Iehova Ko e Atua Loto Fakaaue

“Ko e mena nakai hepehepe e Atua ke fakanimonimo ai e ia ha mutolu a tau gahua, mo e gahua fakamalolo he fakaalofa kua fakakite mai ai e mutolu ke he hana higoa.”​—HEPERU 6:10.

1. Fakakite fēfē e Iehova e loto fakaaue haana ki a Ruta ko e fifine Moapi?

KUA hokulo e loto fakaaue ha Iehova ke he tau laliaga ha lautolu ne kumi fakamooli ke taute e finagalo haana, ti palepale lahi e ia a lautolu. (Heperu 11:6) Ko e tagata tua fakamooli ko Poasa ne mahani lahi mo e vala fulufuluola nei he mahani he Atua, ha kua pehē a ia ki a Ruta ko e fifine Moapi, ne leveki fakahelehele e matua takape fugavai haana: “Kia taui e Iehova hau a gahua, kia tuku atu kia koe e palepale lahi mai ia Iehova.” (Ruta 2:12) Kua fakamonuina kia he Atua a Ruta? Pihia mooli! Ko e tala haana ne fakamau tuai ke he Tohi Tapu! Lafi ki ai, ne taane e ia a Poasa ti eke mo tupuna ke he Patuiki ko Tavita mo Iesu Keriso. (Ruta 4:13, 17; Mataio 1:5, 6, 16) Ko e taha ni a ia he tau fakafifitakiaga loga he Tohi Tapu ne fakakite e loto fakaaue a Iehova ma e tau fekafekau haana.

2, 3. (a) Ko e ha ne kehe lahi e tau talahauaga he loto fakaaue a Iehova? (e) Ko e ha ne maeke a Iehova ke fakakite e loto fakaaue hokulo? Fakatai.

² To nakai tututonu ai ki a Iehova kaeke ke fakakite e ia e nakai loto fakaaue. Pehē e Heperu 6:10: “Ko e mena nakai hepehepe e Atua ke fakanimonimo ai e ia ha mutolu a tau gahua, mo e gahua fakamalolo he fakaalofa kua fakakite mai ai e mutolu ke he hana higoa, kua fekafekau tuai a mutolu ke he tau tagata tapu mo e fekafekau agaia ki ai.” Ko e mena ne kehe lahi e talahauaga nei ha kua fakakite he Atua e loto fakaaue ma e tau tagata fakamooli pete ko e tau tagata agahala a lautolu ti nakai hokotia ke he fakahekeaga Haana.​—Roma 3:23.

³ Ha ko e nakai mitaki katoatoa ha tautolu, to liga logona hifo e tautolu ko e tau gahua fakamooli he mahani Atua ha tautolu kua fakateaga mo e nakai aoga ma e monuina he Atua. Ka e maama katoatoa e Iehova e tau manako mo e tau tutūaga ha tautolu, ti uho mooli e fekafekauaga loto katoa ha tautolu ki a ia. (Mataio 22:37) Ke fakatai: Ne moua he matua fifine e mena fakaalofa, ko e kahoa nakai tauuka he fuga laulau haana. Maeke ia ia ke onoono ke he mena fakaalofa kua nakai uho lahi ti tiaki. Ka ko e lautohi ne tuku fakalataha ai ne fakakite ko e mena fakaalofa mai he tama fifine tote haana, ne fakaaoga oti e tupe haana ke fakatau aki. Ne kehe e kitiaaga he matua fifine mogonei ke he mena fakaalofa. Liga he hihina e tau mata haana, ne kuku e ia e tama ti fakakite e loto fakaaue mooli.

4, 5. Fifitaki fēfē e Iesu a Iehova he fakakite e loto fakaaue?

⁴ He mailoga katoatoa e tau manako mo e tau mena ne kūkū a tautolu, kua loto fakaaue a Iehova ka foaki katoatoa e tautolu ki a ia,  pete he tote po ke lahi. He mena nei, ko e fakaata mitaki katoatoa a Iesu he Matua haana. Manatu e tala he Tohi Tapu hagaao ke he poa he takape. “Kua haga hake a [Iesu], kua kitia e tau tagata mau[k]oloa, ha ne tolo ha lautolu a tau poa ke he mena ne toka ai e tau tupe. Kua kitia foki e ia e taha fifine takape kua nofogati, kua tolo ki ai ua e tupe ikiiki. Ti tala age a ia, Ko e moli, ke tala atu e au kia mutolu, ko e tau mena he fifine takape nofogati na kua tolo ki ai, kua mua ia ke he tau mena ha lautolu oti. Ha ko e mena tolo e lautolu oti e falu a mena mai he tau mena loga ha lautolu ke he tau poa he Atua; ka ko ia kua nofogati kua tolo e ia ki ai hana tau mena oti ne moui ai a ia.”​—Luka 21:1-4.

⁵ E, he iloa e tuaga he fifine​—ko ia ko e takape ti nofogati​—ne maama e Iesu e uho mooli he mena fakaalofa haana, ati loto fakaaue lahi a Ia. Pihia foki e talahauaga ki a Iehova. (Ioane 14:9) Nakai kia mafanatia ke iloa pete ne tau tutūaga haau, kua talia agaia he Atua mo e haana Tama loto fakaaue a koe?

Palepale e Iehova e Aitiope Matakutaku Atua

6, 7. Ko e ha mo e fēfē e puhala ne fakatātā e Iehova e loto fakaaue haana ki a Epetameleka?

⁶ Nukua fakakite e Iehova e loto fakaaue ki a lautolu kua taute e finagalo haana ne kua fakatātā tumau mai he tau Tohiaga Tapu. Manamanatu ke he tau fehagai haana mo e Aitiope matakutaku Atua ko Epetameleka, ko ia he vahā a Ieremia mo e ko e fekafekau he kaina he patuiki nakai tua fakamooli ko Setekaia ha Iuta. Ne iloa e Epetameleka kua fakafili fakakelea he tau iki ha Iuta e perofeta ko Ieremia he fakafualoto ti tuku a ia ke he luo, ke mate ai he hoge. (Ieremia 38:1-7) He iloa kua vihiatia lahi mahaki ki a Ieremia ha ko e fekau ne fakamatala e ia, ne foaki e Epetameleka e moui ni haana ke vagahau ke he patuiki. Ne vagahau fakamalolō ai e Aitiope: “Ko e iki na e, ko e patuiki, kua mahani kelea e tau tagata na ke he tau mena oti ne eke e lautolu ke he perofeta ko Ieremia, kua tuku hifo e lautolu a ia ke he luo; to mate foki a ia he hoge ke he  mena ha i ai a ia.” Ke he poaki he patuiki, ne uta e Epetameleka 30 e tagata mo e laveaki e perofeta he Atua.​—Ieremia 38:8-13.

⁷ Ne kitia e Iehova kua tua a Epetameleka, nukua lagomatai a ia ke kautū mai he tau matakutaku ne liga logona hifo e ia. Ti fakakite e Iehova e loto fakaaue haana mo e tala age ki a Epetameleka he puhala ia Ieremia: “Kitiala, to fakahoko e au haku a tau kupu ke he maga nai ke malaia ai, ka e nakai ke monuina ai . . . Ka to laveaki e au a koe ke he aho ia . . . ti nakai tuku atu a koe ke he tau lima he tau tagata kua matakutaku a koe ki ai. Ha ko e mena to fakahao e au a koe . . . , ka e eke e moui hāu mo mena ne fofo he tau māu; ha kua tua a koe kia au.” (Ieremia 39:16-18) E, ne laveaki e Iehova a Epetameleka ti pihia mo Ieremia mai he tau iki kelea a Iuta, mo e he magaaho fakamui ne moumou he tau Papelonia a Ierusalema. “Kua leoleo e [Iehova] e . . . hana tau tagata tapu, kua laveaki e ia a lautolu mai he tau lima he tau tagata mahani kelea,” he talahau e Salamo 97:10.

‘Ko e Haau a Matua ne Fioia ke he Mena Galo, To Ta Mai Fakakite e Ia e Taui kia Koe’

8, 9. He fakatātā e Iesu, ko e vahega liogi fēfē ne loto fakaaue a Iehova ki ai?

⁸ Ko e taha fakamooliaga kua loto fakaaue mo e uho e tau talahauaga he mahani Atua fakamooli ha tautolu ki a Iehova kua kitia ke he mena ne talahau he Tohi Tapu hagaao ke he liogi. “Ko e liogi he tau tagata mahani hakohako ko e hana [Atua] fiafia haia,” he talahau he tagata pulotu. (Tau Fakatai 15:8) He vahā a Iesu, tokologa e tau takitaki lotu ne liogi ki mua he tau tagata, ne nakai mai he mahani fakamooli, ka e mai he loto ke fakafiafia tagata. ‘Kua moua tuai e lautolu ha lautolu a taui katoa,’ he talahau e Iesu. “Ka liogi a koe,” he fakaako e ia ke he tau tutaki haana, “kia hu a ke he hau a poko, mo e pa hau a gutuhala, ti liogi ai a koe ke he hau a Matua ha ha he mena galo; ko e hau a Matua foki, ko ia ne fioia ke he mena galo, to ta mai fakakite e ia e taui kia koe.”​—Mataio 6:5, 6.

⁹ Mooli, ne nakai fakavihia e Iesu e liogi ki mua he tau tagata, ha ko e mena liogi foki a ia ki mua he tau tagata he falu magaaho. (Luka 9:16) Ne hokulo e loto fakaaue a Iehova he magaaho ne liogi a tautolu ki a ia mai he tau loto fakamooli, he nakai fai manatu ke fakafiafia e falu. Ti ko e liogi fakagalo ni ha tautolu ko e fakakiteaga mitaki he hokulo he fakaalofa ha tautolu ma e Atua mo e falanaki ha tautolu ki a ia. Ti nakai ofo ai kua fa kumi e Iesu e tau matakavi ogoogonoa ke liogi. Lagataha ne liogi a ia he “magaaho pogipogi kua uhu matike.” He taha magaaho ne “hake ai a ia hokoia ke he mouga ke liogi.” Ato fifili e ia e tau aposetolo 12 haana, ne po katoa, po ke ahogia he liogi tokotaha a Iesu.​—Mareko 1:35; Mataio 14:23; Luka 6:12, 13.

10. Ka fakakite he tau liogi ha tautolu e mooli mo e hokulo he logonaaga, ko e heigoa ka liga talitonu a tautolu ki ai?

¹⁰ Manamanatu la e fanogonogo fakalahi ha Iehova ke he tau kupu mai he loto he Tama haana! Mooli, ne liogi a Iesu he falu magaaho “mo e tagi lahi mo e tau hihina mata . . . kua fanogonogo foki a [Iehova] kia ia he maimaina a ia.” (Heperu 5:7; Luka 22:41-44) Ka fakakite he tau liogi ha tautolu e mooli mo e hokulo he tau logonaaga pihia, to liga talitonu a tautolu kua fanogonogo fakalahi mo e loto fakaaue ha tautolu a Matua he lagi. E, “kua tata mai a Iehova kia lautolu oti kana . . . ne ui kia ia mo e fakamoli.”​—Salamo 145:18.

11. Fēfē e logonaaga a Iehova hagaao ke he mena ne taute e tautolu he mena galo?

¹¹ Ka loto fakaaue a Iehova he liogi a tautolu ki a ia he mena galo, ko e loto fakaaue ha ia haana ka omaoma a tautolu ki a ia he mena galo! E, kua mailoga e Iehova e mena ne taute e tautolu he mena galo. (1 Peteru 3:12) Mooli, ko e tua fakamooli mo e omaoma ha tautolu ka nakai fai tagata mo tautolu, ko e fakakiteaga mitaki kua ha ha ia tautolu e “loto katoa” ki a Iehova, ko e loto kua meā ke he logonaaga mo e kua mauokafua ke he mena kua hako. (1 Nofoaga he Tau Patuiki 28:9) Kua fakafiafia mooli he mahani pihia e loto a Iehova!​—Tau Fakatai 27:11; 1 Ioane 3:22.

12, 13. Puipui fēfē e tautolu e tau manamanatuaga mo e tau loto ha tautolu ti eke ke tuga e tutaki tua fakamooli ko Natanielu?

 ¹² Ko e mena ia, puipui e tau Kerisiano tua fakamooli mai he tau agahala galo ne fakakelea aki e manamanatuaga mo e loto, tuga e kitekite ke he tau fakatino telefua mo e favale. He liga nakai kitia he tau tagata e falu agahala, kia mailoga e tautolu “nakai fakai foki ha mena taha kua galo ki mua hana, ka kua toka noa mo e maliali e tau mena oti kana ke he na fofoga hana ke talahau ki ai e tautolu e tau mahani ha tautolu.” (Heperu 4:13; Luka 8:17) He tutuli a tautolu ke kalo mai he tau mena ne nakai fakafiafia a Iehova, kua taofi e tautolu e loto manamanatu meā mo e fiafia he iloa kua talia he Atua a tautolu. E, nakai fakauaua kua loto fakaaue mooli a Iehova ke he tagata “kua fano mo e mahani hako, mo e tututonu, kua vagahau foki mo e moli ke he hana loto.”​—Salamo 15:1, 2.

¹³ Maeke fēfē mogoia ia tautolu ke puipui e tau manamanatuaga mo e tau loto ha tautolu he lalolagi kua hufia ke he mahani kelea? (Tau Fakatai 4:23; Efeso 2:2) He lafi ke he fakaaoga katoatoa e tau foakiaga fakaagaaga, kua lata ia tautolu ke lali fakalahi ke tiaki e mena ne kelea mo e taute e mena ne mitaki, he fakamafiti ke nakai fatu e tau manako kelea ti fanau mai e agahala. (Iakopo 1:14, 15) Manamanatu la ke he fiafia haau ka pehē a Iesu hagaao ki a koe tuga ne talahau e ia hagaao ki a Natanielu: “Kitiala, ko e [tagata], nakai pikopiko a ia.” (Ioane 1:47) Ne higoa foki a Natanielu ko Patolomaio, ne kotofa fakamui ke eke mo taha he tau aposetolo 12 ha Iesu.​—Mareko 3:16-19.

‘Ekepoa ne Mua kua Fakaalofa Noa mo e Fakamooli’

14. Tali atu fēfē a Iesu ke he gahua a Maria he fakatatai atu ke he falu?

¹⁴ Ha “ko e fakatai he Atua nakai kitia,” ko Iehova, ne fifitaki katoatoa tumau e Iesu e Matua haana he fakakite e loto fakaaue ki a lautolu ne fekafekau ke he Atua mai he tau loto meā. (Kolose 1:15) Ma e fakatai, lima e aho ato poa e ia e moui haana, ne eke a Iesu mo e falu tutaki haana mo tau tagata uiina ke he kaina ha Simona i Petania. He magaaho afiafi, ko Maria ko e matakainaga ha Lasalo mo Mareta, ne “toto ai e . . . litara he lolo nato fakafua uka” (kavi ke he totogi he taha e tau), ti tākai aki e ulu mo e tau ve ha Iesu. (Ioane 12:3) “Kua moumou he ha e mena na?” he talahau he falu. Ka e kehe lahi e kitiaaga ha Iesu ke he gahua ha Maria. Ne onoono a ia ki ai ko e gahua fakamokoi mo e uho lahi ha kua tata mai e mate mo e tanu ai a ia. Ti, he nakai tuhituhi a Maria, ne fakalilifu e Iesu a ia. “Ko e tau mena oti he lalolagi ke fakamatala atu ki ai e tala mitaki nai,” he talahau e ia, “to talahaua ai foki e mena nai kua eke e ia ke eke mo fakamanatuaga kia ia.”​—Mataio 26:6-13.

15, 16. Aoga fēfē a tautolu ha kua moui tagata a Iesu mo e fekafekau ke he Atua?

¹⁵ Ko e monuina ha ia ha tautolu ke moua e tagata loto fakaaue ko Iesu mo Takitaki ha tautolu! Ha kua tauteute he moui tagata ha Iesu a ia ke lata mo e gahua ne fakatoka mai e Iehova ma haana​—he fekafekau ko e Ekepoa ne Mua mo e Patuiki, fakamua ke he fakapotopotoaga ha lautolu ne fakauku mo e ke he lalolagi.​—Kolose 1:13; Heperu 7:26; Fakakiteaga 11:15.

¹⁶ Ato hau ke he lalolagi, fitā a Iesu he manamanatu lahi ki ai mo e fiafia pauaki ke he tau tagata. (Tau Fakatai 8:31) He moui tuga e tagata, ne maama lahi foki a ia ke he tau kamatamata ne tupu ki a tautolu he fekafekau ke he Atua. “Kua lata ai ke eke a ia tuga hana tau matakainaga ke he tau mena oti ni,” he tohi he aposetolo ko Paulo, “kia eke ai a ia mo ekepoa ne mua kua fakaalofa, mo e fakamoli . . . Ha kua kamatamata a ia ke he tau mena ne mamahi ai, ti maeke ai ia ia ke lagomatai mai kia lautolu kua kamatamata.” Kua maeke a Iesu ke “mamahi fakaalofa fakalataha mo tautolu ke he tau mena kua lolelole” ha kua “kamatamata a ia ke he tau mena oti kana tuga a tautolu, ka e nakai fai hala a ia.”​—Heperu 2:17, 18; 4:15, 16.

17, 18. (a) Ko e heigoa ne fakakite he tau tohi ke he tau fakapotopotoaga ne fitu i Asia Tote hagaao ke he hokulo he loto fakaaue ha Iesu? (e) Ko e heigoa kua mautauteute e tau Kerisiano fakauku ia ki ai?

¹⁷ Ko e loto fakaaue lahi ha Iesu ma e tau kamatamata he tau tutaki haana ne kitia maali he  mole e liu tu mai haana. Manamanatu ke he tau tohi haana ke he tau fakapotopotoaga fitu i Asia Tote, ne tohi he aposetolo ko Ioane. Ke he fakapotopotoaga i Semurana, ne pehē a Iesu: “Kua iloa e au hau a tau gahua, mo e hau a matematekelea.” He mena nei, ne pehē a Iesu, ‘Kua maama e au e tau lekua haau; ne iloa mooli e au e mena hane tupu ki a koe.’ Ti, fakalataha mo e fakaalofa hofihofi noa mo e pule ne hahamo e ia haana a matematekelea ke hoko ke he mate, ti lafi e Iesu: “Kia fakamoli a koe ato hoko ke he mate, ti ta atu ai e au e foufou he moui kia koe.”​—Fakakiteaga 2:8-10.

¹⁸ Ko e tau tohi ke he tau fakapotopotoaga ne fitu kua puke he tau talahauaga ne fakakite e mailoga katoatoa ha Iesu ke he tau paleko he tau tutaki haana mo e loto fakaaue mooli haana ke he tau momoui mahani fakamooli ha lautolu. (Fakakiteaga 2:1–3:22) Kia tokaloto ko lautolu ne hagaao ki ai a Iesu ko e tau Kerisiano fakauku ne moua e amaamanakiaga ke pule fakalataha mo ia ke he lagi. He tuga e Iki ha lautolu, ne tauteute tuai a lautolu ma e matagahua lilifu ha lautolu he lagomatai ke fakahoko e fakaalofa hofihofi noa mua ue atu he tau aoga he poa lukutoto he Keriso ke he tau tagata matematekelea.​—Fakakiteaga 5:9, 10; 22:1-5.

19, 20. Fakakite fēfē e lautolu ka fakakatoa e “moto tagata tokologa” e loto fakaaue ha lautolu ki a Iehova mo e Tama haana?

¹⁹ Mooli, ko e fakaalofa ha Iesu ke he tau tutaki fakauku haana ne fakalaulahi foki ki a lautolu e ‘tau mamoe kehe’ fakamooli haana, ne totou miliona mogonei ne amanaki ke fakakatoa e “moto tagata tokologa . . . mai he tau motu oti,” ka hao mai he “matematekelea lahi.” (Ioane 10:16; Fakakiteaga 7:9, 14) Ne fakapotopoto atu a lautolu nei ke he tapa a Iesu mai he loto fakaaue ke he poa lukutoto haana mo e ke he amaamanakiaga he moui tukulagi ha lautolu. Fakakite fēfē e loto fakaaue ha lautolu? Ne taute pihia e lautolu he “fekafekau [ke he Atua] ke he aho mo e po.”​—Fakakiteaga 7:15-17.

²⁰ Ko e hokotaki he lalolagi katoa he tau he fekafekauaga he 2006, ne tu he lau tohi 27 ke he 30, ne fakakite e fakamooliaga mahino ko e tau fekafekau tua fakamooli nei kua foaki mooli ki a Iehova “e fekafekau kia ia ke he aho mo e po.” Ke he taha e tau ia, ko lautolu fakalataha mo e matakau tote he tau Kerisiano fakauku ne toe ne foaki 1,333,966,199 e katoatoa he tau tulā ke he fekafekauaga he fonua​—tatai ke molea lahi e 150,000 e tau!

Matutaki ke Fakakite e Loto Fakaaue!

21, 22. (a) Hagaao ke he fakakite e loto fakaaue, ko e ha kua lata e tau Kerisiano ke puipui pauaki he vahā nei? (e) Ko e heigoa ka fakatutala ki ai he vala tala ka mui mai?

²¹ He fehagai mo e tau tagata nakai mitaki katoatoa, ne fakakite e Iehova mo e Tama haana e hokulo he loto fakaaue ne ofoofogia mooli. Momoko ai, ko e laulahi he tau tagata ne nakai manamanatu lahi ke he Atua, ka e hagaaki ni ke he tau kapaletū ha lautolu. He fakamaama e tau tagata ne nonofo ke he “tau aho fakamui,” ne tohi e Paulo: “Ko e mena ke ofaofa he tau tagata a lautolu ni, to velevele koloa . . . to nakai fakaaue.” (2 Timoteo 3:1-5) Kua kehekehe mamao a lautolu ia ke he tau Kerisiano mooli, ha kua liogi mai he loto, omaoma fakamakai, mo e fekafekau loto katoa he fakatātā e loto fakaaue ha lautolu ke he tau mena oti ne taute he Atua ma lautolu!​—Salamo 62:8; Mareko 12:30; 1 Ioane 5:3.

²² He vala tala ka mui mai, to liu kitekite a tautolu ke he falu he tau foakiaga fakaagaga loga ne foaki fakaalofa e Iehova ki a tautolu. He fakaata e tautolu e “tau mena mitaki oti” nei, kia tupu hokulo foki e loto fakaaue ha tautolu.​—Iakopo 1:17.

To Tali Fēfē e Koe?

• Fakakite fēfē e Iehova a ia ko e Atua loto fakaaue?

• Ka haia he mena galo, fakafiafia fēfē e tautolu e loto a Iehova?

• Ke he tau puhala fe ne fakakite e Iesu e loto fakaaue?

• Maeke fēfē he moui ko e tagata ke lagomatai a Iesu ke eke mo pule fakaalofa hofihofi noa mo e loto fakaaue?

[Tau Hūhū he Fakaakoaga]

[Fakatino he lau 17]

He fakaalofa e matua ke he fakakiteaga mooli he tama tote haana, ne loto fakaaue a Iehova ka foaki katoatoa e tautolu ki a ia