Puhala ke Kitia e Tapuakiaga Mooli

LAULAHI he tau lotu ne totoku nukua mai he Atua e tau fakaakoaga ha lautolu. Ati kua mitaki ma tautolu ke fanogonogo ke he tau kupu he aposetolo ha Iesu ko Ioane, ne tohia: “Ko e tau tagata fakahelehele na e, aua neke talia e tau agaga oti kana, ka kia kamatamata e mutolu e tau agaga oti po ke mai he Atua a lautolu; nukua tokologa e tau perofeta pikopiko kua o atu ke he lalolagi.” (1 Ioane 4:1) Maeke fēfē ia tautolu ke kamatamata taha mena ke iloa kua mai mooli he Atua?

Ko e tau mena oti ne mai he Atua kua fakaata e aga fakaperesona haana, kua pauaki ke he aga ne mua haana ko e fakaalofa. Ma e fakatai, ko e hohogi ha tautolu, ati maeke ia tautolu ke fiafia ke he manogi he tau lakau kai, tau fiti, po ke fua falaoa ne moho laia, ko e fakakiteaga he fakaalofa he Atua. Ko e maeke ia tautolu ke kitia e toaga laā, ko e pepe, po ke mamali he tama tote nukua fakaata e fakaalofa he Atua ma tautolu. Kua pihia foki e maeke ha tautolu ke logona e leo kofe fuluola, leo he manu lele, po ke leo he fakahele. Pihia foki e aga fakatagata ha tautolu, pete he nakai mitaki katoatoa, kua fakaata e fakaalofa he Atua. Ko e kakano haia ne fa logona e tautolu e mooli he tau kupu ha Iesu: “Kua mua e monuina hana ke foaki atu, ke he monuina hana ke talia mai.” (Gahua 20:35) Kua olioli a tautolu ke fakakite e fakaalofa ha kua tufuga a tautolu ke he “fakatai he Atua.” (Kenese 1:27) Pete he loga atu falu aga ha Iehova, ko e fakaalofa e aga fakaperesona haana kua mua ue atu.

Ko e tau tohi ne puna mai he Atua kua lata ke fakaata e fakaalofa haana. Kua loga e tohi i tuai he tau lotu he lalolagi. Kautū fēfē e tau tohi ia he fakaata e fakaalofa he Atua?

Ko e tala mooli anei, laulahi he tau tohi fakalotu i tuai ne tote e fakamaamaaga ke he puhala kua fakaalofa e Atua ki a tautolu po ke puhala ka fakaalofa a tautolu ke he Atua. Ko e mena ia, totou miliona e tagata ne nakai moua ha tali he hūhū a lautolu, “Ko e ha ne kitia mooli e mautolu e fakaalofa he Atua ke he tau tufugatia ka kua tumau agaia e matematekelea mo e mahani kelea?” Ko e Tohi Tapu, he taha faahi, ko e tohi fakalotu i tuai hokoia ne fakamaama katoatoa e fakaalofa he Atua. Kua fakaako foki ki a tautolu e puhala ke fakagahuahua e fakaalofa.

Ko e Tohi Hagaao ke he Fakaalofa

Ko e Kupu he Atua, ko e Tohi Tapu, kua fakakite a Iehova ko e ‘Atua he fakaalofa.’ (2 Korinito 13:11) Kua fakamaama he Tohi Tapu e puhala ne omoi he fakaalofa a Iehova ke age ke he tau tagata fakamua e moui ne atāina mai he gagao mo e mate. Ka kua hoko mai e matematekelea ke he tagata ha kua totoko ke he pule he Atua. (Teutaronome 32:4, 5; Roma 5:12) Ne gahua a Iehova ke liuaki mai e mena ne galo. Ne pehē e Kupu he Atua: “Nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.” (Ioane 3:16) Kua au atu foki e fakakikila he tau Tohiaga Tapu e fakaalofa he Atua he fakamaama e puhala ne foaki he Atua e fakatufono mitaki katoatoa ke he pule ha Iesu ke liuaki mai e mafola ke he tau tagata omaoma.​—Tanielu 7:13, 14; 2 Peteru 3:13.

Kua talahau fakakū he Tohi Tapu e kotofaaga he tagata ke he tau kupu nei: “Kia fakaalofa a koe ke he Iki [Iehova] hau a Atua mo e hau a loto katoa, mo e hau a agaga katoa, mo e hau a manatu katoa. Ko e poaki fakamua hanā mo e lahi. Kua pihia foki mo ia ne ua aki, Kia fakaalofa atu a koe kia ia ne katofia a mua, kia tuga foki na koe kia koe. Ko e na poaki ua ia kua tautau ai e fakatufono oti.” (Mataio 22:37-40) Kua talahau e Tohi Tapu ke omoomoi he agaaga he Atua. Ha kua fakaata mooli e aga fakaperesona haana, kua maeke ia tautolu ke mauokafua kua mai ai he ‘Atua he fakaalofa.’​—2 Timoteo 3:16.

He fakagahua e tuaga taha nei ni, kua maeke ia tautolu ke kitia e tau tohi i tuai na kua mai mooli he Atua. Kua fakakite foki he fakaalofa e tau tagata tapuaki mooli, ha kua fifitaki e lautolu e Atua he fakakite e fakaalofa.

Puhala ke Kitia e Tau Tagata kua Fakaalofa ke he Atua

Kua kitia maaliali a lautolu ne fakaalofa mooli ke he Atua, mua atu he magaaho nei ha kua nonofo  a tautolu he mena ne fakahigoa he Tohi Tapu “ko e tau aho fakamui.” Kua holo ki mua e “ofaofa he tau tagata a lautolu ni, to velevele koloa, . . . manako lahi ke he tau mena ke fiafia ki ai, ka e manako tote ke he Atua.”​—2 Timoteo 3:1-4.

Maeke fēfē ia koe ke kitia e tau tagata ne fakaalofa ke he Atua? Ne pehē e Tohi Tapu: “Ko e fakaalofa ke he Atua hanai, kia omaoma a tautolu ke he tau poaki hana.” (1 Ioane 5:3) Kua omoomoi he fakaalofa ke he Atua e tau tagata ke fakalilifu e tuaga he mahani i loto he Tohi Tapu. Ma e fakatai, ha ha he Tohi Tapu e tau fakatufono ke he mahani fakataane mo e fifine mo e ke he fakamauaga. Ko e tau fakafetuiaga he mahani fakataane mo e fifine kua fakagofua ni ki loto he fakamauaga, ti kua lata ke mau tumau e fakamauaga. (Mataio 19:9; Heperu 13:4) He fina atu e fifine i Sepania ne fakaako fioloti ke he feleveiaaga ne fa e fakaako fakamakutu he Tau Fakamoli a Iehova e tau matafakatufono he mahani i loto he Tohi Tapu, ne talahau e ia: “Ne hili e feleveiaaga ti fano au mo e logonaaga atihake, nakai ni ha ko e tau lauga faka-Tohi Tapu ne fakamaama ka e pihia foki ke he kaufakalataha ne ha ha he tau tagata nei, tau mahani kua tokoluga ha lautolu, mo e mahani mitaki.”

Ke lafi ke he fakaalofa ha lautolu ma e Atua, kua mukamuka ke kitia e tau Kerisiano mooli ke he puhala ne fakakite e lautolu e fakaalofa ke he tau katofia ha lautolu. Ko e gahua ne mua atu e aoga ha lautolu ko e tutala ke he falu hagaao ke he amaamanakiaga hokoia ma e tagata, ko e Kautu he Atua. (Mataio 24:14) Nakai fai mena kua maeke ke mua atu e aoga tukulagi ma e tau katofia ha lautolu ka ko e lagomatai a lautolu ke moua e iloilo he Atua. (Ioane 17:3) Kua fakakite foki he tau Kerisiano mooli e fakaalofa ha lautolu ke he falu puhala. Kua lagomatai e lautolu e tau tagata kua matematekelea. Ma e fakatai, magaaho ne matematekelea he tō e mafuike i Italia, ne hokotaki he nusipepa he matakavi ko e Tau Fakamoli a Iehova kua “gahua ke he puhala lagomatai he foaki ki a lautolu ne matematekelea ti nakai tupetupe ko e lotu fe he tau tagata ia.”

Lafi ke he fakaalofa ke he Atua mo e katofia, kua feofanaki e tau Kerisiano mooli. Ne pehē a Iesu: “Ko e poaki fou ke tuku atu e au kia mutolu, kia feofanaki a mutolu; tuga he fakaalofa atu au kia mutolu, kia feofanaki foki a mutolu. Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.”​—Ioane 13:34, 35.

Kua kitia maaliali nakai e kehe he feofanaki he tau Kerisiano mooli? Pihia mooli he manatu he fifine fakameā fale ne higoa ko Ema. Ne gahua a ia i La Paz, Polivia, ne fa vevehe he fekehekehe fakamotu e tau tagata monuina mo e tau tagata mativa. Ne pehē a ia: “He magaaho fakamua ne fano au ke he feleveiaaga he Tau Fakamoli a Iehova, ne kitia e au e tagata taane ne tauteute mitaki ne nofo mo e tutala ke he fifine Initia. Ne nakaila kitia ia au ha mena pihia tali mai. He magaaho ia ni, ne iloa e au liga ko e tau tagata mooli ni he Atua anei. Tatai foki, ko e fifine fuata i Parasili ne higoa ko Miriam ne pehē: “Ne nakai iloa e au e puhala ke moua e fiafia, nakai i loto foki he magafaoa haaku. Ko e magaaho fakamua ne kitia e au e fakaalofa hane gahuahua he vahāloto he Tau Fakamoli a Iehova.” He Tau Faahi Kaufakalataha, ne tohi he takitaki tohi tala ma e matakau televisoni: “Ane mai tokologa atu foki e tagata ne momoui ke he puhala he tua ha mutolu, liga nakai hoko e motu nei ke he tuaga kua ha ha i ai mogonei. Ko au taha tagata tohi tala ne iloa kua fakavē e fakatokatokaaga ha mutolu ke he fakaalofa mo e tua malolō ke he Tufuga.”

Kumi e Tapuakiaga Mooli

Ko e fakaalofa e fakamailoga he tapuakiaga mooli. Ne fakatai e Iesu e kumi ke he tapuakiaga mooli ke he kumi he hala hako mo e fifili ke fano i ai. Ko e hala ia ni ne takitaki atu ke he moui tukulagi. Ne pehē a Iesu: “Kia hūhū atu a mutolu ke he gutuhala pukilu; ha ko e mena pulahi e gutuhala, ti laulahi foki e hala ke pu atu ke he malaia, kua tokologa foki a lautolu kua huhū atu ki ai. Ko e mena pukilu e gutuhala, ti lautote foki e hala ke pu atu ke he moui, kua tokogaogao foki a lautolu ke moua.” (Mataio 7:13, 14) Taha maka ni e matakau he tau Kerisiano mooli ne o fakalataha mo e Atua he puhala he tapuakiaga mooli. Ko e mena ia, kua aoga e lotu haau ne fifili. Ka moua e koe e puhala ia mo e fifili ke fano i ai, kua moua tuai e koe e puhala he moui nukua mua e mitaki ha ko e puhala a ia he fakaalofa.​—Efeso 4:1-4.

Manamanatu la ke he olioli lahi kua maeke ia koe ke moua ka fano he hala he tapuakiaga mooli! Kua tuga e ō mo e Atua. Maeke ia koe ke ako mai he Atua e pulotu mo e fakaalofa ke olioli e fakafetuiaga mitaki mo e falu. Mai ia ia, kua maeke ia koe ke ako hagaao ke he kakano he moui, ti maeke ia koe ke maama e tau maveheaga he Atua mo e moua e amaamanakiaga ma e anoiha. To nakai tokihala a koe he kumi e tapuakiaga mooli.