Lagomatai Falu ke Omaoma e Tau Mena ne Fakaako he Tohi Tapu

“Ka ko e tau mena ha ha he kelekele mitaki, ko lautolu a ia ne fanogonogo ke he kupu, mo e taofi ki ai ke he loto fakamoli mo e mitaki; kua fua mai e tau fua ke he fakauka.”​—LUKA 8:15.

1, 2. (a) Ko e heigoa e kakano ne talaga e tohi Ko e Heigoa ne Fakaako Moli he Tohi Tapu? (e) He tau tau ē kua mole, ne fakamonuina fēfē e Iehova e tau laliaga he tau tagata haana ke taute tutaki?

“KUA mahomo e tohi he mitaki. Ne fiafia lahi e tau tagata fakaako haaku ki ai. Fiafia au ki ai. Ha ko e tohi nei ati maeke ke kamata e tau fakaakoaga Tohi Tapu mo e tau tagata he tau gutuhala.” Ne talahau pihia he paionia gahua mau he Tau Fakamoli a Iehova hagaao ke he tohi Ko e Heigoa ne Fakaako Moli he Tohi Tapu?  * Hagaao ke he tohi taha ia, ne pehē taha fuakau ne fakapuloa e Kautu: “Kua ha ha ia au e kotofaaga monuina lahi he lagomatai e tau tagata tokologa ke o mai ke iloa a Iehova ke he 50 e tau ne hakahakau ai au ke he fekafekauaga. Ka e talaatu e au, kua mahomo atu e mitaki he tohi fakaako nei. Kua fiafia lahi au ke he tau fakatino mo e tau fakataiaga fakalagalaga i loto.” Pihia nakai e logonaaga haau ke he tohi Fakaako he Tohi Tapu? Ko e tohi lagomatai nei mo fakaako Tohi Tapu kua talaga ke lagomatai a koe ke fakakatoatoa e poaki a Iesu: “Hanei, kia o atu a a mutolu ke eke e tau motu oti kana mo tutaki, . . . ti fakaako atu a mutolu kia lautolu kia omaoma ke he tau mena oti ne tala atu e au kia mutolu.”​—Mataio 28:19, 20.

² Nakai fakauaua, kua fiafia mooli e loto ha Iehova he kitia e ia kavi ke 6.6 e miliona he Tau Fakamoli haana hane omaoma fakamakai e hatakiaga ha Iesu ke taute tutaki. (Tau Fakatai 27:11) Kua fakamonuina mooli e Iehova e tau laliaga ha lautolu. He magahala he 2005, ke fakatai ki ai, ne fakamatala e tala mitaki ke he 235 e motu ti ko e evalesi, ne molea e 6,061,500 e tau fakaakoaga Tohi Tapu ne takitaki. Ko e fua, kua tokologa e tagata ne ‘fanogonogo mo e talia e kupu he Atua, nakai ko e kupu he tau tagata, ka ko e kupu he Atua, ko e moli ni haia.’ (1 Tesalonia 2:13) Ke he ua e tau kua mole, kua molea e hafa e miliona he tau tutaki foou ne fakatatau e tau momoui ha lautolu ke he tau tutūaga a Iehova mo e tukulele a lautolu ke he Atua.

3. Ko e heigoa e tau hūhū hagaao ke he fakaaoga he tohi Fakaako he Tohi Tapu ka kumikumi ki ai he vala tala nei?

³ Kua logona nakai e koe e fiafia he takitaki e fakaakoaga Tohi Tapu mo e taha tagata? Kua haia agaia he lalolagi katoa a lautolu ne ha ha ai e “loto fakamoli mo e mitaki,” ko lautolu kua logona e kupu he Atua mo e ‘taofi ki ai ti fua mai e tau fua ke he fakauka.’ (Luka 8:11-15) Kia fakatutala a tautolu ke he puhala ka fakaaoga e  koe e tohi Fakaako he Tohi Tapu ke he gahua taute tutaki. Ke he ha tautolu a fakatutalaaga, to kumikumi ke he tolu e hūhū: (1) Maeke fēfē ia koe ke kamata e fakaakoaga Tohi Tapu? (2) Ko e heigoa e tau puhala fakaako ne gahua mitaki? (3) Maeke fēfē ia koe ke lagomatai e tagata ke nakai kuenaia ko e tagata fakaako Tohi Tapu ka e ko e faiaoga foki he Kupu tohia he Atua, ko e Tohi Tapu?

Puhala ka Kamata e Koe e Fakaakoaga Tohi Tapu

4. Ko e ha kua tehatehaua falu ke fakaako e Tohi Tapu, mo e maeke fēfē ia koe ke lagomatai a lautolu ke kautū mai he fakauaua ha lautolu?

⁴ Kaeke ke ole atu ki a koe ke hopo loa atu ke he taha faahi he vailele, liga to nakai talia e koe. Ka e, kaeke ke fakatokatoka e tau lapamaka ke he vahāloto, to liga talia e koe ke lali ke finatu ke he taha faahi. Tatai foki, kua liga tehatehaua e tagata lavelave ke fakaako e Tohi Tapu. Ne liga manamanatu e tagata he fale kua lahi mahaki e magaaho mo e gahua ke fakaako e Tohi Tapu. Maeke fēfē ia koe ke lagomatai a ia ke kautū mai he fakauaua haana? He fakatumau ke taute e tau fakatutala kūkū mo e atihake, maeke ia koe ke fakaaoga e tohi Fakaako he Tohi Tapu ke takitaki atu e tagata ke fakaako e Kupu he Atua. Ka mautauteute fakamitaki, ko e tau magaaho takitaha ne liu aahi e koe e tagata ia to tuga e tau lapamaka ke moua e kapitiga mo Iehova.

5. Ko e ha kua lata ia koe ke totou e tohi Fakaako he Tohi Tapu?

⁵ Ka e fakamua to lagomatai e koe taha tagata ke aoga mai he tohi Fakaako he Tohi Tapu, kua lata ia koe ke iloa lahi e tohi. Kua totou nakai e koe e tohi mai he kamataaga ke he fakaotiaga? Taha e hoa mau ne uta e tohi he fenoga ha laua ti kamata ke totou he okioki he mataafaga. Ne finatu e fifine fakafua koloa he matakavi ia ki a laua, ti kitia e ia e mataulu Ko e Heigoa ne Fakaako Moli he Tohi Tapu? Ne tala age a ia ki a laua, kua nakai la leva e liogi haana hagaao ke he hūhū ia ni, he ole ke he Atua ke moua e tali. Ne age fiafia e laua e lagaki he tohi ke he fifine. Kua ‘fakaaoga nakai taha magaaho haau’ ke totou e tohi nei, liga ke lagauaaki, he fakatali ke he maveheaga po ke ka okioki fakakū he gahuaaga po ke he aoga? (Efeso 5:15, 16) Kaeke kua taute pihia e koe, to iloa lahi e koe e tohi lagomatai nei mo fakaako Tohi Tapu ti liga moua foki e tau magaaho ke tutala ke he falu hagaao ke he tau matakupu i loto.

6, 7. Maeke fēfē ia koe ke fakaaoga e tohi Fakaako he Tohi Tapu ke kamata e tau fakaakoaga Tohi Tapu?

⁶ He magaaho ka foaki e tohi he fekafekauaga, kia fakaaoga fakamitaki e tau fakataiaga, tau kupu tohi, mo e tau hūhū he lau tohi 4, 5, mo e 6. Ke fakatai ki ai, liga kamata e tutala haau he hūhū, “Ha ko e tau lekua ne fehagai mo e tau tagata he vahā nei, ko e heigoa ne manatu e koe kua lata mo punaaga he takitakiaga mooli?” He mole e fanogonogo fakamitaki ke he tali he tagata, totou 2 Timoteo 3:16, 17, mo e fakamaama kua foaki mai he Tohi Tapu e tali mooli ke he tau lekua he tau tagata. Ti, hagaaki e manatu he tagata he fale ke he lau tohi 4 mo e 5, ti hūhū: “He tau tutūaga ne fakakite mai he tau lau tohi nei, ko e tuaga fe ne tupetupe lahi a koe ki ai?” Ka tuhi e tagata he fale ke he taha fakatino, age e tohi ke totō e ia ka e totou e koe e  kupu tohi ne tū ai mai he Tohi Tapu ni haau. Oti ti totou e lau tohi 6, mo e hūhū ke he tagata he fale, “Mai he ono e hūhū ne totoku i kelekele he lau tohi nei, ko e hūhū fe ka liga manako a koe ke fai tali?” Ka fifili he tagata taha hūhū, fakakite ki a ia e veveheaga ne tali e hūhū ia, toka hifo e tohi, ti taute e tau fakatokaaga ke liu mai mo e fakatutala ke he hūhū ia.

⁷ Ko e tau fakataitaiaga ia ne fakakite mai to taute ni ke he kavi lima e minuti. Ke he tau minuti gahoa ia to iloa e koe e tau mena ne kapaletū ai e tagata he fale, totou mo e fakamaama ua e kupu tohi, mo e fakatoka e fakavēaga ke liu aahi atu. Ko e fakatutalaaga kū haau mo e tagata he fale to liga eke mo mena fakamalolō mo e fakamafanatia mooli ne kua leva e nakai logona e ia. Ko e fua, to fiafia foki e tagata lavelave ke fakaaoga fakalahi taha magaaho mo koe he lagomatai e koe a ia ke he taha lakaaga foki ke he “hala ke pu atu ke he moui.” (Mataio 7:14) Nakai leva, he tupu fakahaga e fiafia he tagata he fale, kua lata ke fakalahi atu e magaaho fakaako. Kua maeke ke taute e mena nei he ole ke nonofo hifo mo e fakaako fakaloa atu tuga ne fakatoka pauaki.

Tau Puhala Fakaako ne Gahua Mitaki

8, 9. (a) Maeke fēfē ia koe ke tauteute tuai e tagata fakaako Tohi Tapu haau ke totoko ke he tau fakatauhele mo e tau kamatamata ka liga fehagai mo ia? (e) Moua i fe e tau koloa nakai vela ke atihake e tua malolō?

⁸ He kamata e tagata ke omaoma ke he tau mena ne fakaako he Tohi Tapu, to liga fehagai a ia mo e tau fakatauhele ke fakatuai e holo ki mua haana. Ne pehē e aposetolo ko Paulo: “Ko lautolu oti foki kua loto ke nonofo mo e mahani Atua kia Keriso Iesu, to hoko ni kia lautolu e favale.” (2 Timoteo 3:12) Ne fakatatai e Paulo e tau kamatamata nei ke he afi ne moumou e tau koloa ta fale ne nakai mitaki, ka kua nakai moumou e tau koloa tuga e auro, ario, mo e tau maka uho. (1 Korinito 3:10-13; 1 Peteru 1:6, 7) Ke lagomatai e tagata fakaako Tohi Tapu haau ke feaki e tau mahani kua lata ke maeke ke fakauka ke he tau kamatamata ka fehagai mo ia, lata ia koe ke lagomatai a ia he atihake aki e tau koloa ka nakai vela.

⁹ Ne fakatai he salamo e “tau vagahau a Iehova” ke he “ario kua vevehe kehe mai he kelekele ke he gutuumu, lagafitu ni he fakamea.” (Salamo 12:6) Mooli, kua ha ha he Tohi Tapu e tau koloa uho mo fakaaoga ke atihake e tua malolō. (Salamo 19:7-11; Tau Fakatai 2:1-6) Ti fakakite he tohi Fakaako he Tohi Tapu ki a koe e puhala kua lauia mitaki ke fakaaoga e tau Tohiaga Tapu.

10. Maeke fēfē ia koe ke hagaaki atu e manatu he tagata fakaako ke he Tohi Tapu?

¹⁰ He fakaakoaga, hagaaki atu e manatu he tagata fakaako ke he tau kupu tohi i loto he tau veveheaga takitaha ne fakatutala ki ai. Fakaaoga e tau hūhū ke lagomatai e tagata fakaako ke maama e tau matapatu kupu tohi he Tohi Tapu mo e fakagahua ki a ia ni. Kia fakaeneene ke ua tala age e tau mena ke taute e ia. Ka e muitua ke he fakafifitakiaga a Iesu. He magaaho ne hūhū e ako Fakatufono ki a ia, ne tali age a Iesu: “Ko e heigoa kua tohi ke he fakatufono? fefe hau a totou?” Ne tali e tagata mai he tau Tohiaga Tapu, ti lagomatai e Iesu a ia ke kitia e puhala ke fakagahua e matapatu fakaakoaga ki a ia ni. He foaki e fakataiaga, ne lagomatai foki e Iesu e tagata ke kitia e puhala kua lata ia ia ke lauia mai he tau mena kua fakaako. (Luka 10:25-37) Kua puke e tohi Fakaako he Tohi Tapu he tau fakataiaga mukamuka ke fakaaoga e koe ke lagomatai e tagata fakaako ke fakagahuahua e tau matapatu fakaakoaga faka-Tohiaga Tapu ki a ia ni.

11. Kua lata ke lahi fēfē e vala ka fakaako e koe he tau fakaakoaga takitaha?

¹¹ Ne fakaaoga he tohi Fakaako he Tohi Tapu e vagahau mukamuka mo e hakotika ke fakamaama e Kupu he Atua, tuga ni he talahau e Iesu e tau manatu uka ke he tau kupu mukamuka. (Mataio 7:28, 29) Kia muitua ke he fakafifitakiaga haana. Talahau e vala tala ke he puhala mukamuka, maaliali, mo e tonutika. Nakai fakatepetepe ke fakaako e tohi. Ka e, toka e tuaga mo e lotomatala he tagata fakaako ke fafati e loga he tau paratafa ka fakatutala ki ai he tau fakaakoaga takitaha. Ne iloa e Iesu e tau kaupāaga he tau tutaki haana ti nakai fakamamafa a lautolu aki e tau vala tala loga ke he mena kua maama ia lautolu he magaaho ia.​—Ioane 16:12.

12. Puhala fe kua lata ke fakaaoga e apenetiki?

¹² Kua toka ai he tohi Fakaako he Tohi Tapu e apenetiki ne 14 e matakupu. He fakavē ke he tau manako he tagata fakaako, ko koe ko e faiaoga  haana kua lata ke fifili e puhala kua latatonu ke fakaaoga e vala nei. Ke fakatai ki ai, kaeke kua uka e tagata fakaako ke maama e matakupu po kua fai hūhū a ia ke he falu mena foki ha ko e tau taofiaga fakamua, kua liga lata ni ke fakakite age e vala kua lata he apenetiki ti toka ke manamanatu ni a ia ki ai. Ke he taha faahi, liga kua latatonu ni ke totou tokoua e mua e vala ia hagaao ke he manako he tagata fakaako. Ha ha he apenetiki e tau matakupu faka-Tohiaga Tapu, tuga e “‘Solu’ mo e ‘Agaga’​—Ko e Heigoa e Kakano Moli he Tau Kupu Nei?” mo e “Mailoga a ‘Papelonia Lahi.’” Liga manako a koe ke tutala ke he tau matakupu nei mo e tagata fakaako haau. Ha kua nakai fai hūhū ma e tau matakupu ka fakatutala ki ai he apenetiki, kua lata ia koe ke iloa mitaki e vala tala ke maeke ke talaga e tau hūhū kakano.

13. Ko e heigoa ne taute he liogi ke fakamalolō e tua?

¹³ “Kaeke ke nakai ati hake e Iehova e fale, ti gahua teao a lautolu ke ati hake ai,” he talahau he Salamo 127:1. Ko e mena ia, ka tauteute a koe ke takitaki e fakaakoaga Tohi Tapu, liogi ki a Iehova ma e lagomatai. Kia fakaata he tau liogi ne talahau e koe he kamataaga mo e he fakahikuaga he tau fakaakoaga takitaha e fakafetuiaga mafanatia haau mo Iehova. Fakamafana e tagata fakaako ke liogi ki a Iehova ma e pulotu ke maama e Kupu Haana mo e malolō ke fakagahua e fakatonuaga i ai. (Iakopo 1:5) Kaeke ke taute pihia e ia, to fakamalolō e tagata fakaako ke fakauka ke he tau kamatamata mo e fakatumau ke tupu malolō e tua.

Lagomatai e Tau Tagata Fakaako Tohi Tapu ke Eke mo Tau Faiaoga

14. Ko e heigoa e holo ki mua kua lata ke taute he tau tagata fakaako Tohi Tapu?

¹⁴ Kaeke ke omaoma e tau tagata fakaako “ke he tau mena oti” ne poaki e Iesu ke he tau tutaki haana, kua lata ia lautolu ke holo ki mua mai he tagata fakaako he Kupu he Atua ke eke mo tau faiaoga he Tohi Tapu. (Mataio 28:19, 20; Gahua 1:6-8) Ko e heigoa ka taute e koe ke lagomatai e tagata fakaako ke holo fakaagaaga pihia ki mua?

15. Ko e ha kua lata ia koe ke fakamafana e tagata fakaako Tohi Tapu haau ke hau ke he tau feleveiaaga Kerisiano?

¹⁵ Tali mai he fakaakoaga fakamua, uiina e tagata fakaako ke hau mo koe ke he tau feleveiaaga he fakapotopotoaga. Fakamaama ki a ia na moua e koe he tau feleveiaaga e fakaakoaga ke eke mo faiaoga he Kupu he Atua. Ke he loga e tau faahi tapu, kia fakaaoga taha magaaho kū he matahiku he tau fakaakoaga Tohi Tapu takitaha ke fakamaama e fakaholoaga he tau hatakiaga fakaagaaga ne moua e koe he tau feleveiaaga mo e tau toloaga kehekehe. Tutala mo e fiafia hagaao ke he tau aoga ne moua e koe he tau feleveiaaga nei. (Heperu 10:24, 25) Ka fano tumau e tagata fakaako ke he tau feleveiaaga, to liga fakahiku a ia ke eke mo faiaoga he Kupu he Atua.

16, 17. Ko e heigoa e falu foliaga ka fakatoka he tagata fakaako he Tohi Tapu ke moua?

¹⁶ Lagomatai e tagata fakaako Tohi Tapu ke fakatoka e tau foliaga ne maeke ia ia ke moua. Ke fakatai ki ai, fakamalolō a ia ke talahau e tau mena ne ako e ia ke he kapitiga po ke tagata he magafaoa. Kia fakamafana foki a ia ke fakatoka e foliaga ke totou e Tohi Tapu katoa. Ka lagomatai e koe a ia ke fakatū mo e matutaki e fakaholoaga ke totou tumau e Tohi Tapu, to lagomatai he puhala nei a ia he leva e mole e papatiso haana. Lafi ki ai, ko e ha he fakamafana e tagata fakaako ke foli ke manatu tumau e taha kupu he Tohi Tapu ne tali e matapatu hūhū mai he  tau veveheaga takitaha he tohi Fakaako he Tohi Tapu? He taute pihia, to eke a ia mo “ekegahua nakai fai mena ke mā ai, kua fakatokatoka fakahako e kupu moli.”​—2 Timoteo 2:15.

¹⁷ He nakai fakaako e tagata fakaako ke talahau manatu e tau kupu tohi po ke ke fakamaama e alito he tau mena ne talahau i ai, kia fakamalolō ki a ia ke fakamaama e tau matapatu kupu he Tohi Tapu, he tali atu ki a lautolu ne hūhū mai ki a ia ke he kakano he tua haana. Kua lagomatai foki e tau fakamahaniaga kūkū, he eke a koe mo tagata he magafaoa po ke kapitiga gahua ne hūhū age ki a ia ke fakamaama e tua haana. He tali atu e tagata fakaako, lagomatai a ia ke tali mo e “mahani molu mo e [“hokulo e lilifu,” NW].”​—1 Peteru 3:15.

18. Ka latatonu e tagata fakaako Tohi Tapu ke eke mo tagata fakailoa nakaila papatiso, ko e heigoa foki e tau lagomatai ka foaki e koe ki a ia?

¹⁸ Fai magaaho, to liga latatonu e tagata fakaako ke fakalataha ke he fekafekauaga he fonua. Peehi ki a ia ko e kotofaaga monuina ke fakaatā ke taute e gahua nei. (2 Korinito 4:1, 7) Ka fifili he tau motua kua latatonu e tagata fakaako ke eke mo tagata fakailoa nakaila papatiso, kia lagomatai a ia ke tauteute tuai e fakatātāaga mukamuka mo e gahua mo ia ke he gahua he fonua. Fakatumau ke gahua tumau mo ia ke he tau vala kehekehe he fekafekauaga, mo e fakaako ki a ia e puhala ke tauteute tuai ke liu aahi atu mo e lauia mitaki. Ko e fakafifitakiaga mitaki ni haau ka eke mo fakaohoohoaga kua atihake.​—Luka 6:40.

“Fakamoui Ai e Koe a Koe, Katoa mo Lautolu kua Fanogonogo kia Koe”

19, 20. Ko e heigoa e foliaga kua lata ia tautolu ke moua, mo e ko e ha?

¹⁹ Nakai fakauaua, kua lahi e gahua ke lagomatai taha tagata ke hokotia ke “maama ke he kupu moli.” (1 Timoteo 2:4) Pete he pihia, kua temotemoai e fiafia he mouiaga nei ka fakatatai ke he fiafia he lagomatai taha tagata ke omaoma ke he tau mena ne fakaako he Tohi Tapu. (1 Tesalonia 2:19, 20) Mooli, ko e kotofaaga monuina ha ia ha tautolu he eke mo ‘tau ekegahua mo e Atua’ ke he gahua fakaako nei he lalolagi katoa!​—1 Korinito 3:9.

²⁰ He puhala ia Iesu Keriso mo e tau agelu malolō, nakai mule to taui e Iehova a lautolu “kua nakai iloa e Atua, mo lautolu kua nakai omaoma ke he vagahau mitaki he Iki ha tautolu ko Iesu Keriso.” (2 Tesalonia 1:6-8) Kua tu hagahaga kelea lahi e tau momoui. Maeke nakai ia koe ke foli ke takitaki taha fakaakoaga Tohi Tapu he kaina ke he tohi Ko e Heigoa ne Fakaako Moli he Tohi Tapu? He taute e koe e gahua nei kua moua e magaaho ke “fakamoui ai e koe a koe, katoa mo lautolu kua fanogonogo kia koe.” (1 Timoteo 4:16) Kua mafiti lahi mahaki e magaaho nei, ati lata ia tautolu ke lagomatai falu ke omaoma ke he tau mena ne fakaako he Tohi Tapu.

[Matahui Tala]

Ko e Heigoa ne Ako e Koe?

• Ko e heigoa e kakano ne talaga ai e tohi Fakaako he Tohi Tapu?

• Maeke fēfē a koe ke kamata e tau fakaakoaga Tohi Tapu he fakaaoga e tohi Fakaako he Tohi Tapu?

• Ko e heigoa e tau puhala fakaako ne gahua mitaki?

• Maeke fēfē a koe ke lagomatai e tagata fakaako ke eke mo faiaoga he Kupu he Atua?

[Tau Hūhū he Fakaakoaga]

[Fakatino he lau 8]

Hane fakaaoga fakamitaki nakai e koe e tohi nei?

[Fakatino he lau 9]

Maeke he tutalaaga kū ke fakalagā e manako he tagata ke iloa e Tohi Tapu

[Fakatino he lau 11]

Ko e heigoa ka taute e koe ke hagaaki e onoonoaga he tagata fakaako ke he Tohi Tapu?

[Fakatino he lau 12]

Lagomatai e tagata fakaako Tohi Tapu ke holo ki mua