‘Kia Fakailoa Atu ke he Atua ha Mutolu a Tau Ole’
‘Kia Fakailoa Atu ke he Atua ha Mutolu a Tau Ole’
“Kia fakailoa atu ke he Atua e tau manako ha mutolu ke he tau mena oti kana ke he liogi, mo e ole, katoa mo e fakaaue.”—FILIPI 4:6.
1. Moua e tautolu e kotofaaga ke matutaki ki a hai, ti ko e ha kua ofoofogia lahi e mena ia?
KA OLE a koe ke feleveia mo e iki he motu, to fēfē e tali ka moua e koe? To liga moua e koe e tali totonu mai he tagata gahua haana, ka e liga nakai fakaatā a koe ke tutala gutu ke he iki. Ka e kehe mamao ai mo e Iki mua ue atu, ko Iehova ko e Atua, ko e Pule Katoatoa he lagi mo e lalolagi. Maeke ia tautolu ke matutaki mo ia ke he ha matakavi ne ha ha ai a tautolu mo e ha magaaho ne liga fifili e tautolu. To logona tumau e ia e tau liogi kua talia e ia. (Tau Fakatai 15:29) Ko e mena homo ue atu mooli a ia! Nakai kia omoi he loto fakaaue ma e mena nei a tautolu ke liogi tumau ki a Ia kua latatonu ke fakahigoa ko e ‘Fanogonogo Liogi’?—Salamo 65:2.
2. Ko e heigoa kua lata ma e tau liogi ke talia ke he Atua?
2 Pete ia, liga hūhū taha tagata, ‘Ha e fe e tau liogi ne talia he Atua?’ Ne fakamaama he Tohi Tapu taha e mena kua lata ma e tau liogi ke talia he pehē mai: “Ka nakai tua, ti nakai maeke ke fakafiafia kia ia; ha ko e mena lata ia ia kua fina atu ke he Atua ke talia kua moui a ia, ko ia foki kua taui mai a lautolu kua kumi fakamakutu kia ia.” (Heperu 11:6) E, he fakamaama he vala tala fakamua, ko e kei he matutaki ke he Atua ko e tua. Kua makai e Atua ke talia e tau liogi ha lautolu kua matutaki ki a ia, ka e lata ke taute e lautolu ke he tua mo e tau gahua hako fakalataha mo e loto fakamooli mo e hako e aga he loto.
3. (a) He fakakite he tau liogi he tau fekafekau tua fakamooli i tuai, ko e heigoa e vahega talahauaga kua liga putoia he tau liogi? (e) Ko e heigoa e tau vahega kehekehe he tau liogi ha tautolu?
3 Kua tomatoma he aposetolo ko Paulo e tau Kerisiano he vahā haana: “Aua neke fakaatukehe a mutolu ke he taha mena taha; ka kia fakailoa atu ke he Atua e tau manako ha mutolu ke he tau mena oti kana ke he liogi, mo e ole, katoa mo e fakaaue.” (Filipi 4:6, 7) Ha ha he Tohi Tapu e tau fakafifitakiaga loga ia lautolu ne talahau e tau kapaletu ke he Atua. Ko lautolu ia ko Hana, Elia, Hesekia, mo Tanielu. (1 Samuela 2:1-10; 1 Tau Patuiki 18:36, 37; 2 Tau Patuiki 19:15-19; Tanielu 9:3-21) Kua lata ia tautolu ke muitua e tau fakafifitakiaga ha lautolu. Mailoga foki, kua fakakite he tau kupu a Paulo mena kehekehe e tau puhala liogi. Ne totoku e ia e fakaaue, ko e liogi haia kua fakakite e tautolu e loto fakaaue ma e tau mena ne taute he Atua ma tautolu. Liga putoia ai foki e fakaheke. Kua hagaao e ole ke he kumi fakatokolalo mo e fakamakutu. Ti fakakite e tautolu e tau olelalo, po ke tau manako ke he taha mena pauaki. (Luka 11:2, 3) Kua fiafia ha tautolu a Matua he lagi ke talia e matutaki mo ia ke he tau puhala nei.
4. Pete he iloa e Iehova e tau manako ha tautolu, ko e ha kua lata agaia a tautolu ke taute e tau olelalo ki a ia?
4 Liga hūhū e falu, ‘Nakai kia fitā e iloa e Iehova e tau manako oti ha tautolu?’ E, iloa e ia. (Mataio 6:8, 32) Ti ko e ha mogoia ne manako agaia a ia ke matutaki a tautolu ki a ia ke he tau olelalo ha tautolu? Manamanatu ke he fakataiaga nei: Kua liga foaki he pule he fale koloa e mena fakaalofa ke he falu tagata fakatau haana. Ka ke moua e mena fakaalofa nei, kua lata he tau tagata fakatau ke o mai ke he pule he fale koloa mo e moua ai. Ko lautolu ne nakai makai he lali ke taute pihia ka fakakite kua nakai loto fakaaue lahi a lautolu ke he mena fakaalofa ia. Pihia foki, ko e fakaheu ke taute e tau olelalo he liogi ka fakakite e tote he loto fakaaue ma e tau mena ne foaki e Iehova. Ne pehē a Iesu: “Ati ole atu a, ti moua ni e mutolu.” (Ioane 16:24) He puhala nei, kua fakakite e tautolu e falanaki ke he Atua.
Fēfē e Puhala ke Tutala a Tautolu ke he Atua?
5. Ko e ha kua lata ke liogi ke he higoa a Iesu?
5 Nakai fakatoka e Iehova e tau matafakatufono maō loga ke he puhala ke liogi. Pete ia, kua lata ia tautolu ke ako e matutakiaga mitaki ke he Atua, ne kua fakamaama he Tohi Tapu. Tuga anei, ne fakaako e Iesu e tau tutaki haana: “Ko e tau mena oti ke ole atu ai a mutolu ke he Matua ha ko e haku a higoa, to foaki mai e ia kia mutolu.” (Ioane 16:23) Ti, kua manako ki a tautolu ke liogi ke he higoa a Iesu, he mailoga ko e halavaka hokoia a Iesu ne puhala mai e tau monuina he Atua ke he tau tagata.
6. Ka liogi ko e heigoa e tuaga kua lata ke taute e tautolu?
6 Ko e heigoa e tuaga kua lata ke taute he magaaho ka liogi? I loto he Tohi Tapu, nakai fai tuaga pauaki ne fakakite ke maeke he tau liogi ha tautolu ke logona. (1 Tau Patuiki 8:22; Nehemia 8:6; Mareko 11:25; Luka 22:41) Ko e mena ne aoga ko e liogi ke he Atua he loto fakamooli mo e hako e aga he loto.—Ioelu 2:12, 13.
7. (a) Ko e heigoa e kakano he “amene”? (e) Fakaaoga fakamitaki fēfē he tau liogi?
7 Ka e kua e fakaaoga he kupu “amene”? Kua fakakite he tau Tohiaga Tapu ko e fakahikuaga kua latatonu mooli a nei ma e tau liogi ha tautolu, mua atu ka liogi a tautolu he toloaga tagata. (Salamo 72:19; 89:52) Ko e Kupu Heperu ʼa·menʹ ne ha ha ai e kakano aoga he “moolioli.” Ne fakamaama he McClintock and Strong’s Cyclopedia ko e aoga he talahau “Amene” he matahiku he tau liogi ko e “fakamooli he tau kupu kua fitā e totoku, mo e talia he fakamooli ki ai.” Ti, he fakahiku aki e “Amene” mai he loto, ko ia ne liogi kua fakakite e tau logonaaga makai hagaao ke he tau mena ne talahau laia e ia. Ka fakahiku aki he Kerisiano ne hukui e fakapotopotoaga ke he liogi e talahauaga nei, ko lautolu ne fanogonogo kua lata ke lafi foki ke he tau loto ha lautolu po ke talahau fakaleo lahi e “Amene” ke fakakite e talia katoatoa ke he tau mena ne talahau laia.—1 Korinito 14:16.
8. Maeke fēfē he falu liogi ha tautolu ke tuga e tau liogi ha Iakopo po ke ha Aperahamo, ti ko e heigoa ka fakakite he mena nei hagaao ki a tautolu?
8 Ha ha ai e tau magaaho ne fakaatā he Atua a tautolu ke fakatātā e hokulo he kapaletu ha tautolu hagaao ke he tau matakupu ne liogi ki ai a tautolu. Kua liga lata a tautolu ke tuga a Iakopo i tuai, ne taufetului mo e agelu he po katoa ke moua e monuina. (Kenese 32:24-26) Po ke falu he tau tutuaga kua liga tuga a Aperahamo a tautolu, ne ole tumau ki a Iehova ke lata mo Lota mo e falu tagata tututonu ne liga ha ha i Sotoma. (Kenese 18:22-33) Kua liga ole pihia foki a tautolu ki a Iehova hagaao ke he tau mena kua uho ki a tautolu, he o atu ki a ia he fakave ke he haana fakafili tonu, fakaalofa-totonu, mo e fakaalofa noa.
Ko e Heigoa Ka Liga Ole a Tautolu ki Ai?
9. Ko e heigoa kua lata ke eke mo matapatu manatu ha tautolu ka liogi?
9 Manatu na pehē a Paulo: “Kia fakailoa atu ke he Atua e tau manako ha mutolu ke he tau mena oti kana ke he . . . ole.” (Filipi 4:6) Ti, kua teitei aamotia he tau liogi fakatagata e tau faahi oti he moui. Pete ia, ko e manatu fakamua he tau liogi ha tautolu kua lata mo e tau mena a Iehova. Ne fakatoka e Tanielu e fakafifitakiaga mitaki ke he mena nei. He magaaho ne matematekelea a Isaraela he fakahala ha ko e tau agahala ha lautolu, ne kumi atu a Tanielu ki a Iehova ke fakakite ki a ia e fakaalofa noa, he talahau: “Aua neke mule mai a koe, ha ko koe ni, haku a Atua na e, ha kua fakahigoa ai ke he hau a higoa.” (Tanielu 9:15-19) Kua fakakite pihia nakai he tau liogi ha tautolu ko e fakatapuaga he higoa a Iehova mo e fakamooli he finagalo haana ko e matapatu manatu ha tautolu a ia?
10. Iloa fēfē e tautolu kua latatonu ke liogi hagaao ke he tau kapaletu fakatagata?
10 Ke he taha faahi, kua latatonu foki ke ole hagaao ke he tau mena fakatagata. Ma e fakatai, tuga a salamo, liga liogi a tautolu ma e maama fakaagaaga hokulo. Ne liogi a ia: “Kia fakamaama mai kia au, ti omaoma ai e au hāu a fakatufono, mo e fifitaki ki ai ke he loto katoa.” (Salamo 119:33, 34; Kolose 1:9, 10) Ko Iesu ne ‘liogi mo e ole atu ki a Ia kua maeke ni ke fakamoui a ia mai he mate.’ (Heperu 5:7) He taute pihia, ne fakatātā e ia e latatonu he kumi e malolō ka fehagai mo e hagahagakelea po ke kamatamata e tagata. He age e Iesu e liogi fakatai ke he tau tutaki haana, ne putoia foki e ia e tau kapaletu fakatagata, tuga e fakamagalo e tau hala mo e moua e tau mena kai ke lata mo e aho.
11. Lagomatai fēfē he liogi a tautolu ke nakai kaumahala ke he tau kamatamata?
11 He liogi fakatai ia, ne putoia e Iesu e olelalo: “Aua neke uta e koe a mautolu ke he kamatamata, ka e laveaki mai a e koe a mautolu he mena kelea.” (Mataio 6:9-13) Ne hataki e ia fakamui: “Kia mataala a mutolu mo e liogi, neke hoko mai e kamatamata kia mutolu.” (Mataio 26:41) Kua latatonu e liogi ka fehagai a tautolu mo e tau kamatamata. Kua liga kamatamata a tautolu ke tiaki e tau matapatu fakaakoaga Tohi Tapu he gahuaaga po ke he aoga. Liga uiina e lautolu ne nakai ko e Tau Fakamoli a tautolu ke fakalataha ke he tau matagahua ne nakai lata mo e Kerisiano. Liga ole ki a tautolu ke taute e mena ne moumou e tau matapatu fakaakoaga tututonu. He tau magaaho pihia, kua lata ia tautolu ke muitua ke he hatakiaga ha Iesu ke—liogi tuai ti ka fehagai mo e kamatamata—ole ke he Atua ke lagomatai a tautolu ke nakai kaumahala.
12. Ko e tau fakaatukehe fēfē ne liga omoi a tautolu ke liogi, ti ko e heigoa ne amanaki a tautolu ki a Iehova?
12 Kua kehekehe e tau pehiaaga mo e tau fakaatukehe ke he tau momoui he tau fekafekau he Atua he vahā nei. Ko e tatalu mo e tupetupe he manamanatuaga ko e tau punaaga lalahi he fakaatukehe ma e tau tagata tokologa. Ko e tau tuaga vale ne takatakai ia tautolu kua fakauka aki e moui. Ko e uka fakatupe ne fakavihi e puhala moui. Ko e mafanatia ha ia ke iloa kua fakateliga a Iehova ke he tau fekafekau haana ne tala age e tau mena nei ki a ia! Kua talahau he Salamo 102:17 hagaao ki a Iehova: “Kua hagao mai a ia ke he liogi he tagata nofogati, kua nakai vihiatia foki e ia ha lautolu a liogi.”
13. (a) Ko e heigoa e tau mena fakatagata kua latatonu ke liogi ki ai? (e) Talahau e fakataiaga ke he liogi pihia.
13 Mooli ai, ko e ha mena ne lauia e fekafekauaga ha tautolu ki a Iehova po ke fakafetuiaga ha tautolu mo ia kua latatonu ke talahau ki a Iehova. (1 Ioane 5:14) Ka fai fifiliaga a koe ke taute hagaao ke he fakamauaga po ke gahua po ke fakalaulahi e fekafekauaga haau, kia ataina ke tala age e tau mena nei ke he Atua, he ole ma e takitakiaga haana. Ma e fakatai, ko e fifine fuata i Filipaina, ne manako ke fakalataha ke he fekafekauaga tumau. Ka e, nakai fai gahua a ia ke lalago aki a ia. Talahau e ia: “Taha e Aho Faiumu, ne liogi fakamahao au ki a Iehova hagaao ke he gahua paionia. Nakai leva he aho ia, he taute e gahua fakamatala, kua foaki e au e tohi ke he tama fuata mui. Fakaofo ai, ne pehē e tama fifine: ‘Lata a koe ke fano ke he aoga haaku, mena mua he pogipogi Gofua.’ Ne hūhū au, ‘Ko e ha?’ Ne fakamaama e ia kua fai pu gahua tokanoa ne lata mafiti ke fai tagata ke gahua ai. Ne fano au, ti moua ni e gahua. Kua putuputui lahi e tau mena oti.” Tokologa e Tau Fakamoli he lalolagi katoa ne tutupu e tau mena pihia ki ai. Ti ua fakauaua ke tala age mai he loto e tau olelalo haau ke he Atua he liogi!
Ka e Kua ka Agahala a Tautolu?
14, 15. (a) Ko e ha e tagata ne nakai lata ke taofi mai he liogi pete ni ka agahala a ia? (e) Kehe mai he tau liogi fakatagata, ko e heigoa foki ka lagomatai e tagata ke malolō mai he agahala?
14 Lagomatai fēfē he liogi ka agahala e tagata? Ha kua fuafuakelea, ne taofi he agahala e falu ke liogi. Nakai ko e puhala pulotu a ia ke muitua. Ke fakatai: Iloa he tau ikivaka he vakalele ka galo a lautolu, maeke ia lautolu ke matutaki mo e tau tagata fakatonutonu he malē vakalele ke moua e lagomatai. Ka e kua ka tehatehaua e ikivaka ne galo ke matutaki ke he tau tagata fakatonutonu he fuafuakelea a ia ha kua galo? Kua takitaki e mena ia ke he hagahagakelea! Pihia foki, ko e tagata ne agahala ti fuafuakelea ke liogi ke he Atua kua lahi atu e hagahagakelea. Ko e fuafuakelea ke he agahala kua nakai lata ke taofi a ia mai he tutala ki a Iehova. Ka kua uiina he Atua a lautolu ne taute e tau hēhē kelea lahi ke liogi ki a ia. Ne tomatoma he perofeta ko Isaia he vahā haana ke ui atu ki a Iehova, “ha ko e mena to fakamagalo fakalahi mai e ia.” (Isaia 55:6, 7) Mooli, kua lata a ia ke ‘ole ki a Iehova’ he fakatokolalo fakamua e loto haana, ti liliu kehe mai he puhala agahala, mo e fakatokihala mooli.—Salamo 119:58; Tanielu 9:13.
15 Ka lauia e agahala, kua eke e liogi mo mena aoga ke he taha kakano foki. Ne talahau he tutaki ko Iakopo hagaao ke he taha tagata kua lata mo e lagomatai fakaagaaga: ‘Kia ui atu a ia ke he tau patu he fakapotopotoaga, kia liogi a lautolu mo ia, to fakatu foki e Iehova a ia.’ (Iakopo 5:14, 15) E, kua lata he tagata ia ke talahau e agahala haana ki a Iehova he liogi, ka e maeke foki a ia ke ole ke he tau motua ke liogi ke lata mo ia. To lagomatai he mena ia a ia ke malolō fakaagaaga.
Tau Tali ke he Tau Liogi
16, 17. (a) Tali fēfē e Iehova e tau liogi? (e) Ko e heigoa e tau mena tutupu ne fakatātā kua matutaki lahi e liogi mo e gahua fakamatala?
16 Tali fēfē e tau liogi? Kua mafiti mo e kitia maali ai e falu. (2 Tau Patuiki 20:1-6) Liga fai magaaho e falu, ti liga uka lahi ke iloa e tau tali. He fakakite he fakataiaga ha Iesu hagaao ke he takape ne fakatumau ke fina atu ke he ikifakafili, ti kua liga lata e ole tumau ke he Atua. (Luka 18:1-8) Pete ia, kua iloa tonu e tautolu ka liogi fakatatau a tautolu ke he finagalo he Atua, to nakai pehē a Iehova ki a tautolu: “Ua fakahoha mai a koe kia au.”—Luka 11:5-9.
17 Kua mailoga mooli tuai he tau tagata ha Iehova e tau liogi ne kua tali. Fa kitia e mena nei ke he fekafekauaga ha tautolu. Ma e fakatai, ua e matakainaga fifine i Filipaina ne foaki e tau tohi faka-Tohi Tapu he tau matakavi mamao he motu. He age e tuleke ke he taha fifine, ne puke e tau mata haana he tau hihina mata. Ne pehē a ia: “Ne liogi au ne pō ke he Atua ke fakafano mai taha tagata ke fakaako e Tohi Tapu mo au, ti manatu au ko e tali anei ke he liogi haaku.” Nakai leva he mole, ne kamata e fifine ke fano he tau feleveiaaga ke he Fale he Kautu. Ke he taha matakavi he Faahi Toga ki Uta ha Asia, kua hopoate e matakainaga taane Kerisiano he fakamatala ke he tau fale nonofo ne kikili e puipuiaga. Ka e, liogi a ia ki a Iehova, ti fakamalolō, mo e hū atu ai ke he fale. Ne nokonoko e ia e gutuhala he poko ti hu mai e fifine fuata. He fakamaama he matakainaga taane e kakano he aahi atu haana, ne kamata e fifine ke tagi. Ne tala age a ia kua leva e kumi haana ke he Tau Fakamoli a Iehova ti liogi ma e lagomatai ke moua a lautolu. Ne lagomatai fiafia he matakainaga taane a ia ke matutaki ke he fakapotopotoaga he Tau Fakamoli a Iehova he matakavi.
18. (a) Ka tali e tau liogi ha tautolu, to fēfē e tali atu ha tautolu? (e) Ko e heigoa ka mauokafua ki ai a tautolu kaeke ke liogi a tautolu he tau magaaho oti?
18 Ko e foakiaga homo ue atu mooli e liogi. Kua mautali a Iehova ke fanogonogo mo e ke tali. (Isaia 30:18, 19) Ka e, kua lata ia tautolu ke matakite ke he puhala tali ha Iehova ke he tau liogi ha tautolu. Kua liga nakai tali tumau ke he puhala ne manako a tautolu ki ai. Ka iloa e tautolu e takitakiaga haana, kua nakai lata ke nimo e tautolu ke fakaaue mo e fakaheke ki a ia. (1 Tesalonia 5:18) Lafi ki ai, kia manatu tumau e tomatomaaga he aposetolo ko Paulo: “Kia fakailoa atu ke he Atua e tau manako ha mutolu ke he tau mena oti kana ke he liogi, mo e ole, katoa mo e fakaaue.” E, fakaaoga e tau magaaho oti ke tutala ke he Atua. He puhala ia, to fakatumau a koe ke moua mooli e mena ne talahau e Paulo hagaao ki a lautolu ne kua tali e tau liogi: “Ko e [“mafola,” NW] foki mai he Atua kua mua ue atu ke he tau mena oti kua manamanatu ki ai, to leveki ai e tau loto ha mutolu, katoa mo e tau manatu ha mutolu.”—Filipi 4:6, 7.
Maeke Nakai Ia Koe ke Tali?
• Ko e heigoa e tau vahega liogi ha tautolu?
• Lata ke liogi fēfē a tautolu?
• Ko e heigoa e tau matakupu ka putoia e tautolu he tau liogi ha tautolu?
• Ko e heigoa ka taute he liogi ka agahala e tagata?
[Tau Hūhū he Fakaakoaga]
[Tau Fakatino he lau 29]
Lagomatai he liogi mai he loto a tautolu ke nakai kaumahala ke he tau kamatamata
[Tau Fakatino he lau 31]
Puhala he liogi, kua talahau e tautolu ke he Atua e fakaaue, tau kapaletu, mo e tau olelalo ha tautolu