Amaamanaki ki a Iehova, mo e Kia Fakamalolō
Amaamanaki ki a Iehova, mo e Kia Fakamalolō
“Amaamanaki ki a Iehova; kia fakamalolō ti malolō e loto haau. E, amaamanaki ki a Iehova.”—SALAMO 27:14, NW.
1. Aoga fēfē e amaamanakiaga, ti fakaaoga fēfē e kupu ia he tau Tohiaga Tapu?
KO E amaamanakiaga mooli kua tuga e molī kikila. Kua lagomatai a tautolu ke kitia loa atu ke he tau kamatamata he magaaho nei mo e ke hagaaki fakamalolō mo e olioli ke he vahā anoiha. Ko Iehova ni ka foaki ki a tautolu e amaamanakiaga mooli, ne foaki e ia he puhala he Kupu omoomoi haana. (2 Timoteo 3:16) Ti ko e kupu “amaamanaki” kua lagaloga e kitia i loto he Tohi Tapu Niue ti hagaao ua ke he tatali mooli mo e makai ke he taha mena mitaki mo e kakano he amaamanakiaga ia. * Kua mua atu e amaamanakiaga pihia ke he manako noa ni, ne kua liga ke nakai fai fakavēaga po ke amanaki ke fakamooli.
2. Lauia fēfē e amaamanakiaga ke he moui ha Iesu?
2 Ka fehagai mo e tau kamatamata mo e tau mena uka, ne ono loa atu a Iesu ki mua mo e amaamanaki ki a Iehova. “Ko ia ne fakauka ke he satauro, mo e fakateaga a ia ke he ma, ha ko e fiafia kua toka ki mua hana, kua nofo foki a ia ke he fahi matau he nofoaiki he Atua.” (Heperu 12:2) Ha kua hagaaki fiafia a ia ke he amanaki ne fakatokoluga e pule katoatoa ha Iehova mo e fakatapu e higoa Haana, kua nakai hola kehe a Iesu mai he puhala omaoma haana ke he Atua, pete ne tau fua ka moua e ia.
3. Lauia fēfē e amaamanakiaga ke he tau momoui he tau fekafekau he Atua?
3 Ne hagaao e Patuiki ko Tavita ke he matutakiaga he amaamanaki mo e fakamalolō, he pehē: “Amaamanaki ki a Iehova; kia fakamalolō ti malolō e loto haau. E, amaamanaki ki a Iehova.” (Salamo 27:14, NW) Ka manako a tautolu ke malolō e tau loto ha tautolu, kua nakai lata ia tautolu ke fakapulefu e amaamanakiaga ha tautolu ka e fakatumau ke tokaloto mo e kitia mitaki ai. He taute pihia to lagomatai a tautolu ke fifitaki a Iesu he fakakite e fakamalolō mo e fakamakai he taute e tautolu e gahua ne poaki e ia ke taute he tau tutaki haana. (Mataio 24:14; 28:19, 20) Mooli, kua tohi fakalataha e amaamanaki mo e tua mo e fakaalofa, ko e mahani kua aoga mo e mauokafua ne fakakite e moui he tau fekafekau he Atua.—1 Korinito 13:13.
Kua ‘Amaamanaki Lahi Ue Atu’ Nakai a Koe?
4. Ko e heigoa ne onoono lahi atu ki ai e tau Kerisiano fakauku mo e tau hoa ha lautolu ko e ‘tau mamoe kehe’?
4 Ha ha he tau tagata he Atua e vahā anoiha ne homo ue atu i mua ha lautolu. Ne tatali fakamakai e tau Kerisiano fakauku ke gahua mo Keriso he lagi, ka e amaamanaki e ‘tau mamoe kehe’ ke “toka noa ai e tau mena ne eke mai he tupaaga ke he mena popo vave kia hoko atu ai ke he tokanoaaga ha ha he monuina he fanau [he lalolagi] he Atua.” (Ioane 10:16; Roma 8:19-21; Filipi 3:20) Kua putoia he “tokanoaaga ha ha he monuina” e fakamouiaga mai he agahala mo e tau fua kelea. Mooli, ko Iehova—ko e Foaki he “tau mena mitaki oti kua foaki noa mai, katoa mo e tau mena fakaalofa oti kua katoatoa ai e mitaki”—to foaki e tau mena ne mua atu e mitaki ki a lautolu ne mahani fakamooli.—Iakopo 1:17; Isaia 25:8.
5. Hokotia fēfē a tautolu ke he “amaamanaki kua lahi ue atu”?
5 Lahi fēfē e vala kua lata ke taute he amaamanaki faka-Kerisiano ke he tau momoui ha tautolu? Totou e tautolu ia Roma 15:13: “Ko e Atua foki hana e amaamanaki, kia fakapuke e ia a mutolu ke he olioli oti, katoa mo e mafola, ha ko e tua; kia ha ha ia mutolu e amaamanaki kua lahi ue atu ke he mana he [a]gaga [t]apu.” E, ko e amaamanakiaga kua nakai fakatatai ke he kanela he mena pouli, ka ke he kikila he tau hokohoko laā he magaaho pogipogi, he fakapuke e moui he tagata aki e mafola, fiafia, amaamanaki, mo e fakamalolō. Mailoga ko e “amaamanaki kua lahi ue atu” ka talitonu e tautolu e Kupu tohia he Atua mo e moua e agaaga tapu haana. He talahau he Roma 15:4: “Ko e tau mena oti ne tohi mai i tuai, ne tohi ia, ke fakaako ai a tautolu; kia moua ai e tautolu e amaamanaki ha ko e fakauka mo e fakamafanatia mai he tau Tohi.” Ti hūhū hifo ki a koe ni: ‘Kua fakatumau nakai au ke fakakikila e amaamanakiaga haaku he eke mo tagata fakaako mitaki he Tohi Tapu, he totou ai he tau aho oti? Kua liogi tumau nakai au ma e agaaga he Atua?’—Luka 11:13.
6. Ke fakakikila tumau e amaamanakiaga ha tautolu, ko e heigoa kua lata ke puipui mai a tautolu i ai?
6 Ne tupuola moui a Iesu, ko e Fakafifitakiaga ha tautolu ke he Kupu he Atua. He manamanatu fakahokulo ki a ia, kua kalo kehe a tautolu ‘neke fakalolelole ha tautolu a tau loto mo e nakai fahia.’ (Heperu 12:3) Kua latatonu e mena nei kaeke ke lolelole ha tautolu a amaamanakiaga mai he Atua ke he tau manamanatuaga mo e tau loto ha tautolu po kua hiki e onoonoaga ha tautolu—liga ke he tau koloa he tino po ke tau foliaga fakalalolagi—to nakai leva ti liga kautū e mategūgū fakaagaaga ki a tautolu, ti fakahiku ke galo e tau mahani mitaki mo e fakamalolō. He tuaga ia he manamanatuaga, to liga “tukia moumou [ha tautolu a] tua.” (1 Timoteo 1:19) He taha faahi, kua fakamalolō he amaamanaki mooli e tua ha tautolu.
Amaamanaki—Aoga ke he Tua
7. Ko e puhala fe kua aoga lahi e amaamanakiaga ke he tua?
7 “Ka ko e tua, ko e falanaki haia ke he tau mena kua amaamanaki ki ai, ko e fakamoli he tau mena nakai kitia atu,” he talahau he Tohi Tapu. (Heperu 11:1) Ti ko e mena ia, kua nakai fakateaga e amaamanakiaga ke he tua; ka ko e vala aoga lahi he tua. Manamanatu ki a Aperahamo. Mai he kitiaaga he tagata, ko ia mo e hoana haana ko Sarai ne molea tuai e tau tau fanafanau he magaaho ne mavehe age e Iehova ki a laua e hakega. (Kenese 17:15-17) Tali atu fēfē a Aperahamo? “Ko ia ne tua mo e amaamanaki ka e nakai fai mena ke amaamanaki ki ai, kia eke a ia mo matua he tau motu loga.” (Roma 4:18) E, ko e amaamanakiaga ne age he Atua ki a Aperahamo kua foaki ke he tua haana e fakavēaga mauokafua to fai tama a ia. Ti ko e fua, kua fakakikila mo e fakamalolō he tua haana e amaamanaki haana. Ti ko e fakamalolō mooli foki ha Aperahamo mo Sarai ke toka e kaina mo e tau magafaoa ha laua mo e nonofo ai ke he tau fale he motu kehe!
8. Fakamalolō fēfē he fakauka fakamooli e amaamanaki?
8 Ne fakatumau a Aperahamo ke fakamalolō e amaamanakiaga haana he omaoma katoatoa ki a Iehova, pete ne uka ke taute pihia. (Kenese 22:2, 12) Pihia foki, he omaoma mo e fakauka ha tautolu ke he fekafekauaga ha Iehova, maeke ia tautolu ke mauokafua ke he taui ha tautolu. Ko e “fakauka,” he tohi e Paulo kua tupu mai e “fakamooli,” ati tupu mai foki e amaamanakiaga, “ko e amaamanaki foki kua nakai fakamā ai.” (Roma 5:4, 5) Ko e mena haia ne tohi e Paulo: “Kua manako lahi a mautolu kia takitokotaha a mutolu mo e fakakite mai e fakamakutu ia, kia mauokafua ai e amaamanaki ato hohoko ke he fakahikuaga.” (Heperu 6:11) Ko e onoonoaga tonu pihia, ne fakavē ke he fakafetuiaga tata mo Iehova, kua lagomatai a tautolu ke fehagai fakamalolō mo e olioli ke he ha mena uka.
“Kia Fiafia ke he Amaamanaki”
9. Ko e heigoa ka taute tumau ke lagomatai a tautolu ke “fiafia ke he amaamanaki”?
9 Kua mua ue atu e amaamanakiaga ne mai he Atua ha tautolu ke he ha mena ne foaki he lalolagi. Talahau he Salamo 37:34: “Kia [“amaamanaki,” NW] a koe kia Iehova, mo e tumau ke he hana puhala; ti fakamatalahi e ia a koe ke eke māu e motu; to kitia e koe e tau tagata mahani kelea kua mahakava.” E, ha ha ia tautolu e tau kakano kehekehe ke “fiafia ke he amaamanaki.” (Roma 12:12) Ka ke taute pihia, kua lata ia tautolu ke fakamata tumau e amaamanakiaga ke he tau manamanatuaga ha tautolu. Manamanatu tumau nakai a koe ke he amaamanaki ne atu he Atua? Kitia nakai e koe a koe i Parataiso, ne fiafia lahi he malolō mitaki e tino, atāina mai he tau fakaatukehe, agaagai he tau tagata ne ofania e koe, mo e fakalataha ke he gahua makona mooli? Manamanatu hokulo nakai a koe ke he tau fakatino he Parataiso ne tūtū he tau tohi ha tautolu? Ko e manamanatu tumau pihia kua liga tuga ke fakameā e matahio ke kitia mitaki e fakatino. Ka fakaheu e tautolu ke fakameā e matahio, to nakai leva ti fakagalo he kiva mo e efu a tautolu ke nakai kitia e mitaki mo e fulufuluola he fakatino ia. Ti lautaki he falu mena kehe e onoonoaga ha tautolu. Kia nakai fakaatā e tautolu e mena ia ke tupu!
10. Ko e ha e onoono ha tautolu ke he taui kua fakaata fakamitaki e fakafetuiaga ha tautolu mo Iehova?
10 Mooli, ko e matapatu kakano ha tautolu ma e fekafekau ki a Iehova ko e ha tautolu a fakaalofa ki a ia. (Mareko 12:30) Ka e lata ia tautolu ke onoono fakamakai atu ke he taui. Ti amanaki a Iehova ke taute pihia e tautolu! Pehē e Heperu 11:6: “Ka nakai tua, ti nakai maeke ke fakafiafia kia ia; ha ko e mena lata ia ia kua fina atu ke he Atua ke talia kua moui a ia, ko ia foki kua taui mai a lautolu kua kumi fakamakutu kia ia.” Ko e ha ne manako a Iehova ki a tautolu ke onoono ki a ia ko e Taui? Kakano ka taute e tautolu, kua fakakite e tautolu kua iloa mitaki e tautolu e Matua he lagi. Kua fakamokoi a ia, ti ofania e ia e tau tama haana. Manamanatu la ke he nakai fiafia mo e mukamuka ke lolelole kaeke ke nakai fai ‘vahā anoiha mo e amaamanaki’ a tautolu.—Ieremia 29:11.
11. Maeke fēfē he amaamanakiaga ne age he Atua ke lagomatai a Mose ke taute e tau fifiliaga pulotu haana?
11 Ko e fakafifitakiaga mua ue atu he tagata, ko Mose, kua hagaaki tumau ke he amaamanaki ne age he Atua. Ha ko e “tama he tama fifine a Farao,” kua moua e Mose e pule, talahaua, mo e monuina ha Aikupito. To tutuli kia e ia e tau mena nei, po ke to fekafekau a ia ki a Iehova? Kua fifili e Mose e mena ke uaaki. Ko e ha? Ha kua ‘amaamanaki lahi a ia ke he taui.’ (Heperu 11:24-26) E, ne nakai fakateaga mooli a Mose ke he amaamanaki ne fakatoka e Iehova i mua haana.
12. Ko e ha e amaamanaki faka-Kerisiano kua tuga e potiki tau?
12 Ne fakatatai he aposetolo ko Paulo e amaamanaki ke he potiki tau. Kua puipui he potiki tau fakatai ha tautolu e tau manamanatuaga ha tautolu, he fakamalolō a tautolu ke taute e tau fifiliaga pulotu, fakatoka e tau mena fakamua kua hako, mo e fakatumau e mahani fakamooli. (1 Tesalonia 5:8) Tui tumau nakai e potiki tau fakatai haau he tau magaaho oti? Ka pihia, ti tuga a Mose mo Paulo, to fakavē e koe e amaamanakiaga haau, ‘nakai tua ke he koloa nakai tumau, ka ko e Atua moui kua foaki fakalahi mai e tau mena oti ke fiafia ai.’ Mooli, kia fakamalolō ke nakai talia e tau puhala talahaua he tiaki e tau tutuliaga lotokai, ka e kua aoga lahi e laliaga! Ka ko e ha ne talia ai e tau mena ne nakai ha ha i ai e ‘moui mooli,’ ne tatali ki a lautolu ne amaamanaki mo e fakaalofa ki a Iehova?—1 Timoteo 6:17, 19.
“Nakai Tuai Toka Ni e Au a Koe”
13. Ko e heigoa e maveheaga kua foaki e Iehova ke he tau fekafekau fakamooli haana?
13 Ko e tau tagata ne fakavē e amaamanaki ha lautolu ke he lalolagi nei kua lata ke manamanatu fakahokulo hagaao ke he tau mena ne mamahi ai e lalolagi ha kua holo ki mua e “tau mena matematekelea.” (Mataio 24:8) Ka ko lautolu ne amaamanaki ki a Iehova ne nakai fai matakutaku pihia. To fakatumau a lautolu ke ‘nonofo ai mo e monuina; to nonofo fakatekiteki a lautolu, ti nakai matakutaku a lautolu he tau mena kelea.’ (Tau Fakatai 1:33) Ha kua nakai ha ha he lalolagi nei e amaamanakiaga ha lautolu, kua omaoma fiafia e lautolu e fakatonuaga ha Paulo: “Kia noa ha mutolu a mahani mo e velevelekoloa; kia fakamamate a mutolu ke he tau mena ha ia mutolu; ha ko e mena talahau mai a ia, Nakai tuai toka ni e au a koe, nakai tuai tiaki ni e au a koe.”—Heperu 13:5.
14. Ko e ha e tau Kerisiano kua nakai lata ke tupetupe teao hagaao ke he tau manako fakatino ha lautolu?
14 Ko e tau talahauaga aamotia nei, “nakai tuai toka,” mo e “nakai tuai tiaki” kua fakakite katoatoa to leveki he Atua a tautolu. Kua peehi foki e Iesu ki a tautolu e manamanatu fakaalofa he Atua, he talahau: “Kia kumikumi fakamua a mutolu ke he kautu he Atua mo e hana tututonu, ati lafi atu ai e tau mena oti ia [ko e tau koloa fakatino kua lata mo e moui] kia mutolu. Hanai, aua neke fakaatukehe a mutolu ke he aho a pogipogi; ha ko e mena fakaatukehe e aho a pogipogi ke he hana tau mena.” (Mataio 6:33, 34) Ne iloa e Iehova ko e paleko ma tautolu ke fakamakai ma e Kautu haana mo e he magaaho taha ke fua katoatoa e matagahua ke leveki e tau manako fakatino ha tautolu. Ti o mai a tautolu ke mauokafua katoatoa ke he lotomatala mo e loto haana ke leveki e tau manako ha tautolu.—Mataio 6:25-32; 11:28-30.
15. Fakatumau fēfē e tau Kerisiano ke ‘fakamukamuka e mata’?
15 Kua fakakite e tautolu e falanaki ki a Iehova ka fakatumau a tautolu ke ‘fakamukamuka e mata.’ (Mataio 6:22, 23) Ko e mata ne fakamukamuka kua fakamooli, meā e manamanatuaga, mo e ataina mai he velevelekoloa mo e foliaga lotokai. Ko e mata ne fakamukamuka kua nakai kakano ke mativa tokaimaka po ke fakaheu ke leveki e tau matagahua faka-Kerisiano ha tautolu. Ka e, kakano ke fakakite e “akonaki atu” he fakatumau a tautolu ke tuku fakamua e fekafekauaga ha Iehova.—2 Timoteo 1:7.
16. Ko e ha kua lata e tua mo e fakamalolō ke fakatumau e mata ne mukamuka?
16 He fakatumau ke fakamukamuka e mata kua lata ke tua mo e fakamalolō. Ma e fakatai, ka peehi he takitaki gahua ke gahua tumau a koe he magaaho ne setulu ma e tau feleveiaaga Kerisiano, to pipiki fakamalolō kia a koe ke he tau mena fakaagaaga fakamua haau? Ka fakauaua e tagata to fakamooli e Iehova e maveheaga Haana ke leveki e tau fekafekau Haana, to fakatumau ni a Satani ke fakatupu ki mua e peehiaga ti liga oti katoatoa e fano he tagata ia he tau feleveiaaga. E, ko e nakai lahi e tua ha tautolu ka fakaatā a Satani ke pule ki a tautolu ti ko ia mogoia, ka e nakai ko Iehova, ne fakatoka e tau mena ne mua ha tautolu. Ko e hagahagakelea ha a ia he mena ia!—2 Korinito 13:5.
‘Amaamanaki Kia Iehova’
17. Kua fakamonuina fēfē a lautolu ne falanaki ki a Iehova he magaaho nei foki?
17 Ne fakakite tumau he tau Tohiaga Tapu ko lautolu ne amaamanaki mo e falanaki ki a Iehova kua nakai kaumahala. (Tau Fakatai 3:5, 6; Ieremia 17:7) Mooli, he falu magaaho ne liga makona a lautolu he nakai muhu koloa, ka e manamanatu a lautolu ko e foakiaga tote anei ke fakatatai mo e tau monuina ne tatanaki ma lautolu. Ti fakatātā e lautolu mogoia e ‘amaamanaki kia Iehova’ ti kua mauokafua a lautolu to fakahiku ke foaki e ia ki a lautolu ne mahani fakamooli e tau manako tututonu oti kana he loto. (Salamo 37:4, 34) Ti, kua fiafia mooli foki a lautolu mogonei. “Ko e amaamanaki he tagata tututonu ko e mena ke olioli ai haia; ka ko e tatali he tau tagata mahani kelea to noa ni a ia.”—Tau Fakatai 10:28.
18, 19. (a) Ko e heigoa e talahauaga mafanatia ne foaki mai e Iehova ki a tautolu? (e) Tuku tumau fēfē e tautolu a Iehova he “tapa matau” ha tautolu?
18 Ka tōtō he tama taane tote e lima he matua taane he o hui a laua, kua logona e ia e haohao mitaki. Ti pihia foki a tautolu he o a tautolu mo e ha tautolu a Matua he lagi. “Ua matakutaku,” he talahau e Iehova ki a Isaraela, “ha kua fakalataha au mo koe . . . kua lagomatai au kia koe; . . . Ha ko au ko Iehova ko e Atua hau, ko ia kua taofi hau a lima matau; ko ia kua pehe atu kia koe, Ua matakutaku a koe ko au ni kua lagomatai kia koe.”—Isaia 41:10, 13.
19 Ko e fakatino mafanatia ha ia ne fakakite mai—ne tōtō e Iehova e lima he tagata! “To tuku atu e au a Iehova ki mua haku nakai noa,” he tohia e Tavita. “Ha ko e mena ha he tapa matau haku a ia, nakai fagahuatia ai au.” (Salamo 16:8) Tuku tumau fēfē e tautolu a Iehova he “tapa matau” ha tautolu? Taute pihia e tautolu ke he ua e puhala. Taha, fakaatā e tautolu e Kupu haana ke takitaki a tautolu ke he tau puhala oti he tau momoui ha tautolu; mo e ua, onoono atu a tautolu ke he palepale mua ue atu ne fakatoka e Iehova ki mua ha tautolu. Ne lologo he salamo ko Asafo: “Kua fakalataha agaia a taua mo koe; ne toto e koe haku lima matau. To takitaki e koe au he hāu a pule; ka mole ia, ti talia ni e koe au ke he monuina.” (Salamo 73:23, 24) Mo e talahauaga mafanatia ia, maeke ia tautolu ke fehagai mauokafua mo e vahā anoiha.
“Kua Tata Tuai ha Mutolu a Fakamouiaga”
20, 21. Ko e heigoa e vahā anoiha ne tatali ki a lautolu ne amaamanaki ki a Iehova?
20 He mole atu e tau aho takitaha, ti lata ke fakamafiti ke tuku tumau e tautolu a Iehova he tapa matau ha tautolu. Nakai leva, he kamata aki e moumouaga he lotu fakavai, to moua he lalolagi a Satani e matematekelea lahi tuga ne nakai la tupu fakamua. (Mataio 24:21) To hufia e tau tagata nakai tua he matakutaku. Ka e, he magaaho matematekelea ia, to fiafia e tau fekafekau fakamalolō a Iehova he ha lautolu a amaamanaki! “Ka kamata he eke e tau mena ia” he talahau e Iesu, “kia kitekite hake mo e haga hake a mutolu; ha kua tata tuai ha mutolu a fakamouiaga.”—Luka 21:28.
21 Ti ko e mena ia kua lata a tautolu ke fiafia ke he amaamanaki mai he Atua mo e nakai fakavaia po ke kamatamata he tau lagatau kelea ha Satani. He magaaho taha, kia gahua fakamalolō a tautolu ke feaki e tua, fakaalofa, mo e matakutaku Atua. He taute pihia, to ha ha ia tautolu e fakamalolō ke omaoma ki a Iehova i lalo he tau tutuaga oti mo e ke totoko e Tiapolo. (Iakopo 4:7, 8) E, “kia fakamalolo a mutolu ko mutolu oti kana kua amaamanaki kia Iehova; to fakamalolo e ia ha mutolu a tau loto.”—Salamo 31:24.
[Matahui Tala]
^ para. 1 Pete ni kua fa hagaao e kupu “amaamanaki” he Tau Tohiaga Tapu Heleni Kerisiano ke he taui he lagi he tau Kerisiano fakauku, ka e i loto he vala tala nei, ko e kupu amaamanaki kua fakaaoga fakalaulahi ai.
Maeke Nakai Ia Koe ke Tali?
• Ko e puhala fe he amaamanaki ha Iesu ne lafi ke he fakamalolō haana?
• Matutaki fakalataha fēfē e tua mo e amaamanaki?
• Maeke fēfē he amaamanaki fakalataha mo e tua ke foaki ke he Kerisiano e fakamalolō ke fakatoka e tau mena kua mua he aoga he moui?
• Ko e ha kua maeke ia lautolu kua “amaamanaki kia Iehova” ke onoono atu ke he vahā anoiha mo e mauokafua?
[Tau Hūhū he Fakaakoaga]
[Fakatino he lau 24]
He fuata po ke fuakau, kitia nakai e koe a koe i Parataiso?