Ko Koe Kia ne ‘Maukoloa ke he Atua’?

“Ha ha ne pihia foki e tagata kua tanaki e tau koloa ia ia, ka e nakai maukoloa a ia ke he Atua.”​—LUKA 12:21.

1, 2. (a) Ko e heigoa ne makai e tau tagata ke foaki fakalahi e tau momoui ki ai? (e) Ko e heigoa e paleko mo e hagahaga kelea kua lata he tau Kerisiano ke fehagai ki ai?

KO E kumi he koloa galo ne nakai ni ko e feua ne fiafia e tau tama ikiiki ke pelē; ko e tala mooli foki ke he moui ne tupu tumau ke he tau vahā mo e ke he tau motu loga. Ma e fakatai, ko e hou ke keli auro he senetenari ke 19 aki i Ausetalia, Aferika Toga, Kanata, mo e tau Faahi Kaufakalataha ne futiaki e tau tagata nonofo mamao ne makai ke toka e tau kaina mo lautolu e tau fakahele ke tutuli e tau monuina he tau motu kehe, ne hagahaga kelea falu magaaho. E, loga e tagata ne makai ke fakahagahaga kelea mo e foaki e tau momoui ke maeke ke moua e maukoloa ne manako e tau loto ha lautolu ki ai.

² Pete ne tokologa e tagata he vahā nei ne nakai kumi mooli ke he koloa galo, kua gahua malolō a lautolu ke lata mo e tau momoui. Ke taute e mena ia he fakatokaaga nei kua maeke ke paleko, uka, mo e mamafa. Kua mukamuka ke kapaletū lahi ke he tau mena kai, mena tui, mo e mena ke nofo ai ati tiaki po ke nimo mogoia e tau mena ne mua atu e aoga. (Roma 14:17) Ne foaki e Iesu e fakataiaga ne fakamaama e hakotika he aga nei he tagata. Kua moua ia Luka 12:16-21.

3. Talahau fakakū e fakataiaga ha Iesu ne fakamau ia Luka 12:16-21.

³ Kua foaki e Iesu e fakataiaga he magaaho taha ia ne tutala a ia ke lata ke puipui neke velevelemena, nukua kumikumi fakamatafeiga ki ai a tautolu he vala tala fakamua. He mole e hataki neke velevelemena, ne tutala a Iesu hagaao ke he tagata maukoloa ne nakai makona ke he tau fale saito ne puke he tau mena mitaki ne fitā he moua e ia ka kua uulu ai ki lalo mo e liu talaga e tau fale saito lalahi  ke maeke ke tanaki atu foki e tau mena mitaki. He manatu a ia kua mautali a ia ke okioki mo e olioli e moui hagahaga mitaki, ne tala age e Atua ki a ia ko e mole fai e moui haana ti ko e tau mena mitaki oti he tagata ne tanaki to eke ai ma e taha. Ti lafi e Iesu e talahauaga fakahiku: “Ha ha ne pihia foki e tagata kua tanaki e tau koloa ia ia, ka e nakai maukoloa a ia ke he Atua.” (Luka 12:21) Ko e heigoa e fakaakoaga ne ako e tautolu mai he fakataiaga nei? Fakaaoga fēfē e tautolu e fakaakoaga ke he tau momoui ha tautolu?

Ko e Tagata Fai Lekua

4. Ko e vahega tagata fēfē ka talahau e tautolu ne fakatino he fakataiaga a Iesu?

⁴ Ko e fakataiaga ne foaki e Iesu kua mahani mau. Mailoga e tautolu kua hafagi e Iesu e tala he pehē: “Kua fua loga mai e fonua he taha tagata maukoloa.” Ne nakai pehē a Iesu kua moua he tagata e tau monuina he tau puhala hehē po ke he moumou e matafakatufono. He falu kupu, ne nakai fakatino a ia ko e tagata kelea. Ka e, mai he talahauaga a Iesu, kua mitaki ke manatu ko e tagata ne fakatino he fakataiaga nukua gahua malolō. Ti maeke mogoia ke maama ko ia ko e tagata ne pulega mo e tatanaki ma e vahā anoiha, liga mo e manamanatuaga ke aoga ai e magafaoa haana. Ti, mai he onoonoaga fakalalolagi, maeke ke fakakite ko ia ko e tagata gahua malolō ne uta fakahokulo e tau matagahua haana.

5. Ko e heigoa e lekua ne fehagai mo e tagata he fakataiaga a Iesu?

⁵ Pete ia, ne fakahigoa e Iesu e tagata he fakataiaga ko e tagata maukoloa, kakano kua fitā a ia he loga lahi e tau koloa fakatino. Ka e, tuga he fakamaama ai e Iesu, ne kua fai lekua e tagata maukoloa. Ne fua mai he fonua haana e tau fua loga ne nakai amanaki a ia ki ai, ti molea e loga po ke ke leveki ki ai. Ko e heigoa haana kua lata ke taute?

6. Ko e heigoa e tau fifiliaga ne fehagai mo e tau fekafekau he Atua he vahā nei?

⁶ Tokologa e tau fekafekau a Iehova he vahā nei ne fehagai mo e tau tuaga pihia tuga he tagata maukoloa. Lali e tau Kerisiano mooli ke eke mo tau tagata gahua fakamooli, fakamakai, mo e fakamakutukutu. (Kolose 3:22, 23) He gahua a lautolu po ke fai pisinisi a lautolu ni, ne fa kautū a lautolu, ti mitaki lahi mahaki e tau gahua ha lautolu. Ka foaki age e tau tuaga tokoluga po ke tau gahua foou, ne fehagai a lautolu mo e fifiliaga. Kua lata nakai a lautolu ke holo hake e tuaga po ke fakalaulahi atu? Pihia foki, ne tokologa e tau fuata Fakamoli ne iloilo he aoga. Ti ko e fua, ne liga foaki ki a lautolu e tau palepale po ke tau sikolasipi ke fakalaulahi ki mua e tau fakaakoaga he tau aoga talahaua. Kua lata kia a lautolu ke muitua mo e talia e mena ne kua foaki?

7. Fehagai fēfē e tagata he fakataiaga ha Iesu mo e lekua haana?

⁷ Liliu mai ke he fakataiaga ha Iesu, ko e heigoa ne taute he tagata maukoloa he magaaho ne fua mai he fonua haana e tau fua loga ti nakai fai mena ke tanaki ai haana tau fua ne helehele? Ne fifili a ia ke uulu e tau fale saito fakamua haana ti talaga fakalalahi foki e tau fale ke tanaki e tau saito ne toe mo e tau mena mitaki oti kana. Ko e pulega ia ne foaki ki a ia e haohao mitaki mo e makona ati manatu hifo a ia: ‘To pehe hifo au ke he haku a moui, Haku moui na e, ha ha ia koe e tau mena mitaki loga kua toka mo e tau tau loga; kia nofo fakatekiteki a, ti kai a, mo e inu, mo e fiafia ai a koe.’​—Luka 12:19.

Ko e Ha ne “Goagoa”?

8. Ko e heigoa e vala aoga lahi ne tiaki he tagata he fakataiaga a Iesu?

⁸ He fakakite ai e Iesu, ko e pulega he tagata maukoloa ne foaki hokoia e manatu haohao mitaki ne nakai mooli. Ne tuga kua aoga, ka kua tiaki ai e vala aoga lahi​—ko e finagalo he Atua. Kua manamanatu ni e tagata ki a ia ni, ke he puhala ka nofo fakatekiteki mo e kai, inu, mo e fiafia ai a ia. Ne manamanatu a ia ha ko e “tau mena mitaki loga,” to ha ha ai e “tau tau loga.” Ka e oi te fakaalofa ki a ia, ne nakai pihia e mena ne tupu. Tuga ni he talahau tuai e Iesu, “ha ko e mena nakai moui taha he loga hana tau mena ha i ai.” (Luka 12:15) He po ia ni, ne galo fakalutukia oti e tau  mena ne moua he gahua he tagata, ha kua pehē e Atua ki a ia: “Ko e goagoa na e, to ahi atu hau a moui mai ia koe ke he po a magaaho; to eke ma hai e tau mena ia ne taute e koe?”​—Luka 12:20.

9. Ko e ha ne ui e tagata he fakataiaga ko e goagoa?

⁹ Hokotia a tautolu mogonei ke he matapatu manatu he fakataiaga a Iesu. Ne ui he Atua e tagata ko e goagoa. Ne fakamaama he Exegetical Dictionary of the New Testament ko e vahega he kupu Heleni ne fakaaoga “kua fakakite tumau e nakai fai maamaaga.” Ne kua fakakite mai he fakataiaga nei, na fakamailoga e Atua he fakaaoga e kupu ke fakamaama aki “e nakai fai kakano he tau pulega anoiha he tagata maukoloa.” Ne nakai hagaao e kupu ki a ia ne nakai fai iloilo, ka ki a “ia ne fakaheu ke fakakite e falanaki ke he Atua.” Ko e talahauaga a Iesu ke he tagata maukoloa kua fakamanatu e mena ne talahau e ia fakamui ke he tau Kerisiano he fakapotopotoaga Laotikaia i Asia Tote he senetenari fakamua: “Kua tala mai e koe, Kua maukoloa au, kua fakaloga mai haku a tau mena, kua nakai nofogati foki au he taha mena taha; ka e nakai iloa e koe kua malaia a koe, mo e matematekelea, mo e nofogati, mo e matapouli, mo e nakai fai felevehi.”​—Fakakiteaga 3:17.

10. Ko e ha e tau koloa he “tau mena mitaki loga” ne nakai moua e fakavēaga ke he “tau tau loga”?

¹⁰ Kua lata ia tautolu ke tokaloto e fakaakoaga. Liga tatai kia a tautolu mo e tagata he fakataiaga​—he gahua malolō ke he “tau mena mitaki loga” ka e kaumahala ke taute e mena kua lata ke moua e monuina he “tau tau loga”? (Ioane 3:16; 17:3) Ne pehē e Tohi Tapu: “Nakai aoga e koloa ke he aho ke tupu ai e ita,” ti “ko ia kua tua ke he hana koloa, to veli ni a ia.” (Tau Fakatai 11:4, 28) Ti ko e mena ia, ne lafi e Iesu e tomatomaaga fakahiku nei ke he fakataiaga: “Ha ha ne pihia foki e tagata kua tanaki e tau koloa ia ia, ka e nakai maukoloa a ia ke he Atua.”​—Luka 12:21.

11. Ko e ha ne nakai fai aoga ke atihake e amaamanakiaga mo e haohao mitaki ke he tau koloa fakatino?

¹¹ He pehē a Iesu “ne pihia foki,” ne tuhi a ia ke he mena ne tupu ke he tagata maukoloa he fakataiaga ka tupu foki ki a lautolu ne fakavē katoatoa ha lautolu a tau momoui​—tau amaamanakiaga mo e haohao mitaki ha lautolu—​ke he tau koloa fakatino. Nakai hehē he ‘tanaki e tau koloa ma haana’ ka ko e kaumahala ke ‘maukoloa ke he Atua.’ Ne tukuogo e Iakopo e hatakiaga pihia he magaaho ne tohi e ia: “Kitiala, ko mutolu na kua pehe age, Ko e aho nai, po ke a pogipogi, to o atu ai a tautolu ke he taha māga po ke taha maga, mo e nonofo ai e taha tau, mo e fefakafuāki, mo e moua ai e tau koloa; ka e nakai iloa e mutolu e mena ke tupu mai a pogipogi Ha ko e heigoa ha mutolu a moui? Ko e aolu kua fakakite mai ke he magaaho tote, ti galo ai ni. Ka e lata ni ke pehe mai a mutolu, Ka finagalo e Iki [Iehova] ki ai, to momoui a tautolu, to eke e tautolu e mena ia mo e mena ia.” (Iakopo 4:13-15) Pete ni he liga maukoloa e tagata po ke loga lahi e tau koloa haana, to nakai fai aoga ato maukoloa a ia ke he Atua. Ti, ko e heigoa mogoia e kakano ke maukoloa ke he Atua?

Kia Maukoloa ke he Atua

12. Ko e heigoa e mena ka taute e tautolu ke maukoloa ke he Atua?

¹² He talahauaga a Iesu, ko e maukoloa ke he Atua ne kehekehe e fakavēaga mo e tanaki he tau koloa fakatino ma e tagata ni, po ke kumi e  tau monuina fakatino ma haana ni. Ti talahau ai a Iesu ko e matapatu manatu ha tautolu he moui kua nakai lata ke tanaki he tau monuina fakatino po ke fiafia ke he tau mena ne liga moua e tautolu. Ka kua lata ia tautolu ke fakaaoga e tau koloa ke he puhala ke maukoloa po ke atihake e fakafetuiaga ha tautolu mo Iehova. Ko e taute pihia ka taute mooli a tautolu ke maukoloa ke he Atua. Ko e ha? Ha kua hafagi e gutuhala ke he tau monuina loga mai ia ia. Kua talahau he Tohi Tapu ki a tautolu: “Ko e fakamonuina a Iehova, ke maukoloa ai e tagata; ti nakai lafilafi e ia ha mamahi ki ai.”​—Tau Fakatai 10:22.

13. “Maukoloa ai” fēfē e monuina a Iehova?

¹³ He magaaho ne liligi e Iehova e tau monuina ke he tau tagata haana, kua foaki tumau e ia ki a lautolu e tau mena kua mua atu e mitaki. (Iakopo 1:17) Ma e fakatai, he magaaho ne foaki e Iehova ke he tau Isaraela e kaina, ko e “motu ne tafe ai e puke huhu mo e meli.” Pete ne fakamaama foki e motu ha Aikupito ke he puhala pihia, ko e motu ne foaki e Iehova ke he tau Isaraela ne kehekehe ke he taha e puhala aoga lahi. Ko e “motu ne leveki e Iehova hau a Atua,” he tala age e Mose ke he tau Isaraela. Ko e pehē a ia, to monuina a lautolu ha ko e mena to leveki e Iehova a lautolu. Ka fakatumau e tau Isaraela ke tua fakamooli ki a Iehova, ne fakamonuina lahi e ia a lautolu mo e olioli e puhala moui ne mahomo hake mooli ke he tau motu oti ne ha ha i ai. E, ko e monuina a Iehova ne “maukoloa ai”!​—Numera 16:13; Teutaronome 4:5-8; 11:8-15.

14. Ko e heigoa ne olioli e lautolu kua maukoloa ke he Atua?

¹⁴ Ko e talahauaga ‘maukoloa ke he Atua’ kua kakano foki “maukoloa ki mua he Atua” (Today’s English Version) po ke “maukoloa ke he fofoga he Atua.” (The New Testament in Modern English, ha J. B. Phillips) Ko lautolu ne maukoloa fakatino kua fa tupetupe ke he puhala ka liga kitia he falu a lautolu. Kua fa fakaata he mena nei e puhala moui ha lautolu. Ne manako a lautolu ke fakafiafia e tau tagata aki e mena ne ui he Tohi Tapu ko e ‘hula ke he tau mena he mouiaga nai.’ (1 Ioane 2:16) Ke he taha faahi, ko lautolu ne maukoloa ke he Atua kua olioli e taliaaga, fiafia, mo e lahi he totonu he Atua mo e fakafetuiaga mafanatia fakatagata mo ia. He tuaga uho pihia kua foaki mooli ki a lautolu e manamanatu mitaki mo e haohao mitaki, mahomo atu mai he tau mena ne foaki he tau monuina fakatino. (Isaia 40:11) Kua tumau agaia e hūhū, Ko e heigoa kua lata ke taute e tautolu ke maeke ke maukoloa ke he fofoga he Atua?

Maukoloa ke he Fofoga he Atua

15. Ko e heigoa kua lata ke taute e tautolu ke maeke ke maukoloa ke he Atua?

¹⁵ He fakataiaga ha Iesu, ko e tagata ne pulega mo e gahua malolō hokoia ni ke monuina ai na ia, nukua ui ko e goagoa. Ke maukoloa ke he Atua mogoia, kua lata ia tautolu ke lali ke gahua malolō mo e fakalataha katoatoa ke he tau matagahua ne aoga mooli mo e uho ke he fofoga he Atua. Taha he tau mena nei ko e poakiaga ha Iesu: “Hanei, kia o atu a a mutolu ke eke e tau motu oti kana mo tutaki.” (Mataio 28:19) He fakaaoga e magaaho, malolō, mo e tau taleni, nakai ke fakaholo ki mua e tuaga fakatagata, ka ko e fakamatala he Kautu mo e gahua taute tutaki kua fakatatai ke he tanakiaga tupe. Ko lautolu ne taute pihia ne monuina e heleheleaga fakaagaaga, tuga ne fakakite he tau mena tutupu na i lalo.​—Tau Fakatai 19:17.

16, 17. Ko e heigoa e tau mena ne tupu ka talahau e koe ke fakakite e puhala he moui ne taute e tagata ke maukoloa ke he fofoga he Atua?

 ¹⁶ Manamanatu ke he mena ne tupu ke he tagata taane Kerisiano he motu he Faahi Uta. Ne totogi lahi e gahua haana ko e tagata taute komopiuta. Pete ia, ne fōfō he gahua e tau magaaho oti haana ti fakatupu a ia ke logona e hoge fakaagaaga. Fakahiku ai, he nakai lali ke tukumoeulu ke he gahua haana, ne toka ai e ia mo e kamata e gahua taute asekulimi ti sela ai he puhalatū ke maeke a ia ke lahi e magaaho ke leveki e tau manako mo e tau matagahua fakaagaaga haana. Ne vaiga he kau gahua fakamua haana a ia, ka ko e heigoa e fua ne moua mai? “A kua mua atu e tuaga fakatupe haaku he nakai gahua mo e tau komopiuta,” he talahau e ia. “Ne taute au ke fiafia lahi ha kua nakai tupetupe mo e fakaatukehe au tuga ke he gahua fakamua haaku. Ti mua atu, ne logona e au mogonei e tata lahi mahaki ki a Iehova.” Ne taute he hikiaga e Kerisiano nei ke fakalataha ke he fekafekauaga mau, ti kua gahua a ia mogonei he la ofisa he Tau Fakamoli a Iehova he motu haana. Ko e monuina a Iehova kua “maukoloa ai” mooli.

¹⁷ Taha fakataiaga foki ko e fifine ne tupu hake he magafaoa ne aoga lahi e fakaakoaga. Ne fano a ia he univesitī i Falani, Mesiko, mo Suisalani ti gutu atu a ia ke he gahua mitaki pauaki. “Ne kautū mooli au; ne ha ha ia au e lilifu mo e kotofaaga,” he talahau e ia, “ka e i loto ne gatigati au he nakai fiafia.” Ti ako a ia hagaao ki a Iehova. Ne pehē a ia: “He tupu fakaagaaga au ki mua, ko e manako haaku ke fakafiafia a Iehova ti liuaki atu e mena tote ne foaki mai e ia ki a au kua lagomatai au ke kitia mitaki e puhala ke fano ai​—he fekafekau mau ki a Ia.” Ne fakaoti e gahua haana ti nakai leva ti papatiso. He 20 e tau he mole, ne gahua fiafia a ia ke he fekafekauaga mau. “Ne manatu e falu kua moumou e au e tau taleni haaku,” he talahau e ia, “ka e mailoga e lautolu e fiafia haaku, ti nava a lautolu ke he tau matapatu fakaakoaga ne taki aki e au e moui haaku. Ne liogi au he tau aho oti ki a Iehova ke lagomatai au ke mahani fakatokolalo ke maeke ke moua e taliaaga haana.”

18. Tuga a Paulo, maeke fēfē a tautolu ke maukoloa ke he Atua?

¹⁸ Ko Saulo, ne eke mo aposetolo ko Paulo, ne fai gahua mitaki pauaki i mua haana. Ka e, he magaaho fakamui ne tohi e ia: “Ko e haku a manatu kua nakai aoga e tau mena oti kana ha ko e mitaki mua ue atu he iloa a Keriso Iesu ko e haku a Iki.” (Filipi 3:7, 8) Ki a Paulo, ko e tau monuina ne moua e ia puhala ia Keriso kua mua atu ke he ha mena ka foaki he lalolagi. Pihia foki, he tiaki e tau foliaga lotokai mo e tutuli e moui mahani Atua, kua maeke foki ia tautolu ke olioli e moui kua maukoloa ke he fofoga he Atua. Ne fakamafana mai he Kupu he Atua ki a tautolu: “Ko e taui he mahani fakatokolalo mo e matakutaku kia Iehova, hanai, ko e koloa, mo e lilifu mo e moui.”​—Tau Fakatai 22:4.

Maeke Nakai a Koe ke Fakamaama?

• Ko e heigoa e lekua ne moua he tagata he fakataiaga a Iesu?

• Ko e ha ne ui e tagata he fakataiaga ko e goagoa?

• Ko e heigoa e kakano ke maukoloa ke he Atua?

• Maeke fēfē a tautolu ke maukoloa ke he Atua?

[Tau Hūhū he Fakaakoaga]

[Fakatino he lau 27]

Ko e ha ne ui e tagata maukoloa ko e goagoa?

[Fakatino he lau 29]

Liga kamatamata mooli fēfē e tau foakiaga ke holo ki mua?

[Fakatino he lau 30, 31]

“Ko e fakamonuina a Iehova, ke maukoloa ai e tagata”