Maeke Kia e Ikifakafili ke Fakahako?

KO SLADJANA, ko e taha he Tau Fakamoli a Iehova i Koroatia, ne setulu ke tu he fakafiliaga ha ko e falu lekua fakatupe. Ka ko e taha tagata he lekua kua mule mai. Ne makai a Sladjana ke fakamatala, he fakatali agaia e tau tagata oti, ne fakamalolō a ia ke tutala ke he ikifakafili.

“Ma iki na e, iloa nakai e koe to nakai leva ti nakai fai ikifakafili mo e nakai fai hopoaga e lalolagi?” he hūhū e ia. Kua hagaao mooli a ia ke he tau ikifakafili tuga ne iloa e tautolu he vahā nei.

Ofo ai, ne ono ni e ikifakafili ki a ia ti nakai fai talahauaga. Mogoia ni ti kamata e fakafili. Magaaho ne oti ai ti tu hake a Sladjana ke saini e tohi, ne pepelu atu e ikifakafili mo e fanafana ki a ia: “Mooli ke mena ne talahau e koe ki a au mogoia, to nakai leva ti nakai fai ikifakafili mo e nakai fai hopoaga e lalolagi?”

“E, ma iki na e. Moolioli au!” he tali e Sladjana.

“Ko e heigoa e fakamooliaga haau ke he mena ia?” he hūhū he ikifakafili.

“Maeke ke moua i loto he Tohi Tapu,” he tali e Sladjana.

Ne pehē e ikifakafili kua manako a ia ke totou e fakamooliaga pihia, ka e nakai fai Tohi Tapu a ia. Ti pehē a Sladjana to ta age e ia taha. Ne aahi atu e Tau Fakamooli ke he ikifakafili, age e Tohi Tapu, ti fakamafana a ia ke fakaako e Tohi Tapu he tau faahi tapu oti. Ne talia he ikifakafili e manatu ia ti nakai leva kua eke a ia mo taha he Tau Fakamoli a Iehova.

Pehē e tau kupu fakaperofeta he Salamo 2:10: “Hanai, ko mutolu ko e tau patuiki na e, kia loto matala a mutolu; kia ako [po ke fakahako] a mutolu ko e tau fakafili he lalolagi.” Kua mafanatia ha ia ka talia fakatokolalo e lautolu pihia e takitakiaga fakaalofa ha Iehova!

[Fakatino he lau 32]

Ko Sladjana mo e ikifakafili