Kitekite Nakai e Atua ki a Koe?

MAEKE nakai a Iehova, ko e Takitaki Tufuga ke ha ha ai e maamaaga ke kitia? Maeke a ia! Kua talahau fakamaaliali he Tohi Tapu: “Ko ia ne eke e mata, nakai kia kitia e ia?” (Salamo 94:9) Kua mua ue atu e laulahi he kitiaaga ha Iehova ke he tau tagata. Nakai kitia ni e ia e tau tino ha tautolu ka ko ia foki “kua kamatamata ai e tau loto,” ti maeke ia ia ke ‘fafati e tau loto.’ (Tau Fakatai 17:3; 21:2) E, maeke ia ia ke fioia e tau manatu, logonaaga, mo e tau fatuakiloto ha tautolu.

Kua mailoga e Iehova e tau tuaga uka ne liga fehagai mo tautolu he moui, ti fakateliga mai a ia ke he tau ole ha tautolu. Ne tohia he salamo: “Ko e tau fofoga a Iehova kua hagao ia kia lautolu ne tututonu, mo e hana tau teliga foki ke he kalaga ha lautolu. Kua tata mai a Iehova kia lautolu kua loto malipilipi; kua fakamoui foki e ia a lautolu kua loto pehia.” (Salamo 34:15, 18) Ko e mafanatia ha ia ke iloa na maama e Iehova e tau tuaga ha tautolu mo e fakateliga ke he tau liogi ha tautolu mai he tau loto!

Kua mailoga e Iehova ko e Atua e tau gahua ne taute, pihia foki ke he mena galo. E, “kua toka noa mo e maliali e tau mena oti kana ke he na fofoga hana ke talahau ki ai e tautolu e tau mahani ha tautolu.” (Heperu 4:13) Ti pete he mitaki po ke kelea e tau gahua ha tautolu, na kitia oti he Atua. (Tau Fakatai 15:3) Ma e fakatai, ne talahau ia Kenese 6:8, 9 ko “Noa kua ofania a ia e Iehova” pihia foki “ne o fano ai e Atua mo Noa.” E, ne talia mo e fakamonuina e Iehova a Noa ha kua omaoma mo e tuku fakatokoluga e ia e tau matapatu fakaakoaga tututonu he Atua. (Kenese 6:22) Kehekehe ai, ko e tau tagata he vahā a Noa ne mahani vale mo e matahavala. Ne nakai matapouli e Atua ke he tuaga nei. Ne “fioia e Iehova kua lahi ni e mahani kelea he tau tagata ke he lalolagi; ko e tau fatuakiloto oti foki he tau manatu he tau loto ha lautolu, ko e kelea hokoia ni ke he tau aho oti kana.” Fakahiku ai, ne moumou e Iehova e tau tagata mahani kelea ka e fakahao a Noa mo e magafaoa haana.​—Kenese 6:5; 7:23.

To fiafia nakai a Iehova ka onoono mai ki a koe? Mooli, ko e tau mata ha Iehova “kua o tafeliuaki ai ke he lalolagi oti, ke lagomatai kia lautolu kua katoatoa ha lautolu a tau loto kia ia.” (2 Nofoaga he Tau Patuiki 16:9) To nakai leva ti liu a ia ke utakehe mai he lalolagi a lautolu oti kana ne mahani kelea mo e fakahao a lautolu ne loto molū.​—Salamo 37:10, 11.