“Ha ko e Tama Taane Hiva Tau”

HE TAU magaaho ne o atu e Tau Fakamoli a Iehova ke he gutuhala ha Wiesława ne nofo he faahi tokelau i Polani, ne fakaaue totonu a ia ka e nakai tutala mo lautolu. Taha aho, ne o atu a Samuel ne hiva e tau mo e matua fifine haana ki a ia. Magaaho nei ne fanogonogo a Wiesława ke he fekau mo e talia e mekasini hagaao ke he parataiso he lalolagi.

Ha kua teitei hoko e Fakamanatuaga he mate ha Iesu Keriso, ne manako a Samuel ke uiina a Wiesława ke he magaaho pauaki nei. Ne liliu atu a ia mo e matua fifine haana ke aahi a Wiesława, mo e ta atu e lau uiina mogonei. He kitia kua tauteute mitaki e tama taane, ne ole fakamolemole a Wiesława ke fano ki fale mo e tui e tapulu mitaki. He liu mai, ne fanogonogo a ia ki a Samuel mo e talia e uiina, ti hūhū: “Fina atu tokotaha ka au po ke o atu mo e taane haaku?” Ti lafi e ia: “Pete ni ka ai fina atu e taane haaku, to fina atu. To taute e au ma haau ma Samuel.” Ne fiafia a Samuel he fakamooli he fifine e maveheaga haana.

He lauga Fakamanatuaga, ne nofo a Samuel he tapa ha Wiesława mo e fakakite age e tau kupu tohi ne fakatutala ki ai. Ne nava lahi a Wiesława ke he mena nei. Ne olioli a ia he Fakamanatuaga mo e loto fakaaue ha kua fakamaama ke he tau kupu mukamuka e tau manatu hokulo ia. Ne omoomoi foki a ia ha ko e fakafeleveia mafanatia mo e totonu he fakapotopotoaga ki a ia. Tali mai he magaaho ia, kua fakakite e ia e loto fakaaue tumau ke he tau mena fakaagaaga ti kua kamata ke fakalataha tumau mo e Tau Fakamoli a Iehova. Nakaila leva he pehē a ia: “Kua mā a au ha kua nakai fanogonogo he o mai fakamua a mutolu ke he gutuhala haaku. Ti tala atu e au ko e fanogonogo noa ni au ke he fekau ha ko e tama taane hiva tau, ko Samuel.”

Tuga a Samuel i Polani, tokologa e fuata Fakamoli ha Iehova ne fakaheke e Atua ke he tau laugutu mo e he tau puhala tauteute mo e tau mahani mitaki ha lautolu. Kaeke ko e fuata mui a koe, maeke foki ia koe ke lagomatai e tau tagata ne manako mooli ke moua e loto fakaaue ke he tau mena aoga fakaagaaga.