Mukamuka Mooli, ka e Tonutika Nakai?

IA Sepetema 2005, ko e Lotu ha Igilani ne talia fiafia e fakatoka mai he The 100-Minute Bible. Ne talaga ke totou ai he 100 e minuti, ko e tohi foou ne kua fakatote e tau Tohiaga Tapu Heperu ke he 17 ni e lau ne 17 e vala i loto mo e he tau Tohiaga Tapu Heleni ke he 33 e lau ne 33 e vala i loto, ti tiaki oti e “tau kupu ne mateafu” he talahau he taha tagata liu kitekite. Kua mukamuka mooli ke totou, ka e tonutika nakai?

He lafi ke he utakehe he higoa faka-Atua, ko Iehova, to loga foki e tau fekehekeheaki ka mailoga he tau tagata makutu he fakaako ke he Tohi Tapu. (Salamo 83:18) Ma e fakatai, talahau he vala 1 “ne tufuga [he Atua] e lagi mo e lalolagi ke he molea e ono e aho.” Ka e talahau pehē e Kenese 1:1: “Ne eke he Atua e lagi mo e lalolagi ke he kamataaga.” Ka mole ia, kua fakamaama fakalahi mai he tala fakamua e falu gahua tufuga ne putoia e lalolagi ke he ono ni e “aho,” po ke tau magaaho. Ti fakakatoatoa mogoia he Kenese 2:4 e magaaho katoa he tufugatia, ti fakahigoa ko e “aho ne eke ai e Iehova ko e Atua e lalolagi mo e lagi.”

Hagaao ke he The 100-Minute Bible, ko Iopu, ko e tagata mahani fakamooli, ne keli ai he “taha he tau fekafekau he [Atua], ko Satani, . . . ha ko e matagahua haana a ia ke eke mo hokotaki he tau tagata.” Kitia nakai e koe e fekehekeheaki nei? Ko e kupu “Satani” kua kakano “Totoko.” Ne nakai ko e fekafekau he Atua a Satani, ka ko e matapatu fī lahi he Atua ne kotofa ne ia a ia ke eke mo hokotaki he tau tagata.​—Fakakiteaga 12:7-10.

Ka e kua e vala he tau Tohiaga Tapu Heleni Kerisiano he The 100-Minute Bible? He fakatai hagaao ke he tau mamoe mo e tau koti, ne pehē e tohi foou kua fiafia a Iesu ki a lautolu ne lagomatai “ha tagata pete e tuaga fakateaga,” ka e pehē mooli a Iesu to fakamonuina e ia a lautolu ne eke e tau mena mitaki ki a lautolu ne mumuitua ke he tuagahui haana​—ko e haana “tau matakainaga.” (Mataio 25:40) Ko e fakamaamaaga fakakū he Fakakiteaga kua talahau ke he tau tagata ne totou ko “Roma, ko Papelonia lahi, to moumou katoatoa.” Ka e iloa he tau tagata fakaako he Tohi Tapu, kua nakai fai vala pihia i loto he tau tohi fakamua ke fakakite aki a ‘Papelonia Lahi.’​—Fakakiteaga 17:15–18:24.

Ma lautolu ne kumi ke iloa e Tufuga ha tautolu mo e maama haana finagalo, kua nakai fai mena ke hukui aki e Tohi Tapu katoa. Mooli, to molea e 100 e minuti ke totou e Tohi Tapu, ka e he taute pihia to aoga lahi mahaki e tau palepale ka moua. (Ioane 17:3) Kia talia e koe e gahua lahi nei mo e moua e tau palepale ma haau.​—2 Timoteo 3:16, 17.