Kia Fakaheke Fakalataha e Tautolu e Higoa a Iehova

“Kia nava atu a mutolu kia Iehova fakalataha mo au; kia fakaheke fakalataha a tautolu ke he hana higoa.”​—SALAMO 34:3.

1. Ko e heigoa e fakafifitakiaga mitaki ne fakatoka e Iesu ke he magaaho ne fekafekau a ia he lalolagi?

KE HE po Nisana 14, 33 V.N., ne uhu fakalataha e Iesu mo e tau tutaki haana e tau lologo fakaheke ki a Iehova he poko tapa ki luga he fale i Ierusalema. (Mataio 26:30) Ko e magaaho fakahiku ma Iesu ke taute pihia mo e tau aposetolo haana. Ti kua latatonu ni ke fakahiku e feleveiaaga haana mo lautolu ke he puhala ia. Mai he kamataaga ke he fakaotiaga he fekafekau haana he lalolagi, ne fakaheke e Iesu e Matua haana ti fakailoa fakamakai e higoa Haana. (Mataio 4:10; 6:9; 22:37, 38; Ioane 12:28; 17:6) Ko e fua, ne taogo atu e ia e uiina mafanatia he salamo: “Kia nava atu a mutolu kia Iehova fakalataha mo au; kia fakaheke fakalataha a tautolu ke he hana higoa.” (Salamo 34:3) Ko e fakafifitakiaga mitaki ha ia ma tautolu ke muitua!

2, 3. (a) Iloa fēfē e tautolu e kakano fakaperofeta he Salamo 34? (e) Ko e heigoa ka fakatutala a tautolu ke he vala tala nei mo e vala tala ka mui mai?

² Fai tulā gahoa he mole e tau lologo fakaheke mo Iesu, ne kitia mata he aposetolo ko Ioane taha mena kehe lahi ne tupu. Ne kitia e ia e Iki haana mo e tokoua e tagata kolokolovao ne fakatautau ai ke mamate he akau fakakikiveka. Ne papaki he tau kautau Roma e tau hui he tau tagata kolokolovao tokoua ke mafiti e mamate ha laua. Ka e, talahau e Ioane ne nakai papaki e lautolu e tau hui a Iesu. He magaaho ne o mai a lautolu ki a Iesu, kua fitā a ia he mate. He Evagelia haana, ne kitia e Ioane ko e mena ia ne tupu ko e fakamooliaga he taha vala he Salamo 34: “Nakai papaki taha hui haana.”​—Ioane 19:32-36; Salamo 34:20.

³ Loga foki e falu manatu he Salamo 34 ne aoga ke he tau Kerisiano. He vala tala nei mo e vala tala ka mui mai, to liu a tautolu ke fakatutala ke he tau tutūaga ne tohia e Tavita e salamo mo e manamanatu ke he tau tala atihake i loto he salamo.

Hola a Tavita ia Saulo

4. (a) Ko e ha ne fakauku a Tavita mo patuiki anoiha ha Isaraela? (e) Ko e ha a Saulo ne “fakaalofa lahi” mahaki ki a Tavita?

⁴ He magaaho ne fuata a Tavita, ko Saulo e patuiki i Isaraela. Pete ia, ne nakai omaoma a Saulo ti galo e taliaaga a Iehova. Ma e kakano ia, ne tala age e perofeta ko Samuela ki a ia: “Kua fofo e Iehova e kautu a Isaraela mai ia koe ke he aho nai, mo e foaki atu ai ke he taha ne mua he mitaki hana mahani ke he mahani hau.” (1 Samuela 15:28) Fakamui, ne takitaki e Iehova a Samuela ke fakauku a Tavita, ko e tama fakahiku a Iese, ke eke mo patuiki ainei ha Isaraela. He magaaho nei ne fano kehe e agaaga he Atua, ati pouligia e manamanatuaga he Patuiki ko Saulo. Ko Tavita ko e tagata ta leo fakatagitagi pulotu ne tamai ki Kipea ke fekafekau ke he patuiki, ti tamai ai he tau leo fakatagitagi ha Tavita e okioki ki a Saulo, nukua “fakaalofa lahi mai a ia kia ia.”​—1 Samuela 16:11, 13, 21, 23.

5. Ko e ha ne hiki e aga a Saulo ki a Tavita, ti ko e heigoa ne omoi a Tavita ke taute?

⁵ He fai magaaho he mole, ne fakamooli a Iehova ke fakalataha mo Tavita. Ne lagomatai e Iehova a ia ke kautū ke he tupua Filisitia ko Koliato ti lalago a Tavita he fakalilifu a ia i Isaraela ma e pulotu fakakautau haana. Pete ia, ko e fakamonuina a Iehova ki a Tavita ne taute a Saulo ke mahekeheke, ati tupu e vihiatia haana ki a Tavita. Lagaua e ta e Tavita e kitara haana ki mua a Saulo, ne velo aki he patuiki e tao a ia. Lagaua ne maeke ia Tavita ke kalo he tao. He magaaho ke lagatolu aki ne lali a Saulo ke tamate a ia, ne mailoga  he patuiki anoiha a Isaraela kua lata a ia ke hola ma e moui haana. Fakahiku ai, ha ko e tau laliaga tumau ha Saulo ke tapaki mo e tamate a Tavita, ne eketaha a ia ke fakamumuli i fafo he matakavi ha Isaraela.​—1 Samuela 18:11; 19:9, 10.

6. Ko e ha ne poaki a Saulo ke tamate e tau tagata oti ha Nove?

⁶ He fenoga haana ke he motuaga ha Isaraela, ne nofo a Tavita he maaga ha Nove, ke he matakavi ne toka ai e fale uta fano a Iehova. Ka kua ō fakalataha mo Tavita e tau fuata taane ne takitaki a ia ti kumi e Tavita e tau mena kai ma lautolu oti. Ne iloa e Saulo kua age he ekepoa ne mua falu mena kai ki a Tavita mo e haana tau tagata mo e pelu ne uta e Tavita ia Koliato nukua mate. He ita lahi, ne tamate e Saulo e tau tagata oti he motu, fakalataha mo e 85 e ekepoa.​—1 Samuela 21:1, 2; 22:12, 13, 18, 19; Mataio 12:3, 4.

Hao Foki Mai he Mate

7. Ko e ha ne nakai ko e matakavi haohao mitaki a Kata ke fakamumuli ai a Tavita?

⁷ Mai i Nove, ne hola a Tavita kavi ke 40 e kilomita ke he faahi lalo he matakavi i Filisitia mo e kumi puipuiaga mo e Patuiki ko Akisa he taone ha Koliato, ko Kata. Liga manatu a Tavita ko e matakavi fakahiku a ia ko Kata ka kumi e Saulo a ia. Nakai leva, ne mailoga he tau fekafekau he patuiki a Kata a Tavita. He tau logona e Tavita kua kitia tuai a ia, “ti matakutaku lahi ai a ia ki mua a Akisa ko e patuiki a Kata.”​—1 Samuela 21:10-12.

8. (a) Ko e heigoa he Salamo 56 ne talahau ki a tautolu hagaao ke he mena ne tupu ki a Tavita i Kata? (e) Hao fetamakina fēfē a Tavita mai he mate?

⁸ Ne tapaki ai he tau Filisitia a Tavita. Liga ko e magaaho nei ne fati e Tavita e salamo mai he loto he ole atu ki a Iehova: “Kia utu haku a tau hihina mata ke he hāu a lupo.” (Salamo 56:8 mo e mataulu) Ti talahau e ia haana mauokafua to nakai nimo e Iehova haana maanu ka to leveki fakaalofa ki a ia mo e puipui ki a ia. Ne manamanatu foki a Tavita ke he lagatau ke fakavaia aki e patuiki Filisitia. Ne taute a ia ke tuga kua heketia. He kitia e mena nei, ne akonaki he Patuiki ko Akisa e tau fekafekau haana he tamai e tagata “heketia” ki mua haana. Maaliali ai, ne fakamonuina e Iehova e lagatau ha Tavita. Ne hola kehe a Tavita mai he maaga, ati hao fetamakina foki a ia mai he mate.​—1 Samuela 21:13-15.

9, 10. Ko e heigoa e kakano ne tohi e Tavita e Salamo 34, ti liga ko hai foki ne tokaloto e Tavita he magaaho ne fati e ia e salamo?

⁹ Ne nakai talahau he Tohi Tapu kua fehola foki a lautolu ne fakalataha mo Tavita ki Kata po kua takahao a lautolu ki a ia mai he tau maaga tata ha Isaraela. Mena fe ni, kua liga liu feleveia fiafia ai he magaaho ne tala age e Tavita ki a lautolu e puhala ne liu a Iehova laveaki a ia. Ko e mena ia ne tupu ne fakavē aki e Salamo 34, nukua fakakite he mataulu. He tau kupu tohi fitu fakamua he salamo, ne fakaheke e Tavita e Atua ha kua laveaki a ia mo e uiina e tau tagata lalago ke fakalataha mo ia he fakaheke a Iehova ko e Laveaki ne Mua he tau tagata Haana.​—Salamo 34:3, 4, 7.

¹⁰ Ko Tavita mo e tau tagata haana ne fakamumuli he ana ko Atulama he atu mouga a Isaraela, kavi ke 15 e kilomita ke he faahi uta ha Kata. Ko e tau Isaraela i ai ne nakai fiafia ke he tau tuaga he pule he Patuiki ko Saulo ne kamata ke fakalataha auloa mai mo lautolu. (1 Samuela 22:1, 2) He magaaho ne fati e Tavita e tau kupu ha Salamo 34:8-22, ne liga tokaloto e ia a lautolu nei. Ko e tau fakamanatuaga he tau kupu tohi ia kua aoga foki ma tautolu he vahā nei, mo e to aoga mooli a tautolu mai he fakatutalaaga matafeiga he salamo fulufuluola nei.

Pihia Nakai Haau a Matapatu Manako Tuga ha Tavita?

11, 12. Ko e heigoa e tau kakano ha tautolu ke fakaheke tumau ki a Iehova?

¹¹ “To fakaaue au kia Iehova ke he tau aho oti kana; nakai noa e fakaheke he haku gutu kia ia.” (Salamo 34:1) He nofo paea fano, ne liga loga e tau tupetupe ha Tavita ke he tau levekiaga fakatino, ka e he fakakite mai he tau kupu nei, ko e tau levekiaga ke he tau aho takitaha haana ne nakai maluia haana fifiliaga ke fakaheke a Iehova. Ko e fakafifitakiaga mitaki ha ia ma tautolu ka fehagai a tautolu mo e tau mena uka! He haia a tautolu he aoga, he gahua, fakalataha mo e tau matakainaga Kerisiano, po ke he fekafekauaga he fonua, ko e matapatu manako ha tautolu kua lata ke fakaheke a Iehova. Manamanatu la ke he tau kakano loga kua lata ke taute pihia e tautolu! Ma e fakatai, nakai fai fakaotiaga ke he mena ka  moua e tautolu mo e fiafia ke he tau gahua homo ue atu ha Iehova he tufugatia. Ti mailoga e mena ne fakakatoatoa e ia he puhala he vala he fakatokatokaaga haana he lalolagi! Pete ne nakai mitaki katoatoa a lautolu, ne fakaaoga fakalahi e Iehova e tau tagata tua fakamooli he vahā foou nei. Maeke fēfē e tau gahua he Atua ke fakatatai mo e tau gahua he tau tagata ne tapuaki ki ai he lalolagi? Talia nakai a koe ki a Tavita, ne tohi foki: “Ko e Iki na e, nakai ha he tau atua taha ke tuga a koe, nakai fai gahua foki ke tuga hāu a tau gahua.”​—Salamo 86:8.

¹² Tuga a Tavita, ne omoomoi e logonaaga ha tautolu ke fakaheke tumau a Iehova ha ko e tau gahua mua ue atu haana. Lafi ki ai, kua fiafia a tautolu ke iloa ko e Kautu he Atua mogonei ha he tau lima he Hakega tukulagi a Tavita, ko Iesu Keriso. (Fakakiteaga 11:15) Kakano anei ko e fakaotiaga he fakatokaaga nei kua tata mai. Ko e vahā tukulagi he tau tagata ne molea e ono e piliona kua hagahaga kelea lahi. Nakai la pihia ia fakamua e lata ke tala age ke he falu hagaao ke he Kautu he Atua mo e mena ka nakai mule to taute ma e tau tagata mo e ke lagomatai a lautolu ke fakaheke auloa a Iehova mo tautolu. Mooli ko e mena fakamua ha tautolu he moui kua lata ke fakaaoga e tau magaaho oti ke fakamalolō e falu ke talia e “tala mitaki” nai neke mule lahi.​—Mataio 24:14.

13. (a) Ko hai ne hula ki ai a Tavita, ti ko e vahega tagata fēfē ne talia? (e) Futiaki fēfē a lautolu ne mahani molū ke he fakapotopotoaga Kerisiano he vahā nei?

¹³ “To fiafia haku agaga kia Iehova; to fanogonogo ki ai a lautolu ne matematekelea, ti fiafia ai a lautolu.” (Salamo 34:2) Ne nakai hula a Tavita anei ke he tau mouaaga fakatagata. Ma e fakatai, ne nakai fakaikaluga a ia ke he puhala ne fakavaia e ia e patuiki ha Kata. Ne mailoga e ia ko Iehova ne puipui a ia he magaaho ne nofo i Kata ti hao ai ha kua lagomatai e Iehova. (Tau Fakatai 21:1) Ti nakai hula a Tavita ki a ia ni, ka ki a Iehova. Ha ko e mena nei, ne futiaki a lautolu ne mahani molū ki a Iehova. Ne fakamatalahi pihia foki e Iesu e higoa ha Iehova, ti futiaki he mena nei e tau tagata fakatokolalo mo e mukamuka ke fakaako ki a Ia. He vahā nei, ko lautolu ne mahani molū he tau motu oti kua futiaki ke he fakapotopotoaga he lalolagi katoa he tau Kerisiano fakauku ne ko Iesu e Ulu. (Kolose 1:18) Ko e tau loto ha lautolu ia ne mahani molū kua aamotia he magaaho ne logona e lautolu e higoa he Atua ne fakamatalahi he tau fekafekau fakatokolalo haana mo e magaaho ne logona e lautolu e fekau he Tohi Tapu, ne fakamalolō he agaga tapu he Atua a lautolu ke maama.​—Ioane 6:44; Gahua 16:14.

Fakamalolō he Tau Feleveiaaga e Tua ha Tautolu

14. (a) Kua maimainā ni kia a Tavita ke fakaheke a Iehova ke he magaaho tokotaha? (e) Ko e heigoa e fakafifitakiaga ne fakatoka e Iesu hagaao ke he tau feleveiaaga ma e tapuakiaga?

¹⁴ “Kia nava atu a mutolu kia Iehova fakalataha mo au; kia fakaheke fakalataha a tautolu ke he hana higoa.” (Salamo 34:3) Ne nakai maimainā a Tavita ke fakaheke hokoia a Iehova ke he tau magaaho tokotaha. Ne uiina mafanatia e ia e tau kapitiga haana ke fakalataha mo ia he fakaheke e higoa he Atua. Pihia foki, ne fiafia a Iesu Keriso, ko Tavita ne Mua Atu, ke fakaheke fakalataha a Iehova mo e tau tagata​—he sunako he matakavi ia, he tau faiagahau he faituga he Atua i Ierusalema, mo e fakalataha mo e falu tutaki haana. (Luka 2:49; 4:16-19; 10:21; Ioane 18:20) Ko e kotofaaga fiafia ha ia ke muitua e fakafifitakiaga a Iesu he fakaheke a Iehova he tau magaaho oti ka fakalataha auloa mo e tau matakainaga talitonu, mua atu mogonei “kua tata tuai e aho”!​—Heperu 10:24, 25.

15. (a) Ko e heigoa e mena ne lauia e tau tagata he mena ne tupu ki a Tavita? (e) Aoga fēfē a tautolu he fakalataha ke he tau feleveiaaga ha tautolu?

¹⁵ “Ne kumikumi au kia Iehova, ti tali mai ai a ia kia au, mo e laveaki e ia au mai he tau mena oti ne matakutaku ai au.” (Salamo 34:4) Ko e mena nei ne tupu kua aoga lahi ki a Tavita. Ti, matutaki a ia ke talahau: “Ne ui e tagata mamahi nai, ti fanogonogo mai ai a Iehova, mo e fakamoui a ia mai he hana tau matematekelea oti kana.” (Salamo 34:6) Ka feoaki mo e tau matakainaga talitonu, kua loga e magaaho ne moua e tautolu ke talahau e tau mena tutupu ne atihake ke he puhala kua lagomatai e Iehova a tautolu ke fakauka ke he tau tutūaga uka. Kua fakamalolō he mena nei e tua he tau matakainaga talitonu ha tautolu, tuga ni ne fakamalolō he tau talahauaga  ha Tavita e tua he tau tagata haana. He mena ne tupu ki a Tavita ko e tau kapitiga haana ne “kitekite a lautolu kia [Iehova] ti maama ai ha lautolu a tau mata; ti nakai mā foki ha lautolu a tau mata.” (Salamo 34:5) Pete he kalo tumau mai he Patuiki ko Saulo, ne nakai mā a lautolu. Ne mauokafua a lautolu kua lalago he Atua a Tavita, ti kua maama ha lautolu a tau mata. He puhala pihia, ko lautolu ne fiafia foou ti pihia mo lautolu ne leva he eke mo tau Kerisiano mooli kua haga ki a Iehova ma e lalagoaga. Ha kua logona fakatagata e lautolu e lagomatai nei, kua fakaata he maama he tau fofoga ha lautolu e fakamalolō ha lautolu ke fakatumau ke tua fakamooli.

Kia Loto Fakaaue ma e Lagomatai Fakaagelu

16. Fakaaoga fēfē e Iehova e tau agelu haana ke laveaki a tautolu?

¹⁶ “Kua fakatu e fale api he agelu a Iehova ke pa takai a lautolu kua matakutaku kia ia, ke laveaki foki e ia a lautolu.” (Salamo 34:7) Ne nakai onoono a Tavita ke he laveakiaga haana mai ia Iehova ko e mena tupu ni ki a ia. Mooli, ko Tavita ne fakauku e Iehova mo patuiki a Isaraela anoiha; ka e iloa e ia kua fakaaoga e Iehova e tau agelu haana ke leveki e tau tagata tapuaki tua fakamooli haana, pete he tu tokoluga po ke tokolalo a lautolu. He vahā foou nei ha tautolu, kua moua foki he tau tagata tapuaki mooli e puipuiaga ne foaki e Iehova. I Nasi Sihamani​—pihia mo Anakola, Malaui, Mosamipiki, mo e loga atu foki he tau motu—​ne fakatokatoka he tau pule e tau fakaholoaga ke tatafi kehe e Tau Fakamoli a Iehova. Kua teao e tau laliaga ha lautolu. Ka e, matutaki e tau tagata a Iehova he tau motu ia ke tupu olaola he fakaheke fakalataha a lautolu ke he higoa he Atua. Ko e ha? Ha kua fakaaoga e Iehova e tau agelu tapu haana ke puipui mo e takitaki e tau tagata haana.​—Heperu 1:14.

17. Ko e heigoa e tau puhala ne lagomatai he tau agelu he Atua a tautolu?

¹⁷ Lafi ki ai, ne maeke he tau agelu ha Iehova ke hikihikifano e tau puhala ke maeke ke utakehe a lautolu ne fakatupu e falu ke tupetupe, mai he tau tagata a Iehova. (Mataio 13:41; 18:6, 10) Ti pete ne nakai mailoga e tautolu he magaaho ia, ne utakehe he tau agelu e tau mena vihi ka fakatauhele aki e fekafekauaga ha tautolu ke he Atua, ti puipui e lautolu a tautolu mai he tau mena ka fakahagahaga kelea e fakafetuiaga ha tautolu mo Iehova. Mua atu e aoga, ne takitaki e lautolu a tautolu he gahua fakamatala he “vagahau mitaki tukulagi” ke he tau tagata oti, putoia e tau matakavi ne hagahaga kelea lahi e tau tutūaga he gahua fakamatala. (Fakakiteaga 14:6) Ko e fakamooliaga he lagomatai fakaagelu kua fa talahau mai he tau tohi faka-Tohi Tapu ne taute fakailoa he Tau Fakamoli a Iehova. * Ko e tau mena tutupu pihia kua loga lahi mahaki ke talahau kua tōtamaki.

18. (a) Ko e heigoa kua manako ki a tautolu ke aoga mai he lagomatai fakaagelu? (e) Ko e heigoa ka fakatutala ki ai he vala tala ka mui mai?

¹⁸ Ke matutaki e aoga mai he takitakiaga mo e puipuiaga fakaagelu, kua lata ia tautolu ke fakatumau e fakaheke he higoa a Iehova pete ne fehagai mo e totokoaga. Manatu, kua pātakai ni he tau agelu he Atua a “lautolu kua matakutaku kia [Iehova].” Ko e heigoa e kakano he mena ia? Ko e heigoa e matakutaku ke he Atua, ti feaki fēfē e tautolu e mena ia? Ko e ha kua manako e Atua fakaalofa ki a tautolu ke matakutaku ki a ia? To fakatutala e tau hūhū nei ke he vala tala ka mui mai.

[Matahui Tala]

To Tali Fēfē e Koe?

• Ko e heigoa e tau kamatamata ne fakauka a Tavita ki ai he magaaho ne fuata a ia?

• Tuga a Tavita, ko e heigoa e tau matapatu tupetupe ha tautolu?

• Fēfē e onoonoaga ha tautolu ke he tau feleveiaaga Kerisiano?

• Fakaaoga fēfē e Iehova e tau agelu haana ke lagomatai a tautolu?

[Tau Hūhū he Fakaakoaga]