Kautūaga​—Fafati Fēfē e Koe?

NE MAILOGA he falu a ia ko e tagata kua mua atu e kautū tali mai he gahua he Wall Street, ne talahaua a Jesse Livermore he pulotu e tau fifiliaga fakapisinisi fa taute. Ko e fua, ne loga e monuina haana ne moua. Ne tui a ia he taute taha ne mua atu e mitaki he tuitui, nofo he fale lahi poko 29, mo e heke he Rolls-Royce uli ne taha e tagata fakaholo.

Ne mui foki a David * he puhala pihia. Ha ko e hagai pelesiteni mo e takitaki he matakau lahi ne ta palana, kua hane hake fakahaga a ia ke eke mo pelesiteni he takaiaga ma e kamupanī. Ne futiaki lahi a ia ke he monuina mo e tuaga tokoluga. Pete ia, ne taute e David a fifiliaga fakatagata ne takitaki atu a ia ke fakaoti e gahua haana. “Iloa e au to nakai fakaai au ke liu moua foki e tuaga takitaki gahua,” he talahau e David. Manatu nakai a koe kua hepe a David?

Tokologa ne talitonu ko e kautūaga kua putoia e moua he tau monuina, talahaua, po ke tuaga tokoluga. Ka e, ko lautolu ne olioli ke he tau monuina fakatino kua liga logona agaia e gatigati mo e nakai fai kakano mo e nakai fai takitakiaga e moui. Ne maaliali ai kua pihia e tuaga ha Mr. Livermore. Pete e tau monuina haana, ne moui loto mamahi a ia, matematekelea, mo e maanu. Ne logona e ia e fakaagitau, kaumahala e tau fakamauaga, mo e nakai mafanatia e fakafetuiaga mo e tau fanau taane haana. Fakahiku ai, he mole e lahi e monuina haana ne galo, ti he taha aho ne nofo a Mr. Livermore he fale kava he hotela tauuka mo e tagi aue ke he tau mena  haana ne galo. Ne ota e ia e inu, eke mai e pepa tote kili leta haana, mo e tohi e tohi mavehe ke he hoana haana. He maha e inu, ne hu atu a ia ke he poko tautau peleue pouliuli mo e fakahiku kelea ai kua tamate ne ia a ia.

Pete kua halavihi mooli e tupumaiaga he taupega haana, kua fakakite mai he mena nei e tonu he kupu mooli he Tohi Tapu ne pehē: “Ko lautolu kua manako ke maukoloa . . . kua hoka e lautolu a lautolu ti ati ni ke he tau mena matematekelea loga.”​—1 Timoteo 6:9, 10.

Ko lautolu ne fafati e kautūaga fakatatau ke he monuina, tuaga, po ke talahaua, kua liga hepe kia e tau tutūaga ne fakaaoga e lautolu? Manamanatu nakai a koe kua kautū a koe? Ko e ha? Ko e tau tutūaga fe haau ne fakaaoga ke taute e fifiliaga nei? Ko e heigoa ne fakaohooho e onoonoaga haau ke he kautūaga? Ko e vala tala ka mui mai to kumikumi ke he fakatonuaga kua fitā he fakagahua ti maeke e tau miliona tagata ke moua e kautūaga. O mai la ke kitekite ke he puhala ka taute foki a koe ke kautū.

[Matahui Tala]