Tapuakiaga Kua Mitaki ma Haau

“KO E mitaki kia au ke fakatata ke he Atua,” he fakapuloa he salamo ko Asafo. Ne onoono a ia ke fifitaki a lautolu ne fakateaga ke he Atua ke maeke ke tutuli e moui monuina. Ka e, ne manamanatu a Asafo ke he mitaki he fakatata ke he Atua mo e fakahiku e ia kua mitaki ki a ia. (Salamo 73:2, 3, 12, 28) Kua mitaki nakai e tapuakiaga mooli ki a koe he vahā nei? Maeke fēfē ke aoga ki a koe?

Ko e tapuaki ke he Atua mooli ka lagomatai a koe ke moua taha mena kua mua hake e mitaki mai he manamanatu hokoia ke he moui fakatagata. Ha ko e puhala ne tufuga he ‘Atua he fakaalofa’ a tautolu, ko lautolu ne tutuli hokoia e tau mena ne fiafia a lautolu ki ai to nakai fakaai ke moua e fiafia. (2 Korinito 13:11) Ne fakaako e Iesu e tau matapatu kupu mooli hagaao ke he aga pauaki he tagata he pehē a ia: “Kua mua e monuina hana ke foaki atu, ke he monuina hana ke talia mai.” (Gahua 20:35) Kakano haia ati olioli a tautolu he taute e tau mena ma e tau kapitiga mo e tau magafaoa ha tautolu. Ka e mua atu e fiafia he taute e tau mena ma e Atua. Ko Ia ni kua lata mooli ke moua e fakaalofa mai ia tautolu. Totou miliona e tau tagata mai he tau tutuaga kehekehe he moui kua iloa ko e tapuaki ke he Atua he taute e tau mena ne ole e ia kua mua atu e fiafia.—1 Ioane 5:3.

Fai Kakano e Moui

Mitaki foki e tapuakiaga mooli ki a koe ha kua foaki atu e kakano he moui. Kua mailoga nakai e koe kua fa matutaki e fiafia ke he logonaaga kua moua e koe taha mena aoga lahi? Laulahi he tau tagata ne fai foliaga a lautolu he moui, ke lata mo e magafaoa, tau kapitiga, pisinisi, po ke fakafiafiaaga. Ha ko e fiofio he moui, kua fa kaumahala e tau mena nei ke fakafiafia a lautolu. (Fakamatalaaga 9:11) Pete ia, kua lagomatai he tapuakiaga mooli a koe ke moua e amaamanakiaga ne mua atu, ko e mena ne maeke ke fakafiafia pete ka kelea e falu tuaga he moui.

Putoia ke he tapuakiaga mooli e iloa a Iehova mo e fekafekau tua fakamooli ki a ia. Ko lautolu ne taute pihia kua fakatata lahi ke he Atua. (Fakamatalaaga 12:13; Ioane 4:23; Iakopo 4:8) Liga uka ia koe ke fakatino kaeke ke iloa lahi e koe e Atua ti eke a ia mo kapitiga haau. Ka e he manamanatu ke he fakamauaga he fakafetuiaga haana mo e tau tagata mo e manamanatu ke he tau mena ne tufugatia e ia, kua maeke mooli ia koe ke kitia e tau mahani haana. (Roma 1:20) Lafi ki ai, he totou e Tohi Tapu, kua maeke ia koe ke maama e kakano ne ha ha a tautolu hinei, kakano ne fakaatā he Atua e matematekelea, puhala ka fakaotioti e ia e matematekelea mo e, liga mua e mitaki ki a koe ke he tau mena oti, kua maeke ia koe ke fai vala uho he gahua he Atua. (Isaia 43:10; 1 Korinito 3:9) Maeke he maamaaga pihia ke fakafoou e kakano haau he moui!

Eke mo Tagata kua Mitaki

Kua mitaki e tapuakiaga mooli ma haau kakano kua lagomatai a koe ke eke mo tagata kua tupu ki mua e mitaki. He taute e koe e tapuakiaga mooli, kua feaki e koe e aga ka takitaki ke he tau fakafetuiaga fiafia lahi mo e falu. Kua ako mai e koe he Atua mo e haana Tama e mahani fakamooli, vagahau totonu, mo e fai kakano e moui. (Efeso 4:20–5:5) Ka iloa mitaki e koe e Atua ti ofania e koe a ia, kua omoomoi a koe ke fifitaki a ia. Pehē e Tohi Tapu: “Kia fifitaki a mutolu ke he Atua tuga e tau fanau fakahelehele. Kia mahani a mutolu mo e fakaalofa.”—Efeso 5:1, 2.

Nakai kia ko e mena fiafia ke agaagai he tau tagata ne fifitaki e fakaalofa he Atua? Fiafia ai,  ko e tapuaki ke he Atua mooli kua nakai ko koe ni tokotaha ne taute e gahua ia. Kua tamai ai a koe ke fakalataha mo e falu ne ofania e tau mena hako mo e mitaki. Mooli, liga fakauaua a koe he manatu hagaao ke he tau lotu fakatokatoka. He kitia e tautolu he vala tala fakamua, ko e lekua ke he laulahi he tau lotu ne nakai ko e fakatokatoka ka kua hepe e puhala fakatokatoka mo e nakai hako e kakano ha lautolu. Loga e lotu ne fakatokatoka ma e tau kakano nakai faka-Kerisiano. Ko e tau tagata he Atua kua fakatokatoka ni e Iehova ma e fekau lilifu. Pehē e Tohi Tapu: “Ko e Atua nakai ko e Atua ha i ai e fakaagitau, ka ko e mafola.” (1 Korinito 14:33) Ke tuga e falu miliona tagata, liga logona hifo e koe he lafi mo e matakau Kerisiano ne maopoopo kua fakaohooho a koe ke he tuaga mitaki.

Amaamanakiaga ma e Anoiha

Kua fakakite mai he tau Tohiaga Tapu kua fakatokatoka he Atua e tau tagata tapuaki mooli ke maeke ia lautolu ke hao he fakaotiaga he lalolagi nei mo e moua e lalolagi foou ka “nofo ai e tututonu.” (2 Peteru 3:13; Fakakiteaga 7:9-17) Ko e tapuakiaga ne mitaki ma haau kua foaki atu e amaamanakiaga ke moua e fiafia. Kua fakavē he falu e tau amaamanakiaga ha lautolu anoiha ke he tau fakatufono mauokafua, ko e monuina he tau pisinisi, po ke onoono atu ke he mitaki e malolō tino mo e okioki fiafia mai he gahua. Ka e gahoa ni po ke ai fai he tau mena nei ka tamai e fakavēaga mauokafua ma e onoonoaga ke he vahā fiafia anoiha. Ke he taha faahi, ne tohi he aposetolo ko Paulo: “Kua amaamanaki tuai a tautolu ke he Atua moui.”—1 Timoteo 4:10.

Ka kumi fakamakutu a koe, to maeke ia koe ke moua e tau tagata tapuaki mooli. He lalolagi mavehevehe nei, ko e fakaalofa mo e kaufakalataha ne kitia maali ai e Tau Fakamoli a Iehova. Ne o mai a lautolu he tau motu oti mo e tau tutuaga kehekehe; ka kua kaufakalataha a lautolu he feofanaki mo e fakaalofa ki a Iehova. (Ioane 13:35) Kua uiina e lautolu a koe ke kumi ni e koe e olioli ne kua moua e lautolu. Ne tohi e Asafo: “Ko e mitaki kia au ke fakatata ke he Atua.”—Salamo 73:28.

[Fakatino he lau 7]

Maeke ia koe ke eke mo kapitiga he Atua