Kia Fakatumau a Koe ke he Fakaalofa he Atua!
Kia Fakatumau a Koe ke he Fakaalofa he Atua!
“Tau fakahelehele na e, . . . kia fakatumau e mutolu a mutolu ke he fakaalofa he Atua, . . . kia hoko atu ke he moui tukulagi.”—IUTA 20, 21.
1, 2. Maeke fēfē ia koe ke fakatumau ke he fakaalofa he Atua?
KO IEHOVA ne lahi e fakaalofa ke he lalolagi ti foaki mai e Tama fuataha haana ke maeke ke fakagahuahua e lautolu e tua ki a ia ke moua e moui tukulagi. (Ioane 3:16) Ko e homo ue atu ha ia ke iloa e fakaalofa pihia! Kaeke ko koe ko e fekafekau ha Iehova, to manako mooli a koe ke olioli tukulagi e fakaalofa ia.
2 Ne fakakite he tutaki ko Iuta e puhala kua maeke ia koe ke fakatumau ke he fakaalofa he Atua. “Kia ati hake e mutolu a mutolu ke he ha mutolu a tua kua tapu ue atu, ko e [a]gaga [t]apu ke liogi ai a mutolu,” he tohia e Iuta, “kia fakatumau e mutolu a mutolu ke he fakaalofa he Atua, ti fakatalitali ke he fakaalofa he Iki ha tautolu ko Iesu Keriso, kia hoko atu ke he moui tukulagi.” (Iuta 20, 21) He kumikumi ke he Kupu he Atua mo e fakamatala e tala mitaki ka lagomatai ke atihake a koe ke he “tua kua tapu ue atu”—ko e tau fakaakoaga faka-Kerisiano. Ke fakatumau ke he fakaalofa he Atua, kua lata ia koe ke liogi fakalataha mo e ‘agaaga tapu,’ po ke i lalo he fakaohoohoaga ia. Ke moua ai e monuina he moui tukulagi, kua lata foki ia koe ke fakagahuahua e tua ke he poa lukutoto ha Iesu Keriso.—1 Ioane 4:10.
3. Ko e ha ne nakai tuai eke e falu mo Tau Fakamoli a Iehova?
3 Ne nakai fakatumau e falu ne tua he vahā fakamua ke he fakaalofa he Atua. Ha kua fifili a lautolu ke tutuli e puhala agahala, ati nakai tuai eke a lautolu mo Tau Fakamoli a Iehova. Maeke fēfē mogoia ia koe ke kalo mai he tau puhala pihia? He manamanatu fakahokulo ke he tau manatu kua mumui mai ka lagomatai a koe ke kalo mai he agahala mo e fakatumau ke he fakaalofa he Atua.
Fakatātā e Fakaalofa Haau ma e Atua
4. Aoga fēfē e omaoma ke he Atua?
4 Fakakite e fakaalofa haau ma e Atua he omaoma ki a ia. (Mataio 22:37) “Ko e fakaalofa ke he Atua hanai,” he tohia he aposetolo ko Ioane, “kia omaoma a tautolu ke he tau poaki hana; nakai mamafa foki hana tau poaki.” (1 Ioane 5:3) Kua maeke he puhala omaoma ke he Atua ke fakamalolō a koe ke totoko e kamatamata mo e ke fakafiafia a koe. Ne pehē e salamo: “Uhoaki e tagata kua nakai fano ke he pulega he tau tagata mahani kelea, . . . ka ko e fakatufono a Iehova kua fiafia ai a ia.”—Salamo 1:1, 2.
5. Ko e heigoa e tau puhala ka omoi he fakaalofa ma Iehova a koe ke taute?
5 Ko e fakaalofa haau ma Iehova ka omoi a koe ke kalo mai neke taute e agahala kelea muitui ka ekefakakelea e higoa haana. “Aua neke foaki mai e koe kia au e nofogati po ke muhu mena,” he liogi e Akuru. “Kia fagai e koe au ke he tau mena kai kua lata mo au. Neke makona ni au mo e fakatikai e au a koe, mo e pehē age au, Ko hai kia a Iehova neke nofogati foki au, mo e kaiha e au, mo e totoku teao ai e au e higoa he haku Atua.” (Tau Fakatai 30:1, 8, 9) Kia fakamalolō ke nakai ‘totoku teao e higoa he Atua’ he ekefakakelea a ia. Ti, kia lali tumau ke taute e tau mena kua hakohako ne fakalilifu a ia.—Salamo 86:12.
6. Ko e heigoa ka tupu ka agahala pauaki a koe?
6 Liogi tumau ke he Matua fakaalofa haau he lagi ma e lagomatai ke totoko e kamatamata neke taute e agahala. (Mataio 6:13; Roma 12:12) Kia fakatumau ke muitua ke he fakatonuaga he Atua neke fakalavelave e tau liogi haau. (1 Peteru 3:7) Kaeke kua agahala pauaki a koe, to malaia lahi e mena ka tupu, he tuga kua ufiufi e Iehova e puhala he tau tagata totoko aki e aolagi ti nakai maeke ke hao atu ai e tau liogi ha lautolu ki a ia. (Tagi Aue 3:42-44) Kia fakakite e aga fakatokolalo, mo e liogi ke nakai taute e koe ha mena ka fakalavelave aki e liogi haau ke he Atua.—2 Korinito 13:7.
Fakakite e Fakaalofa ma e Tama he Atua
7, 8. Lagomatai fēfē e tagata ne omaoma ke he fakatonuaga ha Iesu ke fakaheu e puhala agahala?
7 Fakatātā e fakaalofa ki a Iesu Keriso he omaoma e tau poaki haana, ha ko e mena to lagomatai he mena ia a koe ke fakaheu e puhala agahala. “Kaeke ke omaoma e mutolu haku a tau poaki,” he talahau e Iesu, “ti tumau a mutolu ke he haku a fakaalofa; tuga au ne oma e tau poaki he haku a Matua, mo e tumau au ke he hana fakaalofa.” (Ioane 15:10) Maeke fēfē he fakagahuahua e tau kupu ha Iesu ke takitaki a koe ke fakatumau ke he fakaalofa he Atua?
8 He omaoma ke he tau kupu ha Iesu ka lagomatai a koe ke fakatumau e mahani fakamooli. Ne pehē e Fakatufono he Atua ki a Isaraela: “Aua neke faivao a koe.” (Esoto 20:14) Ka e fakakite e Iesu e matapatu fakaakoaga hagaao ke he poaki ia he talahau: “Ka kikite atu taha ke he fifine kia manako ki ai, kua faivao tuai a ia ke he hana loto.” (Mataio 5:27, 28) Ne pehē e aposetolo ko Peteru kua ha ha ai falu he fakapotopotoaga he senetenari fakamua ne ‘puke e tau mata ke he faivao’ mo e ‘tauhele e tau tagata hikihikifano.’ (2 Peteru 2:14) Ka e he nakai tatai mo lautolu ia, kua maeke ia koe ke kalo mai he tau agahala he mahani fakataane mo e fifine kaeke ke omaoma a koe ke he Atua mo e Keriso ti fakamalolō ke puipui e fakafetuiaga haau mo laua.
Toka e Agaaga a Iehova ke Takitaki a Koe
9. Hagaao ke he agaaga tapu, ko e heigoa ka tupu ane mai ke fakatumau e tagata ke agahala?
9 Liogi ma e agaaga tapu he Atua, mo e fakaatā ai ke takitaki a koe. (Luka 11:13; Kalatia 5:19-25) Kaeke ke fakatumau a koe ke agahala, to liga utakehe he Atua e agaaga haana mai ia koe. He mole e agahala a Tavita mo Patesepa, ne olelalo a ia ke he Atua: “Aua neke tiaki e koe au i mua hāu; aua foki neke uta kehe hāu a [a]gaga [t]apu ia au.” (Salamo 51:11) Ha ko e tagata agahala ti nakai tokihala, ne galo mooli he Patuiki ko Saulo e agaaga he Atua. Ne agahala a Saulo he eke e poa huhunu mo e nakai keli oti e tau mamoe mo e tau koti, tau povi, mo e patuiki he tau tagata Amaleka. Ati utakehe e Iehova he magaaho fakamui e agaaga tapu haana mai ia Saulo.—1 Samuela 13:1-14; 15:1-35; 16:14-23.
10. Ko e ha kua lata ia koe ke fakaheu e manatu ke taute e agahala?
10 Kia fakaheu e manatu ke taute e agahala. “Kaeke kua hala a tautolu mo e loto ki ai, ka kua talia tuai e tautolu e maama he kupu moli,” he tohia he aposetolo ko Paulo, “ti nakai tuai toe ha poa mo e tau hala.” (Heperu 10:26-31) Ko e matematekelea ha ia kaeke ke agahala pauaki a koe!
Fakatātā e Fakaalofa Mooli ma e Falu
11, 12. Ko e tau puhala fe ka taofi he fakaalofa mo e fakalilifu e tagata neke taute e kelea he mahani fakataane mo e fifine?
11 Ko e fakaalofa ma e tau matakainaga ka taofi a koe neke taute e mahani kelea he fakataane mo e fifine. (Mataio 22:39) Ko e fakaalofa pihia ka leveki e loto haau neke fakaohooho a koe ke fōfō e fakaalofa he hoa mau he taha tagata. He taute pihia ka takitaki atu ke he agahala he mahani faivao. (Tau Fakatai 4:23; Ieremia 4:14; 17:9, 10) Kia fifitaki a Iopu ne mahani hakohako he nakai fakaatā e ia a ia ke onoono ke he ha fifine ne nakai ko e hoana haana.—Iopu 31:1.
12 Ko e fakalilifu ke he tapu he fakamauaga ka lagomatai a koe ke kalo mai he agahala kelea muitui. Ko e finagalo he Atua ma e fakamauaga lilifu mo e tau matutakiaga he mahani fakataane mo e fifine ke maeke ke fanafanau. (Kenese 1:26-28) Manatu ko e vala he mouiaga he tagata ko e puhala ke fanafanau, ti lata ai ke fakatapu. Ko e tau tagata feuaki mo e faivao kua nakai omaoma ke he Atua, he fakateaga e mahani fakataane mo e fifine, nakai fakalilifu e tapu he fakamauaga, ti agahala ai ke he tau tino ni ha lautolu. (1 Korinito 6:18) Ka ko e fakaalofa ma e Atua mo e katofia ne lafi ke he omaoma mahani Atua ka laveaki mai e tagata neke taute e mahani ka takitaki atu ke tuku ki tua he fakapotopotoaga Kerisiano.
13. Ko e puhala fe ne ‘moumou koloa’ e tagata feuaki?
13 Kua lata ke tautaofi e tau manatu agahala neke fakamamahi e tautolu ha tautolu a tau fakahele. “Ko ia kua kapitiga mo e tau fifine fakataka kua moumou ai e ia hana koloa,” he talahau he Tau Fakatai 29:3. Ko e tagata faivao nakai fakatokihala kua moumou e fakafetuiaga haana mo e Atua mo e pipiaga he magafaoa. Kua moua ai he hoana haana e fakavēaga ke tau vevehe. (Mataio 19:9) Pete ko e taane po ke hoana ne taute e hepe, kua maeke he mavehevehe he fakamauaga ke fakamamahi lahi e hoa ne nakai agahala, ko e fanau, mo e falu foki. To talitonu nakai a koe ko e iloa e moumou he mahani feuaki ka omoi a tautolu ke totoko neke taute e kamatamata?
14. Ko e heigoa e fakaakoaga hagaao ke he taute mena hepehepe ka ako mai he Tau Fakatai 6:30-35?
14 Ha kua nakai fai puhala foki ke fakahui aki e mahani feuaki ati lata ai ke fakaohooho e tagata ke kalo mai he lotokai kelea muitui nei. Ne fakakite he Tau Fakatai 6:30-35 liga fakaalofa e tau tagata ke he tagata kaihā ne fōfō mena ha kua hoge, ka e fakavihia e lautolu e tagata feuaki ha kua kelea e fatuakiloto haana. “Kua fakaoti ai e ia hana moui.” I lalo he Fakatufono faka-Mose, to kelipopo ni a ia. (Levitika 20:10) Kua fakamamahi he tagata mahani feuaki e falu ke fakamakona aki ni e manako lahi haana, ti nakai fakatumau a ia ne feuaki mo e nakai tokihala ke he fakaalofa he Atua ka e tuku ki tua he fakapotopotoaga Kerisiano meā.
Fakatumau e Loto Manamanatu Meā
15. Ko e heigoa e tuaga he loto manamanatu ne tuga kua fakavela aki e “lapatoa kaka”?
15 Ke fakatumau ke he fakaalofa he Atua, kua nakai lata ke fakaatā e loto manamanatu ha tautolu ke hufia he agahala. Maali ai, kua nakai lata ia tautolu ke talia e tau mahani fakalialia he lalolagi, ti fakaeneene fakalahi ke he tau tuaga pihia tuga e fifiliaga ha tautolu ke he tau kapitiga, tau tohi totou, mo e tau fakafiafiaaga. Ne hataki e Paulo: “To o kehe e falu mai he tua ke he tau aho fakamui, to fanogonogo a lautolu ke he tau agaga ke fakahehe ai, mo e tau kupu he tau temoni; ha ko e fakavai he tau tagata vagahau pikopiko, ko lautolu kua fakavela e tau loto manamanatu hifo ha lautolu ni ke he lapatoa kaka.” (1 Timoteo 4:1, 2) Ko e loto manamanatu ne fakavela aki e “lapatoa kaka” kua fakatatai ke he vala kakano kua punioka he pitepite ti nakai fai logonaaga. To nakai tuai maeke e loto manamanatu pihia ke hataki a tautolu ke fakamamao mai he tau tagata tiaki taofiaga mo e he tau tutuaga ka fakatupu a tautolu ke o kehe mai he tua.
16. Ko e ha kua aoga lahi ke moua e loto manamanatu meā?
16 Kua falanaki e fakamouiaga ha tautolu ke he ha tautolu a loto manamanatu meā. (1 Peteru 3:21) Ko e tua ha tautolu ke he toto a Iesu ati fakameā ai e loto manamanatu ha tautolu mai he tau gahua mamate, “kia fekafekau ai a [ta]utolu ke he Atua moui.” (Heperu 9:13, 14) Kaeke ke agahala pauaki a tautolu, kua pilo e tau loto manamanatu ha tautolu ti nakai tuai eke mo tau tagata meā kua lata ma e fekafekauaga he Atua. (Tito 1:15) Ka e, mo e lagomatai ha Iehova kua maeke ia tautolu ke moua e loto manamanatu meā.
Falu Puhala ke Kalo Mai he Mahani Hepehepe
17. Ko e heigoa e aoga he ‘muitua katoatoa kia Iehova’?
17 ‘Muitua katoatoa kia Iehova,’ ke tuga ne taute e Kalepa ha Isaraela i tuai. (Teutaronome 1:34-36) Kia taute e mena ne poaki atu he Atua ki a koe, ti nakai manamanatu ke fakalataha ke he “laulau he tau temoni.” (1 Korinito 10:21) Fakaheu e tiaki taofiaga. Kia taumafa mo e loto fakaaue ke he tau kai fakaagaaga ne moua hokoia he laulau a Iehova, mena ia to nakai fakahēhē he tau faiaoga pikopiko po ke tau agaaga kelea a koe. (Efeso 6:12; Iuta 3, 4) Kia hagaaki ke he tau mena fakaagaaga, tuga e fakaakoaga Tohi Tapu, o ke he tau feleveiaaga, mo e fekafekauaga he fonua. To fiafia mooli a koe kaeke muitua katoatoa ki a Iehova mo e nakai fagahuatia ke he gahua he Iki.—1 Korinito 15:58.
18. To lauia fēfē e mahani haau he matakutaku ki a Iehova?
18 Kia fakamalolō ke ‘fekafekau ke he Atua mo e maimainā mo e matakutaku.’ (Heperu 12:28) Ko e matakutaku fakalilifu ki a Iehova ka omoi a koe ke fakaheu e ha puhala matahavala. To lagomatai ai a koe ke mahani fakalautatai atu ke he fakatonuaga ha Peteru ke he tau matakainaga fakauku: “Kaeke foki kua tauui a mutolu ke he Matua, ko ia kua nakai fakamailoga tagata, ka e fakafili fakalata ke he tau gahua he tau tagata takitokotaha, kia nonofo a mutolu mo e matakutaku, ka kua api a mutolu ki hinei.”—1 Peteru 1:17.
19. Ko e ha kua lata ke fakagahua tumau e koe e tau mena hane ako e koe mai he Kupu he Atua?
19 Kia fakagahua tumau e tau mena hane ako e koe mai he Kupu he Atua. To lagomatai ai a koe ke kalo mai he agahala kelea muitui ha kua fakamooli a koe ke fakalataha “mo e tau tagata motua, ko lautolu ni kua mahani he ako mua ai ke mailoga e tau mena mitaki mo e tau mena kelea.” (Heperu 5:14) He nakai vagahau mo e mahani fakahanoa, kia mataala a koe he fano tuga e tagata pulotu, he “[“fakatau e tau magaaho ne lata,” NW]” he tau aho kelea nei. “Kia iloa e mutolu e finagalo he Iki [Iehova],” ti fakatumau ke taute ai.—Efeso 5:15-17; 2 Peteru 3:17.
20. Ko e ha kua lata ia tautolu ke kalo mai he velevelemena?
20 Kia tiaki katoatoa e velevelemena—ko e manako lotokai ke he koloa he falu tagata. Ne pehē taha he Tau Fakatufono Hogofulu: “Aua neke manako [“velevelemena,” New International Version] a koe ke he fale he taha tagata, aua neke manako a koe ke he hoana he taha tagata, po ke hana fekafekau tane, po ke hana fekafekau fifine, po ke hana povi, po ke hana asini, po ke taha mena kehe he taha tagata.” (Esoto 20:17) Ne puipui he fakatufono nei e fale, hoana, tau fekafekau, tau manu, mo e falu mena foki he tagata. Ka e mua atu e talahauaga ha Iesu kua fakakelea he velevelemena e tagata.—Mareko 7:20-23.
21, 22. Ko e heigoa e tau puipuiaga ka liga taute he Kerisiano ke kalo mai he agahala?
21 Kia puipui mai neke takitaki atu he manako lahi ke he agahala. Ne tohia he tutaki ko Iakopo: “Ka e takitokotaha mo e kamatamata a ia ka toho mo e hele a ia he hana tau manako lahi. Ka fatu e manako lahi ti fanau mai ai e ia, ko e hala; ka motua foki e hala ti fanau mai ai, ko e mate.” (Iakopo 1:14, 15) Ke fakatai ki ai, kaeke ke lekua taha tagata ke he inu kava he vahā fakamua, kua liga fifili e ia ke nakai fai kava he kaina haana. Ke kalo mai neke kamatamata he manako feuaki ke he taha tagata he gahuaaga, kua lata mogoia e Kerisiano ke hiki e matakavi gahua po ke toka e gahua haana.—Tau Fakatai 6:23-28.
22 Aua neke taute e lakaaga fakamua ke he agahala. Ko e kalahī mo e manamanatu tumau ke he mahani fakataane mo e fifine ka hokotia ke he feuaki po ke faivao. He pikopiko ke he mena tote ka omoomoi e tagata ke pikopiko ke he tau mena lalahi ti liga hokotia atu ke agahala he pikopiko. Kua maeke he tama kaihā tote ke fakapulefu e loto manamanatu he tagata ke hokotia ke kamata ke kaihā e tau mena lalahi. Pihia foki, he fakaatā fakatote e manamanatu ke he tiaki taofiaga ka liga taute e tagata ke fano he puhala ia ti fakahiku ke tiaki taofiaga katoatoa.—Tau Fakatai 11:9; Fakakiteaga 21:8.
Ka e Kua ka Agahala a Koe?
23, 24. Ko e heigoa e mafanatia ka moua mai he 2 Nofoaga he Tau Patuiki 6:29, 30 mo e Tau Fakatai 28:13?
23 Kua nakai mitaki katoatoa e tau tagata oti kana. (Fakamatalaaga 7:20) Ka e, kaeke kua taute e koe e agahala kelea muitui, maeke ia koe ke mafanatia ke he liogi he Patuiki ko Solomona he fakauluaga he faituga a Iehova. Ne liogi a Solomona ke he Atua: “Ko e tau liogi oti, mo e tau ole oti, ke eke ai he tagata, po ke hau a motu oti ko Isaraela; ko e takitaha e tau tagata oti mo e iloa e malaia, mo e mamahi he tau loto ha lautolu, mo e fakaolo atu e lautolu e tau lima ha lautolu kehe fale nai. Kia fanogonogo mai a a koe mai he lagi, ko e mena kua haele ai a koe, mo e fakamagalo mai, mo e foaki mai e koe ke he tau tagata takitokotaha ke lata mo e ha lautolu a tau mahani oti, kua iloa e koe e tau loto ha lautolu; (ha ko koe, hoko koe ni kua iloa e tau loto he tau tagata).”—2 Nofoaga he Tau Patuiki 6:29, 30.
24 E, kua iloa he Atua e loto ti fakamagalo mai. Ne pehē e Tau Fakatai 28:13: “Ko ia kua ufiufi hana tau holifono, nakai monuina a ia; ka ko ia kua fakakite mo e tiaki ai, kua [“fakaalofa noa,” NW] a ia.” He fakakite e tokihala ti tiaki foki e agahala, maeke he tagata ke moua e fakaalofa noa he Atua. Ka e, kaeke kua lolelole fakaagaaga a koe, ko e heigoa foki ka lagomatai a koe ke fakatumau ke he fakaalofa he Atua?
To Tali Fēfē e Koe?
• Maeke fēfē a tautolu ke fakatumau a tautolu ke he fakaalofa he Atua?
• Lagomatai fēfē he fakaalofa ma e Atua mo Keriso a tautolu ke fakaheu e puhala agahala?
• Ko e ha ne taofi he fakaalofa mooli ma e falu a tautolu neke taute e mahani kelea he fakataane mo e fifine?
• Ko e heigoa falu puhala ke kalo mai he mahani hepehepe?
[Tau Hūhū he Fakaakoaga]
[Fakatino he lau 3]
Ne fakakite e Iuta ki a tautolu e puhala ke fakatumau a tautolu ke he fakaalofa he Atua
[Fakatino he lau 5]
Maeke he mavehevehe he fakamauaga ke fakamamahi lahi e hoa nakai agahala mo e fanau
[Fakatino he lau 6]
Tuga a Kalepa, kua fakamalolō nakai a koe ke ‘muitua katoatoa kia Iehova’?
[Fakatino he lau 7]
Liogi tumau ma e lagomatai ke totoko e kamatamata