Muitua Fakatokolalo ke he Tau Leveki Fakaalofa
Muitua Fakatokolalo ke he Tau Leveki Fakaalofa
“Kia omaoma a mutolu ke he tau takitaki ha mutolu, mo e [“muitua,” NW] a mutolu ki ai.”—HEPERU 13:17.
1, 2. Ko e heigoa e tau kupu tohi ne fakakite ko Iehova mo Iesu ko e tau Leveki fakaalofa?
KO IEHOVA KO E ATUA, mo e haana Tama, ko Iesu Keriso, ko e tau Leveki fakaalofa. Ne perofeta e Isaia: “Kitiala, to haele mai e Iki ko Iehova mo e malolo, to pule hana lima māna; . . . To leveki e ia hana fuifui ke tuga ne leveki mamoe; to hapai e ia e tau punua mamoe ke he hana tau lima, mo e uta e ia a lautolu ke he hana fatafata; to takitaki fakatekiteki e ia e tau mamoe kua fai punua.”—Isaia 40:10, 11.
2 Ne fakamooli fakamua e perofetaaga ia he fakafoouaga he magaaho ne liliu e tau Iutaia ne toe ki Iuta he 537 F.V.N. (2 Nofoaga he Tau Patuiki 36:22, 23) Ne liu foki fakamooli he magaaho ne fakahao e Kuresa ne Mua, ko Iesu Keriso, a lautolu ne fakauku ne toe mai i ‘Papelonia Lahi’ he 1919. (Fakakiteaga 18:2; Isaia 44:28) Ko ia ko e “lima” a Iehova ke pule, he fakapotopoto auloa e tau mamoe mo e leveki fakaalofa a lautolu. Ne talahau e Iesu: “Ko au ko e leveki mamoe mitaki; kua kitia e au haku a tau mamoe; kua kitia foki au he haku a tau mamoe.”—Ioane 10:14.
3. Fakakite fēfē e Iehova e manamanatu fakaalofa ma e puhala ne taute aki e tau mamoe haana?
3 Ne peehi he perofetaaga he Isaia 40:10, 11 e fakaalofa hofihofi ne leveki aki e Iehova haana tau tagata. (Salamo 23:1-6) He haana fekafekauaga he lalolagi, ne fakakite foki e Iesu e manamanatuaga hofihofi ma e tau tutaki haana mo e tau tagata oti. (Mataio 11:28-30; Mareko 6:34) Ne mamahi lahi a Iehova mo Iesu ke he aga vale he tau leveki, po ke tau takitaki ha Isaraela, ne tiaki fakalialia mo e fakaaoga hēhē e tau mamoe ha lautolu. (Esekielu 34:2-10; Mataio 23:3, 4, 15) Ne mavehe e Iehova: “Ko e mena ia to fakamoui e au haku a fuifui mamoe, ti nakai tuai eke a lautolu mo tau mena ke hēhē; to fakafili foki e au e tau manu mo e tau manu. To fakatu foki e au e leveki mamoe ne tokotaha ma lautolu, ti fagai e ia a lautolu, ko e haku a fekafekau ko Tavita; to fagai e ia a lautolu, to eke foki a ia mo leveki mamoe kia lautolu.” (Esekielu 34:22, 23) He magaaho nei he fakaotiaga, ko Iesu Keriso, ko Tavita ne Mua Atu, ko e “leveki mamoe ne tokotaha” ne kotofa ki ai e Iehova e tau mena oti Haana he lalolagi, ko e tau Kerisiano fakauku he agaaga mo e ‘tau mamoe kehe.’—Ioane 10:16.
Tau Mena Fakaalofa Mai he Lagi ke he Fakapotopotoaga
4, 5. (a) Ko e heigoa e mena fakaalofa uho ne foaki e Iehova ke he tau tagata haana he lalolagi? (e) Ko e heigoa e mena fakaalofa ne foaki e Iesu ke he fakapotopotoaga haana?
4 He fakatū hake e “leveki mamoe ne tokotaha”—ko Iesu Keriso—ki luga he tau fekafekau Haana he lalolagi, ne foaki e Iehova e mena fakaalofa uho ke he fakapotopotoaga Kerisiano. Ko e mena fakaalofa nei ko e Takitaki mai he lagi ne perofeta ia Isaia 55:4: “Kitiala, kua ta age e au a ia mo tagata fakamoli mena ke he tau motu, ko e takitaki mo e pule ke he tau motu.” Ko e tau Kerisiano fakauku mo e tau tagata he “moto tagata tokologa” ne fakapotopoto mai he tau matakau fakamotu, tau magafaoa, tau tagata, mo e tau vagahau oti. (Fakakiteaga 5:9, 10; 7:9) Ne fakatū e lautolu e fakapotopotoaga he lalolagi katoa, “taha ai e fuifui mamoe,” i lalo he takitakiaga he “leveki mamoe ne tokotaha,” ko Keriso Iesu.
5 Ne foaki foki e Iesu e mena fakaalofa uho ke he fakapotopotoaga haana he lalolagi. Ne foaki e ia e tau leveki lagomatai tua fakamooli kua fifitaki ki a Iehova mo Iesu he leveki e fuifui mo e fakaalofa hofihofi. Ne tutala e aposetolo ko Paulo ke he mena fakaalofa nei he tohi haana ke he tau Kerisiano i Efeso. Ne tohi e ia: “Ne haele hake a ia ki luga, ne takitaki e ia e tau tagata ne fofo he tau ke he fakapaeāga; ne foaki noa mai foki e ia e tau mena fakaalofa ke he tau tagata. Kua tuku mai foki e ia e falu ke eke mo tau aposetolo, ko e falu foki ke eke mo tau perofeta, ko e falu foki ke fakamatala e vagahau mitaki, ko e falu foki ke eke mo tau leoleo katoa mo e tau akoako, Kia fakakatoatoa ai e mitaki he tau tagata tapu, ke eke ai e lautolu e tau gahua he tau fekafekau, kia ati hake ai e tino a Keriso.”—Efeso 4:8, 11, 12.
6. Fakatino fēfē e tau leveki fakauku ne fekafekau he tau kau he tau motua ia Fakakiteaga 1:16, 20, ti ko e heigoa ka talahau hagaao ke he tau motua fakauku mai he tau mamoe kehe?
6 Ko e “tau mena fakaalofa ke he tau tagata” hanei ko e tau leveki, po ke tau motua, ne kotofa e Iehova mo e Tama haana puhala he agaaga tapu, ke leveki e tau mamoe mo e fakaalofa hofihofi. (Gahua 20:28, 29) Ke kamata aki, ko e tau leveki nei ko e tau tagata taane Kerisiano fakauku oti. Ia Fakakiteaga 1:16, 20, ko lautolu ne eke mo kau he tau motua i loto he fakapotopotoaga fakauku ne fakatai ke he ‘tau fetu’ po ke “tau agelu” he lima matau, po ke ha ha i lalo he pule he Keriso. He tau aho fakamui nei, ne tote hifo fakahaga e numera he tau leveki fakauku he lalolagi, ko e laulahi he tau motua Kerisiano he tau fakapotopotoaga kua mai he tau mamoe kehe. Ha kua kotofa he tau hukui he Kau Fakatufono a lautolu i lalo he takitakiaga he agaaga tapu, kua maeke foki ia lautolu ke talahau kua ha ha ai i lalo he lima matau (po ke, i lalo he takitakiaga) he Leveki Mamoe Mitaki, ko Iesu Keriso. (Isaia 61:5, 6) Ha kua muitua e tau motua he tau fakapotopotoaga ha tautolu ki a Keriso, ko e Ulu he fakapotopotoaga, kua latatonu a lautolu mo e kaufakalataha katoatoa ha tautolu.—Kolose 1:18.
Omaoma mo e Muitua
7. Ko e heigoa e fakatonuaga ne foaki he aposetolo ko Paulo hagaao ke he tau aga ha tautolu ke he tau leveki Kerisiano?
7 Ko e tau Leveki ha tautolu he lagi, ko Iehova ko e Atua mo Iesu Keriso, ne amanaki ki a tautolu ke omaoma mo e muitua ke he tau leveki lagomatai ne kua kotofa e tau matagahua he fakapotopotoaga ki ai. (1 Peteru 5:5) I lalo he agaaga, ne tohia he aposetolo ko Paulo: “Kia manamanatu e tau takitaki ha mutolu, ko lautolu kua talahau atu e kupu he Atua kia mutolu; kia fifitaki a mutolu ha lautolu a tua, mo e manamanatu e fakahikuaga he tau mahani ha lautolu. Kia omaoma a mutolu ke he tau takitaki ha mutolu, mo e [muitua] a mutolu ki ai; nukua leoleo a lautolu ke he tau [solu] ha mutolu, to tala atu foki e lautolu e tala ki ai, kia eke ai e lautolu mo e fiafia, ka e aua neke eke mo e fakaatukehe; ha ko e mena nakai aoga ia kia mutolu.”—Heperu 13:7, 17.
8. Ko e heigoa ne uiina e Paulo a tautolu ke “manamanatu,” ti kua lata “kia omaoma” fēfē a tautolu?
8 Mailoga na uiina e Paulo a tautolu ke “manamanatu,” po ke mailoga fakamatafeiga, e fua he mahani tua fakamooli he tau motua ti fifitaki ke he tau fakafifitakiaga pihia he tua. Lafi ki ai, ne fakatonu e ia a tautolu ke omaoma mo e muitua ke he takitakiaga he tau tagata taane nei ne fakauku. Ne fakamaama he tagata pulotu ke he Tohi Tapu ko R. T. France he vagahau Heleni fakamua, ko e tau kupu nei ne fakaliliu “kia omaoma” ne nakai ko e “tau kupu fa mahani ma e omaoma, ka ko e kakano mooli ‘kia fakalagalaga,’ hagaao ke he talia fakamakai e takitakiaga ha lautolu.” Ne omaoma e tautolu e tau motua ha kua nakai ni takitaki he Kupu he Atua a tautolu ke taute pihia ka kua fakalagalaga foki ki a tautolu kua ha ha ia lautolu e tau manako he Kautu mo e matakite ke he tau tutūaga ha tautolu. To fiafia mooli a tautolu kaeke ke talia fakamakai e tautolu e takitakiaga ha lautolu.
9. Ko e ha kua lata ia tautolu ‘ke muitua’ he lafi ke he omaoma?
9 Ka e kua ka nakai talitonu a tautolu ke he falu mena ne takitaki he tau motua kua nakai tonu lahi e puhala ne taute aki? Ko e magaaho haia ke fakagahua e muitua. Kua mukamuka ke omaoma ka kitia mitaki e tau mena oti ti talia e tautolu, ka e to fakakite e tautolu e muitua mooli ka hihiga a tautolu he magaaho ka nakai maama fakatagata e tautolu e takitakiaga ne tuku mai. Ko Peteru, ne nakai leva ti eke mo aposetolo, ne fakakite e muituaaga pihia.—Luka 5:4, 5.
Fā e Kakano ma e Fakamakai Kaufakalataha
10, 11. He puhala fe he tau leveki “kua talahau atu e kupu he Atua” ke he tau matakainaga Kerisiano he senetenari fakamua mo e vaha nei?
10 Ia Heperu 13:7, 17, ne fatiaki i luga, ne foaki he aposetolo ko Paulo fā e kakano ne kua lata ia tautolu ke omaoma mo e muitua ke he tau leveki Kerisiano. Ko e mena fakamua ko lautolu “kua talahau atu e kupu he Atua” ki a tautolu. Manatu ko e “tau mena fakaalofa ke he tau tagata” ne foaki e Iesu ke he fakapotopotoaga ke “fakakatoatoa ai e mitaki he tau tagata tapu.” (Efeso 4:11, 12) Ne hikihiki e ia e manamanatuaga mo e mahani he tau Kerisiano he senetenari fakamua he puhala he tau leveki lagomatai tua fakamooli, falu ia lautolu ne omoomoi ke tohi e tau tohi ke he tau fakapotopotoaga. Ne fakaaoga e ia e tau leveki fakauku he agaaga ke takitaki mo e atihake e tau Kerisiano fakamua atu.—1 Korinito 16:15-18; 2 Timoteo 2:2; Tito 1:5.
11 He vahā nei, ne takitaki e Iesu a tautolu he puhala he “fekafekau fakamoli mo e loto matala,” ne hukui he Kau Fakatufono i ai mo e tau motua ne kotofa. (Mataio 24:45) Mai he fakalilifu ke he “leveki mamoe ne mua,” ko Iesu Keriso, ne omaoma e tautolu e fakatonuaga ha Paulo: “Ke iloa e mutolu a lautolu kua gahua kia mutolu, mo e pule kia mutolu ke he tau mena he Iki, mo e tomatoma atu kia mutolu.”—1 Peteru 5:4; 1 Tesalonia 5:12; 1 Timoteo 5:17.
12. Fēfē e puhala he tau leveki ‘nukua leoleo ke he tau solu ha tautolu’?
12 Ko e kakano ke uaaki he kaufakalataha mo e tau leveki Kerisiano ‘nukua leoleo a lautolu ke he tau solu ha tautolu.’ Ka malika e lautolu ha mena he tau aga po ke mahani ha tautolu kua liga fakahagahaga kelea e tuaga fakaagaaga ha tautolu, kua mafiti a lautolu ke foaki ki a tautolu e fakatonuaga kua lata mo e onoonoaga ke liuaki mai a tautolu. (Kalatia 6:1) Ko e kupu Heleni ne fakaliliu “nukua leoleo” kua kakano mooli “fakamamao mai he mohe.” Hagaao ke he taha pulotu Tohi Tapu, kua “hagaao ke he mataala tumau he leveki.” He lafi ke he fakatumau e mataala fakaagaaga, ne liga momohe alafia foki e tau motua he manamanatu ke he tuaga fakaagaaga ha tautolu. Nakai kia kaufakalataha fakamakai a tautolu mo e tau leveki lagomatai pihia, ne taute e mena ne mua atu ke fifitaki e levekiaga hofihofi ne foaki e Iesu Keriso, ko e “[l]eveki mamoe ne mua”?—Heperu 13:20.
13. Ki a hai mo e ke he puhala fe ne fai tali ki ai e tau leveki mo e tau Kerisiano oti?
13 Ko e kakano ke tolu aki he kaufakalataha fakamakai ha tautolu mo e tau leveki ha kua leoleo e lautolu a tautolu tuga he “tala atu foki e lautolu e tala ki ai.” Manatu he tau leveki ko lautolu ko e tau leveki lagomatai, he fekafekau i lalo he tau Leveki he lagi, ko Iehova ko e Atua mo Iesu Keriso. (Esekielu 34:22-24) Ko Iehova e Pule he tau mamoe, ne “fakafua e ia māna ke he hana [Iesu] toto ni” ti fai tali ki ai e tau leveki ne kotofa ki a Ia he puhala ne taute aki e lautolu e fuifui Haana, ne kua lata ke “fakahelehele.” (Gahua 20:28, 29) Ti kua fai tali oti a tautolu ki a Iehova ma e puhala ne tali a tautolu ke he takitakiaga haana. (Roma 14:10-12) Ko e omaoma ha tautolu ke he tau motua kua foaki foki e fakamooliaga he muitua ha tautolu ke he Keriso, ko e Ulu he fakapotopotoaga.—Kolose 2:19.
14. Ko e heigoa ka takitaki ke he fekafekauaga mo e “fakaatukehe” he tau leveki Kerisiano, ti ko e heigoa e tau fua?
14 Ne foaki e Paulo e kakano ke faaki nukua lata ia tautolu ke muitua fakatokolalo ke he tau leveki Kerisiano. Ne tohi e ia: “Kia eke ai e lautolu mo e fiafia, ka e aua neke eke mo e fakaatukehe; ha ko e mena nakai aoga ia kia mutolu.” (Heperu 13:17) Mo e tau matagahua mamafa ha lautolu he fakaako atu, leveki, he takitaki e gahua fakamatala, leveki e tau magafaoa ha lautolu, mo e taute e tau lekua he fakapotopotoaga, kua hahamo he tau motua Kerisiano e kavega mamafa. (2 Korinito 11:28, 29) Ka kaumahala a tautolu ke kaufakalataha mo lautolu, kua lafi ni a tautolu ke he kavega ha lautolu. To fua e mena nei ke he “fakaatukehe” ha lautolu. Ko e fakakite e tautolu e agaaga nakai kaufakalataha kua nakai fakafiafia a Iehova ti liga nakai aoga, po ke kelea ai a tautolu. Ka e, he fakakite e tautolu e fakalilifu mitaki mo e kaufakalataha, kua maeke he tau motua ke taute ha lautolu a tau matagahua mo e fiafia, ti lafi e mena nei ke he kaufakalataha mo e fiafia he taute e gahua fakamatala he Kautu.—Roma 15:5, 6.
Fakatātā e Muitua ha Tautolu
15. Maeke fēfē ia tautolu ke fakatātā e omaoma mo e muitua ha tautolu?
15 Loga e tau puhala aoga nukua maeke ia tautolu ke kaufakalataha mo e tau leveki fakauku. Mo e onoonoaga ke hikihiki ke he tau tutūaga foou he matakavi, kua fakatokatoka kia he tau motua e tau feleveiaaga ma e gahua he fonua he tau aho mo e he tau magaaho nukua lata ke hiki e fakaholoaga tumau ha tautolu? Kia lali fakalahi a tautolu ke lalago e tau fakaholoaga foou. Liga moua e tautolu e tau monuina ne nakai amaamanaki ki ai. Kua aahi atu kia e leveki fekafekau ke he Fakaakoaga Tohi he Fakapotopotoaga ha tautolu? Kia fakalataha katoatoa a tautolu ke he gahua fakamatala he faahitapu ia. Kua moua kia e tautolu e kotofaaga he Aoga Fekafekau Fakateokarasi? Kua lata ke lali a tautolu ke fakalataha mo e taute e kotofaaga ha tautolu. Kua fakailoa nakai he leveki Fakaakoaga Tohi he Fakapotopotoaga ko e magaaho he matakau ha tautolu ke fakameā e Fale he Kautu? Lata ia tautolu ke lalago katoatoa a ia, ke he fahia he malolō tino mo e maō ha tautolu. He tau puhala loga nei mo e falu foki, maeke ia tautolu ke fakatātā e muitua ha tautolu ke he tau tagata taane ne kotofa e Iehova mo e Tama Haana ke he levekiaga he fuifui mamoe.
16. Ka nakai taute he motua e tau mena ne fakatoka mai, ko e ha e mena nei ne nakai fakagofua e aga totoko ha tautolu?
16 He falu magaaho, ne liga nakai taute he motua e tau mena ne fakatoka mai he vahega fekafekau mo e fakamoli mo e Kau Fakatufono. Ka matutaki a ia ke taute pihia, to fai tali a ia ki a Iehova, ne “leoleo mo e leveki he tau [solu] ha [ta]utolu.” (1 Peteru 2:25) Ka ko e kaumahala po ke tau hehē he vala he falu motua to nakai fakagofua e aga liuliu ha tautolu. Ne nakai fakamonuina e Iehova e mahani liuliu mo e totoko.—Numera 12:1, 2, 9-11.
Fakamonuina e Iehova e Kaufakataha Fakamakai
17. Kua lata ke fēfē e aga ha tautolu ke he tau leveki?
17 Ne iloa e Iehova ko e Atua ko e tau tagata taane ne kotofa ko e tau leveki kua nakai mitaki katoatoa. Ka e, fakaaoga e ia a lautolu, mo e puhala he agaaga haana, ne leveki e ia e tau tagata haana he lalolagi. Mooli e mena nei ke he tau motua—mo tautolu oti—kua “ha ha he Atua e lahi ue atu he malolo, ka e nakai mai ia mautolu.” (2 Korinito 4:7) Kua lata mogoia ia tautolu ke fakaaue ki a Iehova ma e mena ne taute e ia he puhala he tau leveki fakamoli ha tautolu, ti kua lata ke fakakite e tautolu e kaufakalataha fakamakai ki a lautolu.
18. He muitua ke he tau leveki ha tautolu, ko e heigoa mogoia hane taute e tautolu?
18 Ne lali fakalahi e tau leveki ke fakatatau ke he talahauaga ha Iehova ke he tau leveki ne kotofa ki ai haana a fuifui he tau aho fakamui, tuga ne moua ia Ieremia 3:15: “To ta atu foki e au kia mutolu e tau leveki mamoe ke lata mo e haku loto, ti fagai aki e lautolu a mutolu ke he iloilo mo e lotomatala.” Kua mitaki mooli e tau mena ne taute he tau motua ha tautolu he fakaako mo e puipui e tau mamoe ha Iehova. Kia fakatumau a tautolu ke fakakite e loto fakaaue ha tautolu ma e gahua malolō ha lautolu he kaufakalataha fakamakai, omaoma, mo e muitua ha tautolu. He taute pihia, to fakatātā e tautolu e loto fakaaue ke he ha tautolu a tau Leveki he lagi, ko Iehova ko e Atua mo Iesu Keriso.
Ko e Puhala he Fakamanatu
• Kua eke fēfē a Iehova mo Iesu mo tau Leveki fakaalofa?
• He lafi ke he omaoma, ko e ha kua lata ke muitua?
• Ko e heigoa e tau puhala aoga ke fakatātā kua muitua mooli a tautolu?
[Tau Hūhū he Fakaakoaga]
[Fakatino he lau 29]
Kua muitua e tau motua Kerisiano ke he takitakiaga he Keriso
[Tau Fakatino he lau 31]
Loga e puhala ke fakatātā e muitua ha tautolu ke he tau leveki ne kotofa e Iehova