Puhala kua Maeke ia Koe ke Kautū
Puhala kua Maeke ia Koe ke Kautū
TUGA he leveki he tau matua e tau fanau ha lautolu mo e manako ki a lautolu ke kautū, pihia foki e Matua ha tautolu he lagi ne leveki mai mo e manako ke kautū a tautolu. He fakakite e leveki hofihofi haana, ne loga e talahauaga haana hagaao ke he kautū mo e kaumahala. Ti, he tutala hagaao ke he tagata ne fanogonogo ke he kupu he Atua, ne talahau fakamalolō he Tohi Tapu: “To monuina foki a ia ke he tau mena oti kana ke eke e ia.”—Salamo 1:3.
Kaeke ke pihia mogoia, ko e ha ne fakagogoa e moui ne kautū, fiafia, mo e mauokafua ke he tokologa? Ko e onoono fakatata ke he salamo nei ka foaki ki a tautolu e tali mo e to fakakite mai ki a tautolu e puhala ke kautū foki a tautolu.
“Pulega he Tau Tagata Mahani Kelea”
Kua hataki mai e salamo ke he matematekelea he fano ke he “pulega he tau tagata mahani kelea.” (Salamo 1:1) Ko e takitaki ‘ia ne kelea’ ko Satani ko e Tiapolo. (Mataio 6:13) Kua tala mai he tau Tohiaga Tapu ki a tautolu ko ia “ko e iki he lalolagi nei” ti kua “ha he pule hana kua mahani kelea.” (Ioane 16:11; 1 Ioane 5:19) Ti, nakai ofo ko e laulahi he tau fakatonuaga ne ha ha he lalolagi kua fakaata e manamanatuaga haana ne mahani kelea.
Ko e heigoa e vahega fakatonu ne foaki e lautolu ne mahani kelea? Fa mahani, ko lautolu ne mahani kelea ne vihiatia e Atua. (Salamo 10:13) Ko e fakatonuaga ha lautolu ne fakaheu po ke vihiatia e Atua, kua viko takai ia tautolu. Kua fakaohooho he tau puhala foou “e manako lahi he tino, mo e manako lahi he tau mata, katoa mo e tau mena he mouiaga nai ke hula ki ai.” (1 Ioane 2:16) Kua tapeehi he puhala uta tala a tautolu aki e fakaakoaga ke muhu koloa ke “moua e tau mena oti ne manako a koe mai he moui.” Ke he lalolagi katoa, ne molea e 500 piliona talā (U.S.) he taha e tau ne fakamole he tau kamupanī ke he fakatātāaga ke fakaohooho e tau tagata ke fakatau e tau koloa ha lautolu—pete he lata po ke nakai lata mo lautolu. Ti ko e fakatātāaga nei kua lauia lahi e puhala fakatau koloa he tau tagata. Kua fakahehē e onoonoaga he lalolagi ke he kautūaga.
Ko e fua, pete kua moua he tau tagata e tau mena loga ne liga miti noa ki ai he tau tau kua mole, ne tō vevele agaia a lautolu ke loga atu foki e tau koloa fakatino. Ko e logonaaga, ka nakai moua e koe e tau mena nei, to nakai fakaai a koe ke fiafia po ke kautū. Kua fakavai e manatu nei mo e “nakai mai he Matua ia, ka e mai he lalolagi.”—1 Ioane 2:16.
Iloa he Tufuga ha tautolu e mena ka fakakautū mooli aki a tautolu. Kua kehe e fakatonuaga haana mai he “pulega he tau tagata mahani kelea.” Ko e mena ia, ko e lali ke moua e monuina he Atua ka e muitua ke he puhala he lalolagi ke kautū kua tuga e lali ke fano he ua e puhala kehekehe he taha e magaaho. Kua nakai maeke ke taute pihia. Ko e mena ia ni ati hataki mai he Tohi Tapu: “Aua neke mahani foki a mutolu fakalataha mo e lalolagi”!—Roma 12:2.
Ua Toka e Lalolagi ke Takitaki a Koe
Ko e lalolagi ha ha he fakaohoohoaga ha Satani kua lali ke tuga na fiafia ke he tau tutūaga ha tautolu. Ka kua lata ia tautolu ke fakaeneene. Manatu na fakavai lotokai e Satani e fifine fakamua ko Eva ke lata ni mo e tau manako haana. Ti fakaaoga e ia a Eva ke takitaki a Atamu ke he puhala he agahala. He vahā nei, kua fakaaoga foki e Satani e tau tagata ke talahau e tau fakatonuaga kelea haana.
Ma e fakatai, ko David ne tokutoku he vala tala kua mole, ne amanaki ke gahua loa mo e loga e tau fenoga pisinisi. “To fano tuai au he pogipogi Gofua mo e liu mai he afiafi Tuloto,” he ui e David. He mailoga ko e tau foakiaga pihia ka moua e kautūaga fakalalolagi, ne fakamafana he tau kapitiga mooli, tau tagata he magafaoa, mo e tau kapitiga gahua a David: “Taute ma e magafaoa haau.” Ne manamanatu a lautolu na gahoa ni e tau ka pihia e setulu ha David ato tūtū mitaki a ia. Ne fakamaama e David: “Ne manamanatu a lautolu kua mitaki e mena nei ma e magafaoa haaku ha kua maeke au ke loga e tupe ka moua—ti maeke au ke mua atu e kautū. Pete he nakai nofo au mo e magafaoa haaku, ne fakamalolō he tau kapitiga haaku au kua lahi atu e mena haaku kua taute ma e magafaoa haaku.” Kua tokologa ne tuga a David ne gahua malolō ke foaki ke he magafaoa e tau mena oti ne manatu a lautolu kua manako e tau fakahele ha lautolu ki ai. Ka e ko e muitua kia ke he vahega fakatonuaga pehenei ka takitaki ke he kautūaga? Ko e heigoa he magafaoa ne manako mooli ki ai?
Ne logona e David he magaaho ne fano he fenoga pisinisi. “Ne tala au he telefoni ke he tama fifine haaku ko Angelica, ne pehē a ia: ‘Tete, ko e ha ne nakai fia loto a koe ke nofo i kaina mo mautolu?’ Kua fakatupetupe lahi mahaki,” he talahau e David. Ne fakamalolō he talahauaga he tama fifine haana a ia ke tuku e tohi fakaoti gahua. Ne fifili a David ke foaki ke he magafaoa haana e mena ne loto mooli a lautolu ki ai—ko ia.
Kautūaga he Fakagahua e Fakatonuaga he Atua
Maeke fēfē ia koe ke fehagai mo e tau vala tala fakahehē ne kua holofa lahi he lalolagi nei? Kua tala mai he salamo ki a tautolu ko e tagata kua kautū mo e olioli ko ia haia ne ‘kua fiafia ke he fakatufono ha Iehova, ti manamanatu a ia ke he tau fakatufono hana ke he aho katoa mo e po.’—Salamo 1:2.
Magaaho ne kotofa he Atua a Iosua ke takitaki e motu ko Isaraela, ne tala age ki a ia: “Kia manamanatu ai a koe ke he [Kupu he Atua he] aho katoa mo e po.” E, kua aoga lahi e totou mo e manamanatu fakahokulo ke he Kupu he Atua, ka e lata foki ia Iosua ke “taofi e [ia] ke eke ai ke lata mo e tau mena oti kua tohi ai.” Mooli, ko e totou hokoia ke he Tohi Tapu ka nakai taute a koe ke moua noa e kautūaga. Kua lata ia koe ke fakagahua e tau mena haau ne totou. Ne tala age ki a Iosua: “Ti monuina a koe ke he tau puhala oti ke fano ai a koe.”—Iosua 1:8.
Manamanatu la ke he tama tote ne hapai he matua fakahele he totou a laua ke he tala ne fiafia lahi ki ai. Pete kua lagaloga e totou e laua e tala ia he magaaho fakamua, kua tokiofa e laua e tau magaaho uho pihia. Tuga foki e tagata ne fakaalofa ke he Atua kua logona e fiafia he totou tumau e Tohi Tapu he tau aho oti—ko e magaaho mitaki lahi ke fakaaoga mo e Matua he lagi. He muitua ke he fakatonuaga mo e takitakiaga ha Iehova, “to lata a ia mo e akau kua to ke he tapa he tau vai lele, to fua mai ke he hana tau fua ke he tau ni hana; to nakai mokulu foki hana tau lau, to monuina foki a ia ke he tau mena oti kana ke eke e ia.”—Salamo 1:3.
Ko e akau ne fakamaama he salamo ne nakai tupu hake noa ni. Ne to fakamitaki ai he tapa vai mo e leveki he tagata gahua fonua. Ke he puhala taha ia, ko e Matua ha tautolu he lagi kua hikihiki mo e fakahako e tau manamanatuaga ha tautolu puhala he fakatonuaga ne moua he tau Tohiaga Tapu. Ko e mena ne moua, kua tupu olaola mo e fua mai e tau mahani Atua ia tautolu.
Pete ia, “nakai pihia e tau tagata mahani kelea.” Mooli, ne tuga kua fai magaaho a lautolu he monuina ai, ka e fakahiku ni ne kelea e tau fua ne moua e lautolu. To “nakai tutu ai e tau tagata mahani kelea ke he fakafiliaga.” Ka e, “moumou ai e puhala he tau tagata mahani kelea.”—Salamo 1:4-6.
Ti kia nakai fakaatā e lalolagi ke takitaki e tau foliaga mo e tau mena kua aoga ki a koe. Pete he liga fai taleni a koe mo e maeke ke moua e tau kautūaga he lalolagi nei, kia fakaeneene ke he puhala ne fakaaoga e koe e tau taleni haau po ke puhala ne fakaatā e koe e lalolagi ke fakaaoga ai. Ko e tau tutuliaga nakai fai fua he velevelekoloa kua taute e tagata ke “mokulu foki hana tau lau.” Ke he taha faahi, ko e mitaki e fakafetuiaga mo e Atua kua moua e kautūaga mo e fiafia mooli.
Puhala Ka Kautū Ai a Koe
Ko e ha mogoia ka muitua he tagata e fakatonuaga he Atua to kautū e tau mena oti haana ka taute? Ne nakai tutala e salamo ke he kautūaga he lalolagi nei. Ko e kautūaga he tagata mahani Atua kua matutaki ke he taute e ia e finagalo he Atua—ti kua kautū tumau e finagalo he Atua. Kia kitekite la ke he puhala ka taute a tautolu ke kautū he fakagahua e tau matapatu fakaakoaga he Tohi Tapu.
Magafaoa: Kua tomatoma he tau Tohiaga Tapu e tau taane ke “fakaalofa age ke he tau hoana ha lautolu, tuga e tau tino ha lautolu,” mo e kua talahau ke he hoana Kerisiano ke “fakalilifu a ia ke he hana tane.” (Efeso 5:28, 33) Kua fakamafana ke he tau matua ke fai magaaho mo e tau fanau ha lautolu, ke tau fekī mo lautolu, mo e fakaako ki a lautolu e tau mena aoga he moui. (Teutaronome 6:6, 7; Fakamatalaaga 3:4) Kua fakatonu foki he Kupu he Atua e tau matua: “Aua neke fakahogohogomanava ke he fanau ha mutolu.” Ka fakagahua e fakatonuaga nei, to mukamuka ma e tau fanau ke “omaoma ke he tau matua ha [la]utolu” mo e ke “fakalilifu a [lautolu] ke he [ha lautolu] a matua tane, mo e [ha lautolu] a matua fifine.” (Efeso 6:1-4) Ko e muitua ke he fakatonuaga faka-Atua nei ka fua mai e kautūaga he moui magafaoa.
Tau Kapitiga: Laulahi e tau tagata ne manako ke fai kapitiga. Kua moua e tautolu e manamanatuaga mo e logonaaga ne maeke ke fakaalofa atu mo e mokoina. Ne tala age a Iesu ke he tau tutaki haana kua lata ia lautolu ke “feofanaki.” (Ioane 13:34, 35) Mai ia lautolu, kua maeke ia tautolu ke moua e tau kapitiga ne maeke ke fakaalofa mo e falanaki a tautolu ki ai—ke hoko ke he tau manatu hokulo mo e tau logonaaga ha tautolu. (Tau Fakatai 18:24) Mua atu, he fakagahua e tau matapatu fakaakoaga he Tohi Tapu, maeke ia tautolu ke ‘fakatata atu ke he Atua,’ he tuga a Aperahamo, ke fakahigoa foki ko e “kapitiga he Atua.”—Iakopo 2:23; 4:8.
Kakano he Moui: He nakai fai fakavēaga e moui he taha aho ke he taha aho, ko lautolu ne kautū mooli ne iloa e kakano he moui. Ne nakai fakavē e tau momoui ha lautolu he tau tutūaga maluelue he fakatokaaga he lalolagi nei. Kua takitaki atu e tau foliaga ha lautolu ke he fiafia mooli mo e tukulagi ha kua fakamatapatu ai ke he kakano tonu he moui. Ko e heigoa ne foaki ke he tagata e kakano he moui? “Kia matakutaku a ke he Atua, mo e omaoma ke he hana tau fakatufono; ha ko e mena ia kua lata ke eke he tau tagata oti kana.”—Fakamatalaaga 12:13.
Amaamanakiaga: He eke e Atua mo Kapitiga ha tautolu ka foaki foki e amaamanakiaga ma e vahā anoiha. Ne fakamalolō he aposetolo ko Paulo e tau Kerisiano ke “aua foki neke tua ke he koloa nakai tumau, ka ko e Atua.” He puhala nei, kua hane “tauteute e lautolu e koloa ma lautolu ni ko e fakaveaga mitaki mo e tau aho ne tatali, kia toto atu e lautolu ke he moui tukulagi.” (1 Timoteo 6:17-19) Ko e moui tukulagi nei to nakai leva ti hoko mai he magaaho ka liuaki mai he Kautū he Atua he lagi e Parataiso ke he lalolagi nei.—Luka 23:43.
Ka fakagahua e koe e tau fakatonuaga he Tohi Tapu, to nakai atāina a koe he tau lekua, ka e to hao a koe mai he tau mena fakamamahi mo e maanu ne taute he tau tagata mahani kelea ki a lautolu ni. Ko David ne totoku he vala fakamua, mo e tau miliona ne tuga a ia ne ako e aoga he fakagahua e tau matapatu fakaakoaga he Tohi Tapu he tau momoui ha lautolu. He mole e moua e gahua tupe ne felauaki mitaki e setulu, ne pehē a David: “Kua fakaaue au ke he fakafetuiaga haaku mo e hoana mo e tau fanau pihia mo e kotofaaga ke maeke ke fekafekau ki a Iehova ko e Atua he eke mo motua he fakapotopotoaga.” Ko e mena ia ni ne pehē e salamo hagaao ke he tagata ne fanogonogo ke he fakatonuaga he Atua: “To monuina foki a ia ke he tau mena oti kana ke eke e ia”!
[Fakafonua he lau 6]
LIMA E LAKAAGA KE HE KAUTŪAGA
1 Kia totoko neke takitaki he tau mena ne aoga he lalolagi nei.
2 Totou mo e manamanatu fakahokulo ke he Kupu he Atua he tau aho oti.
3 Fakagahua e fakatonuaga he Tohi Tapu he moui haau.
4 Taute e Atua mo kapitiga haau.
5 Matakutaku ke he Atua mooli, mo e omaoma haana tau poakiaga.
[Tau Fakatino he lau 7]
Kua muitua nakai a koe ke he tau lakaaga ke kautū?