Kelea Muitui​—Nakai Kia Fai Taofiaga?

Ko e tama taane tote ne fia iloa ne lagaki hake taha mena he fonua​—ko e pomu tanu—​ti kua fakapouli e tau mata mo e fakakunekune a ia he moui katoa haana. Ko e matua fifine ne tiaki haana tama mukemuke fanau foou he fufū i loto he tau otaota he kala puhalatū. Ko e tagata gahua ne fakaoti mai he gahuaaga ne liu ke he fale gahua ia haana mo e fana oti e tau tagata ne kitia e ia, ti tamate ne ia a ia. Ko e tagata lilifu he motu ne ekefakakelea e tau fanau lolelole ke he mahani fakataane mo e fifine.

MOMOKO AI, ko e tau hokotaki pihia he kelea muitui kua eke mo mena aga mau he vahā ha tautolu. Ka e mua atu e momoko, kua pukeina e tau hokotaki nei he tau tala ke he kelipopoaga fakamatakau mo e fakamatakutaku. “Kua au atu e kelea muitui ha ko e senetenari ha Satani anei,” he talahau he taha etitoa ne lolomi he 1995. “Ne nakai la pihia ia tali mai fakamua e fakakite he tau tagata e makaka mo e manako lahi ke tamate e tau miliona tagata ha ko e lanu, lotu po ke tuaga.”

He magaaho taha, kua takiva he tau tagata e matagi, fakakona e fua lalolagi, molea e fakaaoga he tau koloa i ai, mo e hane taute ke galo fakahaga e loga he tau vahega manu. Maeke nakai he tau tagata ke utakehe e tau mena kelea muitui oti nei mo e taute e lalolagi ke haohao mitaki? Po ke ke taute pihia kua tuga kia e lali ke tafitafi e puke lahi aki e tafi kaniu? Ne talahau he porofesa ne tohi fakalaulahi hagaao ke he kelea muitui: “Kua manako lahi mahaki au ke hiki e lalolagi, ke fakamitaki e lalolagi. Ka e maaliali kua nakai fai mitaki e lalolagi.” Liga kua pihia foki e logonaaga haau.

Ko e fanoaga he lalolagi kua tuga e toga ne holo he tahi kua loka fakahaga mo e hagahaga kelea tumau. Pete he nakai fai tagata ne manako ke ō he hala ia, ko e tau laliaga oti ke hiki e hala kua kaumahala ni. Kua holo ni e toga ki mua ke he afā tokaimaka mo e nakai maeke ke taofi.

Kua fai vala foki e nakai mitaki katoatoa he tagata ne lafi ke he tuaga nei hane au atu e kelea. (Roma 3:23) Ka kua lahi mahaki e kelea muitui ke pehē ko e lekua hokoia ni ne fakatupu he tagata. Liga kua fakaohooho kia he agaaga ne nakai kitia ka e malolō lahi mo e fakalialia e tau tagata? Kaeke ke pihia, ko e heigoa e mena ia, mo e puhala fe ke puipui ai a tautolu? To tali he vala tala ka mui mai e tau hūhū nei.

[Fakatino Credit Line he lau 3]

© Heldur Netocny/Panos Pictures