Fakaako e Tau Fanau ha Mutolu ke Tali

KO PERLA mai i Mesiko ne manatu e magaaho ne tama fifine tote a ia, ne lagomatai he matua fifine haana a ia ke taute tuai e tau tali kūkū ma e Fakaakoaga Watchtower. Mogonei kua taha e tama taane lima tau ha Perla. Lagomatai fēfē e ia e tama haana? “Fakamua, kua lata ia au ke tauteute. Ka taute pihia e au, ne kumi e au e paratafa ne maeke e tama haaku ke maama, paratafa ne maeke ia ia ke fakamaama ke he tau kupu ni haana. Ti hagaaki a maua ke he mena ne fakahigoa e ia ‘ko e paratafa haaku.’ Ne hūhū au ki a ia ke fakamaama mai he fakaaoga e tau fakataiaga he tau aho takitaha. Ti lagaloga e talahau e maua e tali. Ne fakaaoga e maua taha mena ne tuga e maikorofoni ke iloa e ia e puhala ke totō aki ka tali. Ne fiafia lahi au ha kua nakai tonoa ha feleveiaaga mo e tali po ke hiki e lima haana. Lahi he tau magaaho, ne fano a ia ke he takitaki aoga ato kamata e feleveiaaga mo e tala age e paratafa haana.”

Ko Jens, ko e motua ne fekafekau he matakau vagahau Hiniti, ne ua e tama taane, taha ne ua mo e taha ne fa e tau. Ka tauteute a ia mo e hoana ma e feleveiaaga mo e tau fanau ha laua, ne fakaaoga e Jens e puhala ne ako e ia mai he tau matua haana. Pehē a ia: “Ne fifili e maua e tau vala he tohi ne maeke he tau fanau ke maama. Ti lali mogoia a maua ke tala age e kakano katoa po ke tau matapatu manatu he vala tala, oti ti hūhū ki a laua e tau hūhū ne manatu a maua kua lata ia laua ke tali he feleveiaaga. Kua fa ofo a maua he falu magaaho ke he tau tali ne talahau e laua ke he puhala mukamuka lahi. Ko e puhala tali ha laua ne fakakite mooli e maamaaga ha laua. Ko e fua, kua eke e tau tali ha laua mo fakaheke mooli ki a Iehova mo e ko e fakakiteaga fakatagata he tua ha laua.”