Ko e Kumi ke he Tau Tali Hako

Maeke fēfē au ke puipui e malolō tino haaku?

Ko e heigoa haaku ka taute ke fiafia lahi e moui magafaoa haaku?

Maeke fēfē au ke leveki e gahua tupe haaku?

KUA hūhū nakai e koe ha hūhū pihia? Kua moua nakai e koe e tau tali ne aoga mo e gahuahua mooli? He tau tau takitaha, kavi ke he 2,000 e tohi kehekehe ne lolomi ne foaki e fakatonuaga ke he tau hūhū nei mo e falu vala tala aoga. I Peritania hokoia, ne fakaaoga he tau tagata totou ke hokotia ke he 80 e miliona pauna (kavi $150 miliona U.S.) he taha e tau ke he tau tohi ne foaki e tau fakatonuaga hagaao ke he puhala ke fehagai ke he tau paleko he moui. He Tau Faahi Kaufakalataha, ne $600 miliona ne moua he taha e tau mai he fakafua he tau tohi lagomatai fakatagata. Ti nakai ko koe ni ne kumi fakatonuaga mitaki ke fehagai ke he moui he tau aho takitaha.

Hagaao ke he tau fakatonuaga ne moua he tau tohi nei ne loga lahi, taha e tagata tohia ne pehē: “Ko e loga he tau tohi foou ne fatiaki mai ni he tau mena kua fitā he tohi.” Mooli, ko e loga he tau fakatonuaga i loto he tau tohi nei ko e fakataogo noa he pulotu ne fakamau i loto he taha tohi ne tuai lahi he lalolagi. Ko e tohi nei kua lahi mahaki e tufa fano ke he lalolagi katoa. Kua fakaliliu e tohi katoa po ke vala ke he kavi 2,400 e vagahau. He katoa, kua molea e 4.6 e piliona lagaki ne lolomi ke he lalolagi katoa. Ko e tohi nei ko e Tohi Tapu.

Kua talahau fakamaali he Tohi Tapu: “Ko e tau Tohi Tapu oti kana mai he [a]gaga he Atua ia, kua aoga ni ke fakaako ai, ke fakatonu ai, ke akonaki ai, ke fakailoilo ai foki ke he tututonu.” (2 Timoteo 3:16) Mooli, ne nakai tohia e Tohi Tapu ke eke mo tohi lagomatai fakatagata. Ko e matapatu fakaaogaaga ke fakakite e finagalo he Atua ma e tau tagata. Pete ia, ne loga e talahauaga he Tohi Tapu hagaao ke he puhala ke fehagai mo e tau lekua ne aga mau mo tautolu oti, ti mavehe mai ko lautolu ne mumuitua ke he tau takitakiaga i loto to ako e tau mena ke aoga ai a lautolu. (Isaia 48:17, 18) Ka fakagahuahua, to aoga tumau e tau fakatonuaga i ai, pete ko e motu, aga fakamotu, po ke tuaga he fakaakoaga he tagata. Ko e ha he totou e vala tala ka mui mai mo e fifili ne koe kua aoga kia e talahauaga he Tohi Tapu ke he tau matakupu tuga e malolō tino, magafaoa, mo e gahuaaga?