Hokulo mo e Hololoa e Mamahi

NAKAI LA LEVA, taha e tagata kumikumi ne manako ke iloa e puhala ne logona hifo e lautolu ne maanu he fai magaaho ne mole e mamate he tau fakahele. Ne fakafano e ia e tau hūhū ke he tau matua ne kua mamate e tau fanau he loga e tau tau kua mole. Ne nakai tali oti he tau matua. Ko e matua taane ko Vladimir, ne mate e tama taane he lima e tau kua mole, ne fakamaama kua uka lahi mahaki agaia a ia ke tutala hagaao ke he tama taane haana. *

Ko e momoko hololoa pihia ko e mena fa mahani ke he tau matua ne fakatutuku. Hogofulu e tau kua mole ne mate e tama taane 18 tau ha William he tomo. Ne tohi e William, “Ko e mamahi he mate ia kua haia agaia mo au, mo e to ha ha tumau mo au ato mate au.” Lima e tau he mole e mate he tama taane ha Lucy he gagao fakalutukia, ne tohi e ia: “He tau aho gahoa fakamua, ne manamanatu tumau au, ‘Nakai mooli e mena ia.’ Ne logona e au tuga kua miti kelea au ti ma ofo mogoia. Fai magaaho he mole ne kamata au ke mailoga kua nakai tuai liu mai a ia ki kaina. Ne mate e tama taane haaku he lima e tau kua mole, ka e he falu magaaho ka nofo tokotaha au, ne fa tagi agaia au.”

Ko e ha e tau matua tuga a Vladimir, William, mo Lucy, ne hokulo lahi mo e hololoa e momoko? O mai a tautolu ke fakatutala ke he falu kakano.

Ko e Ha ne Momoko Lahi Mahaki?

Magaaho ne fanau mai e tama mukemuke ke he magafaoa, kua moua he tau matua e tau logonaaga ne nakai moua he ha fakafetuiaga he tagata. He lukuluku e tama tote ha laua, onoono ki ai he mohe, po ke kitia noa ni he mamali lahi haana kua tamai e fiafia mo e olioli lahi mahaki. Kua ofania he tau matua fakaalofa e tau fanau ha laua. Ne fakaako e laua a lautolu ke mahani mitaki mo e mahani molu. (1 Tesalonia 2:7, 11) He tutupu hake e tau fanau mo e tau feakiaga nei, kua matalahi e tau matua mo e kamata ke fakatoka e tau amaamanakiaga lalahi ma lautolu.

Kua gahua malolō e tau matua fakaalofa ke leveki e tau fanau ha laua. Liga toka kehe tumau e laua taha tupe po ke tau koloa ke maeke ke lagomatai e tau fanau ha laua ke kamata aki e tau magafaoa ha lautolu ni. (2 Korinito 12:14) Ha kua lahi pehēnei e manamanatu, magaaho, mo e tupe kua fakaaoga nukua hihiga ni ke he taha e fakahikuaga​—na feaki he tau matua e tau fanau ha lautolu ke momoui, nakai ke mamate. Magaaho ka mate e tama, kua oti motuhia e gahua ke feaki a ia, ti ko e  amaamanakiaga he tau matua ma haana kua malipilipi. Ko e fakaalofa mafanatia mo e hofihofi noa mai he tau matua ke he tama kua oti tuai mo e taofi he pā patuō he mate. Ko e tokaaga he tama taane po ke tama fifine ke he tau loto ha laua kua gatigati tuai mogonei. Kua logona he tau matua e maanu lahi ne nakai mukamuka ke galo.

Kua fakamooli mai he Tohi Tapu na fehagai e tau matua ne maanu mo e mamahi lahi ne hololoa. He fakamaama e mena ne tupu ke he tupuna ko Iakopo he logona kua kelipopo haana tama taane ko Iosefa, ne pehē e Tohi Tapu: “Kua hehe e Iakopo hana tau tapulu, kua felevehi a ia ke he ie talatala; kua manu a ia po loga ha ko e hana tama. Kua tutu mai hana tau tama tane oti kana, mo e hana tau tama fifine oti kana ke fakamafana a ia; ka e nakai fakai ke mafanatia ai a ia, kua pehe mai a ia, Ha ko e mena hifo au mo e manu ke he tukuaga.” Loga e tau he mole, ne momoko agaia a Iakopo ke he tama taane haana, he manatu kua mate a ia. (Kenese 37:34, 35; 42:36-38) Taha fakatai foki he Tohi Tapu ko e fifine tua fakamooli ko Naumi ne lauia he mamate haana tau tama taane tokoua. Ne lahi e maanu ti manako a ia ke hiki e higoa haana ko Naumi ki a Mara, ne kakano ‘Kona.’​—Ruta 1:3-5, 20, 21.

Pete ia, kua lahi atu e talahauaga he Tohi Tapu he mailoga e maanu ne logona he tau matua. Kua fakakite foki e puhala ne foaki age e Iehova e malolō ki a lautolu ne maanu. He vala tala ka mui mai, to kumikumi a tautolu ke he falu puhala ne foaki age he Atua e mafanatia ki a lautolu ia ne tagi.

[Matahui Tala]