Hane Hoko Ainei e “Liu Tu Mai Fakamua”!

“To tutu fakamua mai a lautolu kua mamate ha ia Keriso.”​—1 TESALONIA 4:16.

1, 2. (a) Ko e heigoa e amaamanakiaga ma lautolu ne mamate? (e) Ko e heigoa e fakavēaga ati talitonu a koe ke he liu tu mai? (Kikite e matahui tala.)

“KO LAUTOLU kua momoui, kua iloa e lautolu to mamate a lautolu.” Tali mai he agahala a Atamu, ne mooli e mena ia. Ke he fakamauaga tala tuai, ko e tau tagata oti ne fanau ne iloa kua fakahiku ni to mamate, ti tokologa ne manamanatu: ‘Ko e heigoa foki ka mui mai? Ko e heigoa e tuaga he tau tagata mamate?’ Ne tali he Tohi Tapu: “Ka ko lautolu ne mamate nakai iloa e lautolu ha mena.”​—Fakamatalaaga 9:5.

² Ti fai amaamanakiaga nakai ma lautolu ne kua mamate? E. Maeke ke fai kaeke ke fakamooli e finagalo fakamua he Atua ma e tau tagata. Ke he tau senetenari loga, ne fakagahuahua he tau fekafekau fakamooli he Atua e tua ke he maveheaga ha Iehova hagaao ke he Tega (NW) ka moumou a Satani mo e vetevete e hagahagakelea ne taute e ia. (Kenese 3:15) Laulahi ne mamate. Kaeke ke kitia e lautolu e fakamooli he maveheaga ia mo e falu maveheaga foki ne taute e Iehova, kua lata a lautolu ke fakaliu tūtū mai he mamate. (Heperu 11:13) Hoko mooli kia e mena ia? E, hoko. Ne pehē e aposetolo ko Paulo: “[To ha ha i ai e] liu foki tutu mai a lautolu kua mamate, ko lautolu ne tututonu katoa mo lautolu ne hepehepe.” (Gahua 24:15) Ne lagataha e fakaliu tu mai e Paulo e tama fuata ne higoa ko Eutuko, ne tō hifo he fakamaama mai luga he tolu e fata he fale ti “lagaaki a ia kua mate tuai.” Ko e liu tu mai ke hivaaki fakahiku anei ne fakamau he Tohi Tapu.​—Gahua 20:7-12. *

3. Ko e heigoa e mafanatia ne logona fakatagata e koe mai he tau kupu a Iesu ne fakamau ia Ioane 5:28, 29, ti ko e ha?

³ Ko e tau liu tu mai ia ne hiva ne foaki e fakavēaga ke he tua he talahauaga ha Paulo. Kua fakamalolō ai e mauokafua ha tautolu ke he mooli he tau kupu a Iesu: “Hane hoko mai e matahola ke logona e lautolu katoa ha he tau tuagamau fakamanatu hana [Iesu] leo mo e o mai ki fafo.” (Ioane 5:28, 29, NW) Ko e mafanatia ha ia he tau kupu ia! Ti ko e mafanatia ha ia ma e tau miliona ne mamate e tau fakahele!

4, 5. Ko e heigoa e tau liu tu mai kehekehe ne talahau he Tohi Tapu, ti ko e liu tu mai fe ka fakatutala ki ai he vala tala nei?

 ⁴ Ko e laulahi ha lautolu ne fakaliu tu mai ka liliu mai ke he lalolagi mafola i lalo he Kautu he Atua. (Salamo 37:10, 11, 29; Isaia 11:6-9; 35:5, 6; 65:21-23) Pete ia, ko e falu liu tu mai ne fakahoko ato tupu e mena nei. Fakamua, ko Iesu Keriso ne fakaliu tu mai ke foaki e toto uho haana ke he Atua ke lata mo tautolu. Ne mate a Iesu ti fakaliu tu mai he 33 V.N.

⁵ Matutaki atu, ko e tau tagata fakauku he “Isaraela he Atua” kua lata ke fakalataha mo e Iki ko Iesu Keriso ke he lilifu he lagi, ko e matakavi ka “fakalataha mau a [l]autolu mo e Iki.” (Kalatia 6:16; 1 Tesalonia 4:17) Ko e mena ia ne tupu kua fakahigoa ko e ‘liliu tutu mai fakamua’ po ke “liu tu mai fakamua.” (Filipi 3:10, 11; Fakakiteaga 20:6) Ka fakakatoatoa e liu tu mai ia, to hoko ai e magaaho ma e tau miliona ke fakaliu tūtū mai ke he lalolagi mo e amaamanakiaga he moui tukulagi ke he Parataiso. Ti ko e amaamanakiaga ha tautolu ke he lagi po ke lalolagi, kua ha ha ia tautolu e amaamanaki lahi ke he “liu tu mai fakamua.” Ko e heigoa e vahega liu tu mai ia? Magaaho fe ne hoko ai?

“Ko [e] Heigoa Foki e Tino?”

6, 7. (a) Ato o hake e tau Kerisiano fakauku ke he lagi, ko e heigoa ka lata ke hoko? (e) Ko e vahega tino fēfē ka fakaliu tu mai a lautolu?

⁶ He tohi fakamua haana ke he tau Korinito, ne fakatū e Paulo e hūhū hagaao ke he liu tu mai fakamua: “Po ke fefe he tutu mai a lautolu kua mamate? Ko [e] heigoa foki e tino ke o mai ai a lautolu?” Ti tali mogoia e ia e hūhū: “Ko e mena kua gana e koe, nakai moui ia kaeke ke nakai popo . . . ka kua āge he Atua ki ai e tino kua finagalo a ia ki ai . . . Ka e kehe e fulufuluola he tau mena he lagi, ti kehe e fulufuluola he tau mena he lalolagi.”​—1 Korinito 15:35-40.

⁷ Ne fakakite he tau kupu a Paulo ko e tau Kerisiano kua fakauku ke he agaaga tapu kua lata ke mamate ato maeke ia lautolu ke moua e palepale he lagi. He mamate a lautolu, kua liliu atu e tau tino tagata ha lautolu ke he efuefu. (Kenese 3:19) He magaaho kotofa he Atua, ne fakaliu tūtū mai a lautolu ke he vahega tino kua lata mo e moui ke he lagi. (1 Ioane 3:2) Ne foaki foki he Atua ki a lautolu e moui nakai mate. Nakai moua e lautolu e mena ia he magaaho ne fanau mai a lautolu, ke tuga na fafagu e agaaga nakai mate ki loto ia lautolu. “To fakatapulu foki e tino nai ke mate ke he tino nakai tuai mate,” he talahau e Paulo. Ko e tino nakai mate ko e mena fakaalofa mai he Atua, “ne fakatapulu” e lautolu ka fakalataha ke he liu tu mai fakamua.​—1 Korinito 15:50, 53; Kenese 2:7; 2 Korinito 5:1, 2, 8.

8. Iloa fēfē e tautolu kua nakai fifili he Atua e 144,000 mai he tau tagata he tau lotu kehekehe?

⁸ Ko e 144,000 ni ka moua e liu tu mai fakamua. Ne kamata fifili e Iehova a lautolu he Penetekoso 33 V.N., nakai leva he mole e fakaliu tu mai ha Iesu. Ha ha oti ia lautolu “e higoa [ha Iesu mo e] he hana Matua ke he tau matale ha lautolu.” (Fakakiteaga 14:1, 3) Ti nakai fifili a lautolu mai he tau lotu loga kehekehe. Ko e tau Kerisiano oti a lautolu, ti hahamo fakamatalahi oti e lautolu e higoa he ha lautolu a Matua​—ko Iehova. He magaaho ne fakaliu tūtū mai a lautolu, ne moua e lautolu e kotofaaga ke he lagi. Ko e amaamanakiaga he fekafekau ke he Atua ke he puhala fakahako pihia kua mitaki lahi mooli ki a lautolu.

Hane Hoko Ainei?

9. Lagomatai fēfē he Fakakiteaga 12:7 mo e 17:14 a tautolu ke fuafua e magaaho ka kamata e liu tu mai fakamua?

⁹ Hoko i ne fe e liu tu mai fakamua? Ko e fakamooliaga malolō hane hoko ainei. Ma e fakatai, fakatatai e ua he veveheaga he tohi a Fakakiteaga. Fakamua, onoono ke he Fakakiteaga veveheaga 12. Ne totou ai e tautolu ko e patuiki foou ko Iesu Keriso, fakalataha mo e tau agelu tapu haana, kua latau ki a Satani mo e tau temoni haana. (Fakakiteaga 12:7-9) Ha kua fakakite tumau he senolo nei, na kamata e tauaga he 1914. * Mailoga, mogoia kua nakai fai he tau tutaki fakauku he Keriso ne talahau kua fakalataha mo Iesu ke he tauaga ia he lagi. Mogonei, onoono ke he veveheaga 17 ha Fakakiteaga. Ne  totou ai e tautolu he mole e moumouaga ha ‘Papelonia Lahi,’ to kautū e Punua Mamoe ke he tau motu. Ti, lafi atu ai: “Ko lautolu foki kua fakalataha mo ia kua uiina, mo e fifili, mo e fakamoli.” (Fakakiteaga 17:5, 14) Ko lautolu “kua uiina, mo e fifili, mo e fakamoli” kua lata ke fitā e fakaliliu tūtū mai kaeke ke fakalataha a lautolu mo Iesu ke he fakakaumahala fakahiku he lalolagi a Satani. Tonu ai mogoia, ko lautolu ne fakauku ne mamate ato hoko a Amaketo kua fakaliliu tūtū mai he fai magaaho he vahāloto he 1914 mo Amaketo.

10, 11. (a) Ko hai e tau patu ne 24, ti ko e heigoa he taha ia lautolu ne talahau ki a Ioane? (e) Ko e heigoa kua maeke ke moua mai e tautolu he mena nei?

¹⁰ Maeke nakai a tautolu ke talahau fakatonu ko e kamata he magaaho fe e liu tu mai fakamua? Ko e tali fuluola ne moua he Fakakiteaga 7:9-15, ne fakamaama he aposetolo ko Ioane e fakakiteaga haana he “moto tagata tokologa, kua nakai maeke ia taha ke totou.” Ko e kitiaaga he moto tagata tokologa ia ne fakakite ki a Ioane he taha he tau patu ne 24, ti ko e tau patu nei ne hukui e 144,000 ko e tau hakega fakalataha mo Keriso ke he ha lautolu a lilifu he lagi. * (Luka 22:28-30; Fakakiteaga 4:4) Ne moua e Ioane e amaamanakiaga ke he lagi; ka ko ia agaia he lalolagi he magaaho ne tutala e patu ki a ia, he fakakiteaga kua lata ia Ioane ke hukui a lautolu ne fakauku ha he lalolagi ne nakai la moua ia e palepale ha lautolu he lagi.

¹¹ Ko e heigoa mogoia ka fakaoti e tautolu mai he mooliaga ko e taha he tau patu ne 24 ne fakakite e moto tagata tokologa ki a Ioane? Tuga ko lautolu ne fakaliu tūtū mai he matakau he tau patu ne 24 kua liga putoia e matutakiaga mo e tau kupu mooli faka-Atua he vahā nei. Ko e ha ne aoga e mena ia? Ha ko e kitiaaga hako he moto tagata tokologa ne fakakite ke he tau fekafekau fakauku he Atua he lalolagi he 1935. Kaeke ko e taha he tau patu ne 24 ne fa talahau e kupu mooli aoga, to liga lata a ia ke fakaliu tu mai ke he lagi he kavi ke he 1935. To fakakite he mena ia ko e liu tu mai fakamua ne kamata he falu magaaho he vahāloto he  1914 mo e 1935. Maeke nakai a tautolu ke tali fakatonu mooli?

12. Fakamaama e kakano ko e tau tupu he 1918 kua liga onoono ki ai ko e magaaho fakalata ne kamata e liu tu mai fakamua?

¹² He magaaho nei, liga lagomatai ka manamanatu ai ke tuga e fakatataiaga he Tohi Tapu. Ne fakauku a Iesu Keriso ko e Patuiki anoiha he Kautu he Atua he vahā tau mateafu he 29 V.N. Kua tolu e tau mo e hafa he mole, he tau tupu he 33 V.N., ne fakaliu tu mai a ia ko e tagata fakaagaaga malolō lahi. Liga maeke kia ke talahau he tali mai he patuiki a Iesu he tau tupu he 1914, ko e liu tu mai he tau tutaki fakauku tua fakamooli haana ne kamata he tolu mo e hafa e tau he mole, he tau tupu he 1918? Fuluola e fakalatalata ia. Pete ni e nakai fakamooli fakatonu he Tohi Tapu, kua felauaki ai mo e falu kupu tohi ne fakakite ko e liu tu mai fakamua ne hoko he nakai leva e mole e kamata he ha ha hinei he Keriso.

13. Ke he puhala fe ne talahau he 1 Tesalonia 4:15-17 kua kamata e liu tu mai fakamua he mataulu he ha ha hinei he Keriso?

¹³ Ma e fakatai, ne tohi e Paulo: “Ko tautolu kua momoui mo e toe ka [“ha ha hinei,” NW] e Iki [nakai ke he fakaotiaga he ha ha hinei haana], nakai mumua a tautolu kia lautolu kua momohe. Ha ko e mena haele hifo e Iki ni mai he lagi, mo e kalaga, mo e leo he agelu ne mua, mo e pu he Atua; to tutu fakamua mai a lautolu kua mamate ha ia Keriso; ti hamutia ai a tautolu kua momoui mo e toe, fakalataha mo lautolu ke he tau aolagi, ke fonofono e Iki ke he pulagi likoliko, ti fakalataha mau a tautolu mo e Iki.” (1 Tesalonia 4:15-17) Ko e mena ia, ko e tau Kerisiano fakauku ne mamate ato ha ha hinei he Keriso kua fakaliu tūtū fakamua ke he moui he lagi ia lautolu ne momoui agaia ka ha ha hinei he Keriso. Kakano e mena nei ko e liu tu mai fakamua kua liga kamata he mataulu he ha ha hinei he Keriso, ti matutaki ai ‘ke he vaha ka ha ha hinei ai a ia.’ (1 Korinito 15:23) He nakai hohoko oti e tau mena nei he taha e magaaho, kua fai magaaho ne hoko e liu tu mai fakamua.

“Kua Ta Age kia Lautolu Takitokotaha e Tau Tapulu Hina”

14. (a) Magaaho fe kua fakamooli e tau fakakiteaga ne tohi ia Fakakiteaga veveheaga 6? (e) Ko e heigoa ne fakatino mai he Fakakiteaga 6:9?

¹⁴ Manamanatu foki ke he fakamooliaga ne fakamau he Fakakiteaga veveheaga 6. Ne kitia ai a Iesu hane fina atu ai ko e Patuiki kua kautū. (Fakakiteaga 6:2) Ne putoia e tau motu ke he vala makimaki he tauaga. (Fakakiteaga 6:4) Ne holofa katoa ai e hoge. (Fakakiteaga 6:5, 6) Ne tamate he tau malaia kelea lahi e tau tagata. (Fakakiteaga 6:8) Ko e tau mena oti nei ne perofeta mai ne felauaki mooli mo e tau tutūaga he lalolagi tali mai he 1914. Ka e fai mena foki ne tupu. Ne hagaaki e onoonoaga ha tautolu ke he fatapoa. Ki lalo he fakavēaga he fatapoa  ko e “tau [tino] ha lautolu ne kelipopo ha ko e kupu he Atua, mo e talahauaga ne taofi ai e lautolu.” (Fakakiteaga 6:9) Ha “ko e toto ko e moui he tino haia,” ko e mena mooli ne hukui i lalo he fakavēaga he fatapoa ko e toto he tau fekafekau tua fakamooli ha Iesu ne kelipopo ha ko e talahau fakamalolō mo e makutu ha lautolu.​—Levitika 17:11.

15, 16. Fakamaama ko e ha kua hagaao e tau kupu he Fakakiteaga 6:10, 11 ke he liu tu mai fakamua?

¹⁵ Tuga e toto ha Apelu ne tututonu, ko e toto he tau Kerisiano mamate matulo nei kua tagi ma e fakafili tonu. (Kenese 4:10) “Kua tauui a lautolu mo e leo lahi, kua pehe atu, Ko e Iki na e, ko e tapu, mo e fakamoli, ato a fe kia he nakai fakafili e koe, mo e taui ha mautolu a tau toto kia lautolu kua nonofo ke he lalolagi?” Ko e heigoa foki ka tupu? “Kua ta age kia lautolu takitokotaha e tau tapulu hina; kua tala age foki kia lautolu ke tatali fakatekiteki ke he vaha tote, ato katoatoa mai ai ha lautolu a tau matakainaga a fekafekau, katoa mo e ha lautolu a tau matakainaga, kua nakaila kelipopo tuga na lautolu ni.”​—Fakakiteaga 6:10, 11.

¹⁶ Age kia e tau tapulu hina nei ke he loloto he toto ne fakavē i lalo he fatapoa? Nakai pihia! Ne age e tau tapulu ke he tau tagata takitaha ne fakamaligi e toto, tuga ki luga he fatapoa. Ne foaki e tau momoui ha lautolu ke he higoa a Iesu ti ko e mogonei ne fakaliu tūtū mai ko e tau agaaga. Iloa fēfē e tautolu e mena ia? He mataulu he tohi a Fakakiteaga, ne totou e tautolu: “Ko ia kua kautu to fakatapulu a ia ni ke he tau tapulu hina; ti nakai tamate foki e au hana higoa ke he tohi he moui.” Manatu foki, ko e tau patu ne 24 kua “tapulu a lautolu ke he tau tapulu hina; ha i ai foki ke he tau ulu ha lautolu e tau foufou auro.” (Fakakiteaga 3:5; 4:4) He mole ai e felakutaki, hoge, mo e tau tatalu kua kamata ke moumou e lalolagi, ko lautolu he 144,000 ne mamate, kua hukui he toto ki lalo he fakavē he fatapoa, ne fakaliu tūtū ke he moui he lagi mo e tapulu ke he tau tapulu hina fakatai.

17. Ke he puhala fe kua lata ia lautolu ne moua e tapulu hina ke “tatali”?

¹⁷ Ko lautolu ia ne fakaliu tūtū mai foou kua lata ke “tatali.” Kua lata ia lautolu ke fakatali fakatekiteki ke he aho taui he Atua. Ko e ‘tau matakainaga fekafekau’ ha lautolu ko e tau Kerisiano fakauku ne haia agaia ke he lalolagi, ne nakai katoatoa ai e mahani fakamooli ha lautolu i lalo he kamatamata. Ka hoko mai e magaaho ma e fakafiliaga faka-Atua, to oti e “tatali.” (Fakakiteaga 7:3) He magaaho ia, ko lautolu ne fakaliu tūtū mai ka fakalataha mo e Iki ko Iesu Keriso ke fakahoko e moumouaga ke he tau tagata mahani kelea, putoia a lautolu ne fakamaligi e toto he tau Kerisiano nakai mahani kelea.​—2 Tesalonia 1:7-10.

Ko e Kakano ma Tautolu?

18, 19. (a) Ko e heigoa e tau kakano ka fakaoti aki e koe e liu tu mai fakamua hane hoko mogonei? (e) Fēfē e logona hifo haau ke he maamaaga he liu tu mai fakamua?

¹⁸ Nakai fakakite he Kupu he Atua e aho tonu ma e liu tu mai fakamua, ka e fakakite mai ai kua fai magaaho ne hoko ai, ke he ha ha hinei he Keriso. Ko lautolu ka fakaliu tūtū mai ko e tau Kerisiano fakauku ne mamate ato kamata e ha ha hinei he Keriso. He hane hoko e ha ha hinei he Keriso, ko lautolu e tau Kerisiano fakauku ne tua fakamooli ti kua fakaoti e gahua ha lautolu he lalolagi ne hiki “tuga e magaaho ke kemo ai e mata” ke he tau mena momoui agaaga malolō. (1 Korinito 15:52) To moua oti kia e lautolu ne fakauku e palepale ha lautolu he lagi ato hoko e tauaga i Amaketo? Nakai iloa e tautolu. Ka e iloa e tautolu, ke he magaaho ni he Atua, to tūtū oti e 144,000 ki mua he Mouga ko Siona he lagi.

¹⁹ Kua iloa foki e tautolu to laulahi he 144,000 kua fitā he fakalataha mo Keriso. Toko gahoa ni ne toe he lalolagi. Ko e fakakiteaga malolō ha ia kua tata lahi mahaki mai ke fakahoko e fakafiliaga he Atua! Nakai mule, to moumou e fakatokaaga he lalolagi katoa ha Satani. To tuku a Satani he pahua. Ti, kamata ai e liu tu mai fakalaulahi, ti maeke he tau tagata tua fakamooli, ne fakavē ke he poa lukutoto ha Iesu, ke fakaliu tūtū mai ke he mitaki katoatoa tuga ia ke he mitaki katoatoa ne fakagalo e Atamu. Ne fakamooli homo ue atu e perofetaaga ha Iehova ne fakamau ia Kenese 3:15. Ko e lilifu ue atu ha ia ke momoui ke he vahā nei!

[Tau Matahui Tala]

Maeke Nakai a Koe ke Fakamaama?

Lagomatai fēfē he tau kupu tohi na a tautolu ke iloa e magaaho he “liu tu mai fakamua”?

• Fakakiteaga 12:7; 17:14

• Fakakiteaga 7:13, 14

• 1 Korinito 15:23; 1 Tesalonia 4:15-17

• Fakakiteaga 6:2, 9-11

[Tau Hūhū he Fakaakoaga]

[Tau Fakatino he lau 30]

Ko e heigoa e tau liu tu mai ne hoko ato fakaliu tūtū mai e tau tagata fakalaulahi he mate?

[Fakatino he lau 31]

Ke he puhala fe ne age e tapulu hina ki a lautolu pauaki ne momohe ke he mamate?