To Fakatupu e Iehova e ‘Fakafili Tonu’

‘Ka e nakai kia fakafili tonu he Atua e tau mena ha lautolu ne fifili e ia, ha ha ne tauui a lautolu kia ia ke he aho mo e po?’​—LUKA 18:7.

1. Ko hai e punaaga he fakamalolōaga ki a koe, ti ko e ha?

KE HE lalolagi katoa, hane olioli he Tau Fakamoli a Iehova e feoaki mo e tau matakainaga Kerisiano ne fekafekau tua fakamooli ki a Iehova ke he tau tau loga. Kua iloa lahi nakai e koe e falu he tau fakahele nei? Liga manatu e koe e matakainaga fifine fuakau, ko ia kua leva e papatiso ke he tau tau loga ti gahoa lahi ni e magaaho ne fakatō e ia e tau feleveiaaga he Fale he Kautu. Po ke manatu e koe e matakainaga taane fuakau ne lalago tumau e tau gahua he fonua he fakapotopotoaga ke he tau faahi tapu oti ti kua taute pihia tali mai ke he loga e tau hogofulu tau. Mooli, ne manatu e tokologa ia lautolu nei ne tua fakamooli to hoko mai ti mole atu a Amaketo he vahā nei. Ka e ha kua ha ha agaia e lalolagi nakai tonu nei ne nakai fakalolelole he mena ia e mauokafua ha lautolu ke he tau maveheaga a Iehova po ke fakatote e malolō ha lautolu ke “tumau ato hoko e fakaotiaga.” (Mataio 24:13) Ko e hokulo he tua ne fakakite he tau fekafekau mahani fakamooli ia ha Iehova ko e punaaga mooli he fakamalolōaga ma e fakapotopotoaga katoa.​—Salamo 147:11.

2. Ko e heigoa e tau tutūaga ne momoko ai a tautolu?

² He falu magaaho liga kua mailoga e tautolu e aga kua kehe lahi. Kua leva tigahau e fakalataha e falu Fakamoli ke he fekafekauaga, ka e fakahiku ne lolelole e tua ha lautolu ki a Iehova, ti oti e fakalataha mo e fakapotopotoaga Kerisiano. Ko e mena momoko lahi ha kua tiaki he tau kapitiga fakamua ia ha tautolu a Iehova, ti kua manako lahi a tautolu ke fakatumau ke lagomatai e ‘tau mamoe hehē’ takitaha ke liliu ke he fuifui. (Salamo 119:176; Roma 15:1) Pete he pihia, kua tupu mai e tau hūhū ha ko e tau tutūaga fekehekeheaki nei, ne tua fakamooli e falu ka e tiaki ai he falu. Ko e heigoa ati maeke he tokologa he Tau Fakamoli ke fakatumau e tua ha lautolu ke he tau maveheaga a Iehova pete kua tiaki ai he falu? Ko e heigoa kua lata ke taute e tautolu ke mauokafua tumau e talitonuaga ha tautolu kua hane hoko mai e “aho lahi a Iehova”? (Sefanaia 1:14) Kia fakatutala a tautolu ke he fakataiaga i loto he Evagelia ha Luka.

Ko e Hatakiaga ma Lautolu ne Momoui “Ka Hau e Tama he Tagata”

3. Ko hai ka aoga pauaki mai he fakataiaga ke he fifine takape mo e ikifakafili, ti ko e ha?

³ He veveheaga 18 ha Luka, ne moua e tautolu e fakataiaga ha Iesu ke he fifine takape mo e ikifakafili. Ti tatai mo e fakataiaga hagaao ke he tagata leveki ne ole fakamakamaka ne kua fakatutala a tautolu ki ai he vala tala fakamua. (Luka 11:5-13) Pete ia, ne fakakite he tau faahi kupu he Tohi Tapu ke he fakataiaga he fifine takape mo e ikifakafili kua hagaao pauaki ki a lautolu ne momoui he magaaho “ka hau e Tama he tagata” ke he pule Kautu, ne kamata tali mai he 1914.​—Luka 18:8. *

4. Ko e heigoa ne tutala a Iesu ki ai fakamua to talahau e ia e fakataiaga he veveheaga 18 ha Luka?

⁴ Fakamua to talahau e fakataiaga ia, ne pehē a Iesu ko e fakamooliaga he ha ha hinei  haana ke he pule Kautu to kitia lahi ai “tuga e uhila” ne “kapa mai mai he taha fahi lagi, ti kikila atu ke he taha fahi lagi.” (Luka 17:24; 21:10, 29-33) Pete ia, ne nakai fanogonogo e laulahi he tau tagata ne nonofo he “vaha ke fakahiku ai” ke he fakamooliaga mahino ia. (Tanielu 12:4) Ko e ha a ia? Ha ko e kakano ia ni ne fakaheu he tau tagata he vahā ha Noa mo e ha Lota e tau hatakiaga a Iehova. Ko e tau tagata he vahā ia ‘kua kai, inu, fakafua mai, fakafua atu, tō mena, mo e ta fale ato hoko e aho ne fakaotioti ai a lautolu.’ (Luka 17:26-29) Ne mamate ai a lautolu ha kua lavelave lahi ke he tau gahua fa mahani ti nakai fanogonogo a lautolu ke he finagalo he Atua. (Mataio 24:39) He vahā nei, kua pihia foki e laulahi he tau tagata nukua lavelave lahi ke he tau gahua he tau aho takitaha ati nakai kitia e lautolu e mooli kua tata mai e fakaotiaga he lalolagi nakai mahani Atua nei.​—Luka 17:30.

5. (a) Ko hai ne hataki fakahako a Iesu ki ai, ti ko e ha? (e) Ko e heigoa ne fakatupu falu ke tiaki ha lautolu a tua?

⁵ Kua kitia maali ai e kapaletū ha Iesu neke fakalavelave foki he lalolagi ha Satani e tau tutaki haana, ati ‘liliu ki tua’ a lautolu. (Luka 17:22, 31) Ti kua tupu mooli e mena nei ke he falu Kerisiano. Ke he tau tau loga ne fakatalitali a lautolu ia ke he aho ka fakaotioti e Iehova e lalolagi kelea nei. Ka e, he nakai hoko mai a Amaketo he magaaho ne amanaki a lautolu ki ai, ne fakalolelole a lautolu. Ati galo fakahaga e mauokafua ha lautolu ke he tata he aho he fakafiliaga ha Iehova. Ne fakatuai a lautolu ke he fekafekauaga ti fakahiku putoia lahi ke he tau mena fa mahani he moui ati tote lahi e magaaho ne toe ma e tau mena fakaagaaga. (Luka 8:11, 13, 14) Fai magaaho ti ‘liliu ki tua’ a lautolu​—ko e momoko ha ia!

Ko e Lata ke “Liogi Mau”

6-8. (a) Talahau e fakataiaga ke he fifine takape mo e ikifakafili. (e) Fakamaama fēfē e Iesu e fakataiaga nei?

⁶ Ko e heigoa kua lata ia tautolu ke taute ke mataala neke fakalolelole e mauokafua ha tautolu ke he fakamooliaga he tau maveheaga a Iehova? (Heperu 3:14) Ne tali e Iesu e hūhū ia he nakai leva e hataki atu ke he tau tutaki ke nakai liliu ki tua ke he lalolagi kelea ha Satani.

⁷ Ne talahau e Luka “kua tala age foki e [Iesu] e fakatai kia lautolu, kia liogi mau ke lata ai, ka e aua neke fakalolelole.” Ne pehē a Iesu: “Ha he taha māga e taha fakafili, kua nakai matakutaku ke he Atua, ti nakai maimaina ke he tau tagata. Ha he māga foki ia e taha fifine takape, ne fano kia ia, kua pehe age, Kia fakafili [tonu] e koe a ia ha i ai haku a tau mena. Ko e falu a aho nakai maeke ai a ia; ati oti, ka e pehe hifo a ia ke he hana loto, Pete ni he nakai matakutaku au ke he Atua, ti nakai maimaina au ke he tau tagata; ka ko e mena kua fakahoha mai kia au e fifine takape nei, ti fakafili [tonu] ai e au hana tau mena, neke fakamamahi mai kia au he fa hau mau a ia.”

⁸ He oti e talahau e mena nei, ne fakamaama e Iesu: “Kia fanogonogo mai a a mutolu ke he kupu he fakafili mahani hepehepe. Ka e nakai kia fakafili [tonu] he Atua e tau mena ha lautolu ne fifili e ia, ha ha ne tauui a lautolu kia ia ke he aho mo e po, pete ni he mule mai a ia kia lautolu? Kua tala atu e au kia mutolu, To fakafili [tonu] vave e ia e tau mena ha lautolu. Ka hau e Tama he tagata, mailoga he ha ke moua mai e ia e tua ke he lalolagi?”​—Luka 18:1-8.

‘Kia Fakafili Tonu e Koe Au’

9. Ko e heigoa e matakupu ne peehi lahi he fakataiaga ke he fifine takape mo e ikifakafili?

⁹ Kua maama lahi e matapatu kakano he fakataiaga maaliali nei. Ne talahau e laua i loto he fakataiaga ti talahau foki e Iesu. Ne ole fakamakamaka e fifine takape: ‘Kia fakafili tonu e koe au.’ Ne tala age e ikifakafili: ‘To fakafili tonu ai e au hana tau mena.’ Ne hūhū e Iesu: ‘Ka e nakai kia fakafili tonu he Atua e tau mena?’ Hagaao ki a Iehova, ne pehē a Iesu: ‘To fakafili tonu vave e ia a lautolu.’ (Luka 18:3, 5, 7, 8) A fe mooli ka ‘fakatupu he Atua e fakafili tonu’?

10. (a) I ne fe ne fakahoko e fakafili tonu he senetenari fakamua? (e) A fe mo e ke he puhala fe ka fakahoko e fakafili tonu ke he tau fekafekau he Atua he vahā nei?

 ¹⁰ He senetenari fakamua, “ko e tau aho ia ke fakahala ai” kua hoko he 70 V.N. magaaho ne moumou a Ierusalema mo e faituga i ai. (Luka 21:22) Ma e tau tagata he Atua he vahā nei, to fakahoko e fakafili tonu he “aho lahi a Iehova.” (Sefanaia 1:14; Mataio 24:21) He magaaho ia to “taui atu [e Iehova] e matematekelea kia lautolu kua matematekelea” ai e tau tagata haana he “taui atu [a Iesu Keriso] kia lautolu kua nakai iloa e Atua, mo lautolu kua nakai omaoma ke he vagahau mitaki he Iki ha tautolu ko Iesu.”​—2 Tesalonia 1:6-8; Roma 12:19.

11. Ke he puhala fe ka hoko mai “vave” e fakafili tonu?

¹¹ Ka e lata ke maama fēfē e tautolu e fakamafana ha Iesu to fakatupu “vave” e Iehova e fakafili tonu? Ne fakakite he Kupu he Atua “pete ni he mule mai a [Iehova],” to fakahoko vave e ia e fakafili tonu he magaaho kua kotofa. (Luka 18:7, 8; 2 Peteru 3:9, 10) He vahā ha Noa, magaaho ne Fakapuke ai, kua nakai mule ke fakaotioti a lautolu ne mahani kelea. Pihia foki he vahā ha Lota, ne mamate e tau tagata he magaaho ne tō hifo po ke uha e afi mai he lagi. Ne pehē a Iesu: “To eke pihia ni ke he aho ke fakakite mai ai e Tama he tagata.” (Luka 17:27-30) Ka e to liu hoko foki e ‘mahaikava fakalutukia’ ke he tau tagata mahani kelea. (1 Tesalonia 5:2, 3) Mooli, kua mauokafua katoatoa a tautolu to nakai fakaatā he fakafili tonu ha Iehova e lalolagi ha Satani ke fai aho ke hao atu foki.

‘To Fakatupu e Ia e Fakafili Tonu’

12, 13. (a) Ko e heigoa e fakaakoaga he fakataiaga ha Iesu ke he fifine takape mo e ikifakafili? (e) Ko e ha kua mauokafua ai to logona e Iehova e tau liogi ha tautolu mo e fakatupu e fakafili tonu?

¹² Kua fai kupu aoga mooli agaia e fakataiaga ha Iesu ke he fifine takape mo e ikifakafili. He fakamaama e fakataiaga, ne pehē a Iesu: “Kia fanogonogo mai a a mutolu ke he kupu he fakafili mahani hepehepe. Ka e nakai kia fakafili he Atua e tau mena ha lautolu ne fifili e ia?” Mooli, kua nakai fakatatai e Iesu a Iehova ke he ikifakafili ke tuga ke pehē, na pihia e fakafehagai he Atua ke he tau tagata talitonu. Ka e fakaako e Iesu e tau tutaki haana hagaao ki a Iehova he fakamaama e kehe he ikifakafili mo e Atua. Ko e heigoa e falu puhala ne kehekehe ai a laua?

¹³ Ko e ikifakafili he fakataiaga ha Iesu kua “mahani hepehepe,” ka ko e ‘Atua ko e Ikifakafili tututonu a ia.’ (Salamo 7:11; 33:5) Ne nakai manamanatu e ikifakafili ke he fifine takape, ka ko Iehova kua manamanatu a ia ke he tau tagata takitokotaha. (2 Nofoaga he Tau Patuiki 6:29, 30) Ne nakai maimainā e ikifakafili ke lagomatai e fifine takape, ka kua maimainā a Iehova​—e, kua fakamakai—​ke lagomatai a lautolu ne fekafekau ki a Ia. (Isaia 30:18, 19) Ko e heigoa e fakaakoaga? Kaeke ke fanogonogo e ikifakafili mahani hepehepe ke he ole he fifine takape ti fakafili tonu ki a ia, kua nakai kia mua atu e fanogonogo ha Iehova ke he tau liogi he tau tagata haana mo e  fakatupu mooli e fakafili tonu ki a lautolu!​—Tau Fakatai 15:29.

14. Ko e ha kua nakai lata ia tautolu ke tiaki e tua ke he hauaga he aho he fakafiliaga he Atua?

¹⁴ Ti kua kelea muitui e mena ne taute e lautolu ne tiaki e tua ke he hoko mai he aho he fakafiliaga he Atua. Ko e ha? He tiaki e taofiaga mauokafua ha lautolu ne hagaao ke he tata maiaga he “aho lahi a Iehova,” kua fakakite e lautolu e fakauaua ke falanaki ki a Iehova ke fakamooli e tau maveheaga haana. Ka e nakai ha ha he taha tagata e tonuhia ke hūhū atu ke he mooli he Atua. (Iopu 9:12) Ko e hūhū aoga lahi anei, To fakatumau nakai a tautolu takitokotaha ke tua fakamooli? Ti ko e matakupu tonu ia ne talahau e Iesu he matahiku he fakataiaga ke he fifine takape mo e ikifakafili.

“To Moua Mooli Kia e Ia e Tua Nei he Lalolagi?”

15. (a) Ko e heigoa e hūhū ne talahau e Iesu, ti ko e ha? (e) Ko e heigoa kua lata ke hūhū hifo ki a tautolu ni?

¹⁵ Ne talahau e Iesu e hūhū fakalagalaga: “Ka hoko mai e Tama he tagata, to moua mooli kia e ia e tua nei he lalolagi?” (Luka 18:8, matahui tala NW) Ne fakakite he tau kupu “tua nei,” kua nakai hagaao a Iesu ke he tau kakano loga he tua ka e hagaao ke he tua pauaki​—tuga ne moua he fifine takape. Ti nakai tali e Iesu e hūhū ni haana. Ka e hūhū ai e ia ke manamanatu e tau tutaki haana ke he uho he tua ha lautolu. Kua lolelole fakahaga kia e tua ha lautolu, ti kua hagahaga kelea ai ke liliu ki tua ke he tau mena kua tiaki? Po kua ha ha ia lautolu e vahega he tua ne fakakite he fifine takape? He vahā nei, kua lata foki ia tautolu ke hūhū hifo pihia, ‘Ko e vahega tua fēfē ka kitia he “Tama he tagata” he loto haaku?’

16. Ko e vahega tua fēfē he fifine takape?

¹⁶ Ke fakalataha auloa a tautolu mo lautolu ka moua e fakafili tonu ha Iehova, kua lata ia tautolu ke muitua ke he puhala he fifine takape. Ko e vahega tua fēfē haana? Ne fakakite e ia e tua haana he fakamakamaka ke ‘fano ke he ikifakafili, kua pehē age, Kia fakafili tonu e koe au.’ Ne fakamakamaka e fifine takape ia ke moua e fakafili tonu mai he tagata mahani hepehepe. Pihia foki, lata he tau fekafekau he Atua he vahā nei ke mauokafua to moua e lautolu e fakafili tonu mai ia Iehova​—pete he fai magaaho ka mole ke he mena ne amanaki ki ai a lautolu. Taha mena foki, kua  fakakite e lautolu e mauokafua ke he tau maveheaga he Atua he liogi fakamakamaka​—e, he ‘tauui kia Iehova ke he aho mo e po.’ (Luka 18:7) Mooli, kaeke ke mamutu e liogi he Kerisiano ma e fakafili tonu, kua fakakite e ia e nakai mauokafua haana ki a Iehova ke lagomatai e tau fekafekau haana.

17. Ko e heigoa e tau kakano ha ha ia tautolu ke fakamakamaka ke he liogi mo e taofi mau e tua ke he hoko mai mooli he aho fakafili ha Iehova?

¹⁷ Kua fakakite mai he falu tutūaga he fifine takape e tau kakano ne ha ha foki ia tautolu ke fakamakamaka ke he liogi. Mailoga e tau tutūaga kehekehe he vahāloto haana mo e ha tautolu. Ne fakatumau e fifine takape ke fano ke he ikifakafili pete he nakai fai tagata ne fakamalolō a ia ke taute pihia, ka e foaki mai he Kupu he Atua ki a tautolu e tau fakamalolō loga ke “fakamakamaka ke he liogi.” (Roma 12:12) Ne nakai fai fakamooliaga e fifine takape to moua e ole haana, ka kua fakamooli mai a Iehova ki a tautolu to hoko e fakafili tonu. He puhala mai he perofeta haana, ne talahau e Iehova: “Pete he fakamule mai a ia, ka kia tatali atu ki ai; ha ko e mena to hoko mai ni, nakai mule mai.” (Hapakuka 2:3; Salamo 97:10) Ne nakai fai tagata lagomatai e fifine takape ke lalago a ia ke omoi e ole haana. Ka e ha ha ia tautolu e lagomatai malolō ue atu, ko Iesu, “ko ia foki ha ha he fahi matau he Atua, ko ia foki kua ole ma tautolu.” (Roma 8:34; Heperu 7:25) Ti kaeke kua fakatumau e fifine takape ke ole ke he ikifakafili pete ko e tuaga halauka haana, he lali ke moua e fakafili tonu, kua lata lahi foki ia tautolu ke taofi mau e tua ha tautolu ke he hoko mai mooli he aho fakafili ha Iehova!

18. Puhala fe ka fakamalolō he liogi e tua ha tautolu mo e lagomatai a tautolu ke moua e fakafili tonu?

¹⁸ Ne fakaako mai he fakataiaga ke he fifine takape ki a tautolu e matutakiaga tata he vahāloto he liogi mo e tua mo e kua maeke he tau liogi fakamakamaka ha tautolu ke totoko e tau fakaohoohoaga ka fakalolelole e tua ha tautolu. Ka e nakai kakano e mena nei kua puipui he tau liogi totoku noa e tua ha tautolu neke lolelole. (Mataio 6:7, 8) Ka liogi a tautolu ha kua mailoga e falanaki katoatoa ke he Atua, ne futiaki he liogi a tautolu ki a ia mo e fakamalolō e tua ha tautolu. Ha kua lata e tua ma e fakamouiaga ati mailoga e Iesu e lata ke fakamalolō e tau tutaki haana ke ‘liogi mau ka e aua neke fakalolelole’! (Luka 18:1; 2 Tesalonia 3:13) Mooli, kua nakai falanaki e hoko mai he “aho lahi a Iehova” ke he tau liogi ha tautolu​—ka e to hoko mai ni pete kua liogi po ke nakai liogi a tautolu ki ai. Pete he moua e tautolu takitokotaha e fakafili tonu ti hao po ke nakai hao mai he tauaga he Atua kua falanaki katoatoa ni ke he tua ne ha ha ia tautolu mo e ke he puhala tututonu ne tutuli e tautolu he liogi.

19. Maeke fēfē ia tautolu ke fakakite mooli kua talitonu mauokafua a tautolu to fakatupu he Atua e ‘fakafili tonu’?

¹⁹ He manatu e tautolu a Iesu ne hūhū: “Ka hoko mai e Tama he tagata, to moua mooli kia e ia e tua nei he lalolagi?” Ko e heigoa e tali ke he hūhū fakalagalaga haana? Kua fiafia lahi a tautolu ha kua totou miliona e tau fekafekau tua fakamooli ha Iehova he lalolagi katoa he vahā nei nukua fakakite ke he tau liogi, fakauka, mo e fakamakamaka ha lautolu kua moua mooli e lautolu e tua nei! Ati moua ai e tali mitaki ke he hūhū ha Iesu. E, pete he tamai he lalolagi ha Satani mogonei e nakai fakafili tonu ki a tautolu, kua talitonu mauokafua agaia a tautolu to fakatupu he Atua e ‘fakafili tonu ke he tau mena ne fifili e ia.’

[Matahui Tala]

To Tali Fēfē e Koe?

• Ko e heigoa ne taute falu Kerisiano ke tiaki e tua?

• Ko e ha kua lata ia tautolu ke moua e tua mauokafua ke he hoko mai he aho he fakafiliaga ha Iehova?

• Ko e heigoa e tau kakano ne ha ha ia tautolu ke fakamakamaka ke he liogi?

• Maeke fēfē he liogi fakamakamaka ke puipui a tautolu neke tiaki e tua?

[Tau Hūhū he Fakaakoaga]

[Fakatino he lau 20]

Ko e heigoa ne fakamaama he fakataiaga ke he fifine takape mo e ikifakafili?

[Tau Fakatino he lau 21]

Totou miliona he vahā nei kua talitonu mauokafua to fakatupu he Atua e ‘fakafili tonu’