Fua Fakaagaaga Agaia he Vahā Fuakau

“Ko lautolu kua to ke he fale a Iehova . . . ka hoko ke he vaha fuakau, ti fua agaia a lautolu.”​—SALAMO 92:13, 14.

1, 2. (a) Fa fakamaama fēfē e vahā fuakau? (e) Ko e heigoa ne mavehe he tau Tohiaga Tapu hagaao ke he tau lauiaaga he agahala ha Atamu?

VAHĀ FUAKAU​—ko e heigoa ne fakamanatu he talahauaga ia ki a koe? Kili mafigofigo? Teliga tuli? Tau alaga moluelue? Po ke taha vala he “tau aho kelea” ne fakatino e fakamatafeiga maaliali he Fakamatalaaga 12:1-7? Ka pihia, kua aoga ke manatu ko e talahauaga ne moua ia Fakamatalaaga veveheaga 12 ne fakatino e fuakau, nakai ko e amaamanakiaga fakamua he Tufuga, ko Iehova ko e Atua, ka ko e fua he agahala ha Atamu ke he tino tagata.​—Roma 5:12.

² Nakai ko e kaiaalu e vahā fuakau hokoia, ka ke matutaki ke moui kua lata ke mole e tau tau. Ko e tupuaga mo e motua mogoia ko e tau aga mitaki lahi he tau mena momoui oti kana. Ko e matematekelea he ono e afe tau he agahala mo e nakai mitaki katoatoa ne kitia viko e tautolu to nakai leva to mole atu ia, mo e to olioli he tau tagata oti ne omaoma e moui tuga he amaamanaki ki ai, ke nakai fai mamahi he fuakau mo e mate. (Kenese 1:28; Fakakiteaga 21:4, 5) He magahala ia, “to nakai pehe mai foki taha kua nofo ai, Kua gagao au.” (Isaia 33:24) To liliu a lautolu ne momotua ke he vahā ka “liu foki a ia ke he hana vaha fuata,” to “liu moui mitaki hana tino ke homo atu ke he tino he tama tote.” (Iopu 33:25) Ka e, he magaaho nei, kua lata ia tautolu oti ke taufetului mo e tufaaga mai ia Atamu. Ti ko e tau fekafekau ha Iehova kua fakamonuina ke he tau puhala pauaki he hoko atu a lautolu ke he tau vahā momotua ha lautolu.

3. Ke he tau puhala fe he tau Kerisiano “ka hoko ke he vaha fuakau, ti fua agaia a lautolu”?

³ Kua fakamafana mai he Kupu he Atua “ko lautolu kua to ke he fale a Iehova . . . ka hoko ke he vaha fuakau, ti fua agaia a lautolu.” (Salamo 92:13, 14) He vagahau fakatai, ne fakatoka mai he salamo e kupu mooli mua ue atu kua maeke e tau fekafekau tua fakamooli he Atua ke holo ki mua, tupu olaola, mo e monuina fakaagaaga, pete ne fuakau e tino. Loga e fakafifitakiaga faka-Tohi Tapu mo e vahā nei ne fakamooli e mena nei.

“Nakai Fano Kehe”

4. Fakakite fēfē he perofeta fifine fuakau ko Ana e fakamooliaga haana ke he Atua, ti palepale fēfē a ia?

⁴ Manamanatu ke he perofeta fifine ko Ana he senetenari fakamua. He 84 e tau he moui, ne “nakai fano kehe a ia he faituga, ka e fekafekau a ia, ha ne fakakanopogi mo e liogi ke he aho mo e po.” Ko e matua taane a Ana ne nakai ko e tagata Levi, ka kua mai he “magafaoa a Asera,” ti kua nakai nofo tumau a Ana he faituga. Manamanatu la ke he laliaga ne taute e ia ke fakalataha tumau ke he faituga  he magaaho ka taute e liogi pogipogi ke hoko ke he liogi afiafi! Ne lahi e palepale ha Ana ha ko e loto fakamooli haana. Kua monuina a ia ke fakalataha he magaaho ne tamai e Iosefa mo Maria e tama mukemuke ko Iesu ke he faituga ke foaki ki a Iehova fakatatau ke he Fakatufono. He kitia a Iesu, “ti fakaaue atu [a Ana] ke he Iki, mo e vagavagahau kia ia ke he tau tagata oti kana ne talifaki ke he luk[u]toto i Ierusalema.”​—Luka 2:22-24, 36-38; Numera 18:6, 7.

5, 6. Ko e heigoa e tau puhala nukua tokologa ia lautolu ne fuakau he vahā nei ne fakakite e aga tuga ha Ana?

⁵ Ke tuga a Ana, kua tokologa ia lautolu ne fuakau kua ha ha mo tautolu he vahā nei nukua fakalataha tumau ke he feleveiaaga, ko e ole fakamakamaka ha lautolu ke fakatupu ki mua e tapuakiaga mooli, mo e manako malolō ha lautolu ke fakamatala e tala mitaki. Ko e matakainaga taane he atu tau 80 ne fano tumau mo e hoana haana ke he tau feleveiaaga Kerisiano, ne pehē: “Ne feaki e maua e mahani ke ō he tau feleveiaaga. Nakai manako a maua ke haia he taha matakavi. Ko e mena ne ha ha i ai e tau tagata he Atua, ko e mena haia ne manako a maua ke ha ha i ai. Ko e matakavi haia kua logona e maua e haohao mitaki.” Ko e fakafifitakiaga atihake ha ia ma tautolu oti!​—Heperu 10:24, 25.

⁶ “Ka fai fakaholoaga fakaagaaga ne maeke ke putoia ai au, kua loto au ke taute foki.” Ko e foliaga ha Jean a ia, ko e takape Kerisiano he atu tau 80 haana. “Mooli, fa momoko au,” he matutaki e ia, “ka ko e momoko he ha e tau tagata oti ne viko takai ia au he magaaho ka momoko au?” He mata fiafia, ne fakakite e ia e olioli he ahiahi ke he falu motu ma e tau magaaho atihake fakaagaaga. He nakai la leva e fano fenoga haana, ne tala age a ia ke he kapitiga haana ne fakatauō, “Ai fia manako au ke kitia e tau matakavi ō kitekite; manako au ke fano he gahua ke he fonua!” Pete he nakai iloa e ia e vagahau he motu ia, ne maeke ia Jean ke fakalagalaga e fiafia he tau tagata ke he fekau he Tohi Tapu. Lafi ki ai, fai tau ne gahua a ia mo e fakapotopotoaga ne lata ke lagomatai, pete kua lata ke ako e vagahau foou mo e taha e tulā ka fano mo e taha e tulā ka liu mai he tau feleveiaaga.

Fakatumau e Manamanatuaga ke Gahuahua

7. He vahā motua ha Mose, fakakite fēfē e ia e manako haana ke tupu e fakafetuiaga haana mo e Atua?

⁷ Ko e iloaaga he moui kua hau mo e mole he tau magaaho. (Iopu 12:12) Ke he taha faahi, ko e tupu ki mua fakaagaaga ne nakai hau noa mo e tau he moui. Ti ko e mena ia, he nakai ni falanaki hokoia ke he iloilo ne moua he tau tau kua mole, kua lali e tau fekafekau fakamooli he Atua ke ‘tolomaki atu e iloilo’ he mole e tau tau. (Tau Fakatai 9:9) He kotofa e Iehova a Mose, kua 80 tuai e tau haana he moui. (Esoto 7:7) He magahala haana, ko e momoui ke hoko ke he tau tau ia ne matakehe mooli ai, ati tohi e ia: “Ko e tau aho he tau tau ha mautolu ko e fitu gofulu ia he tau tau, kaeke ko e valu gofulu e tau tau ha kua malolo.” (Salamo 90:10) Ne nakai logona e Mose kua fuakau lahi tuai a ia ke fakaako. He tau hogofulu tau kua mole he fekafekau ke he Atua, ti moua loga e tau kotofaaga, mo e taute e tau matagahua mamafa, ne ole a Mose ki a Iehova: “Kia fakailoa mai e koe kia au hau  a puhala, kia iloa ai e au a koe.” (Esoto 33:13) Ne manako lahi a Mose ke tupu e fakafetuiaga haana mo Iehova.

8. Fakagahuahua tumau fēfē e Tanielu e manamanatuaga haana he hokotia ke he atu tau 90 haana, ti ko e heigoa e fua?

⁸ Ko e perofeta ko Tanielu, kua liga haia he atu tau 90 haana, kua maeke agaia ke kumikumi fakahokulo ke he tau kupu tapu. Ko e mena ne iloa e ia he fakaako haana ke he “tau tohi”​—kua liga putoia e Levitika, Isaia, Ieremia, Hosea, mo Amosa—​ne omoi a ia ke kumi a Iehova he liogi fakamakamaka. (Tanielu 9:1, 2) Ko e liogi ia ne tali aki e vala tala mai he agaaga hagaao ke he hauaga he Mesia mo e vahā i mua he tapuakiaga meā.​—Tanielu 9:20-27.

9, 10. Ko e heigoa he falu kua taute ke tumau e manamanatuaga ke gahuahua?

⁹ Tuga a Mose mo Tanielu, maeke ia tautolu ke lali ke fakagahuahua tumau e manamanatuaga ha tautolu he hagaaki ke he tau mena fakaagaaga he maeke agaia ia tautolu. Tokologa hane taute pihia. Ko Worth, ko e motua Kerisiano he atu tau 80 haana, ne lali ke fakatumau mo e tau mena kai fakaagaaga foou ne foaki mai he “fekafekau fakamoli mo e loto matala.” (Mataio 24:45) Pehē a ia: “Kua tokiofa katoatoa e au e kupu mooli, ti fiafia au ke kitia e maama he kupu mooli kua tupu tolomaki ke he tupoula.” (Tau Fakatai 4:18) Pihia foki a Fred ne fakaaoga molea e 60 e tau he fekafekauaga mau, ne fakaohooho fakaagaaga ke kamata e tau fakatutalaaga faka-Tohi Tapu mo e tau matakainaga talitonu. “Taute e au e Tohi Tapu ke gahuahua tumau he manamanatuaga haaku,” he talahau e ia. Ka maeke a koe ke taute e Tohi Tapu ke gahuahua​—kia taute ke fai aoga—​ti ka maeke a koe ke fakatatai e tau mena hane ako e koe he ‘fakafifitaki ke he tau kupu tonu,’ ti nakai ni ha ha ia koe e tau vala kehekehe he tala. Maeke ia koe ke kitia e tau vala takitaha ne kalopalopa ha kua hako e fakatokaaga ha lautolu.”​—2 Timoteo 1:13.

¹⁰ He fuakau fakahaga ne nakai lata ke tiaki e ia e ako he tau fakamaamaaga uka mo e foou. Ko e tau tagata he atu tau 60, 70, mo e 80 foki ne iloa ke totou po ke ako e vagahau foou. Kua taute pihia he falu he Tau Fakamoli a Iehova he foli ke talahau e tala mitaki ke he tau tagata he tau motu kehekehe. (Mareko 13:10) Ko Harry mo e hoana haana he atu tau 60 ne fifili ke lagomatai e fonua he tau tagata Potukala. “He onoono ki ai,” he talahau e Harry, “ko e ha gahua he moui ne mua atu e uka ka fuakau.” Ka e, he lali mo e fakatumau, ne maeke ia laua ke taute e tau fakaakoaga Tohi Tapu faka-Potukala. Kua totou tau tuai a Harry mogonei he taute e tau lauga he fonoaga he faahimotu ke he vagahau foou haana.

11. Ko e ha ne tutala ke he tau mena ne taute e lautolu ne momotua kua tua fakamooli?

¹¹ Mooli, nakai ha ha he tau tagata oti e malolō tino po ke tau tutūaga ke talia e tau paleko pihia. Ko e ha mogoia he fakatutala ke he tau mena ne taute he falu ne momotua? Nakai ko e talahauaga kua lata he tau tagata oti ke lali ke taute pihia foki. Ka ko e aga he puhala ne tohi he aposetolo ko Paulo ke he tau Kerisiano Heperu hagaao ke he tau motua tua fakamooli he fakapotopotoaga: “Kia fifitaki a mutolu ha lautolu a tua, mo e manamanatu e fakahikuaga he tau mahani ha lautolu.” (Heperu 13:7) Ka manamanatu a tautolu ke he tau fakafifitakiaga pihia he fakamakai, kua atihake a tautolu ke fifitaki e tua malolō ne fakalagalaga a lautolu nei ne momotua ke he fekafekauaga ha lautolu ke he Atua. He fakamaama e mena ne fakaohooho a Harry, kua 87 e tau tau moui haana mogonei, ne pehē: “Loto au ke fakaaoga fakamitaki e vala moui haaku ne toe ti eke mo tagata aoga ke he fekafekauaga a Iehova. Ko Fred ne totoku i luga, ne moua e fiafia lahi mahaki he taute e kotofaaga haana he Peteli. Ne talahau e ia, “Kia kumi e koe e puhala kua mua atu ke fekafekau ki a Iehova ti tumau ki ai.”

Fakamooli Pete he Hikihiki e Tau Tutūaga

12, 13. Fakakite fēfē e Pasili e fakamooli mahani Atua pete e hikihiki e tau tutūaga haana?

¹² He fehagai mo e tau hikiaga he tino kua maeke ke uka. Ka e, maeke ke fakatātā e fakamooli mahani Atua pete e tau hikihikiaga pihia. Ko e fakafifitakiaga mitaki a Pasili, ko e tagata Kiliata ke he mena nei. He 80 e tau  he moui, ne fakakite e ia e loto fakamokoi kua kehe lahi ki a Tavita mo e matakau tau haana, he foaki ki a lautolu e tau mena kai mo e mena ke nonofo ai he magahala ne totoko a Apisaloma. He liu mai a Tavita ki Ierusalema, ne takitaki atu e Pasili e matakau ke he Vailele ko Ioritana. Ne ole a Tavita ke nofo a Pasili he lotopā he fale patuiki haana. Ko e tali ha Pasili? “Ko e valugofulu e tau tau haku ke he aho nai . . . kua logona kia he fekafekau hau e tau mena kua kai, mo e tau mena kua inu? ke logona foki kia e au e tau leo he tau tane kua lologo, mo e tau fifine kua lologo? . . . Ko e fekafekau hau ko Kimehama; kia o atu a ia mo e haku iki ko e patuiki, ti eke e koe māna e mena kua finagalo a koe ki ai.”​—2 Samuela 17:27-29; 19:31-40.

¹³ Pete e hikihiki e tau tutūaga ha Pasili, ne taute e ia e tau mena kua fahia a ia ke lalago aki e patuiki kotofa ha Iehova. He mailoga e ia kua galo e puhala kamata mo e kua teligatuli, ne nakai ita a ia. Ka e, he nava totonu ke moua e Kimehama e tau monuina ne age ki ai, ne fakakite e Pasili e aga he loto haana. Tuga a Pasili, tokologa a lautolu ne fuakau he vahā nei ne fakakite e aga totonu mo e fakamokoi. Ne taute e lautolu e mena kua fahia a lautolu ke lalago e tapuakiaga mooli, he iloa ko e “tau poa pihia kua fiafia ai e Atua.” Ko e monuina ha ia ke ha ha ai a lautolu ne fakamooli mo tautolu!​—Heperu 13:16.

14. Fai kakano fēfē e tau tau moui ha Tavita ke he talahauaga ne fakamau ia Salamo 37:23-25?

¹⁴ Pete ne hikihiki lagaloga e tau tutūaga a Tavita ke he tau tau, ne tumau e fifiliaga haana kua nakai hiki e levekiaga ha Iehova ke he tau fekafekau fakamooli Haana. Ke hoko atu ke he fakaotiaga he moui ha Tavita, ne fati e ia e lologo ne iloa he vahā nei ko e Salamo 37. Fakaata la a Tavita ke he manamanatuaga hokulo haana, ne tā e ia e kitara mo e lologo e tau kupu nei: “Ko Iehova ne kotofa e fano[a]ga he tagata; to fiafia foki a ia ke he hana puhala. Kaeke ke veli a ia, ti nakai takaveli ni; ha kua toto e Iehova hana lima. Ne fuata au, ka kua motua tuai au ainei; ka e nakai kitia e au ha tagata tututonu kua tiaki, po ke hana fanau kua ole mena kai.” (Salamo 37:23-25) Ne kitia e Iehova kua lata ke tohi foki e fakamauaga he tau tau moui a Tavita he salamo nei ne mai he  agaaga. Ko e logonaaga hokulo mooli kua lafi ke he talahauaga ia mai he loto!

15. Fakatoka fēfē he aposetolo ko Ioane e fakafifitakiaga mitaki he tua fakamooli pete e hikihiki e tau tutūaga mo e vahā fuakau?

¹⁵ Ko e aposetolo ko Ioane taha fakafifitakiaga mitaki he tua fakamooli pete ne hikihiki e tau tutūaga mo e vahā motua. He mole e fekafekau ke he Atua teitei ke 70 e tau, ne fakapaea a Ioane ke he motu ko Patamo “ha ko e kupu he Atua, mo e talahauaga kia Iesu Keriso.” (Fakakiteaga 1:9) Ka e, nakai la oti haana gahua. Ko e tau tohi oti he Tohi Tapu ne tohia e Ioane he vahā ne motua ai a ia he moui. He nofo a ia i Patamo, ne age ki a ia e fakamailoga he Fakakiteaga, nukua tohi fakamatafeiga e ia. (Fakakiteaga 1:1, 2) Na laulahi ne manatu kua fakatoka mai a ia he fakapaea he magahala ne ha ha i ai e Pule Atu Motu Roma ko Nerva. Fakahiku ai, kavi ke he 98 V.N., liga kua 90 po ke 100 e tau tau moui ha Ioane, ne tohi e ia e Evagelia mo e tolu e tohi ikiiki ne totoku ai haana higoa.

Ko e Fakamauaga Mauokafua he Fakauka

16. Fakakite fēfē e lautolu ne matulituli e iloaaga ke matutaki e fakamooli ha lautolu ki a Iehova?

¹⁶ Ko e tau fakakaupāaga kua kitia ke he tau faahi loga mo e tau lauiaaga kehekehe. Ma e fakatai, falu tagata kua matulituli ti pihia foki ha lautolu a iloaaga ke matutaki. Pete ia, ne tokiofa agaia e lautolu e tau manamanatuaga mafanatia he fakaalofa mo e fakaalofa nakai noa he Atua. Pete ne nakai katoatoa e mena ne talahau e lautolu he tau gutu ha lautolu, ka ke he tau loto ha lautolu hane talahau ki a Iehova: “Kua lahi ni haku a manako ke he hāu a fakatufono; kua manamanatu au ki ai ke he aho oti.” (Salamo 119:97) Ke he faahi a Iehova, iloa e ia a lautolu ne “manamanatu ai ke he hana higoa,” ti loto fakaaue a ia ha kua kehe a lautolu ia mai he laulahi he tau tagata ne nakai fakakite e manamanatuaga ke he tau puhala haana. (Malaki 3:16; Salamo 10:4) Ko e mafanatia ha ia ke iloa kua fiafia a Iehova he manamanatu hokulo ke he tau loto ha tautolu!​—1 Nofoaga he Tau Patuiki 28:9; Salamo 19:14.

17. Ko e heigoa kua moua he tau fekafekau kua leva ha Iehova ne kehe ue atu mooli?

¹⁷ He nakai fakaheu mooli ko lautolu ne fekafekau tua fakamooli ki a Iehova ke he tau tau loga ne moua e mena ne kehe ue atu mooli ti ko e mena ia kua nakai moua ai ke he ha puhala foki​—ko e fakamauaga mauokafua he fakauka. Ne pehē a Iesu: “Ko e ha mutolu a fakauka, kia moua ai ha mutolu a moui.” (Luka 21:19) Latatonu e fakauka ke moua e moui tukulagi. Ko lautolu ne “eke . . . e finagalo he Atua” ti kua kitia e fakamooli ha mutolu he puhala moui kua amaamanaki atu ke “moua ai e mutolu e tau mena kua talahaua mai.”​—Heperu 10:36.

18. (a) Ko e heigoa kua fiafia a Iehova ke kitia hagaao ki a lautolu ne momotua? (e) Ko e heigoa ka tutala a tautolu ki ai he vala tala ka mui mai?

¹⁸ Kua ofania e Iehova e gahua moui katoa haau pete ni e lahi po ke tote e mena ne taute e koe. Pete ne mena kua tupu ke he “tagata i fafo” he momotua fakahaga, ko e “tagata i loto” kua fakafoou he taha aho mo e taha aho. (2 Korinito 4:16) Nakai fakauaua ai kua loto fakaaue a Iehova ke he tau mena ne taute e koe he vahā kua mole, ka e maaliali lahi ai foki kua loto fakaaue a ia ke he mena hane taute e koe mogonei ma e higoa haana. (Heperu 6:10) He vala tala ka mui mai, to tutala a tautolu ke he tau lauiaaga mua ue atu he tua fakamooli pihia.

To Tali Fēfē e Koe?

• Ko e heigoa e fakafifitakiaga mitaki ne fakatoka e Ana ma e tau Kerisiano momotua he vahā nei?

• Ko e ha e tau tau moui ne nakai lata ke fakakaupā e tau mena ne taute he tagata?

• Maeke fēfē a lautolu ne fuakau ke fakatumau ke fakakite e fakamooli mahani Atua?

• Onoono fēfē a Iehova ke he fekafekauaga ne taute e lautolu ne momotua ki a Ia?

[Tau Hūhū he Fakaakoaga]

[Fakatino he lau 23]

Ne manamanatu e fuakau ko Tanielu ke he “tau tohi” he leva e fakapaea ha Iuta

[Tau Fakatino he lau 25]

Tokologa a lautolu ne momotua ko e fakafifitakiaga mitaki he fakalataha tumau ke he feleveiaaga, gahua fakamakai, mo e makutu ke fakaako