Fakatumau e Tupu he Loto Fakaaue Haau
Fakatumau e Tupu he Loto Fakaaue Haau
“Kua uhoaki ni kia au hāu a tau manamanatu, kua loga ue atu e katoatoa ha lautolu ka lafilafi.”—SALAMO 139:17.
1, 2. Ko e ha kua lata ia tautolu ke loto fakaaue ke he Kupu he Atua, ti talahau fēfē he salamo haana a loto fakaaue?
KO E mouaaga ofoofogia. He fakafoou e faituga a Iehova i Ierusalema, ko e Ekepoa ne Mua ko Hilikia ne moua e “tohi he fakatufono a Iehova ne tohi e Mose,” kua nakai fakauaua ne tohi katoa e lagaki fakamua ke he kavi ke 800 e tau fakamua atu! Fēfē e manamanatuaga haau ke he logonaaga he patuiki matakutaku Atua ko Iosia he magaaho ne fofola ai e tohi ki mua haana? Mooli, ne tokiofa e ia ti tala age ki a Safana ko e tohikupu, kia totou fakaleo lahi ai.—2 Nofoaga he Tau Patuiki 34:14-18.
2 He vahā nei, kua tohi katoa po ke he vala e Kupu he Atua ne maeke ke totou ai he tau piliona. Ka e taute kia he mena ia e tau Tohiaga Tapu ke nakai aoga po ke uho lahi? Nakai pihia! Nukua tohi ai i loto e tau manatu ni he Malolō Ue Atu ke aoga ai a tautolu. (2 Timoteo 3:16) He fakakite e tau logonaaga haana hagaao ke he Kupu he Atua, ne tohi he salamo ko Tavita: “Kua uhoaki ni kia au hāu a tau manamanatu, kua loga ue atu e katoatoa ha lautolu ka lafilafi.”—Salamo 139:17.
3. Ko e heigoa ne fakakite ko Tavita ko e tagata ne hokulo fakaagaaga?
3 Ko e loto fakaaue ha Tavita ki a Iehova, haana Kupu, mo e haana fakatokaaga ma e tapuakiaga mooli ne nakai galo. Ko e tau salamo fulufuluola loga ne fati e Tavita nukua fakakite e logonaaga haana. Ma e fakatai, ia Salamo 27:4, ne tohi e ia: “Taha mena ne ole au mai ia Iehova, ko e mena ia ni ke kumi atu e au ki ai; kia nofo au ke he fale a Iehova ke he tau aho oti he haku a moui, kia kitia ai e au e fulufuluola a Iehova, mo e kumikumi [“loto fakaaue,” NW] ke he hana faituga.” He tau kupu Heperu ko e ‘kumikumi loto fakaaue’ kua kakano ke takele ke he manamanatuaga, ke filifilia, ke kitia mo e olioli, fiafia, mo e nava. Maaliali ai, ko Tavita ko e tagata ne hokulo fakaagaaga ne loto fakaaue mooli ke he tau foakiaga fakaagaaga ha Iehova mo e fagai ke he tau valavala oti he kupu mooli fakaagaaga ne fakakite he Atua. Ko e fakafifitakiaga haana he loto fakaaue kua uho lahi ke fifitaki ki ai.—Salamo 19:7-11.
Loto Fakaaue ke he Kotofaaga he Iloa e Kupu Mooli he Tohi Tapu
4. Ko e heigoa ne fakatupu a Iesu ke ‘fiafia lahi ke he agaaga tapu’?
4 He moua e maama ke he Kupu he Atua kua nakai falanaki ke he lotomatala po ke fakaakoaga fakalalolagi, ne liga ke feaki e fakaikaluga. Ka e falanaki ai ke he totonu noa ha Iehova, kua foaki e ia ke he tau tagata loto molū mooli hane manamanatu ke he tau manako fakaagaaga ha lautolu. (Mataio 5:3, NW; 1 Ioane 5:20) He magaaho ne manamanatu hokulo a Iesu ke he falu tagata nakai mitaki katoatoa ne tohi e tau higoa ha lautolu he lagi, “kua fiafia lahi ai e finagalo a Iesu [“ke he agaaga tapu,” NW], ti kua pehe age a ia, Kua fakaaue au kia koe ma Matua na e, ko e Iki he lagi mo e lalolagi, he ufiufi e koe e tau mena nai he tau tagata iloilo, mo e loto matala, ka kua fakakite atu ai ke he tau tama mukemuke.”—Luka 10:17-21.
5. Ko e ha ne nakai uta fakateaga he tau tutaki a Iesu e tau kupu mooli he Kautu ne fakakite ki a lautolu?
5 He talahau e liogi ia mai he loto, ne haga a Iesu ke he tau tutaki haana mo e pehē: “Uhoaki e tau mata ha lautolu kua kitia he tau mena kua kitia e mutolu; ha ko e mena ke tala atu e au kia mutolu, tokologa e tau perofeta mo e tau patuiki ne fia mamata ke he tau mena nai kua kitia e mutolu, ka e nakai kitia e lautolu; ne fia fanogonogo foki ke he tau mena nai kua fanogonogo ai a mutolu, ka e nakai fanogonogo ai a lautolu.” E, ne fakamalolō e Iesu e tau tutaki tua fakamooli haana ke nakai uta fakateaga e tau kupu mooli uho he Kautu ne fakakite ki a lautolu. Kua nakai fakakite e tau kupu mooli nei ke he tau atuhau fakamua atu he tau fekafekau he Atua, ti ufiufi foki ke he “tau tagata iloilo, mo e loto matala,” he vahā a Iesu!—Luka 10:23, 24.
6, 7. (a) Ko e heigoa e kakano ne loto fakaaue a tautolu ke he kupu mooli faka-Atua? (e) Ko e heigoa e kehekeheaga he vahā nei he lotu mooli mo e fakavai?
6 He vahā ha tautolu, kua loga atu foki e tau kakano ke loto fakaaue a tautolu ke he kupu mooli faka-Atua, ha kua foaki agaia e Iehova, he puhala he “fekafekau fakamoli mo e loto matala,” ke he tau tagata haana e maama hokulo he Kupu haana. (Mataio 24:45; Tanielu 12:10) Hagaao ke he magaaho he fakaotiaga, ne tohi he perofeta ko Tanielu: “To tafepoi tafeliuaki foki e tau tagata tokologa, to tupu lahi ai foki e mahani iloilo.” (Tanielu 12:4) Nakai kia talia e koe, he vahā nei ko e iloilo he Atua kua “tupu lahi ai” ti ko e mena ia kua makona lahi fakaagaaga e tau fekafekau a Iehova?
7 Kua kitia e tautolu e kehekeheaga he monuina fakaagaaga he tau tagata he Atua mo e fakagogoa fakalotu ha Papelonia Lahi! Ti ko e fua, tokologa ne fakavaia po ke fakalialia ke he lotu fakavai hane haga atu ke he tapuakiaga mooli. Ko lautolu ne tuga e tau mamoe kua ‘nakai manako ke fakalataha mo Papelonia Lahi ke he hana tau hala’ po ke “moua foki . . . he hana tau malaia.” Ne uiina e Iehova mo e tau fekafekau haana a lautolu ia ke he fakapotopotoaga Kerisiano mooli.—Fakakiteaga 18:2-4; 22:17.
Fakapotopoto a Lautolu ne Loto Fakaaue ke he Atua
8, 9. Nukua fakamooli fēfē e tau kupu ia Hakai 2:7 he vahā nei?
8 Hagaao ke he fale fakaagaaga haana he tapuakiaga, ne talahau tuai e Iehova: “To luelue foki e au e tau motu oti; ti hoko mai ai e tau mena kua manako ki ai e tau motu oti; to fakapuke foki e au e fale nai ke he lilifu.” (Hakai 2:7) Ko e perofetaaga ofoofogia nei ne fakamooli he vahā a Hakai he magaaho ne talaga he tau tagata fakauku he Atua e faituga i Ierusalema. He vahā nei, ne fai fakamooliaga foki e tau kupu ha Hakai hagaao ke he faituga fakaagaaga lahi a Iehova.
9 Totou miliona ne fitā e tafe mai ke he faituga fakatai ke maeke ke tapuaki ke he Atua “mo e agaga mo e fakamoli,” mo e he tau tau takitaha kua totou teau afe e “tau mena kua manako ki ai e tau motu oti” ne matutaki ke tafe mai. (Ioane 4:23, 24) Ma e fakatai, ko e hokotaki he lalolagi katoa ma e tau he fekafekauaga he 2006 ne fakakite ko e 248,327 kua papatiso he fakamailoga he tukuleleaga ha lautolu ki a Iehova. Ne fakakite he mena ia e evalesi he 680 a lautolu ne foou he tau aho takitaha! Ko e ofania ha lautolu ke he kupu mooli mo e manako ke fekafekau ki a Iehova ko e tau tagata fakailoa he Kautu kua fakamooli nukua futiaki mooli a lautolu ke he Atua.—Ioane 6:44, 65.
10, 11. Talahau e mena ne tupu kua fakakite e puhala ne loto fakaaue e tau tagata ke he kupu mooli he Tohi Tapu.
10 Tokologa ia lautolu nei ne loto fakamooli ne futiaki ke he kupu mooli ha kua mailoga e lautolu e “kehe e tagata mahani tututonu, kehe e tagata mahani kelea; kua kehe a ia kua fekafekau ke he Atua, mo ia kua nakai fekafekau kia ia.” (Malaki 3:18) Manamanatu ke he mena ne tupu ki a Wayne mo Virginia, ko e hoa mau ne fakalataha ke he lotu Porotesano ka e loga e tau hūhū ne nakai tali. Ne vihiatia e laua e felakutaki ti fakagogoa mo e tupetupe a laua he kitia e tau akoako ne fakamonuina e tau kautau mo e tau kanavaakau tau. He fuakau fakahaga e hoa, ne logona hifo e laua e fakaheu mai he falu he lotu, pete ne fakaako a Virginia he aoga Aho Tapu ke he loga e tau tau. “Nakai fai ne aahi mai po ke fakakite e fiafia ke he tuaga fakaagaaga ha maua,” he talahau e laua. “Ko e mena ni ne manako e lotu mai ia maua ko e tupe. Ne fakagogoa a maua.” Ne mua atu e fakagogoa ha maua he magaaho ne fakagofua he lotu ha laua e mahani fakasotoma.
11 Ka ke he magaaho ia, ko e mokopuna fifine ha Wayne mo Virginia ti fakamui ko e tama fifine ha laua ne eke mo Tau Fakamoli a Iehova. Pete ne nakai fiafia a Wayne mo Virginia he magaaho fakamua ke he mena nei, ne fakahiku ti hiki e tau manamanatuaga ha laua mo e talia e fakaakoaga Tohi Tapu. “He tolu ni e mahina,” ne talahau e Wayne, “ne lahi e mena ne ako e maua hagaao ke he Tohi Tapu ke he mena ne ako e maua ke he 70 e tau fakamua! Ne nakai iloa e maua e higoa he Atua ko Iehova, ti nakai iloa e maua ha mena ke he Kautu mo e lalolagi Parataiso.” Nakai leva, ko e hoa fakamooli nei ne kamata ke ō he tau feleveiaaga Kerisiano mo e fakalataha ke he fekafekauaga. “Manako a maua ke talahau ke he tau tagata oti hagaao ke he kupu mooli,” he ui e Virginia. He taki 80 tumā e tau tau he moui ha laua, ne papatiso a laua he 2005. “Kua moua e maua e kaina Kerisiano mooli,” he talahau e laua.
Loto Fakaaue he ‘Taute e Tau Gahua Mitaki Oti Kana’
12. Ko e heigoa ne foaki tumau e Iehova ma e tau fekafekau haana, ti ko e heigoa kua lata ia tautolu ke taute ke aoga mai ai?
12 Ne lagomatai tumau e Iehova e tau fekafekau haana ke taute e finagalo haana. Ma e fakatai, ne moua e Noa e tau hatakiaga pauaki mo e maaliali ke he puhala ke ta aki e vaka—ko e matagahua nukua lata ke hakotika! Ti pihia ni. Ko e ha? Ha kua “eke ni e Noa; tuga ne poaki mai he Atua kia ia ke he tau mena oti, ne eke pihia ai e ia.” (Kenese 6:14-22) He vahā nei foki, hane taute katoatoa e Iehova haana tau fekafekau ke taute haana finagalo. Mooli, ko e matapatu gahua ha tautolu ko e fakamatala e tala mitaki he Kautu he Atua ne fakatū ti lagomatai a lautolu kua latatonu ke eke mo tau tutaki ha Iesu Keriso. Ke tuga a Noa, ko e kautūaga ha tautolu kua falanaki ke he omaoma. Kua lata ia tautolu ke omaoma he muitua ke he takitakiaga a Iehova ne puhala mai he Kupu mo e fakatokatokaaga haana.—Mataio 24:14; 28:19, 20.
13. Ko e heigoa e tau puhala ne foaki e Iehova ki a tautolu e fakamahaniaga?
13 Ke maeke ke fakakatoatoa e gahua ia, kua lata ia tautolu ke ako ke “fakatokatoka fakahako” e matapatu kanavaakau ha tautolu—ko e Kupu he Atua—ne kua “aoga ni ke fakaako ai, ke fakatonu ai, ke akonaki ai, ke fakailoilo ai foki ke he tututonu, Kia katoatoa ai e mitaki he tagata he Atua, kia taute ni a ia ke he tau gahua mitaki oti kana.” (2 Timoteo 2:15; 3:16, 17) Tuga he senetenari fakamua, ne foaki e Iehova ki a tautolu e fakamahaniaga aoga he puhala he fakapotopotoaga Kerisiano. He vahā nei, he tau fakapotopotoaga ne 99,770 ke he lalolagi katoa, kua fakahoko e Aoga Fekafekau Fakateokarasi mo e Feleveiaaga Fekafekau he tau faahitapu takitaha ke lagomatai a tautolu ke he fekafekauaga ha tautolu. Fakakite nakai e koe e loto fakaaue haau ke he tau feleveiaaga aoga nei he fakalataha tumau ki ai mo e fakagahua e tau mena ne ako e koe?—Heperu 10:24, 25.
14. Fakatātā fēfē he tau fekafekau a Iehova e loto fakaaue ha lautolu ma e kotofaaga he fekafekau ke he Atua? (Putoia e tau talahauaga ke he fakafonua he lau 27-30.)
14 He eketaha a lautolu ke he fekafekauaga, totou miliona e tau tagata he Atua he lalolagi katoa hane fakatātā e loto fakaaue ha lautolu ma e fakamahaniaga ne moua e lautolu. Ma e fakatai, he tau he fekafekauaga he 2006, ne 6,741,444 e tagata fakailoa he Kautu ne fakaaoga 1,333,966,199 e tulā he katoatoa ke he tau faahi oti he gahua, putoia e 6,286,618 he tau fakaakoaga Tohi Tapu. Ko e falu ni anei he tau fakamatafeiga atihake ne tohi he hokotaki he lalolagi katoa. Kua uiina e mautolu a koe ke onoono fakalahi ke he hokotaki nei ti moua mai e fakamalolōaga i ai, tuga ne tau matakainaga ha tautolu he senetenari fakamua ne lahi e fakamalolōaga ne moua mai he tau hokotaki hagaao ke he laulahi atu he gahua fakamatala he vahā ha lautolu.—Gahua 1:15; 2:5-11, 41, 47; 4:4; 6:7.
15. Ko e ha kua nakai lata he ha tagata ke fakalolelole hagaao ke he fekafekau loto katoa ki a Iehova?
15 Ko e kalaga lahi he fakahekeaga ne hake ke he Atua he tau tau takitaha kua fakakite e loto fakaaue hokulo ne ha ha he tau fekafekau ha Iehova ma e kotofaaga he iloa a Iehova mo e fakamatala hagaao ki a ia. (Isaia 43:10) Mooli, ko e poa he fakahekeaga ne foaki he falu he tau matakainaga momotua, gagao, po ke kulikuli kua maeke ke fakatatai ke he poa ne tuku he fifine takape. Ka e nakai nimo e tautolu kua loto fakaaue a Iehova mo e Tama haana ke he tau tagata oti ne fekafekau loto katoa ke he Atua, he taute e lautolu e tau mena oti ne maeke ia lautolu.—Luka 21:1-4; Kalatia 6:4.
16. Ko e heigoa e tau kanavaakau fakaako ne foaki he Atua he tau magahala e kua mole?
16 He nakai ni ko e fakamahani a tautolu ma e fekafekauaga, kua tauteute e Iehova a tautolu puhala he fakatokatokaaga haana ke fakaaoga e tau kanavaakau fakaako ne mitaki lahi mahaki. He tau hogofulu tau e kua mole, kua putoia e tau tohi Ko e Kupu Mooli ke Takitaki Atu ai ke he Moui Tukulagi, You Can Live Forever in Paradise on Earth, Iloilo ne Takitaki Atu ke he Moui Tukulagi, mo e foou nei, Ko e Heigoa ne Fakaako Moli he Tohi Tapu? Ko lautolu ne loto fakaaue mooli ke he tau foakiaga nei kua fakaaoga fakamitaki ai he fekafekauaga.
Fakaaoga Fakamitaki e Tohi Fakaako he Tohi Tapu
17, 18. (a) Ko e tau vala fe he tohi Fakaako he Tohi Tapu kua loto a koe ke fakakite he fekafekauaga haau? (e) Ko e heigoa e kitiaaga he taha leveki takaiaga hagaao ke he tohi Fakaako he Tohi Tapu?
17 He tohi Ko e Heigoa ne Fakaako Moli he Tohi Tapu?, ne 19 e veveheaga, ko e apenetiki ne fakamatafeiga ti maama mo e mukamuka e vagahau, nukua eke ai mo mena fakaalofa ke he fekafekauaga. Ma e fakatai, ne fakatutala e veveheaga 12 ke he matakupu “Moui he Puhala ne Fakafiafia e Atua.” Kua fakamaama he vala tala nei ke he tagata fakaako e puhala ke eke mo kapitiga he Atua, ko e taha mena ne tokologa kua nakai mailoga po ke manamanatu to maeke. (Iakopo 2:23) Fēfē e tali ke he tohi lagomatai fakaako Tohi Tapu nei?
18 Ne hokotaki he leveki takaiaga i Ausetalia ko e tohi Fakaako he Tohi Tapu “ne futiaki mafiti e tau tagata he kaina ke he fakatutalaaga.” Ne lafi e ia kua mukamuka lahi e tohi ke fakaaoga ti “foaki ke he tau tagata fakailoa he Kautu e mauokafua foou mo e olioli ke he fekafekauaga. Ko e mena haia ne ui he falu e tohi ko e Maka Auro!”
19-21. Talahau falu mena tutupu ne fakamaama e aoga he tohi Fakaako he Tohi Tapu.
19 “Kua liga fakafano mai he Atua a koe,” he talahau he fifine i Kaiana ke he paionia he gutuhala haana. Ko e hoa he fifine ne tiaki foou a ia mo e ua e tama ikiiki ha laua. Ne veveu he paionia e tohi Fakaako he Tohi Tapu ke he veveheaga 1 ti totou age e paratafa 11, i lalo he vala mataulu “Fefe e Logonaaga he Atua ke he Nakai Fakafili Tonu ne Fehagai mo Tautolu?” “Ne aamotia lahi a ia he manatu ia,” he talahau he paionia. “Ati matike e fifine ti fano ki tua he fale koloa haana, ti tagi lahi a ia.” Ne talia he fifine nei ke fakaako tumau e Tohi Tapu mo e matakainaga fifine he matakavi ti kua matutaki ke holo ki mua.
20 Ko José ne nofo i Sepania, ne mate e hoana haana he pakia he peleōafi. Ne moua e ia e mafanatia ke he tau tulaki, ti kumi lagomatai foki a ia ke he tau ekekafo. Ka e nakai maeke he tau tagata kumikumi ke he manamanatuaga ke tali e hūhū ne fakatupetupe lahi aki a José: “Ko e ha ne fakaatā he Atua e hoana haaku ke mate?” Taha aho ne feleveia a José mo Francesc, ne gahua he kamupanī taha ia. Ne tala age a Francesc ke fakatutala a laua ke he veveheaga 11 he tohi Fakaako he Tohi Tapu, ne mataulu “Ko e Ha ne Fakaata he Atua e Matematekelea?” Ko e fakamaamaaga faka-Tohiaga Tapu mo e fakataiaga he faiaoga mo e tagata fakaako kua fakafiafia hokulo a José. Ne kamata a ia ke fakaako fakamakutu, fina atu he toloaga he takaiaga, ti ko e mogonei kua fina atu ke he tau feleveiaaga he Fale he Kautu he matakavi.
21 Ko Roman, ko e tagata pisinisi, ne 40 e tau he moui he nofo i Polani, ne fakalilifu tumau e Kupu he Atua. Ka ko e putoia lahi haana ke he gahua ati mamutu e holo ki mua he haana fakaakoaga Tohi Tapu. Pete ia, ne fina atu a ia ke he fonoaga he faahimotu ti moua e lagaki he tohi Fakaako he Tohi Tapu. Fakahiku, ne kitia ai e holo ki mua haana. “Mo e tohi nei,” ne pehē a ia, “ko e tau fakaakoaga aoga he Tohi Tapu kua tuga ke tukutuku fakalataha ke moua e fakatino katoa, tuga e tikisoa pasolo.” Kua fakaako tumau a Roman he magaaho nei ke he Tohi Tapu ti hane holo mitaki ki mua.
Matutaki ke Tupu ke he Loto Fakaaue
22, 23. Matutaki fēfē a tautolu ke fakakite e loto fakaaue ma e amaamanakiaga ne fakatoka i mua ha tautolu?
22 He fakamaama ai ke he tau Fonoaga Faahimotu “Kua Tata Mai e Laveakiaga!” ne fakalagalaga, kua manako lahi e tau Kerisiano mooli ke he “fakamouiaga tukulagi” ne mavehe mai he Atua mo e maeke ai ha kua fakamaligi ai e toto ha Iesu Keriso. Nakai fai puhala mitaki foki ke fakakite e tautolu e loto fakaaue mooli ma e amaamanakiaga uho nei he matutaki ke fakameā “mai he tau gahua ke mamate ai, kia fekafekau ai a [ta]utolu ke he Atua moui?”—Heperu 9:12, 14.
23 E, kua molea e ono miliona he tau tagata fakapuloa he Kautu hane fakauka fakamooli ke he fekafekauaga he Atua, pete he paleko lahi e peehiaga ke gahua ni ma lautolu, kua eke ai mo mena uho. Kua eke foki mo fakamooliaga kua loto fakaaue lahi e tau fekafekau a Iehova ke he lilifu he fekafekau ke he Atua, he iloa kua ‘nakai noa mo e fua ha lautolu a fakafita ke he gahua he Iki.’ Kia fakatumau e tupu he loto fakaaue ia!—1 Korinito 15:58; Salamo 110:3.
To Tali Fēfē e Koe?
• Ko e heigoa he salamo ne fakaako ki a tautolu hagaao ke he loto fakaaue ma e Atua mo e tau foakiaga fakaagaaga haana?
• Fakamooli fēfē e tau kupu ia Hakai 2:7 he vahā nei?
• Taute fēfē e Iehova haana tau fekafekau ke gahua lauia mitaki ki a ia?
• Ko e heigoa haau ka taute ke fakakite e loto fakaaue haau ma e mitaki lahi a Iehova?
[Tau Hūhū he Fakaakoaga]
[Fakafonua he lau 27-30]
HOKOTAKI HE FEKAFEKAUAGA HE TAU HE 2006 TAU FAKAMOLI A IEHOVA HE LALOLAGI OTI
(Kikite pega volume)
[Tau Fakatino he lau 25]
Kua tauteute katoatoa e Iehova a tautolu ke taute haana a finagalo