Foaki e Iehova e “Agaga Tapu kia Lautolu ka Ole Atu ai kia Ia”

“Ko mutolu ne mahani kelea, kaeke kua iloa e mutolu ke uta e tau mena mitaki mo e tau fanau ha mutolu; ka e nakai kia mua e Matua ha mutolu ha ha he lagi ke foaki mai e [a]gaga [t]apu kia lautolu ka ole atu ai kia ia.”​—LUKA 11:13.

1. Magaaho fe ne manako lahi a tautolu ke he lagomatai he agaaga tapu?

‘NAKAI fakaai au ke fehagai tokotaha ke he mena nei. Ko e lagomatai ni he agaaga tapu ka maeke ia au ke fakauka ke he kamatamata nei!’ Kua fa talahau nakai e koe e tau logonaaga pihia mai he loto haau? Kua pihia e laulahi he tau Kerisiano. Liga kua pihia a koe he iloa kua moua a koe he gagao kelea lahi. Po ke liga he magaaho ne mate e hoa mau haau ne kua leva e nonofo. Po ke liga ko e aga fiafia haau fakamua kua maluia ai he tau aolagi pouliuli he fakaagitau. He tau magaaho fakaatukehe he moui, ne liga logona hifo e koe kua fahia ni ha ko e agaaga tapu ha Iehova ne foaki ki a koe e ‘malolo ne lahi ue atu.’​—2 Korinito 4:7-9; Salamo 40:1, 2.

2. (a) Ko e heigoa e tau paleko ne fehagai mo e tau Kerisiano mooli? (e) Ko e heigoa e tau hūhū ka fakatutala a tautolu ki ai he vala tala nei?

² Ko e tau Kerisiano mooli kua fehagai ke he tau fakaohooho mo e tau totokoaga ne hane tupu tolomaki he lalolagi nakai mahani Atua nei. (1 Ioane 5:19) Lafi ki ai, kua kamatamata e Satani ko e Tiapolo e tau tutaki he Keriso, ti tau atu ki a lautolu “kua omaoma ke he tau poaki he Atua, mo e taofi e talahauaga kia Iesu Keriso.” (Fakakiteaga 12:12, 17) Kakano haia ne kua lata a tautolu mogonei ke moua e lalago he agaaga he Atua ke mua atu ke he vahā fakamua. Ko e heigoa ka taute e tautolu ke iloa mooli to matutaki a tautolu ke moua e agaaga tapu he Atua? Ti ko e ha kua mauokafua a tautolu kua mua atu e fakamakai ha Iehova ke foaki mai e malolō kua lata he tau magaaho he kamatamata? To moua e tautolu e tau tali ke he tau hūhū nei he tau fakataiaga ne ua ha Iesu.

Liogi Fakamakamaka

3, 4. Ko e heigoa e fakataiaga ne talahau e Iesu, ti fakahagaao fēfē e ia ke he liogi?

³ Ne taha e mogo ne ole taha he tau tutaki ha Iesu: “Ko e Iki na e, kia fakaako mai e koe kia mautolu e liogi.” (Luka 11:1) He tali ha Iesu, ne foaki e ia ua e fakataiaga ke he tau tutaki haana. Fakamua, ne hagaao ke he tagata ne leveki e tagata ahiahi, mo e uaaki ko e matua ne fanogonogo ke he tama taane haana. Kia fakatutala takitaha a tautolu ke he tau fakataiaga ua nei.

⁴ Ne pehē a Iesu: “Ko hai taha ia mutolu hana e kapitiga ka fano kia ia he tuloto po, mo e tala age kia ia. Teme na e, ati ta mai a tolu e areto, ka e taui atu; ha kua hau tuai e kapitiga haku ke he hana fenoga, ka e nakai fai mena au ke age ki ai. Ti ui mai a ia mai he fale, kua pehe mai, Ua fakahoha mai a koe kia au; kua pa tuai e gutuhala, ti kua tatakoto a mautolu mo e haku a fanau; nakai maeke ia au ke matike mo e atu māu. Kua tala atu e au kia mutolu, Pete he nakai matike a ia mo e age kia ia, ha ko ia hana kapitiga; ka e matike a ia, mo e age e tau mena oti ne manako ai a ia, ha ko e hana ole fakamakamaka.” Ti fakamaama mogoia e Iesu e puhala ne hagaao e fakataiaga nei ke he puhala liogi, he pehē: “Kua tala atu foki e au kia mutolu, Kia ole atu a mutolu, ti foaki mai ai kia mutolu; kia kumikumi a mutolu, ti moua ai e mutolu; kia tukituki atu a mutolu, ti vevete mai ai kia mutolu. Ha ko ia ke ole atu, to moua e ia; ko ia ke kumi,  to iloa e ia; ko ia ke tukituki, to vevete mai kia ia.”​—Luka 11:5-10.

5. Ko e heigoa ne fakaako he fakataiaga hagaao ke he tagata ne ole fakamakamaka hagaao ke he aga liogi ha tautolu?

⁵ Ko e fakataiaga maaliali nei ke he tagata ne ole fakamakamaka kua fakakite mai e aga ne kua lata ke moua ka liogi a tautolu. Mailoga ne pehē a Iesu kua moua ni he tagata e tau mena ne manako a ia “ha ko e hana ole fakamakamaka.” (Luka 11:8) Ko e talahauaga “ole fakamakamaka” kua kitia lagataha ni i loto he Tohi Tapu. Kua fakaliliu mai he kupu Heleni ne kakano “nakai maimainā.” Ti fa matutaki e nakai maimainā ke he aga kelea. Pete ia, ka fakaaoga e nakai maimainā po ke fakamakamaka ke he kakano mitaki, kua eke ai mo mahani kua nava ki ai. Kua pihia e mena ne tupu ke he tagata leveki he fakataiaga. Ne nakai logona e ia e maimainā he ole fakamakamaka ke moua e tau mena ne manako. Ha kua fakakite e Iesu e tagata leveki nei mo fakafifitakiaga ma tautolu, kua lata foki ke ole fakamakamaka ke he tau liogi ha tautolu. Kua manako a Iehova ki a tautolu ke fakatumau ke ole, fakatumau ke kumikumi, mo e fakatumau ke tukituki. He tali age, to foaki e ia e ‘agaaga tapu kia lautolu ka ole atu ai ki a ia.’

6. He vahā a Iesu, kua onoono fēfē ke he aga fakamotu he mahani fakamokoi?

⁶ Ne nakai ni fakakite e Iesu ki a tautolu e puhala kua lata ke liogi​—mo e malolō ke ole fakamakamaka—​ka e fakakite foki e kakano ne lata ia tautolu ke taute pihia. Ke maama maaliali e fakaakoaga ia, kua lata ia tautolu ke mailoga e puhala ne onoono a lautolu ne fanogonogo ke he aga fakamotu ne fakakite e fakamokoi he fakataiaga ha Iesu ke he tagata leveki ne ole fakamakamaka. Ne fakakite he tau fakamauaga loga i loto he tau Tohiaga Tapu ko e aga fakamotu ke leveki e tau tagata ahiahi he tau vahā Tohi Tapu, ti mua atu e taute he tau fekafekau he Atua. (Kenese 18:2-5; Heperu 13:2) Ka kaumahala ke fakakite e mahani fakamokoi ko e mena fakamā a ia. (Luka 7:36-38, 44-46) He tokaloto e mena ia, kia liliu a tautolu ke kikite ke he tala ha Iesu.

7. Ko e ha e tagata leveki he fakataiaga ha Iesu ne nakai maimainā ke fafagu e kapitiga haana?

⁷ Ne hau e tagata ahiahi ke he tagata leveki he fakataiaga he tuloto po. Ne manako e tagata leveki ke foaki taha mena kai ma e tagata ahiahi haana ‘ka e nakai fai mena ke age ki ai.’ Ki a ia, ko e tuaga kua lata ke fakamafiti lahi anei! Kua lata ke moua taha areto, pete kua hagahaga kelea. Ne finatu a ia ke he kapitiga haana mo e nakai maimainā ti fafagu a ia. “Teme na e, ati ta mai a tolu e areto, ka e taui atu,” he hea age he tagata leveki. Ne ole fakamakamaka a ia ato moua e tau mena ne manako. Ko e magaaho ia ni ka eke a ia mo tagata leveki mitaki ka moua e tau areto.

Ka Lahi e Manako​—Kia Ole Fakalahi Atu Foki

8. Ko e heigoa ka omoi a tautolu ke liogi fakamakamaka ma e agaaga tapu?

⁸ Ko e heigoa ne fakakite he fakataiaga nei hagaao ke he kakano ne liogi fakamakamaka ai a tautolu? Ne fakamakamaka e tagata ke ole ke he tau areto he iloa e ia kua latatonu ni ke moua ai ha ko e matagahua haana a ia ko e tagata leveki. (Isaia 58:5-7) Ka nakai fai areto to kaumahala a ia ke taute e matagahua leveki haana. Tatai foki, ha kua mailoga e tautolu e latatonu ke moua e agaaga he Atua ke taute e fekafekauaga ha tautolu ko e tau Kerisiano mooli, ati fakamakamaka a tautolu ke ole ma e agaaga ia he liogi ke he Atua. (Sakaria 4:6) Kua kitia nakai e koe e fakahikuaga aoga ka futia mai e tautolu he fakataiaga nei? Kaeke ke mailoga e tautolu e agaaga he Atua ko e taha mena kua uho lahi ke moua e tautolu, to liga ole fakamakamaka a tautolu ki ai.

9, 10. (a) Fakamaama ko e ha kua lata ia tautolu ke ole fakamakamaka ke he Atua ma e agaaga tapu haana. (e) Ko e heigoa e hūhū kua lata ke hūhū ki a tautolu ni, ti ko e ha?

⁹ Ke fakatai e tuaga nei ke he vahā ha tautolu, kia manamanatu la kua gagao taha he magafaoa haau he tuloto po. To fafagu nakai e koe e toketa ke ole ma e lagomatai haana? Nakai kaeke ko e tama lekua tote. Ka e, kaeke kua kelea lahi e ate haana, to nakai maimainā a koe ke hea e toketa. Ko e ha? Ha kua fehagai a koe  mo e tuaga hagahaga kelea. Ne mailoga e koe kua latatonu ni ke moua e lagomatai he tagata pulotu. Ka nakai ole lagomatai to liga mate e tagata gagao. Tatai foki, ko e tau Kerisiano mooli kua fehagai a lautolu ke he tau tutūaga hagahaga kelea pihia. Kakano kua hane faifano a Satani tuga e “leona tagi,” he lali ke faiola ki a tautolu. (1 Peteru 5:8) Ke nonofo fakaagaaga tumau, kua latatonu ni a tautolu ke moua e lagomatai he agaaga he Atua. He nakai ole ma e lagomatai he Atua ka liga fakahagahaga kelea lahi a tautolu. Ko e mena ia, kia malolō a tautolu he ole fakamakamaka ma e agaaga tapu he Atua. (Efeso 3:14-16) Ti ko e taute pihia ni ka fakamalolō a tautolu ke “tumau ato hoko ke he fakaotiaga.”​—Mataio 10:22; 24:13.

¹⁰ Ati aoga lahi ai ma tautolu ke fakamanou he falu magaaho mo e hūhū ki a tautolu ni, ‘Kua ole fakamakamaka fēfē au ke he tau liogi haaku?’ Manatu, ka mataala katoatoa a tautolu kua lata ni ke moua e lagomatai he Atua, to fakamakamaka fakalahi mogoia a tautolu ke he tau liogi ma e agaaga tapu.

Ko e Heigoa kua Omoomoi a Tautolu ke Liogi mo e Mauokafua?

11. Fakahagaao fēfē e Iesu e fakataiaga ke he matua taane mo e tama haana ke he liogi?

¹¹ Ne fakakite he fakataiaga ha Iesu ke he tagata leveki ne ole fakamakamaka e aga he tagata ne liogi​—ko ia ne talitonu. Ne fakakite he fakataiaga ne mui mai e aga haana ne fanogonogo ke he tau liogi​—ko Iehova ko e Atua. Ne hūhū a Iesu: “Ko hai e matua ia mutolu ke age kia e ia e maka ke he tama hana ka ole mai e areto? ka ole mai e ika, ke age kia e gata kia ia mo ika. Ka ole mai a ia e fufua moa, ke age kia kia ia e akarava?” Ne matutaki a Iesu ke talahau e hagaaoaga: “Hanai, ko mutolu ne mahani kelea, kaeke kua iloa e mutolu ke uta e tau mena mitaki mo e tau fanau ha mutolu; ka e nakai kia mua e Matua ha mutolu ha ha he lagi ke foaki mai e [a]gaga [t]apu kia lautolu ka ole atu ai kia ia?”​—Luka 11:11-13.

12. Fakakite fēfē he fakataiaga ke he matua taane ne fanogonogo ke he ole he tama haana e fakamakai ha Iehova ke fanogonogo ke he tau liogi ha tautolu?

¹² Ha ko e fakataiaga nei he matua taane ne fanogonogo ke he tama haana, ne fakakite e Iesu e logonaaga a Iehova ki a lautolu ne liogi ki a ia. (Luka 10:22) Fakamua, kia mailoga e kehekehe he tau fakataiaga nei. Ne nakai tatai mo e tagata he fakataiaga fakamua ne fakauaua ke talia e ole ma e lagomatai, kua tatai a Iehova mo e matua tagata fakaalofa ne mautali ke fanogonogo ke he ole he tama haana. (Salamo 50:15) Ne fakamaama foki e Iesu e aga fakamakai ha Iehova ki a tautolu he tala hagaao ke he matua taane tagata ke he matua taane he lagi. Ne pehē a ia kaeke ke foaki he matua taane tagata e mena mitaki ke he tama haana pete he “mahani kelea” ha ko e agahala, to amanaki pihia foki a tautolu ke he ha tautolu a Matua he lagi ne fakaalofa hofihofi ke foaki e agaaga tapu ke he magafaoa tapuaki haana!​—Iakopo 1:17.

13. Ko e heigoa kua iloa mooli e tautolu he magaaho ka liogi ki a Iehova?

¹³ Ko e heigoa e fakaakoaga ma tautolu? Maeke ia tautolu ke mauokafua he magaaho ka ole ke he ha tautolu a Matua he lagi ma e agaaga tapu, to fakamakai lahi a ia ke tali e tau ole ha tautolu. (1 Ioane 5:14) He magaaho ka liogi  tumau a tautolu ki a ia, to nakai pehē a Iehova, ke tuga anei: “Ua fakahoha mai a koe kia au; kua pa tuai e gutuhala.” (Luka 11:7) Ke he taha faahi, ne pehē a Iesu: “Kia ole atu a mutolu, ti foaki mai ai kia mutolu; kia kumikumi a mutolu, ti moua ai e mutolu; kia tukituki atu a mutolu, ti vevete mai ai kia mutolu.” (Luka 11:9, 10) E, to ‘fanogonogo mai a Iehova ke he aho ka tauui atu ai a tautolu.’​—Salamo 20:9; 145:18.

14. (a) Ko e heigoa e tau manatu hehē ne fakatupetupe aki falu ne fehagai ke he tau kamatamata? (e) Ka fehagai mo e tau kamatamata, ko e ha kua maeke ia tautolu ke liogi mo e mauokafua ki a Iehova?

¹⁴ Ko e fakataiaga ha Iesu ke he matua taane fakaalofa kua peehi foki e mua ue atu he mahani mitaki ha Iehova ke he mahani mitaki ne fakakite he ha matua tagata. Ko e mena ia, kua nakai lata he taha ia tautolu ke logona hifo kua liga fehagai a tautolu mo e tau kamatamata ha kua nakai fiafia e Atua ki a tautolu. Ko e matapatu fī ha tautolu, ko Satani, ne manako ke manamanatu pihia a tautolu. (Iopu 4:1, 7, 8; Ioane 8:44) Kua nakai fai fakavēaga mai he Tohi Tapu ma e tau manatu fakahala fakatagata pihia. Kua nakai kamatamata e Iehova a tautolu “ke he mena kelea.” (Iakopo 1:13) Kua nakai tuku mai e ia ki a tautolu e tau kamatamata tuga e gata po ke tuga e akarava. Ka e foaki mai he ha tautolu a Matua he lagi e “tau mena mitaki kia lautolu kua ole atu kia ia.” (Mataio 7:11; Luka 11:13) Mooli, ka lahi e loto fakaaue ha tautolu ma e mahani mitaki ha Iehova mo e fakamakai haana ke lagomatai a tautolu, to au atu e manako ha tautolu ke liogi mo e mauokafua. He taute e tautolu, to maeke foki ia tautolu ke talahau e tau manatu tuga ne tohia he salamo: “Kua fanogonogo mai e Atua kia au; kua hagao mai a ia ke he leo he haku a liogi.”​—Salamo 10:17; 66:19.

Puhala ne Eke e Agaaga Tapu mo Lagomatai ha Tautolu

15. (a) Ko e heigoa e maveheaga ne taute e Iesu hagaao ke he agaaga tapu? (e) Ko e heigoa taha puhala ne lagomatai he agaaga tapu a tautolu?

¹⁵ Nakai leva ato mate a ia, ne fatiaki e Iesu e fakamafanaaga ne talahau e ia i loto he tau fakataiaga haana. He vagahau hagaao ke he agaaga tapu, ne pehē a ia ke he tau aposetolo haana: “To tala age foki au ke he Matua, ati foaki mai ai e ia kia mutolu e taha [l]agomatai, kia nofo mau a ia ia mutolu tukulagi.” (Ioane 14:16) Ati mavehe ai a Iesu to moua he tau tutaki haana e lagomatai, po ke agaaga tapu, he tau aho i mua ti putoia e vahā nei ha tautolu. Ko e heigoa taha puhala mahuiga ne kitia e tautolu e lalago he agaaga tapu he vahā nei? Ne lagomatai he agaaga tapu a tautolu ke fakauka ke he tau kamatamata kehekehe. Ke he puhala fe? Ne fakamaama he aposetolo ko Paulo, ne fehagai foki ke he tau kamatamata, he tohi haana ke he tau Kerisiano i Korinito e puhala ne lagomatai he agaaga he Atua a ia. Kia tutala fakakū a tautolu ke he mena ne tohia e ia.

16. Liga tatai fēfē e tuaga ha tautolu mo e ha Paulo?

¹⁶ Fakamua, ne tala age fakamooli a Paulo ke he tau matakainaga talitonu haana kua fehagai a ia mo e “mena mahukihuki ke he tino,” ko e taha vahega kamatamata. Ti pehē foki a ia: “Ne ole atu lagatolu au ke he Iki [Iehova] ha ko e mena ia, kia fano kehe ai . . . ia au.” (2 Korinito 12:7, 8) Pete he ole a Paulo ke he Atua ke utakehe e mamahi haana, ne toka agaia ni. Liga kua fehagai a koe ke he tuaga pihia he vahā nei. Ke tuga a Paulo, kua liga liogi fakamakamaka mo e mauokafua  a koe he ole ki a Iehova ke utakehe e kamatamata. Pete ko e ole lagaloga haau, kua fehagai agaia a koe mo e lekua ia. Ti pehē kia mogoia kua nakai fanogonogo a Iehova ke he tau liogi haau mo e kua nakai lagomatai he agaaga haana a koe? Mamao mai he pihia! (Salamo 10:1, 17) Mailoga e mena ne talahau foki e Paulo.

17. Tali fēfē e Iehova e tau liogi ha Paulo?

¹⁷ He tali atu ke he tau liogi ha Paulo, ne tala age e Atua ki a ia: “Ko e haku a fakaalofa noa kua lata ia mo koe; ha kua fakakatoatoa haku a malolo ke he lolelole.” Ne pehē a Paulo: “Haia, to olioli lahi ai au, mo e hula ke he tau mena kua lolelole ai au, kia tumau ai e malolo a Keriso ki luga haku.” (2 Korinito 12:9; Salamo 147:5) Ati mailoga ai e Paulo he puhala ia Keriso, kua fofola he Atua e puipuiaga haana ke fakamalu aki a ia ke tuga e fale ie. He vahā nei, ne tali e Iehova e tau liogi ha tautolu ke he puhala taha ia. Ne fofola e ia e puipuiaga haana ke fakamalu aki e tau fekafekau haana ke tuga e huaga.

18. Ko e ha kua maeke ia tautolu ke fakauka ke he tau kamatamata?

¹⁸ Mooli, kua nakai taofi he fale ie e uha neke tō po ke matagi neke havili, ka e kua fai puipuiaga ke he tau mena ia ne tutupu. Kua tatai foki mo e huaga ne foaki he “malolo a Keriso,” kua nakai taofi e tau kamatamata po ke tau mena uka neke tutupu ki a tautolu. Ka e, kua foaki e puipui fakaagaaga ke he tau mena tutupu ne hagahaga kelea he lalolagi nei mo e tau lagatau he pule he lalolagi, ko Satani. (Fakakiteaga 7:9, 15, 16) Ti pihia foki ka fehagai a koe mo e kamatamata ne nakai ‘fano kehe ia koe,’ kua lata ia koe ke mauokafua na iloa e Iehova e tau taufetului haau ti kua logona e ‘tagi haau.’ (Isaia 30:19; 2 Korinito 1:3, 4) Ne tohia e Paulo: “Kua fakamoli e Atua, he nakai tuku atu e ia a mutolu ke he kamatamata kua mua ke he mena kua fahia ai a mutolu, ka e taute foki e ia fakalataha mo e kamatamata e mena ke hao ai, kia fahia a mutolu ke fakauka ai.”​—1 Korinito 10:13; Filipi 4:6, 7.

19. Ko e heigoa kua fakamalolō a koe ke taute, ti ko e ha?

¹⁹ Mooli lahi, ko e “tau aho fakamui” nei he lalolagi nakai mahani Atua kua mailoga ai ha ko e “tau aho uka.” (2 Timoteo 3:1) Pete he pihia, kua maeke agaia e tau fekafekau he Atua ke fehagai ke he tau aho uka nei. Ko e ha ne pihia ai? Ha ko e lagomatai mo e puipui he agaaga tapu he Atua, ne foaki fakamakai mo e fakalahi e Iehova ki a lautolu oti ne ole fakamakamaka mo e mauokafua ki a ia. Kia lata mogoia a tautolu ke fakamalolō ke liogi tumau ma e agaaga tapu he tau aho oti.​—Salamo 34:6; 1 Ioane 5:14, 15.

To Tali Fēfē e Koe?

• Ko e heigoa kua lata ia tautolu ke taute ke moua e agaaga tapu he Atua?

• Ko e ha kua lata ia tautolu ke mauokafua to tali e Iehova e tau liogi ha tautolu ma e agaaga tapu?

• Lagomatai fēfē he agaaga tapu a tautolu ke fakauka ke he tau kamatamata?

[Tau Hūhū he Fakaakoaga]

[Fakatino he lau 15]

Ko e heigoa kua maeke ia tautolu ke ako mai he fakataiaga ha Iesu hagaao ke he tagata leveki ne ole fakamakamaka?

[Fakatino he lau 16]

Liogi fakamakamaka nakai a koe ma e agaaga tapu he Atua?

[Fakatino he lau 17]

Ko e heigoa ne ako e tautolu hagaao ki a Iehova mai he fakataiaga he matua taane fakaalofa?