Uho e Omaoma Haau ki a Iehova

“Haku tama na e, kia iloilo ai a koe, kia fiafia ai haku loto.”​—TAU FAKATAI 27:11.

1. Ko e heigoa e agaaga ne holofa he lalolagi he vahā nei?

KO E agaaga tu tokotaha mo e faliuliu kua holofa he lalolagi he vahā nei. Ne fakamaama he aposetolo ko Paulo e kakano i loto he tohi haana ke he tau Kerisiano i Efeso: “Ne o fano ai a mutolu ke he vaha i tuai, ke lata mo e mahani he lalolagi nai, ke lata mo e takitaki ha lautolu kua pule ha he pulagi, ko e agaga haia kua gahua ai ni ainei kia lautolu kua faliuliu.” (Efeso 2:1, 2) E, ko Satani ko e Tiapolo, ko e “pule ha he pulagi,” he liga talahau e koe, hane fakapikitia e lalolagi katoa aki e agaaga faliuliu. Ne taute pihia e ia he senetenari fakamua, ti kua au atu e taute pihia e ia tali mai he liti hifo he lagi kavi ke he Felakutaki I he Lalolagi.​—Fakakiteaga 12:9.

2, 3. Ko e heigoa e tau kakano ne ha ha ia tautolu ke omaoma ki a Iehova?

² Ka ko e tau Kerisiano, na iloa e tautolu kua latatonu ia Iehova ko e Atua ke moua e omaoma fakamooli ha tautolu ha ko ia ko e Tufuga mo e Fakatumau he moui ha tautolu, ko e Pule Katoatoa fakaalofa, mo e ha tautolu a Laveaki. (Salamo 148:5, 6; Gahua 4:24; Kolose 1:13; Fakakiteaga 4:11) Ne iloa he tau Isaraela he vahā a Mose ko Iehova e Foaki Moui mo e Fakahao ha lautolu. Mena ia ne pehē a Mose ki a lautolu: “Kia omaoma a mutolu ti eke ai, tuga ne poaki mai ai e Iehova ha mutolu a Atua kia mutolu.” (Teutaronome 5:32) E, kua latatonu a Iehova ke moua e omaoma ha lautolu. Ka kua mafiti a lautolu ke nakai omaoma ke he Pule Katoatoa ha lautolu.

³ Aoga fēfē e omaoma ha tautolu ke he Tufuga he lagi mo e lalolagi katoatoa? Ne taha e mogo ne fekau he Atua e perofeta ko Samuela ke tala age ke he Patuiki ko Saulo: ‘Kua mua e mitaki he omaoma ke he poa.’ (1 Samuela 15:22, 23) Ko e ha ne pihia ai?

Puhala ne ‘Mua e Mitaki he Omaoma ke he Poa’

4. Puhala fe kua maeke ia tautolu ke foaki taha mena ki a Iehova?

⁴ Ha ko e Tufuga, ko e tau koloa oti kana ne moua e tautolu ko e ha Iehova ni. Ha kua pihia, ti fai mena nakai ne kua lata ia tautolu ke foaki ki a ia? E, lata ia tautolu ke foaki ki a ia e mena uho lahi. Ko e heigoa a ia? Kua moua mai e tautolu e tali he tomatomaaga nei: “Haku tama na e, kia iloilo ai a koe, kia fiafia ai haku loto; kia fai kupu au ke tali age kia ia kua fakafiu mai kia au.” (Tau Fakatai 27:11) Maeke ia tautolu ke tuku age e omaoma ha tautolu ke he Atua. Pete  he kehekehe e tau tutūaga mo e tau feakiaga ha tautolu, ka e mai he omaoma, kua lata ia tautolu takitokotaha ke tali atu ke he paleko kelea muitui ha Satani ko e Tiapolo kua nakai maeke e tau tagata ke tumau ke mahani fakamooli ke he Atua ka fehagai mo e tau kamatamata. Ko e lilifu ha ia!

5. Lauia fēfē e Tufuga he nakai omaoma? Fakamaama.

⁵ Kua fiafia e Atua ke he tau fifiliaga ne taute e tautolu. Kaeke ke nakai omaoma a tautolu, to lauia a ia. Puhala fe? Kua mamahi lahi a ia ke kitia taha tagata ne taute e puhala nakai pulotu. (Salamo 78:40, 41) Tuga e tagata suka ne kaumahala ke pipiki ke he kai malolō tino ne fakatoka pauaki ke lata mo e malolō haana ne fakatumau ke kai e tau mena kua nakai lata mo ia. To fēfē mogoia e logonaaga he ekekafo ne leveki a ia? Maeke ia tautolu ke iloa mooli kua mamahi e logonaaga a Iehova ka nakai omaoma e tau tagata ki a ia, ha kua iloa e ia e fakahikuaga he fakaheu e tau takitakiaga haana ma e moui.

6. Ko e heigoa ka lagomatai a tautolu ke omaoma ke he Atua?

⁶ Ko e heigoa ka lagomatai a tautolu takitokotaha ke omaoma? Kua lata ia tautolu ke igatia ke ole ke he Atua ma e “loto omaoma” (NW) tuga ne taute he Patuiki ko Solomona. Ne ole a ia ma e loto omaoma pihia ke “fifili ai e ia e mitaki mo e kelea” ke maeke ke fakafili e tau matakainaga Isaraela haana. (1 Tau Patuiki 3:9) Kua lata a tautolu ke “loto omaoma” kaeke ke fifili e tautolu e mena mitaki mo e kelea he lalolagi ne holofa ai e agaaga faliuliu. Kua foaki mai he Atua ki a tautolu e Kupu haana, tau lagomataiaga ke fakaako e Tohi Tapu, tau feleveiaaga Kerisiano, mo e tau motua fakaalofa he fakapotopotoaga ke maeke ia tautolu ke feaki e “loto omaoma.” Kua fakaaoga fakamitaki nakai e tautolu e tau foakiaga fakaalofa pihia?

7. Ko e ha ne peehi e Iehova e omaoma ke mua atu ke he tau poa?

⁷ He matutakiaga nei, manatu ne fakakite e Iehova he vahā kua mole ke he tau tagata haana i tuai kua mua atu e aoga he omaoma ke he poa he tau manu. (Tau Fakatai 21:3, 27; Hosea 6:6; Mataio 12:7) Ko e ha ne pihia ai, a ko Iehova ne poaki ke he tau tagata haana ke foaki e tau poa pihia? E, ka ko e heigoa e fatuakiloto haana ne foaki e poa? Kua taute kia e ia ke fakafiafia e Atua? Po kua muitua noa a ia ke he tau mena fa mahani? Kaeke kua manako mooli e tagata tapuaki ke fakafiafia e Atua, to omaoma fakakikili a ia ke he tau poakiaga oti kana he Atua. Ne nakai aoga e poa manu ke he Atua, ka ko e taha mena uho ke tuku age e tautolu ki a ia ko e omaoma ha tautolu.

Ko e Fakafifitakiaga Hataki

8. Ko e ha ne utakehe he Atua a Saulo he tuaga patuiki?

⁸ Ne peehi he fakamauaga he Tohi Tapu ke he Patuiki ko Saulo e aoga lahi mahaki he omaoma. Ne kamata a Saulo ke pule ko e tagata fakatokolalo mo e mahani fakalatalata, ti ‘kua fakateaga ke he haana ni a manatu.’ Fai magaaho mogoia, ne kamata e fakatokoluga mo e manamanatu hehē ke pule ke he tau fifiliaga haana. (1 Samuela 10:21, 22; 15:17) He taha magaaho, ne amanaki a Saulo ke fehagai tau mo e tau Filisitia. Ne tala age a Samuela ke he patuiki ke fakatali ato hau a ia ke taute e tau poa ki a Iehova mo e ke foaki e falu hatakiaga. Ka e, ne nakai hau a Samuela he magaaho ne fakatali ki ai, ti kamata e tau tagata ke mavehevehe fano. He kitia ai e Saulo, ne ‘eke e ia e poa huhunu.’ Nakai fiafia a Iehova ke he mena nei. He magaaho ne hoko atu a Samuela, ne piu e nakai omaoma he patuiki he talahau kua mule a Samuela ati ‘fakamalolo ai a ia’ ke eke e poa huhunu ke fakamolū aki e fofoga ha Iehova. Ke he Patuiki ko Saulo, kua aoga lahi ke taute e poa mai he omaoma ke he hatakiaga ne tala age ki a ia ke fakatali ki a Samuela ke hau ke taute e poa. Ne pehē a Samuela ki a ia: “Kua goagoa a koe ke he mena na kua eke, kua nakai omaoma a koe ke he poaki a Iehova hāu a Atua ne poaki atu ai e ia kia koe.” He nakai omaoma ki a Iehova ne galo ai e tuaga patuiki ha Saulo.​—1 Samuela 10:8; 13:5-13.

9. Fakakite fēfē e Saulo e puhala he nakai omaoma ke he Atua?

⁹ Kua mailoga nakai he patuiki e fakaakoaga mai he mena nei ne tupu? Nakai! Magaaho fakamui, ne poaki e Iehova a Saulo ke moumou  e motu ko Amaleka, ne tapaki teao a Isaraela he magaaho kua mole. Ne nakai lata foki ia Saulo ke fakamomoui e tau manu he kaina he tau tagata. Ne omaoma a ia ke ‘keli a Amaleka ke kamata mai i Havihia ke hoko atu ki Sura.’ He magaaho ne feleveia atu a Samuela ki a ia, kua fiafia lahi e patuiki he kautū mo e pehē a ia: “Kia fakamonuina atu e Iehova a koe; kua fakamoli tuai e au e kupu a Iehova.” Ka e kehe mai he tau poaki maaliali ne tala age ki a lautolu, ne fakamoui e Saulo mo e tau tagata haana e Patuiki ko Akako mo e “tau mena mua he mitaki he tau mamoe mo e tau povi, katoa mo e mena mitaki ha i ai, mo e tau punua mamoe, mo e tau mena mitaki oti.” Ti lagohala ni he Patuiki ko Saulo e puhala nakai omaoma haana, he pehē: “Ne fakahao he tau tagata e tau mamoe mo e tau povi ne mua he mitaki, ke eke ai e poa kia Iehova hau a Atua.”​—1 Samuela 15:1-15.

10. Ko e heigoa e fakaakoaga ne kaumahala a Saulo ke mailoga?

¹⁰ Ko e mena ia, ne pehē a Samuela ki a Saulo: “Kua tatai kia e fiafia a Iehova ke he tau poa huhunu mo e tau poa, mo e hana fiafia ke he fanogonogo ke he leo a Iehova? Kitiala, ko e fanogonogo kua mua hana mitaki ke he poa mo e omaoma kua mua hana mitaki ke he gako he tau mamoe tane.” (1 Samuela 15:22) Ha kua fifili a Iehova ke tamate e tau manu ia, ne nakai talia ai ke foaki mo tau poa.

Kia Omaoma ke he Tau Mena Oti Kana

11, 12. (a) Fēfē e onoonoaga ha Iehova ke he tau laliaga ha tautolu ke fakafiafia a ia ke he tapuakiaga ha tautolu? (e) Liga fakahehē fēfē he tagata a ia he manamanatu hane taute e ia e finagalo he Atua ka e he magaaho taha kua nakai omaoma mooli?

¹¹ Ko e fiafia ha ia ha Iehova ke kitia e tau fekafekau mahani fakamooli haana hane fakatumau ke mauokafua pete ko e favaleaga, fakapuloa e Kautu pete ko e fekehekeheaki he tau tagata, mo e ō ke he tau feleveiaaga Kerisiano pete kua logona e mamafa ke gahua tupe ma e moui! He omaoma ke he tau puhala aoga pihia he moui fakaagaaga ha tautolu ka fakafiafia e loto haana! Ko e tau laliaga ha tautolu ke tapuaki ki a Iehova kua uho ki a ia ka foaki e tautolu ha ko e fakaalofa. Liga fakaheu he tau tagata e gahua uka ha tautolu, ka kua mailoga he Atua e tau foakiaga fakamooli ha tautolu ti kua manatu foki e ia.​—Mataio 6:4.

¹² Ti, ke fakafiafia katoatoa e Atua ha tautolu, kua lata ai ke omaoma ke he tau puhala oti he moui ha tautolu. Kia nakai lata ia tautolu ke fakahehē ne tautolu a tautolu he manamanatu na maeke ia tautolu ke fakahanoa ke he tau fakatufono he Atua ka e tapuaki agaia ki a ia ke he falu puhala he moui. Ke fakatai ki ai, liga kua fakahehē ni he tagata e tagata he manamanatu kaeke ke taute e ia falu matagahua he tapuakiaga pauaki, to hao a ia he taute e mahani feuaki po ke putoia ke he falu a mahani  kelea muitui. Ko e manatu hehē ha ia!​—Kalatia 6:7, 8.

13. Kaeke ko koe hoko koe ni, liga to kamatamata fēfē e omaoma ha tautolu ki a Iehova?

¹³ Hagaao ki ai, lata ia tautolu ke hūhū hifo, ‘Kua omaoma nakai au ki a Iehova ke he tau matagahua haaku he tau aho takitaha, liga pihia foki ke he tau matagahua haaku tokotaha?’ Ne pehē a Iesu: “Ko ia ne fakamoli ke he mena tote, to fakamoli foki a ia ke he tau mena loga; ka ko ia ne hepehepe ke he mena tote, to hepehepe foki a ia ke he tau mena loga.” (Luka 16:10) Kua ō kia a tautolu mo e ‘loto hako’ pihia ‘ki loto he tau fale ha tautolu,’ ko e mena ne nakai kitia mai he falu? (Salamo 101:2) E, he nonofo a tautolu i loto he fale ni ha tautolu, liga to kamatamata e loto fakamooli ha tautolu. He tau motu loga ne eke e tau komopiuta mo taha koloa he kaina, ko e tau fakatino fakalialia to moua vave he gahoa ni e peehi e mouse he komopiuta. He tau tau gahoa kua mole, ne nakai kitia he tagata e tau fakatino pihia ha kua nakai fano ke he tau fale ne fakakite e tau fakafiafiaaga mahani fakalialia. To omaoma mo e tokaloto nakai e tautolu e tau kupu a Iesu: “Ka kikite atu taha ke he fifine kia manako ki ai, kua faivao tuai a ia ke he hana loto”? E, to fakaheu nakai e tautolu ke kitekite ke he tau fakatino fakalialia? (Mataio 5:28; Iopu 31:1, 9, 10; Salamo 119:37; Tau Fakatai 6:24, 25; Efeso 5:3-5) Ka e kua e tau polokalama televisoni ne ha ha ai e aga favale? Kua talia auloa nakai a tautolu mo e ha tautolu Atua, ko ia ne ‘vihiatia e tagata mahani kelea ne fiafia ke he favale’? (Salamo 11:5) Ka e kua ka fakaaoga lahi foki e koe e kava kaeke ko koe hoko koe ni? Ne fakahala he Tohi Tapu e konahia, ti hataki foki e tau Kerisiano ke ua “fakatupa ke he uaina.”​—Tito 2:3; Luka 21:34, 35; 1 Timoteo 3:3.

14. Ko e heigoa falu puhala ka kitia maali e omaoma ha tautolu ke he Atua ka hagaao ke he tau mena fakatupe?

¹⁴ Taha faahi ne lata ia tautolu ke mataala ki ai ko e fakaaoga he tau mena fakatupe. Ke fakatai ki ai, liga to putoia nakai a tautolu ke he pulega ke mautū mafiti ne hihiga ke fakavai? Kua kamatamata kia a tautolu ke taute e tau mena nakai matafakatufono he kalo neke totogi e tau tukuhau? Po kua omaoma fakamooli a tautolu ke he poaki ke “ta atu ke he tau tagata oti kana ha lautolu a tau mena; ko e poa kia lautolu kua lata ki ai e poa [po ke, tukuhau]”?​—Roma 13:7.

Omaoma ne Puna Mai he Fakaalofa

15. Ko e ha ne omaoma e koe e tau poakiaga ha Iehova?

¹⁵ Ko e omaoma ke he tau fakatufono faka-Atua ka tamai e tau monuina. Ke fakatai ki ai, he fakamamao mai he fakaaoga e tapaka, nonofo he moui hagahaga mitaki, mo e he fakalilifu e fakatapu he toto, liga to puipui mai a tautolu neke moua falu gagao pauaki. Lafi ki ai, he moui fakatatai ke he kupu mooli he Tohi Tapu ke he falu faahi he moui, ka liga moua e tautolu e aoga ke he puhala fakatupe, fakalatahaaga, po ke kaina. (Isaia 48:17) Ko e tau aoga fakatino pihia kua lata ke onoono ki ai ko e tau monuina mooli he fakagahuahua e tau fakatufono he Atua. Pete ia, ko e matapatu kakano ne omaoma a tautolu ki a Iehova ha kua ofania e tautolu a ia. Kua nakai fekafekau a tautolu ke he Atua ha ko e tau kakano lotokai. (Iopu 1:9-11; 2:4, 5) Ne mai he Atua ki a tautolu e atāina ke fifili ke omaoma ki a lautolu ne manako a tautolu ki ai. Kua fifili a tautolu ke omaoma ki a Iehova ha kua manako ke fakafiafia a ia mo e ha ko e manako ha tautolu ke taute e tau mena kua hako.​—Roma 6:16, 17; 1 Ioane 5:3.

16, 17. (a) Fakakite fēfē e Iesu e omaoma ke he Atua ha ko e fakaalofa mai he loto? (e) Maeke fēfē ia tautolu ke fifitaki a Iesu?

¹⁶ Ne fakatoka e Iesu e fakafifitakiaga mitaki katoatoa he omaoma ki a Iehova ha ko e fakaalofa fakamooli ki a Ia. (Ioane 8:28, 29) He nofo agaia he lalolagi, ne ‘ako e Iesu e omaoma mai he tau mena ne mamahi ai a ia.’ (Heperu 5:8, 9) Puhala fe? Ko Iesu “ne fakatokolalo e ia a ia, ne oma e ia kua hoko ke he mate, ko e mate haia he [“akau fakakikiveka,” NW].” (Filipi 2:7, 8) Pete kua fitā a Iesu he omaoma i luga he lagi, ne kamatamata atu foki e omaoma haana ke he lalolagi. Maeke ia tautolu ke mauokafua kua latatonu katoatoa a Iesu ke eke mo Ekepoa ne  Mua ma e tau matakainaga fakaagaaga haana pihia foki ma e falu tagata talitonu.​—Heperu 4:15; 1 Ioane 2:1, 2.

¹⁷ Ka e kua a tautolu? Maeke ia tautolu ke fifitaki a Iesu he tuku fakamua e omaoma ke he finagalo he Atua. (1 Peteru 2:21) Maeke ia tautolu ke moua e mauokafua fakatagata ka omoomoi he fakaalofa ma e Atua a tautolu ke taute e tau mena ne poaki e Iehova, pihia foki he tau magaaho ka peehi mai po ke kamatamata a tautolu ke taute taha mena kehe. (Roma 7:18-20) Putoia ki ai e fakamakai ha tautolu ke omaoma e tau hatakiaga mai ia lautolu hane takitaki e tapuakiaga mooli, pete he nakai mitaki katoatoa a lautolu. (Heperu 13:17) Ke omaoma ke he tau poakiaga faka-Atua he moui fakatagata ni ha tautolu nukua uho ke he fofoga a Iehova.

18, 19. Ko e heigoa e tau fua he omaoma ke he Atua mai he loto?

¹⁸ He vahā nei, ko e omaoma ha tautolu ki a Iehova kua liga putoia e fakauka ke he favale ke maeke ia tautolu ke fakatumau ke fakamooli. (Gahua 5:29) Taha mena foki, he omaoma ke he poaki ha Iehova ke fakamatala mo e ke fakaako kua kakano ke fakauka a tautolu ato fakaoti e fakatokaaga nei. (Mataio 24:13, 14; 28:19, 20) Kua lata a tautolu ke fakauka ke fakatumau ke fakapotopoto auloa mo e tau matakainaga ha tautolu, pete he logona e tautolu e peehi mamafa mai he lalolagi. Kua mataala katoatoa e Atua fakaalofa ha tautolu ke he tau laliaga ha tautolu ke omaoma ke he tau mena pihia. Ka ke omaoma katoatoa, lata ia tautolu ke taufetului mo e tino agahala ha tautolu mo e fuluhi kehe mai he kelea ka e feaki e loto fakaaue ma e tau mena mitaki.​—Roma 12:9.

¹⁹ Ka fekafekau a tautolu ki a Iehova ha ko e fakaalofa mo e loto fakaaue, ne eke ‘a ia ki a tautolu ko e taui ha lautolu kua kumi fakamakutu kia ia.’ (Heperu 11:6) Nukua tonu mo e fulufuluola e tau poa mitaki, ka ko e omaoma katoatoa ha ko e fakaalofa ma Iehova ne fiafia lahi mahaki a ia ki ai.​—Tau Fakatai 3:1, 2.

To Tali Fēfē e Koe?

• Ko e ha ne talahau e tautolu kua fai mena a tautolu ke age ki a Iehova?

• Ko e heigoa e tau mena hehē ne taute e Saulo?

• Maeke fēfē ia koe ke fakakite na talitonu a koe kua mua e mitaki he omaoma ke he poa?

• Ko e heigoa ne omoi a koe ke omaoma ki a Iehova?

[Tau Hūhū he Fakaakoaga]

[Fakatino he lau 12]

Liga fēfē e logonaaga he ekekafo ne leveki e tagata gagao ne fakaheu e tau lagomatai haana?

[Fakatino he lau 14]

Ko e ha ne nakai fiafia a Iehova ke he Patuiki ko Saulo?

[Tau Fakatino he lau 16]

Kua omaoma nakai a koe ke he tau poaki he Atua ka haia he kaina ni haau?