a tau mata lima, ko e mahina katoa mo e  tau fetu ne eke e koe” ne tohi e ia he magaaho fakamui, “ko e heigoa kia e tagata kia manatu mai ai a koe kia ia, mo e tama he tagata kia ahi mai ai e koe a ia?”—Salamo 8:3, 4.

6. Fēfē e logonaaga ha Tavita he iloa e homo ue atu ha Iehova?

⁶ Latatonu ai, ne ofoofogia a Tavita he magaaho ne fakatatai e ia e tote lahi mahaki haana mo e lagi likoliko ne loga lahi e tau fetu. He nakai fakamatakutaku a ia, ko e iloilo nei ne futiaki a ia ke fakaheke ki a Iehova he pehē: “Kua talahau he lagi e lilifu he Atua; kua fakakite foki he pu lagi likoliko e gahua he haana tau lima.” (Salamo 19:1) Ko e fakalilifu nei ma e Atua ne fakatata lahi a Tavita ki a Iehova mo e taute a Tavita ke manako ke iloa mo e muitua ke he tau puhala mitaki katoatoa Haana. Manamanatu la ke he logonaaga ha Tavita he magaaho ne lologo a ia ki a Iehova: “Ha kua homo ni a koe, kua eke e koe e tau mana, ko koe hoko koe ni ko e Atua. Iehova na e, kia fakakite mai e koe hāu a puhala, to fano au ke he tonu mai ia koe, kia fakamau e koe hoku loto ke matakutaku ke he hāu a higoa.”—Salamo 86:10, 11.

7. Maeke fēfē he matakutaku ke he Atua ke lagomatai a Tavita ke tau mo Koliato?

⁷ He magaaho ne moumou he tau Filisitia e motu ha Isaraela, ko e toa ha lautolu ne tolu e mita he tokoluga ko Koliato, ne fakafiu e tau Isaraela, he talahau ai pehē: ‘Kia fifili e tagata ke tau mo au! Kaeke ke kelipopo e ia au; to eke a mautolu mo tau fekafekau ki a mutolu.’ (1 Samuela 17:4-10) Ne matakutaku a Saulo mo e tau kautau oti haana—ka e nakai pihia a Tavita. Ne iloa e ia ko Iehova kua lata ke matakutaku ki ai, nakai ko e ha tagata, pete ne malolō lahi a ia. “Kua fina atu au kia koe ke he higoa a Iehova Sapaota,” he tala age a Tavita ki a Koliato, “ke iloa ai foki he fakapotopotoaga oti nai, nakai fakamoui ai e Iehova ha tagata ke he pelu mo e tao; ha ko e mena ha ha ia Iehova e pule ke he tau.” Ke he filo mo e maka haana—mo e lagomatai a Iehova—ne kelipopo e Tavita e tupua.—1 Samuela 17:45-47.

8. Ko e heigoa ne fakaako he tau fakafifitakiaga he tau tagata matakutaku Atua he Tohi Tapu ki a tautolu?

⁸ Liga fehagai a tautolu mo e tau mena uka po ke tau fi ne fakafiu mai tuga a lautolu ne fakafeao mo Tavita. Ko e heigoa ka taute e tautolu? Maeke ia tautolu ke fehagai mo lautolu ke he puhala taha ne taute e Tavita mo e falu ne tua fakamooli i tuai—he matakutaku ke he Atua. Maeke he matakutaku ke he Atua ke kautu ke he matakutaku ke he tagata. Ne tomatoma e Nehemia ko e fekafekau tua fakamooli he Atua e tau tagata Isaraela, ne tupetupe he tau tagata totoko: “Aua neke matakutaku a mutolu ha ko lautolu; kia  manamanatu a mutolu ke he Iki ne mua mo e matakutakuina.” (Nehemia 4:14) Ha ko e lalagoaga ha Iehova ati kautu ai a Tavita, Nehemia, mo e falu fekafekau tua fakamooli he Atua he taute e tau matagahua ne foaki age he Atua. He matakutaku ke he Atua, maeke foki ia tautolu ke pihia.

Matakutaku Mahani Atua he Fehagai mo e Tau Lekua

9. Ko e heigoa e tau tutuaga ne fakakite e Tavita e matakutaku ke he Atua?

⁹ He mole e liti aki e Tavita e maka a Koliato, ne loga atu foki e kautuaga haana ne age e Iehova. Ka ko Saulo ne mahekeheke—magaaho fakamua ne fakahaupō, ti ta lagatau, ati fakahiku ke he tau kautau—ke kelipopo a Tavita. Pete kua tala age a Iehova to eke a Tavita mo patuiki, ne loga e tau tau ha Tavita ne hola, tau atu, mo e tatali ki a Iehova ke eke a ia mo patuiki. He tau mena oti nei, ne fakakite e Tavita na matakutaku a ia ke he Atua mooli.—1 Samuela 18:9, 11, 17; 24:2.

10. Fakakite fēfē e Tavita e matakutaku ke he Atua he fehagai mo e hagahagakelea?

¹⁰ He taha magaaho, ne hola a Tavita ki a Akisa, ko e patuiki he taone ko Kata i Filisitia, ko e kaina ha Koliato. (1 Samuela 21:10-15) Ne fakailoa he tau fekafekau he patuiki ko Tavita e fi he motu ha lautolu. Tali atu fēfē a Tavita ke he tuaga hagahagakelea ia? Ne liligi e ia e loto haana he liogi ki a Iehova. (Salamo 56:1-4, 11-13) Pete he fakatupua a ia ke heketia ke hola aki, ne iloa e Tavita ko Iehova mooli ne fakahao a ia he fakamonuina e tau laliaga haana. Ko e falanaki loto katoatoa ha Tavita ki a Iehova mo e mauokafua ia Ia ne fakakite ko Tavita kua matakutaku mooli ke he Atua.—Salamo 34:4-6, 9-11.

11. Fakakite fēfē e tautolu e matakutaku mahani Atua ka kamatamata, tuga ne taute e Tavita?

¹¹ Tuga a Tavita, maeke ia tautolu ke fakakite e matakutaku ke he Atua he falanaki ke he maveheaga haana ke lagomatai a tautolu ke fahia ke he tau lekua. “Kia tuku atu hāu a puhala kia  Iehova, kia tua foki a koe kia ia, ti eke ai e ia,” he talahau e Tavita. (Salamo 37:5) Nakai kakano e mena nei ke fakaolo age e tautolu e tau lekua ki a Iehova ti nakai taute ha mena ki ai ti amanaki ke fai mena ka taute e ia ma tautolu. Ne nakai liogi a Tavita ke he Atua ma e lagomatai ti toka ai pihia. Ne fakaaoga e ia e malolō mo e lotomatala ne foaki e Iehova mo e fakafehagai mo e lekua ia. Ka e, iloa e Tavita ko e tau lali tokotaha he tagata ka nakai tamai ai e kautu. Ti kua lata ke putoia a tautolu. He taute e tau mena oti kua fahia ia tautolu, kia toka atu e vala ne toe ki a Iehova. Mooli, kua nakai fai mena foki ke taute e tautolu ka e tua ki a Iehova. Ko e magaaho anei ke fakatātā e tautolu e matakutaku fakatagata ke he Atua. Maeke ia tautolu ke mafanatia ke he talahauaga ha Tavita mai he loto: “Kua fakafetui a Iehova mo lautolu kua matakutaku ki a ia.”—Salamo 25:14.

12. Ko e ha kua lata ia tautolu ke manamanatu fakahokulo ke he tau liogi ha tautolu, ti ko e heigoa e aga kua nakai lata ke moua e tautolu?

¹² Ko e mena ia, kua lata ia tautolu ke manamanatu fakahokulo ke he tau liogi mo e fakafetuiaga ha tautolu mo e Atua. Ka tutala a tautolu ki a Iehova, kua lata ia tautolu ke “talia kua moui a ia, ko ia foki kua taui mai a lautolu kua kumi fakamakutu kia ia.” (Heperu 11:6; Iakopo 1:5-8) Ti ka lagomatai e ia a tautolu, kua lata ia tautolu ke ‘mahani fakaaue,’ tuga he fakatonu mai he aposetolo ko Paulo. (Kolose 3:15, 17) Kia nakai eke a tautolu ke tuga a lautolu ne fakamaama mai he Kerisiano fakauku lotomatala: “Ne manamanatu a lautolu ke he Atua ko e fekafekau he lagi,” he talahau e ia. “Ka manako a lautolu ke he taha mena, ne manako a lautolu ke fitipā e tau matalima ke hau a ia. Ti ka moua e lautolu e mena ne manako ki ai, kua loto a lautolu ki a ia ke fano kehe.” Kua fakakite he aga pihia e nakai matakutaku mahani Atua.

Magaaho ka Kaumahala e Matakutaku ke he Atua

13. Magaaho fe ne kaumahala a Tavita ke fakakite e fakalilifu ke he Fakatufono he Atua?

¹³ He moua e lagomatai ha Iehova he magaaho matematekelea ne fakahokulo e matakutaku ha Tavita ke he Atua ti fakamalolō e mauokafua haana ki a Ia. (Salamo 31:22-24) Tolu e magaaho kehe lahi ne kaumahala e matakutaku ha Tavita ke he Atua, ati takitaki atu ke he fakahikuaga kelea lahi. Ko e mena fakamua ne putoia e fakatokaaga haana ma e puha he maveheaga ha Iehova ke uta ki Ierusalema he peleō ka e nakai tauloto he tukeua he tau Levi, tuga ne talahau he Fakatufono he Atua. Ko e magaaho ia ne takitaki e Usa e peleō, ne taofi atu e ia e Puha ke fakalagotatai ai, ti mate a ia he magaaho ia ni ha ko e hana “hehe.” E, ne agahala kelea lahi a Usa, ka e mua atu, ko e kaumahala ha Tavita ke fakatumau e fakalilifu mitaki ma e Fakatufono he Atua ne tamai e fua kelea lahi mahaki. Ko e matakutaku ke he Atua kua kakano ke taute e tau mena ne fakatatau ke he fakatokaaga haana.—2 Samuela 6:2-9; Numera 4:15; 7:9.

14. Ko e heigoa ne fua mai he totou e Tavita a Isaraela?

¹⁴ Fakamui, he fakalagalaga e Satani, ne totou e Tavita e tau tagata Isaraela ka o he tau. (1 Nofoaga he Tau Patuiki 21:1) He taute pihia, ne fakakite kua kaumahala e matakutaku ha Tavita ke he Atua, ti fua ai ke 70,000 he tau Isaraela ne mamate. Pete kua fakatokihala a Tavita ki a Iehova, ne matematekelea lahi a ia mo e tau tagata ne agaagai ia ia.—2 Samuela 24:1-16.

15. Ko e heigoa ne fakatupu a Tavita ke taute e agahala feuaki?

¹⁵ Ko e taha kaumahala ku he matakutaku ke he Atua ne takitaki a Tavita ke taute e mahani feuaki mo Patesepa, ko e hoana a Uria. Ne iloa e Tavita ko e faivao po ke manako ke he hoa he taha kua hehē. (Esoto 20:14, 17) Ko e lekua ne kamata he kitia e Tavita a Patesepa hane koukou. Kua lata he matakutaku mitaki ke he Atua ke omoi fakamafiti a Tavita ke haga kehe e mata mo e nakai manamanatu ki ai. Nakai pihia a Tavita ha kua “kikite atu taha” a ia ki a Patesepa ato mahala e matakutaku haana ke he Atua he manako loto. (Mataio 5:28; 2 Samuela 11:1-4) Ne galo e Tavita e putoia tata ha Iehova mo e moui haana.—Salamo 139:1-7.

16. Ko e heigoa e tau fua ne matematekelea a Tavita ha ko e haana a mahani hehē?

¹⁶ Ko e mahani feuaki ha Tavita mo Patesepa ne fanau mai e tama taane. Nakai leva he mole, ne fakafano atu e Iehova e haana perofeta ko Natano ke fakatapakupaku e agahala ha Tavita. He matala e manamanatuaga haana, ne liuaki  mai ki a Tavita haana matakutaku ke he Atua ti fakatokihala a ia. Ne ole a ia ki a Iehova ke nakai tiaki a ia po ke utakehe e agaga tapu Haana mai ia ia. (Salamo 51:7, 11) Ne fakamagalo e Iehova a Tavita ti fakatote e fakahala, ka e nakai puipui e Ia a Tavita mai he tau fua kelea he tau gahua haana. Ne mate e tama ha Tavita, ti lauia e magafaoa haana ke he loto mamahi mo e matematekelea tali mai he magaaho ia. Ko e palepale lahi ha ia he kaumahala ke matakutaku ke he Atua!—2 Samuela 12:10-14; 13:10-14; 15:14.

17. Talahau e loto mamahi ne fua mai he tau gahua agahala.

¹⁷ He vahā nei, ko e kaumahala ke matakutaku ke he Atua ke he tau mahani to liga moua foki e tau fua kelea lahi mo e hololoa. Manamanatu ke he mamahi he taha hoana fuata he iloa ne nakai fakamooli e taane Kerisiano haana ki a ia he gahua ai ke he taha motu. He tukutukuhifo ha ko e ofomate mo e fakaatukehe, ne fakapulou hifo e fofoga haana ke he tau lima ti pa e tagi. Fiha e leva he taane ato liu a ia ke moua e falanaki mo e fakalilifu mai he hoana haana? Ko e tau fua kelea ia ne maeke ke kalo kehe he matakutaku mooli ke he Atua.—1 Korinito 6:18.

Puipui he Matakutaku ke he Atua a Tautolu Mai he Agahala

18. Ko e heigoa e foliaga mo e puhala gahuahua ha Satani?

¹⁸ Kua mafiti lahi e fakakeukeu e Satani e tau mahani mitaki he lalolagi, ti manako pauaki a ia ke moumou e tau Kerisiano mooli. He taute pihia, ne fakahēhē e ia e puhala ke he tau loto mo e tau manamanatuaga ha tautolu—puhala he tau logonaaga, mua atu ke he tau mata mo e tau teliga ha tautolu. (Efeso 4:17-19) To tali atu fēfē a koe ka fakataupā mo e tau fakatino, tau kupu, po ke tau tagata fakalialia?

19. Lagomatai fēfē he matakutaku mahani Atua e taha Kerisiano ke kautu mai he kamatamata?

¹⁹ Manamanatu ke he mena ne tupu ki a André, * ko e motua Kerisiano, matua taane, mo e ko e ekekafo i Europa. He gahua pō a André he fale gagao, ne pine tumau he tau fifine gahua e tau laupepa—ne fakamanaia aki e tau fakatino kalahī—ke he uluga haana, he uiina a ia ke mahani feuaki mo lautolu. Ne fakaheu fakamalolō a André ke hufia ke he tau aga ia ha lautolu. Lafi ki ai, ke hola kehe a ia mai he takatakaiaga kelea ia, ne moua e ia e gahua he taha matakavi. Ne eke e matakutaku ke he Atua mo pulotu mo e takitaki atu ke he tau monuina, ti mogonei kua gahua vala magaaho a André he la ofisa he Tau Fakamoli a Iehova he motu haana.

20, 21. (a) Lagomatai fēfē he matakutaku ke he Atua a tautolu ke kalo mai he agahala? (e) Ko e heigoa ka tutala ki ai he vala tala ka mui mai?

²⁰ Ko e takele he tau manatu hepe kua takitaki ke he tuaga he manamanatuaga ne makai e tagata ke tiaki e fakafetuiaga uho mo Iehova he tautui aki taha mena ne nakai tonuhia a ia ki ai. (Iakopo 1:14, 15) He taha faahi, ka matakutaku a tautolu ki a Iehova, to nonofo kehe—o kehe foki—mai he tau tagata, matakavi, tau gahua, mo e fakafiafiaaga ka fakatupu a tautolu ke fakatokolalo e tau mahani mitaki ha tautolu. (Tau Fakatai 22:3) Ko e heigoa ni e mena fakamā po ke foakiaga ne liga putoia ai, ko e mena tote a ia ka fakatatai ke he galo e taliaaga he Atua. (Mataio 5:29, 30) Ko e matakutaku ke he Atua kua putoia mooli e nakai fakatalē pauaki ha tautolu ke he ha mahani kelea fakataane mo e fifine, putoia e tau puhala telefua oti, ka e “fakamafoki kehe [ha mautolu a] mata neke kitekite ke he tau mena nakai aoga.” Ka taute pihia e tautolu, maeke ia tautolu ke falanaki ki a Iehova ke ‘fakamalolo a tautolu’ mo e foaki e tau mena oti ne lata mooli mo tautolu.—Salamo 84:11; 119:37.

²¹ Ti ko e fakagahua e matakutaku mooli he Atua ko e puhala tumau he iloilo. Ko e punaaga foki he fiafia mooli. (Salamo 34:9) To fakamahino e mena nei mai he vala tala ka mui mai.

[Tau Matahui Tala]

Maeke Nakai a Koe ke Fakamaama?

• Ko e heigoa e tau mahani Kerisiano ne putoia he matakutaku ke he Atua?

• Kautu fēfē e matakutaku ke he Atua ke he matakutaku he tagata?

• Fakakite fēfē e tautolu kua ha ha ia tautolu e onoonoaga mitaki he liogi?

• Maeke fēfē e matakutaku ke he Atua ke taofi a tautolu mai he agahala?

[Tau Hūhū he Fakaakoaga]

[Fakatino he lau 23]

Ne fakaako e Tavita e matakutaku ke he Atua he kitekite ke he tau gahua a Iehova

[Tau Fakatino he lau 24]

To tali atu fēfē a koe he magaaho ka fakataupā mo e tuaga kamatamata?