Laveaki e Iehova a Lautolu ne Mamahi

“Loga e tau mena kelea ke hohoko ke he tagata tututonu; ka e laveaki e Iehova a ia mai he tau mena oti ia.”—SALAMO 34:19.

1, 2. Ko e heigoa e mena vihi ne fehagai mo e taha Kerisiano tua fakamooli, ti ko e ha kua liga lauia foki a tautolu ke he tau logonaaga pihia?

KO E fifine fuata ko Keiko, * ne molea e 20 e tau he eke mo taha he Tau Fakamoli a Iehova. Fai magaaho, ne fekafekau a ia ko e paionia tumau, po ke tagata fakapuloa tumau he Kautu. Ne tokiofa e ia e kotofaaga haana. Ka e nakaila leva ia, ne hufia a Keiko ke he tau logonaaga he nakai aoga mo e ogoogonoa. “Ti tagi tumau au,” he talahau e ia. Ke kautū mai he tau manamanatu hehē haana, ne lahi e magaaho ne fakaaoga e Keiko ke fakaako fakatagata. “Pete ia, ne nakai fahia au ke hiki e puhala manamanatuaga haaku” he talahau e ia. “Ati fia mate au.”

² Kua taufetului nakai a koe mo e tau logonaaga pihia he maanu? Ko e taha he Tau Fakamoli a Iehova, kua lahi e kakano haau ke fiafia ha kua toka he mahani Atua e “mena kua talahaua mai ke he mouiaga nai katoa mo ia kua tatali.” (1 Timoteo 4:8) Ti ko koe mogonei ha he parataiso fakaagaaga! Ka e pehē kia e mena nei kua puipui mai a koe he tau mamahi oti? Nakai! Ne talahau e Tohi Tapu: “Loga e tau mena kelea ke hohoko ke he tagata tututonu.” (Salamo 34:19) Kua nakai lata ke ofo ki ai, ha “ko e lalolagi oti ha he pule hana kua mahani kelea,” ko Satani ko e Tiapolo. (1 Ioane 5:19) Ke he ha puhala ni, kua lauia oti a tautolu he pule ha Satani.—Efeso 6:12.

Ko e Tau Lauiaaga Mamahi

3. Talahau e tau fakafifitakiaga he Tohi Tapu hagaao ke he tau fekafekau he Atua ne fakaatukehe lahi.

³ Maeke he fakaatukehe tumau ke fakapouli e onoonoaga katoa ha tautolu. (Tau Fakatai 15:15) Onoono la ke he tagata hakohako ko Iopu. He lotouho he tuaga kelea, ne pehē a Iopu: “Ko e tagata ne fanau ai he fifine, kua gahoa hana tau aho, ti puke ai ke he fakaatukehe.” (Iopu 14:1) Ati galo e fiafia ha Iopu. Fai magaaho, ne manatu foki a ia kua tiaki e Iehova a ia. (Iopu 29:1-5) Ti nakai ni ko Iopu e fekafekau he Atua ne ita lahi mahaki. Ne talamai e Tohi Tapu ki a tautolu ne ‘mamahi e loto’ a Hana, ha kua tufua a ia. (1 Samuela 1:9-11) He hogohogo manava ke he tuaga he magafaoa haana, ne pehē a Repeka:  “Kua vihia e au haku moui.” (Kenese 27:46) He magaaho ne liu manatu e tau hepehepe haana, ne pehē a Tavita: “Kua faifano au mo e pilo ke he aho oti.” (Salamo 38:6) Kua fakamahino mai he tau fakafifitakiaga gahoa nei, kua fakauka e tau tagata taane mo e tau fifine matakutaku Atua he vahā fakamua ato Kerisiano, ke he tau magaaho fakaatukehe lahi.

4. Ko e ha ne nakai ofo ai ha kua ha ha i ai a “lautolu kua fakaagitau” mo e tau Kerisiano he vahā nei?

⁴ Ka e kua e tau Kerisiano? Ne kitia he aposetolo ko Paulo e latatonu ke tala age ke he tau Tesalonia “kia fakamafana a lautolu kua manava tote [po ke, fakaagitau].” (1 Tesalonia 5:14) Ne talahau he taha tohi, ko e kupu Heleni ne fakaliliu ko “lautolu kua fakaagitau” nukua hagaao foki ki a lautolu “ne hufia fakakū ke he tau tupetupe he moui.” Ne fakakite he tau kupu ha Paulo kua loto lolelole falu ne fakauku he agaaga he fakapotopotoaga ia i Tesalonia. Kua ha ha i ai foki e tau tagata fakaagitau mo e tau Kerisiano he vahā nei. Ka ko e ha ne fakaagihoa ai a lautolu? Kia fakatutala a tautolu ke he tolu e tupuaga.

Maeke he Tuaga Agahala ha Tautolu ke Fakaatukehe a Tautolu

5, 6. Ko e heigoa e mafanatia ka moua mai he Roma 7:22-25?

⁵ Nakai tuga e tau tagata matahavala ne “nakai tuai logona e lautolu ha mena,” kua mamahi e tau Kerisiano mooli ha ko e tuaga agahala ha lautolu. (Efeso 4:19) Liga tatai e logonaaga ha lautolu mo Paulo, ne tohia: “Ha ko e mena fiafia au ke he fakatufono he Atua ke he tagata i loto. Ka kua iloa e au e taha fakatufono ha ha he tino haku, kua tau a ia ke he fakatufono he haku a manamanatu, kua mahala foki au ke he fakatufono he hala ha ha he tino haku.” Ti talahau e Paulo: “Oi te, ko e tagata malaia au!”—Roma 7:22-24.

⁶ Kua manatu pihia nakai a koe tuga a Paulo? Kua nakai hepe ka mailoga lahi e koe e tau nakai mitaki katoatoa haau, ha kua fakakite he mena nei ki a koe e hokulo he agahala ti maeke mogoia ke fakamalolō e fifiliaga haau ke tiaki e tau mena kelea. Ka e nakai lata ia koe ke fakaatukehe tumau ke he haau a tau kūkū. Ke he tau kupu fakaatukehe haana i luga, ne lafi e Paulo: “Kua fakaaue atu au ke he Atua, ha ko Iesu Keriso ha tautolu a Iki.” (Roma 7:25) E, kua mauokafua a Paulo kua maeke he toto ha Iesu ke laveaki a ia mai he agahala pauaki.—Roma 5:18.

7. Ko e heigoa ka lagomatai e tagata ke nakai maanu ha ko e tau hihiga haana ke agahala?

⁷ Kaeke ke hufia lahi a koe ha ko e tuaga agahala haau, kia moua e mafanatia he tau kupu ne tohia he aposetolo ko Ioane: “Kaeke foki kua hala taha, ha ia tautolu e [l]agomatai ki mua he Matua, ko Iesu Keriso ko e tututonu a ia. Ko e lukutoto foki a ia mo e tau hala ha tautolu; ka e nakai kuenaia e tau hala ha tautolu, ka e katoa mo e lalolagi oti kana.” (1 Ioane 2:1, 2) Kaeke ke maanu a koe ha ko e tau hihiga ke agahala, kia manatu tumau na mate a Iesu ma e tau tagata agahala, nakai ma e tau tagata mitaki katoatoa. Ti mooli, “nukua hala e tau tagata oti kana, to nakai hoko ke he fakahekeaga mai he Atua.”—Roma 3:23.

8, 9. Ko e ha kua lata ia tautolu ke tiaki e tau logonaaga ke fakahala ni e koe a koe?

⁸ Ti manamanatu la, kua taute e koe e agahala kelea muitui he vahā kua mole. Nakai fakauaua, kua fitā he liogi a koe ki a Iehova hagaao ki ai, ti liga liogi tumau a koe. Ne moua foki e koe e lagomatai fakaagaaga mai he tau motua Kerisiano. (Iakopo 5:14, 15) Ne fakatokihala mooli a koe ti fakatumau ke eke mo taha he fakapotopotoaga. Po kua fai magaaho a koe ne fano kehe mai he fakatokatokaaga he Atua, ka e fakatokihala a koe he magaaho fakamui ti liu moua e tuaga mea. Pete he pihia, kua liga manatu e koe e agahala tuai haau ati maanu ai a koe. Kaeke ke tupu e mena ia, kia manatu na “fakamagalo fakalahi” e Iehova a lautolu ne tokihala mooli. (Isaia 55:7) Mua atu foki, kua nakai manako a ia ke logona hifo e koe kua mamafa e kelea hau. Ha ko e  finagalo ha Satani a ia ke pihia e logonaaga haau. (2 Korinito 2:7, 10, 11) To lata pauaki ni e Tiapolo ke fakaotioti, ti manako a ia ke logona hifo e koe kua lata pauaki a koe ke fakaotioti foki. (Fakakiteaga 20:10) Kia nakai toka a Satani ke kautū ke he lagatau nei ke moumou e tua haau. (Efeso 6:11) Ka “kia totoko atu a mutolu kia ia” hagaao ke he mena nei, tuga ne taute foki e koe ke he falu a puhala.—1 Peteru 5:9.

⁹ He Fakakiteaga 12:10, ne talahau ko Satani hane “hokotaki e tau matakainaga ha tautolu”—ko e tau Kerisiano fakauku. Ne “hokotaki [e ia] a lautolu ki mua he Atua ha tautolu ke he aho mo e po.” He manamanatu ke he kupu ia ka lagomatai a koe ke kitia ko Satani, ko e hokotaki fakavai, kua fiafia kaeke ke hokotaki mo e fakahala ne koe a koe, ka kua nakai taute pihia e Iehova. (1 Ioane 3:19-22) Ko e ha ne tualoto tumau a koe ke he tau kūkū haau ati hokotia ke tiaki e tua? Aua neke toka a Satani ke moumou e fakafetuiaga ha tautolu mo e Atua. Kia nakai toka e Tiapolo ke fakapouli e loto haau ke he mooli ko Iehova ko e “fakaalofa hofihofi, mo e fakaalofa noa; kua fakatuai hana ita, to lahi e fakaalofa.”—Esoto 34:6.

Maeke he Tau Kūkū ha Tautolu ke Fakalolelole a Tautolu

10. Ko e heigoa ka liga fakalolelole he tau kaupaaga ni ha tautolu a tautolu?

¹⁰ Kua fakalolelole e falu Kerisiano ha kua fakatauhele he tau kūkū fakatagata e fekafekauaga ha lautolu ke he Atua. Kua tupu nakai e mena ia ki a koe? Ti liga taofi he gagao lahi, he motua e tino, po ke he falu tutuaga a koe mai he foaki fakalahi e magaaho ke he fekafekauaga tuga ne taute e koe he vahā kua mole. Mooli, kua fakamalolō e tau Kerisiano ke fakatau e tau magaaho ma e fekafekauaga he Atua. (Efeso 5:15, 16, NW) Ka e kua ka nakai lahi e gahua ka taute e koe he fekafekauaga ha ko e tau kaupaaga mooli, ti eke e mena nei mo punaaga ke fakalolelole aki a koe?

11. Aoga fēfē e fakatonuaga ha Paulo ne fakamau ia Kalatia 6:4 ki a tautolu?

¹¹ Ne hataki he Tohi Tapu a tautolu ke nakai teva ka e “kia fifitaki a mutolu kia lautolu kua moua tuai ke he tua mo e fakauka e tau mena kua talahaua mai.” (Heperu 6:12) Kua maeke ia tautolu ke taute pihia ka kumi e tautolu e tau fakafifitakiaga mitaki ha lautolu mo e lali ke fifitaki e tua ha lautolu. Pete ia, to nakai moua e tautolu e aoga kaeke ke fakataitai teao atu a tautolu ke he falu ti fakahiku kua nakai mitaki ha mena ne taute e tautolu. Ko e mena ia, kua lata ia tautolu ke fakagahua e fakatonuaga ha Paulo: “Kia igatia mo e fakamoli hana ni a gahua, ti ha ha ia ia e mena ke hula ki ai a ia ni, ka e nakai ha he taha.”—Kalatia 6:4.

12. Ko e ha kua lata ia tautolu ke hula ke he gahua ne foaki e tautolu ki a Iehova?

¹² Kua ha ha he tau Kerisiano e kakano mitaki ke hula, pete kua fakakaupā he tau lekua he malolō tino a lautolu. Ne fakamafana he Tohi Tapu a tautolu: “Ko e mena nakai hepehepe e Atua ke fakanimonimo ai e ia ha mutolu a tau gahua, mo e gahua fakamalolo he fakaalofa kua fakakite mai ai e mutolu ke he hana higoa.” (Heperu 6:10) Kua liga uka mogonei ha kua lolelole e tuaga haau ti nakai maeke ke fakatumau ke he tau gahua ne olioli fakamua a koe ki ai. Pete ia, ha ko e lagomatai ha Iehova, liga maeke ia koe ke fakalataha fakalahi atu ke he taha puhala he fekafekauaga Kerisiano, tuga e fakamatala ke he telefoni mo e tohitohi. Kia mauokafua ha ko e mena to fakamonuina e Iehova ko e Atua a koe ma e gahua loto katoa haau mo e fakaalofa ne fakakite e koe ki a ia mo e tau tagata.—Mataio 22:36-40.

Maeke he “Tau Aho Uka” ke Fakalolelole a Tautolu

13, 14. (a) Ko e tau puhala fe ka fakamamahi he “tau aho uka” a tautolu? (e) Kitia fēfē e nakai fakaalofa hofihofi mooli he vahā nei?

¹³ Pete kua amaamanaki a tautolu ke momoui he lalolagi foou he Atua, kua nonofo  agaia a tautolu mogonei he “tau aho fakamui to hohoko mai ai e tau aho uka.” (2 Timoteo 3:1) Ka e mafanatia a tautolu he iloa kua fakakite mai he tau tutuaga fakaatukehe e tata lahi he laveakiaga ha tautolu. Pete ia, kua lauia a tautolu he tau tutuaga ne agaagai ia tautolu. Ke fakatai ki ai, ka e kua ka nakai fai gahua a koe? Liga kua nakai loga e gahua, ti fai mahina he mole, liga tuahā a koe na kitia nakai e Iehova e tuaga haau po kua fanogonogo nakai ke he haau a tau liogi. Po ke liga kua fakamamahi he onoono hifo po ke nakai tonu e tau mena ne taute ki a koe. Pihia foki ka totou e koe e tau mataulu he tohi tala ka taute a koe ke tuga e tagata tututonu ko Lota, ne “oti e manava” ha ko e tau mahani matahavala ha lautolu ne agaagai ia ia.—2 Peteru 2:7.

¹⁴ Kua fai vala pauaki he tau aho fakamui kua nakai lata ia tautolu ke nimo. Ne talahau tuai he Tohi Tapu to tokologa ka “nakai fai fakaalofa.” (2 Timoteo 3:3) Ne loga e kaina ne tote maka e fakaalofa fakamagafaoa i ai. Mooli, “ne fakakite he tau talahauaga to liga ni ke kelipopo, fakamatematekelea fakatino, po ke ekefakakelea e tau manamanatuaga mo e mahani fakataane mo e fifine he tau tagata mai ni he magafaoa ka e nakai mai he tau tagata kehe,” he talahau he tohi Family Violence. “Ko e matakavi haia kua lata ke moua he tau tagata e fakaalofa mo e logona hifo e haohao mitaki, ma e falu tagata lalahi mo e tau tama, ko e matakavi ne mua atu e hagahaga kelea.” Ko lautolu ne fakatapakupaku ke he tau takatakaiaga ne nakai atihake he kaina, to liga ke moua e tupetupe mo e fakaatukehe he tau tau a mui. Ka e kua ka tupu e mena nei kia koe?

15. Mua atu fēfē e fakaalofa ha Iehova ke he fakaalofa he tau tagata?

¹⁵ Ne lologo e salamo ko Tavita: “Ha kua tiaki au he haku a matua tane mo e haku a matua fifine, ti talia ai e Iehova au.” (Salamo 27:10) Ko e mauokafua ha ia ke iloa kua mua atu e fakaalofa ha Iehova ke he tau matua he tagata! Pete kua mamahi e fakaheu, ekefakakelea, po ke tiaki he matua, kua nakai fakatote he naia e leveki ha Iehova ki a koe. (Roma 8:38, 39) Manatu na futiaki he Atua a lautolu ne fakaalofa a ia ki ai. (Ioane 3:16; 6:44) Pete ne tau puhala ne fakafehagai atu e tau tagata ki a koe, na fakaalofa e Matua haau he lagi ki a koe!

Tau Lakaaga Aoga ke Fakatotoka e Fakaagihoa

16, 17. Ka fehagai mo e fakaagihoa, ko e heigoa kua lata ke taute he tagata ke puipui e malolō fakaagaaga haana?

¹⁶ Maeke ia koe ke taute e tau lakaaga kua lata ke fahia ke he fakaagihoa. Ke tuga anei, kia muitua ke he fakaholoaga atihake  he gahua faka-Kerisiano. Manamanatu fakahokulo ke he Kupu he Atua, mua atu ka lahi mahaki e fakalolelole. Ne lologo e salamo: “Ka pehe atu au, Kua heke haku hui, ti toto hake ai au he hāu a fakaalofa, Iehova na e. Ko e tau manamanatu loga he haku a loto kua fiafia ai au ha ko e fakamafanaaga mai ia koe.” (Salamo 94:18, 19) He totou tumau e Tohi Tapu ka lagomatai ke fakapuke e manamanatuaga haau aki e tau kupu fakamafana mo e atihake.

¹⁷ Kua aoga foki e liogi. Pete ka nakai maeke ia koe ke fakakite katoatoa e hokulo he tau logonaaga haau ke he tau kupu, na iloa e Iehova e mena ne lali a koe ke talahau. (Roma 8:26, 27) Ne foaki he salamo e fakamafana nei: “Kia tuku atu kia Iehova e tau mena ne fakaatukehe ai a koe; ko ia ni ke fakamalolo a koe; nakai tuku e ia tukulagi e tau tagata tututonu ke fagahuatia.”—Salamo 55:22.

18. Ko e heigoa e tau lakaaga kua lata ke taute e lautolu ne fakaatukehe?

¹⁸ Ne moua he falu e tupetupe ha kua gagao fakaagitau. * Kaeke kua tupu e mena nei ki a koe, lali ke manamanatu ke he lalolagi foou he Atua mo e magaaho ka “nakai pehē mai foki taha kua nofo ai, Kua gagao au.” (Isaia 33:24) Kaeke kua lahi e logonaaga fakateaga haau ke he fakaagitau ne fa mahani, liga kua pulotu ke kumi e lagomatai fakaekekafo. (Mataio 9:12) Aoga foki ke leveki e tino haau. Kua liga mitaki ke fuafua e puhala kai mo e ke faofao. Mitaki ke lahi foki e okioki haau. Aua neke ala mule ke kitekite televisoni, ti kalo mai he taute e tau mena ka mategūgū ai a koe ke he tino mo e manamanatuaga. Mua atu, kia fakatumau ke fakalataha ke he gahua he Atua! Pete kua nakaila hoko mai e magaaho ka “holoholo kehe he Atua e tau hihina mata oti,” to lagomatai e ia a koe ke fakauka ki ai.—Fakakiteaga 21:4; 1 Korinito 10:13.

Momoui “ki Lalo he Lima Malolo he Atua”

19. Ko e heigoa ne mavehe e Iehova ki a lautolu hane mamahi?

¹⁹ Ne fakamafana he Tohi Tapu a tautolu, pete ni he loga e tau mamahi he tau tagata tututonu, “ka e laveaki e Iehova a ia mai he tau mena oti ia.” (Salamo 34:19) Taute fēfē he Atua e mena nei? He magaaho ne liogi lagaloga e aposetolo ko Paulo ke laveaki mai he “mena mahukihuki ke he tino” haana, ne tala age a Iehova: “Kua fakakatoatoa haku a malolo ke he lolelole.” (2 Korinito 12:7-9) Ko e heigoa ne mavehe e Iehova ki a Paulo, mo e ko e heigoa ne mavehe e ia ki a koe? Nakai ko e fakamaulu he vahā nei, ka ko e malolō ke fakauka ki ai.

20. Pete ne tau kamatamata ha tautolu, ko e heigoa ne fakamafana mai ki a tautolu he 1 Peteru 5:6, 7?

²⁰ Ne tohia he aposetolo ko Peteru: “Kia fakatokolalo ai a mutolu ki lalo he lima malolo he Atua, kia fakamatalahi ai e ia a mutolu ke he vaha ke lata ai. Kia tuku atu kia ia e tau mena oti kua fakaatukehe ai a mutolu, ha ko e mena kua manatu e ia a mutolu.” (1 Peteru 5:6, 7) Ha kua manatu e Iehova a koe to nakai tiaki e ia a koe. To lalago e ia a koe pete ne tau kamatamata ne moua e koe. Kia manatu ko e tau Kerisiano tua fakamooli kua ha ha “ki lalo he lima malolo he Atua.” He fekafekau a tautolu ki a Iehova, kua foaki mai e ia e malolō ke fakauka. Kaeke ke tua fakamooli a tautolu ki a ia, to nakai fai mena ka fakahagahaga kelea fakaagaaga a tautolu tukulagi. Kia lata mogoia ia tautolu ke fakamooli tumau ki a Iehova ke maeke ia tautolu ke olioli e moui tukulagi he haana a lalolagi foou ne mavehe mo e kitia e aho ka laveaki tukulagi e ia a lautolu ne mamahi!

[Tau Matahui Tala]

Manatu Nakai e Koe?

• Ko e ha ne lauia foki e tau fekafekau ha Iehova he mamahi?

• Ko e heigoa falu a mena ne taute e tau tagata he Atua ke logona e fakaagihoa?

• Lagomatai fēfē e Iehova a tautolu ke fahia ke he ha tautolu a tau tupetupe?

• Ko e puhala fe ko tautolu ha ha “ki lalo he lima malolo he Atua”?

[Tau Hūhū he Fakaakoaga]

[Tau Fakatino he lau 13]

Pete ne tau kamatamata, kua fai kakano e tau tagata ha Iehova ke fiafia

[Fakatino he lau 16]

Fakamatala he telefoni ko e taha puhala ke foaki e loto katoa haau ki a Iehova