Kua Agahala Kia a Koe ke he Agaaga Tapu?

“Na fai hala ke hoko atu ke he mate.”​—1 IOANE 5:16.

1, 2. Iloa fēfē e tautolu kua maeke ke agahala ke he agaaga tapu he Atua?

“NE LAHI e tupetupe haaku he piko kua agahala au ke he agaaga tapu.” Kua tohi pihia he fifine i Sihamani, pete kua fekafekau a ia ke he Atua. Maeke mooli kia e Kerisiano ke agahala ke he agaaga tapu, po ke malolō gahuahua he Atua?

² E, kua maeke ke agahala ke he agaaga tapu ha Iehova. “Ko e tau hala oti mo e tau kupu kelea, to fakamagalo ia ke he tau tagata,” he talahau e Iesu Keriso, “ka ko e kupu kelea ke he [a]gaga, nakai fakamagalo ia ke he tau tagata.” (Mataio 12:31) Kua hataki a tautolu: “Kaeke kua hala a tautolu mo e loto ki ai, ka kua talia tuai e tautolu e maama he kupu moli, ti nakai tuai toe ha poa mo e tau hala, ka ko e tatali mo e matakutaku lahi ke he fakahala.” (Heperu 10:26, 27) Ti tohia he aposetolo ko Ioane: “Na fai hala ke hoko atu ke he mate.” (1 Ioane 5:16) Ka e toka ni kia ke he tagata ne agahala kelea muitui ke fifili po kua taute e ia e “hala ke hoko atu ke he mate”?

Tamai he Tokihala e Fakamagaloaga

3. Ko e heigoa kua liga ke mooli kaeke ke momoko lahi a tautolu he taute e agahala?

³ Ko Iehova e Ikifakafili fakahiku he tau tagata taute mena hehē. Mooli, kua lata ia tautolu oti ke talatala atu haana mahani ki a Ia, ti kua taute tumau foki e Ia e tau mena kua hako. (Kenese 18:25; Roma 14:12) Ko Iehova ka fifili po kua taute e tautolu e agahala nakai fai fakamagaloaga, ti maeke ia ia ke utakehe ia tautolu e agaaga haana. (Salamo 51:11) Pete ia, kaeke ke momoko lahi a tautolu ha kua agahala, liga kua tokihala mooli a tautolu. Ka e, ko e heigoa e tokihala mooli?

4. (a) To fakamaama fēfē e koe e tokihala? (e) Ko e heigoa ne mafanatia ai e Salamo 103:10-14?

⁴ Ke tokihala ko e kakano ke hiki e tautolu e aga ha tautolu hagaao ke he tau hehē ne taute fakamua po ke ka liga hihiga ke taute. Kakano kua logona hifo e tautolu e momoko po ke tupetupe ti fuluhi kehe mai he puhala agahala. Kaeke kua agahala kelea muitui a tautolu ka e fitā e taute e tau lakaaga kua lata ke fakakite na tokihala mooli a tautolu, maeke ia tautolu ke moua e mafanatia mai he tau kupu he salamo: “Nakai eke e [Iehova] kia tautolu ke lata mo e ha tautolu a tau hala; nakai taui foki e ia a tautolu ke lata mo e ha tautolu a tau mahani hepehepe. Ha ko e mena tuga ne lagi kua tokoluga ke he lalolagi, kua pihia ni e lahi he hana fakaalofa kia lautolu kua matakutaku kia ia. Tuga ne vaha mamao e fahi uta mo lalo, kua fakamamao pihia e ia ia tautolu ha tautolu a tau holifono. Tuga ne hofihofi e fakaalofa he matua ke he hana fanau, kua hofihofi pihia e fakaalofa a Iehova kia lautolu kua matakutaku kia ia. Ha kua fioia e ia e mena ne eke aki a tautolu; kua manatu e ia ko e kelekele ni a tautolu nai.”​—Salamo 103:10-14.

5, 6. Talahau e alito manatu he 1 Ioane 3:19-22, mo e fakamaama e kakano he tau kupu he aposetolo.

⁵ Kua mafanatia foki e tau kupu he aposetolo ko Ioane: “Ko e mena foki ia ke iloa ai e tautolu kua fakamoli a tautolu; to iloa tonuhia foki e tau loto ha tautolu ki mua hana. Ha ko e mena kaeke kua fakahala mai he tau loto ha tautolu kia tautolu, kua mua e Atua ke he tau loto ha tautolu, kua fioia foki e ia e tau mena oti kana. Ko e tau tagata fakahelehele na e, kaeke kua nakai fakahala mai he tau loto ha tautolu kia tautolu, ti moua ai e tautolu e fakamalolo ki mua he Atua; ko e tau mena oti foki ke ole atu ai  a tautolu, kua moua mai e tautolu ia ia, ha kua omaoma a tautolu ke he tau poaki hana, mo e eke e tautolu e tau mena kua fiafia ki ai a ia.”​—1 Ioane 3:19-22.

⁶ Nukua “iloa ai e tautolu kua fakamoli a tautolu” ha kua fakatātā e tautolu e fakaalofa fakamatakainaga mo e lali ke nakai taute e agahala. (Salamo 119:11) Kaeke ke logona e tautolu e fakahala ha ko e taha mena ni, lata ia tautolu ke manatu “kua mua e Atua ke he tau loto ha tautolu, kua fioia foki e ia e tau mena oti kana.” Ne fakakite e Iehova e fakaalofa noa ki a tautolu ha kua mailoga e ia e ‘fakaalofa fakamoli ha tautolu ke he tau matakainaga,’ ko e taufetului ha tautolu ke he agahala, mo e tau laliaga ha tautolu ke taute e finagalo haana. (1 Peteru 1:22) To “nakai fakahala mai he tau loto ha tautolu kia tautolu” kaeke kua falanaki a tautolu ki a Iehova, fakatātā e fakaalofa fakamatakainaga, ti nakai fakaatukehe foki he taute pauaki e agahala ia. To “moua ai e tautolu e fakamalolo ki mua he Atua” he liogi, mo e to tali mai a ia ki a tautolu ha kua omaoma a tautolu ke he tau poaki haana.

Ne Agahala a Lautolu ke he Agaaga

7. Ko e heigoa ka fifili kua fakamagalo e agahala po ke nakai?

⁷ Ko e heigoa e tau agahala ka nakai fakamagalo? Ke tali e hūhū nei, kia kikite a tautolu ke he falu fakafifitakiaga he Tohi Tapu. Lata e mena nei ke fakamafanatia ki a tautolu kaeke kua tokihala mooli ka kua tupetupe lahi mahaki agaia ha ko e ha tautolu a tau hehē kelea muitui. To mailoga e tautolu kua nakai ni fakavē hokoia ke he puhala agahala ne taute he tagata, ka e fakavē ke he fatuakiloto, tuaga he loto, mo e ke he laulahi ne taute pauaki ai ka fifili ke fakamagalo e agahala po ke nakai.

8. Agahala fēfē e falu takitaki lotu faka-Iutaia he senetenari fakamua ke he agaaga tapu?

⁸ Ko e tau takitaki lotu faka-Iutaia ne totoko vevela ki a Iesu Keriso ne agahala ke he agaaga tapu. Ne kitia e lautolu e agaaga he Atua hane gahuahua ia Iesu he taute e ia e tau mana ne fakaheke a Iehova. Pete ia, ne tukuage he tau fī nei he Keriso e malolō ia ki a Satani ko e Tiapolo. Hagaao ki a Iesu, ko lautolu ne vagahau kelea ke he agaaga tapu he Atua kua eke e lautolu e agahala ne nakai fai fakamagaloaga “ke he mouiaga nai, po ke mouiaga ne tatali.”​—Mataio 12:22-32.

9. Ko e heigoa e vagahau kelea, ti ko e heigoa ne talahau e Iesu hagaao ki ai?

⁹ Ko e vagahau kelea ko e vagahau pikopiko, moumou, po ke ekefakakelea. Ko e Atua e Punaaga he agaaga tapu, ke vagahau totoko mogoia ke he agaaga tapu haana kua tatai mo e vagahau totoko ki a Iehova. Ti ke vagahau pihia mo e nakai tokihala ka nakai moua e fakamagaloaga. Ko e tau kupu ha Iesu hagaao ke he agahala pihia ne fakakite kua tuhi atu a Ia ki a lautolu ne totoko pauaki e gahuahuaaga he agaaga tapu he Atua. Ha ko e agaaga ha Iehova hane gahuahua ia Iesu ka e tukuage ni he tau tagata totoko haana e malolō nei ke he Tiapolo ati agahala a lautolu he vagahau kelea ke he agaaga. Ti pehē a Iesu: “Ko e tagata ne vagahau kelea ke he [a]gaga [t]apu, nakai fakai ke moua e ia e fakamagaloaga tukulagi; ka e lata ni kia ia e fakahala tukulagi.”​—Mareko 3:20-29.

10. Ko e ha ne ui e Iesu a Iuta “ko e tagata he malaia hokoia”?

¹⁰ Mailoga foki e mena ne tupu ki a Iuta Isakariota. Ne tutuli e ia e puhala nakai fakamooli, he kaiha mai he puha tupe ne age ke leveki e ia. (Ioane 12:5, 6) Magaaho fakamui ne finatu a Iuta ke he tau takitaki Iutaia mo e pulega ke afo a Iesu ma e 30 e tupe ario. E, ne lahi e momoko ha Iuta he mole e afo, ka e nakai tokihala a ia ha ko e agahala ne taute pauaki e ia. Ko e fua, ne nakai lata a Iuta ke moua e liu tu mai. Ati ui e Iesu a ia “ko e tagata he malaia hokoia.”​—Ioane 17:12; Mataio 26:14-16.

Ne Nakai Agahala a Lautolu ke he Agaaga

11-13. Agahala fēfē e Patuiki ko Tavita he fakafetui mo Patesepa, ti ko e heigoa e mafanatia ne moua mai he puhala ne fehagai e Atua mo laua?

¹¹ He falu magaaho, ko e tau Kerisiano ne talahau e tau agahala kelea muitui ha lautolu ti moua e lagomatai fakaagaaga mai he tau motua he fakapotopotoaga kua liga tupetupe agaia ha ko e tau agahala fakamua ke he fakatufono he Atua. (Iakopo 5:14) Kaeke kua tupetupe fakatagata a tautolu ke he puhala nei, liga to moua mooli e tautolu e aoga he manamanatu ke he  tau mena ne talahau he tau Tohiaga Tapu hagaao ki a lautolu ne kua fakamagalo e tau agahala.

¹² Ne agahala makimaki e Patuiki ko Tavita he fakafetui mo Patesepa, ko e hoana ha Uria. He kitia e fifine mata fulufuluola nei hane koukou he ono hifo a ia he tuafale haana ne tata ki ai, ne poaki e Tavita ke tamai e fifine ke he fale patuiki haana ti matutaki mo ia ke he mahani fakataane mo e fifine. He talahau fakamui kua fatu a ia, ne taute e Tavita e pulega ke fakamohe e fifine mo e haana taane, ko Uria, ke uufi aki e mahani feuaki. He kaumahala e lagatau ia, ne taute he patuiki a Uria ke mate he tauaga. He mole atu, ne eke a Patesepa mo hoana a Tavita ti fanau ki a ia e tama ti mate.​—2 Samuela 11:1-27.

¹³ Ne fakafehagai atu a Iehova ke he mena ne tupu ki a Tavita mo Patesepa. Ne fakamagalo he Atua a Tavita, kakano ha kua tokihala mo e he maveheaga ne taute mo ia ke he Kautu. (2 Samuela 7:11-16; 12:7-14) Ko Patesepa mogoia ne fakakite mooli e aga fakatokihala, ha kua monuina a ia ke eke mo matua fifine he Patuiki ko Solomona mo e tupuna ha Iesu Keriso. (Mataio 1:1, 6, 16) Kaeke ke agahala a tautolu, kua mitaki ke manatu kua mailoga e Iehova e aga fakatokihala ha tautolu.

14. Kitia fēfē e laulahi he fakamagalo he Atua ke he mena ne tupu ke he Patuiki ko Manase?

¹⁴ Ko e laulahi he fakamagalo ha Iehova kua kitia foki ke he mena ne tupu ke he Patuiki ko Manase i Iuta. Ne taute e ia e mahani kelea ki mua ha Iehova. Ne fakatutū hake e Manase e tau fatapoa ki a Paala, tapuaki “ke he tau kau oti he lagi,” ti ati foki e tau fatapoa ke he tau atua  pikopiko i loto he tau lotopā he tau faituga ne ua. Ne fakafano foki e ia haana fanau ki loto he afi, fakaohooho e tau gahua taulaatua, mo e fakamalolō e tau tagata i Iuta mo Ierusalema “ke eke e mahani ne mua he kelea ke he mahani he tau motu ne fakaotioti ai e Iehova ki mua he fanau a Isaraela.” Kua nakai omaoma ke he tau hatakiaga ne talahau he tau perofeta he Atua. Fakahiku, ne uta fakapaea he patuiki ha Asuria a Manase. He paeaaga ia, ne tokihala mo e liogi fakatokolalo tumau a Manase ke he Atua, ne fakamagalo a ia mo e liuaki a ia ke eke mo patuiki i Ierusalema, ne fakaohooho ai e ia e tapuaki mooli.​—2 Nofoaga he Tau Patuiki 33:2-17.

15. Ko e heigoa e mena ne tupu ke he moui he aposetolo ko Peteru ne fakakite na fakamagalo “fakalahi mai” a Iehova?

¹⁵ He tau senetenari fakamui, ne lahi ue atu e agahala he aposetolo ko Peteru he fakatikai a Iesu. (Mareko 14:30, 66-72) Pete ia, ne fakamagalo “fakalahi mai” e Iehova a Peteru. (Isaia 55:7) Ko e ha? Ha kua fakatokihala mooli a Peteru. (Luka 22:62) Ne kitia maaliali e fakamagalo he Atua he 50 e aho he mole ti hoko ke he aho he Penetekoso, ne kua monuina a Peteru ke fakamatala fakamalolō hagaao ki a Iesu. (Gahua 2:14-36) Kua fai kakano kia ke talitonu to nakai lahi e fakamagaloaga he Atua ke he tau Kerisiano tokihala mooli he vahā nei? “Ioha na e, ane mai tokaloto e koe e tau mahani hepehepe, po ko hai, ma Iki [Iehova] na e, ke maeke ke tu atu?” he lologo he salamo, “ka e ha ha ia koe ke fakamagalo e tau hala.”​—Salamo 130:3, 4.

Fakatote e Matakutaku Neke Agahala

16. I lalo he tau tutūaga fēfē ne foaki e Iehova e fakamagalo?

¹⁶ Kua lata ke lagomatai he tau fakafifitakiaga nā i luga ke fakatote hifo e fakaatukehe ha tautolu neke agahala ke he agaaga tapu. Ne fakakite mai kua fakamagalo mooli e Iehova e tau tagata agahala ne tokihala. Ko e mena aoga ne mua ko e liogi fakamakai ke he Atua. Kaeke ke agahala a tautolu, kua maeke ai ke ole ma e fakamagaloaga he fakavē ke he poa lukutoto ha Iesu, fakaalofa noa ha Iehova, nakai mitaki katoatoa ha tautolu, mo e fakamauaga he fekafekau tua  fakamooli ha tautolu. He iloa e fakaalofa totonu ha Iehova, ne maeke ia tautolu ke kumi e fakamagaloaga, he mauokafua to foaki mai.​—Efeso 1:7.

17. Ko e heigoa kua lata ke taute kaeke ke agahala a tautolu mo e manako ke lagomatai fakaagaaga?

¹⁷ Ka e kua kaeke ke agahala a tautolu ka e nakai maeke ke liogi ha kua taute he agahala ha tautolu a tautolu ke gagao fakaagaaga? Hagaao ke he mena nei, ne tohia he tutaki ko Iakopo: “Kia ui atu [e tagata pihia] ke he tau patu he ekalesia, kia liogi a lautolu mo ia, mo e fakatākai a ia ke he magalolo ke he higoa he Iki [Iehova]. To fakamoui e tagata gagao ke he liogi kua eke mo e tua, to fakatu foki he Iki [Iehova] a ia; kaeke foki kua hala a ia, to fakamagalo ai.”​—Iakopo 5:14, 15.

18. Ko e ha ne nakai kakano kua nakai fakamagalo e agahala he tagata ti pihia foki kaeke ke tuku a ia ki tua he fakapotopotoaga?

¹⁸ Pihia foki kaeke ke nakai tokihala e tagata ne hehē ti tuku a ia ki tua he fakapotopotoaga, ne nakai kakano e mena ia kua nakai maeke ke fakamagalo e agahala haana. Hagaao ke he tagata fakauku taute mena hehē ne tuku ki tua i Korinito, ne tohia e Paulo: “Tokai, neke eke foki ha mena ke he tagata ia, ko e fakahala hokoia ne fakahala ai a ia he tokologa. Ka ko e hanai, kia fakamagalo atu a mutolu mo e fakamafana atu ke he tagata na, neke mahala a ia ke he momoko kua lahi ue atu.” (2 Korinito 2:6-8; 1 Korinito 5:1-5) Ka e, ke liuaki fakaagaaga kua lata a ia ne hehē ke talia e lagomatai fakaagaaga ne fakavē ke he Tohi Tapu ne mai he tau motua Kerisiano mo e fakakite e tokihala mooli. Lata ke ‘fua mai ia lautolu e tau fua ke lata mo e tokihala.’​—Luka 3:8.

19. Ko e heigoa ka lagomatai a tautolu ke fakatumau ke “malolo ke he tua”?

¹⁹ Ko e heigoa kua liga lafi ke he logonaaga nukua agahala a tautolu ke he agaaga tapu? Liga ha kua molea e manamanatuaga po ke nakai malolō e tino. Ke he mena ia, kua liga lagomatai ke liogi mo e moua e okioki mitaki. Kua lata lahi mogoia ia tautolu ke ua toka a Satani ke fakalolelole a tautolu, neke fakaoti e fekafekau ha tautolu ke he Atua. Ha kua nakai fiafia a Iehova ke mamate a lautolu ne mahani kelea, ti mooli to nakai fiafia foki a ia ka galo taha he tau fekafekau haana. Ti kaeke ke matakutaku ha kua agahala a tautolu ke he agaaga, kua lata ia tautolu ke fagai tumau ke he Kupu he Atua, putoia e tau kupu mafanatia tuga he Tau Salamo. Lata ia tautolu ke ō tumau ke he tau feleveiaaga he fakapotopotoaga mo e fakalataha ke he gahua fakamatala he Kautu. He taute pihia ka lagomatai a tautolu ke “malolo ke he tua” mo e atāina mai he fakaatukehe neke taute e agahala ne nakai fai fakamagaloaga.​—Tito 2:2.

20. Ko e heigoa e tau kakano ka lagomatai e tagata ke iloa kua nakai agahala a ia ke he agaaga tapu?

²⁰ Ko e ha tagata ne matakutaku kua agahala a lautolu ke he agaaga tapu ka liga hūhū hifo: ‘Kua vagahau kelea kia a au ke he agaaga tapu? Kua tokihala mooli kia au ke he agahala haaku? Kua tua nakai au ke he fakamagaloaga he Atua? Ko au kia ko e tagata tiaki taofiaga ne tiaki e maama fakaagaaga?’ Liga ni, to mailoga he tau tagata pihia kua nakai vagahau kelea a lautolu ke he agaaga tapu he Atua, po kua eke mo tau tagata tiaki taofiaga. Ne tokihala a lautolu, mo e ha ha ia lautolu e tua tukumalagi ke he fakamagaloaga ha Iehova. Kaeke ke pihia, kua nakai agahala a lautolu ke he agaaga tapu ha Iehova.

21. Ko e heigoa e tau hūhū ka fehagai ki ai e vala tala ka mui mai?

²¹ Ko e monuina ha ia ke iloa mooli kua nakai agahala a tautolu ke he agaaga tapu! Ka e hagaao ke he matakupu nei, kua ha ha i ai e tau hūhū ka fakatutala ki ai he vala tala ka mui mai. Ke tuga anei, liga hūhū hifo a tautolu: ‘Kua takitaki mooli kia he agaaga tapu he Atua au? Kua kitia mooli kia e tau fua he agaaga tapu ke he moui haaku?’

Ko e Heigoa e Tali Haau?

• Ko e ha kua talahau e tautolu kua maeke ke agahala ke he agaaga tapu?

• Ko e heigoa e kakano ke tokihala?

• Ko hai ne agahala ke he agaaga he nofo a Iesu he lalolagi?

• Maeke fēfē ke kautū mai he fakaatukehe neke taute e agahala ne nakai fai fakamagaloaga?

[Tau Hūhū he Fakaakoaga]

[Fakatino he lau 5]

Ko lautolu ne talahau na taute e Iesu e tau mana ha ko e malolō ha Satani ne agahala ke he agaaga tapu he Atua

[Fakatino he lau 6]

Pete he fakatikai e ia a Iesu, ne nakai taute e Peteru e agahala ne nakai fai fakamagaloaga